Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Disiembre 2013

‘Saan Koma a Sidadaras a Magunggon ti Kinasimbengyo’!

‘Saan Koma a Sidadaras a Magunggon ti Kinasimbengyo’!

“Kakabsat, . . . kiddawenmi kadakayo a saankay koma a sidadaras a magunggon manipud kinasimbengyo.”—2 TES. 2:1, 2.

1, 2. Apay a nakasaksaknap ita ti panangallilaw, ken ania ti sumagmamano a kita ti panangallilaw? (Kitaen ti ladawan iti rugi ti artikulo.)

GAGANGAY ita ti panangsaur ken panangallilaw. Ngem ditay pakasdaawan daytoy ta dakamaten ti Biblia a ni Satanas a Diablo ket eksperto a mangallilaw, ken isu ti agturay iti daytoy a lubong. (1 Tim. 2:14; 1 Juan 5:19) Bayat nga umas-asideg ti panungpalan daytoy dakes a sistema, kumarkaro met ti pungtot ni Satanas gapu ta “ababan ti [nabatbati a] periodo ti tiempona.” (Apoc. 12:12) Di pakasdaawan a dagidiay im-impluensiaan ti Diablo ket kumarkaro met ti panangallilawda, a ti kangrunaan a puntiriada ket dagiti agdaydayaw ken Jehova.

2 No dadduma maitamtampok iti media dagiti pammadakes ken makariro nga impormasion maipapan kadagiti adipen ni Jehova ken kadagiti patpatienda. Dagiti headline iti diario, dagiti dokumentario iti telebision, ken dagiti Website ket maus-usar a mangisaknap kadagita a kinaulbod. Gapu iti dayta, adda dagidiay maallilaw, a mamatida lattan kadagita a kinaulbod.

3. Ania ti makatulong tapno saantayo a maallilaw?

3 Imbag laengen ta adda kadatayo ti Sao ti Dios a “makagunggona . . . iti panangpalinteg iti bambanag” a mangsalaknib kadatayo maibusor kadagiti nasikap a taktika ti kabusortayo. (2 Tim. 3:16) Nasayaat ngarud nga usigentayo ti kinuna ni apostol Pablo maipapan iti dadduma a Kristiano idiay Tesalonica idi umuna a siglo a nayaw-awan gapu ta namatida iti kinaulbod. Imbalakadna a ‘saan koma a sidadaras a magunggon ti kinasimbengda.’ (2 Tes. 2:1, 2) Ania dagiti maadaltayo iti naayat a balakad ni Pablo, ken kasano a mayaplikartayo dagitoy?

 DAGITI NAINTIEMPUAN A PAKDAAR

4. Kasano a napakdaaran dagiti Kristiano a taga-Tesalonica maipapan iti um-umay nga “aldaw ni Jehova”? Kasanotayo met a mapakpakdaaran ita?

4 Iti umuna a surat ni Pablo iti kongregasion idiay Tesalonica, impalagipna ti iyaay ti “aldaw ni Jehova.” Saanna a kayat nga adda iti kinasipnget dagiti Kristiano ken dida nakasagana. Isu nga imparegtana kadakuada a, kas “annak ti lawag,” ‘agtalinaedda koma a siririing ken sipupuot.’ (Basaen ti 1 Tesalonica 5:1-6.) Iti agdama, ur-urayentayo a madadael ti Babilonia a Dakkel, ti sangalubongan nga imperio ti palso a relihion. Daytanto ti pangrugian ti dakkel nga aldaw ni Jehova. Agyamantayo ta lumawlawag ti pannakatarustayo iti panangibanag ni Jehova iti panggepna. Kasta met, babaen ti kongregasion, regular a maipapaayantayo kadagiti palagip a tumulong kadatayo nga agtalinaed a sipupuot. No ipangagtayo dagitoy a maulit-ulit a pakdaar, bumileg ti determinasiontayo nga agserbi iti Dios ‘buyogen ti pannakabalin nga agrason.’—Roma 12:1.

Dagiti surat ni Pablo naglaonda kadagiti naintiempuan a pakdaar para kadagiti Kristiano (Kitaen ti parapo 4, 5)

5, 6. (a) Ania ti dinakamat ni Pablo iti maikadua a suratna kadagiti taga-Tesalonica? (b) Ania ti asidegen nga aramiden ti Dios babaen ken Jesus, ken ania ti rumbeng nga isaludsodtayo iti bagitayo?

5 Iti maikadua a surat ni Pablo kadagiti Kristiano a taga-Tesalonica, dinakamatna ti maipapan iti dumteng a rigat inton ipakat ni Apo Jesus ti panangukom ni Jehova “kadagidiay saan a makaammo iti Dios ken kadagidiay saan nga agtulnog iti naimbag a damag.” (2 Tes. 1:6-8) Iti kapitulo 2 daytoy a surat, nadakamat a ‘madandanagan’ ti sumagmamano a kameng dayta a kongregasion maipapan iti aldaw ni Jehova nga uray la impagarupda nga asideg idin a dumteng dayta. (Basaen ti 2 Tesalonica 2:1, 2.) Limitado laeng idi ti pannakatarus dagidiay a Kristiano maipapan iti pannakaibanag ti panggep ni Jehova. Binigbig dayta ni Pablo idi kinunana: “Addaantayo iti sangkapaset a pannakaammo ken agipadtotayo iti sangkapaset; ngem inton dumteng daydiay naan-anay, daydiay sangkapaset mapukawto.” (1 Cor. 13:9, 10) Ngem agtalinaed a natibker ti pammatida no ipangagda dagiti naipaltiing a pakdaar nga insurat ni Pablo, ni apostol Pedro, ken ti dadduma pay a matalek a napulotan a Kristiano.

6 Tapno maatur ti pannakaawatda, pinaltiingan ti Dios ni Pablo a mangilawlawag a tumaudto ti dakkel a panagapostasia ken “ti tao ti kinakillo” sakbay ti aldaw ni Jehova. * Ket  iti inkeddengna a tiempo, ‘pukawento’ ni Apo Jesus “daydiay nakillo” ken dagiti amin a naallilawna. Dinakamat ti apostol no apay a maukom dagitoy—gapu ta “saanda nga inawat ti ayat iti kinapudno.” (2 Tes. 2:3, 8-10) Nasayaat ngarud nga isaludsodtayo iti bagitayo: ‘Kasano kauneg ti panagayatko iti kinapudno? Ikagkagumaak kadi nga ammuen ti kabaruan a lawag a maipabpablaak iti daytoy a magasin ken iti dadduma pay a publikasion a naibatay iti Biblia nga agpaay iti ili ti Dios iti intero a lubong?’

NAINSIRIBAN A PILIENTAYO DAGITI KAKADUATAYO

7, 8. (a) Ania dagiti peggad a nakaipasanguan dagiti nagkauna a Kristiano? (b) Ania ti nangnangruna a pagannadan ita dagiti pudno a Kristiano?

7 Malaksid kadagiti apostata ken dagiti sursuroda, adda pay sabali a peggad a pakaipaspasanguan dagiti Kristiano. Insurat ni Pablo ken ni Timoteo a “ti ayat iti kuarta isu ti ramut dagiti amin a kita ti makadangran a bambanag.” Inlawlawag ti apostol a “babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.” (1 Tim. 6:10) Kanayon met a nasken a sarangten dagiti Kristiano “dagiti aramid ti lasag.”—Gal. 5:19-21.

8 Nupay kasta, sigaganetget a pinakdaaran ni Pablo dagiti taga-Tesalonica maipapan iti peggad a patauden dagidiay inawaganna iti ‘ulbod nga apostol.’ Dadduma kadakuada ket agsasao iti “tiritir a bambanag tapno iyadayoda a pasuroten kadakuada dagiti adalan.” (2 Cor. 11:4, 13; Ara. 20:30) Kinomendaran ni Jesus idi agangay ti kongregasion ti Efeso gapu ta saanda a pinanuynoyan dagiti “dakes a tattao.” ‘Sinubokda’ dagiti indibidual a maibilang nga ulbod nga apostol. (Apoc. 2:2) Imbalakad ni Pablo iti maikadua a suratna kadagiti taga-Tesalonica: “Ita ipaayandakayo kadagiti bilin, kakabsat, iti nagan ni Apo Jesu-Kristo, nga adaywanyo ti tunggal kabsat a magmagna a nakagulgulo.” Kalpasanna, espesipiko a dinakamatna nga adda dagiti Kristiano a “saan[da] a kayat ti agtrabaho.” (2 Tes. 3:6, 10) No dagitoy ket naibilang a nakagulgulo, nakarkaro pay dagidiay agturturong iti apostasia! Wen, no kasano a nakapegpeggad ken masapul a liklikan idi ti nasinged a pannakikadua iti kakasta nga indibidual, masapul met a kasta ti aramidentayo ita.—Prov. 13:20.

9. Apay a masapul nga agannadtayo iti asinoman a mangar-aramid kadagiti espekulasion wenno panangkritikar?

9 Asidegen ti dakkel a rigat ken ti panungpalan daytoy dakes a sistema, isu nga ad-adda koma ita nga ipangagtayo dagiti naipaltiing a pammakdaar a naipaay idi umuna a siglo. Ditay la ketdi kayat a sayangen ti “panggep” ti di kaikarian a kinamanangngaasi ni Jehova ken ti namnamatayo a biag nga agnanayon, idiay man langit wenno ditoy daga. (2 Cor. 6:1) Masapul nga agannadtayo iti asinoman a tumabtabuno kadagiti gimongtayo a makisarsarita maipapan kadagiti espekulasion wenno panangkritikarna.—2 Tes. 3:13-15.

“TAGINAYONENYO TI PANANGPETPETYO KADAGITI TRADISION”

10. Ania dagiti tradision a naidagadag a salimetmetan dagiti Kristiano a taga-Tesalonica?

10 Imparegta ni Pablo kadagiti Kristiano a taga-Tesalonica nga ‘agtakderda a sititibker’ ken salimetmetanda no ania ti nasursuroda. (Basaen ti 2 Tesalonica 2:15.) Ania dagiti “tradision” a naisuro kadakuada? Sigurado a saan a dagiti tradision a salsalimetmetan ken itantandudo ti palso a relihion a kas ket ‘tay naggapu dagita iti Kasuratan. Ti tuktukoyen ni Pablo ket dagiti sursuro nga impaay ni Jesus kenkuana ken iti sabsabali; kasta met dagiti impaisurat kenkuana ti Dios, a kaaduan kadagita ti nagbalin a paset ti naipaltiing a Kasuratan. Kinomendaran ni Pablo dagiti kakabsat iti kongregasion idiay Corinto agsipud ta, sigun kenkuana, “iti amin a bambanag silalagipkayo kaniak ket petpetpetanyo a siiirut dagiti tradision kas inyawatko ida kadakayo.” (1 Cor. 11:2) Mapangnamnamaan  ti gubuayan dagita a sursuro isu a mapagtalkan dagita.

11. Ania ti mabalin a mapasamak iti dadduma no maallilawda?

11 Idi nagsurat ni Pablo kadagiti Hebreo a Kristiano, dinakamatna ti dua a pamay-an a mabalin a pakapukawan ti maysa a Kristiano iti pammatina ket saanen a makapagtakder a sititibker. (Basaen ti Hebreo 2:1; 3:12.) Dinakamatna ti ‘pannakayayus’ ken ‘iyaadayo.’ Ti maysa a bangka ket mabalin nga in-inut a mayayus ken mayadayo manipud iti takdang. Ngem mabalin met nga igagara ti maysa nga iduron ti bangkana tapno umadayo manipud iti takdang. Ipakita dagitoy a dua a pagarigan ti mabalin a mapasamak iti dadduma no ipalubosda a maallilawda ken kumapuy ti panagtalekda iti kinapudno.

12. Ania dagiti mabalin a mangdadael ita iti espiritualidadtayo?

12 Mabalin a kasta ti napasamak iti dadduma a taga-Tesalonica. Posible met kadi a mapasamak dayta ita? Nagadu ti mabalin a pakaibusan ti panawentayo. Panunotem ti kaadu ti oras a mabusbos iti kanayon a pannaki-chat iti social network, panagbasa ken panangsungbat iti elektroniko a mensahe, panangaramid kadagiti aktibidad a pagpalabasan laeng iti tiempo, wenno kanayon a panangkita iti kabaruan a damdamag iti isports. Mabalin a makasinga ti aniaman kadagitoy iti maysa a Kristiano ken pabaawenda ti regtana. Ania ti resultana? Mabalin nga awanton ti tiempona nga agkararag a naimpusuan, agadal iti Sao ti Dios, makigimong, ken mangikasaba iti naimbag a damag. Ania ti maaramidantayo tapno saan a ‘sidadaras a magunggon ti kinasimbengtayo’?

PROTEKSION TAPNO SAANTAYO A “MAGUNGGON”

13. Kas naipadto, ania ti kababalin ti kaaduan ita? Ania ti makatulong tapno masaluadantayo ti pammatitayo?

13 Laglagipentay koma nga asidegen ti panungpalan ti lubong ni Satanas ken napeggad ti pannakikadkadua kadagiti di mamati nga agbibiagtayon iti ‘maudi nga al-aldaw.’ Insurat ni apostol Pedro maipapan iti panawentayo: “Umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’” (2 Ped. 3:3, 4) Ti inaldaw a panangbasa ken regular a panangadal iti Sao ti Dios matulongannatayo a kanayon a silalagip nga addatayon iti ‘maudi nga al-aldaw.’ Nabayagen a nagparang ti naipadto a panagapostasia ken agtultuloy dayta agingga ita. Adda pay laeng ita “ti tao ti kinakillo” ken busbusorenna dagiti adipen ti Dios. Masapul ngarud nga agtalinaedtayo nga alerto ta nakaas-asidegen ti aldaw ni Jehova.—Sof. 1:7.

Ti nasayaat a panagsagana ken pannakiraman iti ministerio ket makatulong tapno saan a ‘sidadaras a magunggon ti kinasimbengtayo’ (Kitaen ti parapo 14, 15)

14. Kasano a maysa a proteksion ti panagbalin nga okupado iti panagserbi iti Dios?

14 Ti kangrunaan a pamay-an tapno agtalinaedtayo nga alerto ken saan a magunggon ti kinasimbengtayo ket ti regular a panangikasaba iti naimbag a damag ti Pagarian. Isu nga idi imbilin ni Kristo-Jesus, ti Ulo ti kongregasion, a mangaramid dagiti pasurotna iti ad-adalan a tattao iti amin a nasion ken isuroda ida a tungpalenda ti amin a bambanag nga insurona, mangipapaay iti balakad a mangsalaknib kadagiti pasurotna. (Mat. 28:19, 20) Tapno matungpaltay ti bilinna, nasken nga agbalintayo a naregta iti trabaho a panangasaba. Panagkunam, basta la ngata nangaskasaba ken nangisursuro idi dagiti kakabsat idiay Tesalonica gapu laeng ta obligasionda dayta? Lagipem ti kinuna ni Pablo kadakuada: “Dikay iddepen ti apuy ti espiritu. Dikay umsien dagiti panagipadto.” (1 Tes. 5:19, 20) Anian a makapagagar dagiti padto nga iyad-adaltayo ken iranranudtayo kadagiti sabsabali!

15. Ania a bambanag ti mabalinyo nga usigen iti panagdaydayawyo kas pamilia?

 15 Nasayaat ngarud no tulongantayo dagiti kameng ti pamiliatayo nga agbalin a nalaing iti ministerio. Tapno maaramidanda dayta, iramraman ti adu a kakabsat iti panagdaydayawda kas pamilia ti panagpraktis para iti ministerio. Mabalin a nakitam a makatulong met no pagsasaritaan dagiti miembro ti pamilia no kasano a sublian dagiti nangipakita iti interes. Ania ti mabalin nga ibagada iti sumaruno nga isasarungkarda? Ania dagiti topiko a nalabit mangparayray iti interes dagiti masarungkaran? Kaano ti kasayaatan a tiempo nga isasarungkar? Bayat ti panagdaydayaw ti pamiliada, adu met dagidiay mangadal kadagiti material para iti sumaganad a gimong tapno makapagsaganada kadagiti punto a mausig. Mabalinmo kadi a nayonan ti panagreggetmo nga agsagana tapno makapagkomentoka? Ti pannakipartisiparmo mapabilegna ti pammatim ket matulongannaka tapno saan a magunggon ti kinasimbengmo. (Sal. 35:18) Wen, ti pannakiraman iti panagdaydayaw ti pamilia ket proteksion manipud iti aniaman nga espekulasion ken panagduadua.

16. Ania ti pakagutugotan dagiti napulotan a Kristiano nga agtalinaed a nasimbeng?

16 Iti panaglabas ti panawen, tinulongan ni Jehova ti ilina a maaddaan iti nalawag a pannakaawat kadagiti padto ti Biblia. No utobentayo dagita, bumileg ti panagtalektayo a matungpal met ti nakaskasdaaw a gunggona nga agur-uray kadatayo. Dagiti napulotan addaanda iti nadayag a namnama a makikadua ken Kristo idiay langit. Dayta ti pakagutugotanda nga agtalinaed a nasimbeng! Maikunatayo kadakuada ti insurat ni Pablo kadagiti taga-Tesalonica: “Pagrebbenganmi ti agyaman a kankanayon iti Dios maipaay kadakayo, kakabsat nga ay-ayaten ni Jehova, agsipud ta pinilinakayo ti Dios . . . babaen ti panangsantipikar kadakayo iti espiritu ken babaen ti pammatiyo iti kinapudno.”—2 Tes. 2:13.

17. Ania a pammaregta ti masarakam iti 2 Tesalonica 3:1-5?

17 Masapul met nga agregget dagidiay addaan namnama nga agbiag nga agnanayon ditoy daga tapno ‘saan a magunggon ti kinasimbengda.’ No maysaka kadakuada, ipapusom koma ti naayat a pammaregta nga insurat ni Pablo kadagiti padana a napulotan a Kristiano idiay Tesalonica. (Basaen ti 2 Tesalonica 3:1-5.) Naimpusuan koma nga apresiarentayo dayta a naayat a balakad. Wen, dagiti surat kadagiti taga-Tesalonica ket agserbi a pakdaar kadatayo maibusor kadagiti espekulasion wenno mapagduaduaan nga ideya. Yantangay asidegen ti panungpalan, agyamyamantayo unay kadagitoy a pakdaar.

^ par. 6 Kas mabasatayo iti Aramid 20:29, 30, kinuna ni Pablo nga iti uneg a mismo dagiti kongregasion, “tumakderto dagiti tattao ket agsaodanto iti tiritir a bambanag tapno iyadayoda a pasuroten kadakuada dagiti adalan.” Patalgedan ti historia nga idi agangay, timmaud dagiti klero a maibilang a natantan-ok ngem kadagiti ordinario a miembro. Idi maikatlo a siglo C.E., nagminaren no siasino “ti tao ti kinakillo”—ti grupo dagiti klero ti Kakristianuan.—Kitaen Ti Pagwanawanan, Pebrero 1, 1990, panid 10-14.