Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2013

Makapagsakripisioka Kadi Maipaay iti Pagarian?

Makapagsakripisioka Kadi Maipaay iti Pagarian?

“Ti Dios ayatenna ti naragsak a manangited.”—2 COR. 9:7.

1. Ania a kita ti panagsakripisio ti ar-aramiden ti adu a tattao, ken apay?

SITUTULOK nga agsakripisio ti maysa a tao para iti bambanag a napateg kenkuana. Ipaay dagiti nagannak ti tiempo, kuarta, ken pigsada para iti pagimbagan dagiti annakda. Dagiti agtutubo nga atleta a mayat a mangibagi iti pagilianda iti Olympics ket adu nga oras nga agprakpraktis iti inaldaw idinto ta agaayam ken agraragsak dagiti padada nga agtutubo. Nagsakripisio met ni Jesus para iti bambanag a napateg kenkuana. Saan a nagsapul iti nanam-ay a biag, ken saan met a nagpamilia. Imbes ketdi, impamaysana ti biagna kadagiti interes ti Pagarian. (Mat. 4:17; Luc. 9:58) Adu met ti insakripisio dagiti pasurotna tapno masuportaranda ti Pagarian ti Dios gapu ta dayta ti kapatgan kadakuada. (Mat. 4:18-22; 19:27) Gapuna, mabalin nga isaludsodtayo iti bagitayo, ‘Ania ti napateg iti biagko?’

2. (a) Ania dagiti panagsakripisio nga ar-aramiden ti amin a pudno a Kristiano? (b) Ania a kanayonan a panagsakripisio ti ar-aramiden ti dadduma?

2 Adda dagiti panagsakripisio a kasapulan nga aramiden ti amin a pudno a Kristiano. Napateg dagita iti panangpatanor ken panangtaginayontayo iti nasayaat a relasiontayo ken Jehova. Karaman kadagita ti panangipaay iti panawen ken pigsa para iti panagkararag, panagbasa iti Biblia, panagdaydayaw ti pamilia, pannakigimong, ken panangasaba. * (Jos. 1:8; Mat. 28:19, 20; Heb. 10:24, 25) Gapu iti panagreggettayo ken bendision ni Jehova, napartak ti trabaho a panangasaba, ken adu ti agturturong iti “bantay ti balay ni Jehova.” (Isa. 2:2) Tapno masuportaranda dagiti aktibidad ti Pagarian, adu ti agsaksakripisio nga agserbi iti Bethel, tumulong a mangibangon kadagiti Kingdom Hall ken Assembly Hall,  mangorganisar kadagiti kombension, wenno sumaranay kadagiti apektado iti didigra. Nupay saan a makalikaguman dagitoy a trabaho iti pananggun-od iti biag, napategda iti pannakasuporta dagiti interes ti Pagarian.

3. (a) Kasanotayo a magunggonaan no agsakripisiotayo para iti Pagarian? (b) Ania dagiti saludsod a rumbeng nga usigentayo?

3 Ad-adda a kasapulan ita ti aktibo a panangsuporta iti Pagarian. Makaparagsak a makita ti adu a situtulok nga agsaksakripisio para ken Jehova. (Basaen ti Salmo 54:6.) Ti kasta a kinaparabur ket mangipapaay iti dakkel a rag-o kadatayo bayat nga ur-urayentayo ti iyaay ti Pagarian ti Dios. (Deut. 16:15; Ara. 20:35) Ngem masapul nga usigentayo ti bagbagitayo. Mabalintay kadi a nayonan ti panagsakripisiotayo para iti Pagarian? Kasanotayo nga us-usaren ti tiempo, kuarta, pigsa, ken dagiti abilidadtayo? Ania dagiti rumbeng a pagannadantayo? Repasuentayo ti maysa nga ulidan a nasayaat a tuladen mainaig iti panangipaay iti boluntario a sakripisio, iti kasta dakdakkel ti rag-otayo.

DAGITI SAKRIPISIO ITI NAGKAUNA NGA ISRAEL

4. Kasano a nagunggonaan dagiti Israelita iti panagdatonda?

4 Masapul nga agdaton idi dagiti nagkauna nga Israelita tapno mapakawan dagiti basolda. Napateg daytoy tapno magun-od dagiti umili ti pabor ni Jehova. Adda dagiti daton a kalikaguman ti Linteg, ken adda met dagiti boluntario a daton. (Lev. 23:37, 38) Mabalin a maipaay kas boluntario a daton dagiti sibubukel a daton a mapuoran, wenno sagut, agpaay ken Jehova. Ti maysa a naisangsangayan a pannakaipaay dagiti daton ket idi inagurasion ti templo ni Solomon.—2 Cron. 7:4-6.

5. Ania nga urnos ti inaramid ni Jehova para kadagiti napanglaw?

5 Maawatan ni Jehova a saan nga agpapada ti maipaay ti tunggal maysa, ket kalikagumanna laeng no ania ti kabaelantayo. Sigun iti linteg ni Jehova, masapul a mangidaton dagiti Israelita kadagiti animal ken masapul nga iparukpokda ti darana. Dagitoy a daton ket “anniniwan ti naimbag a bambanag nga umay” babaen ken Jesus nga Anakna. (Heb. 10:1-4) Ngem, nainkalintegan ni Jehova iti panangipaalagadna iti dayta a linteg. Kas pagarigan, awatenna dagiti pagaw kas daton no ti maysa saanna a kabaelan ti karnero wenno kalding. Gapuna, siraragsak a makapagdaton ken Jehova uray dagiti napanglaw. (Lev. 1:3, 10, 14; 5:7) Nupay nagduduma  nga animal ti mabalin nga idaton, adda dua a banag a nakalikaguman iti tunggal maysa a mangipapaay iti boluntario a daton.

6. Ania dagiti nakalikaguman iti asinoman a mangipaay iti daton? Kasano kapateg ti panangsurotna kadagita?

6 Umuna, rebbeng nga ipaay ti agdaton ti kasayaatan nga adda kenkuana. Imbaga ni Jehova kadagiti Israelita a rumbeng a nasalun-at ti idatonda tapno awatenna dayta. (Lev. 22:18-20) No adda depekto ti animal a maidaton, saan nga awaten ni Jehova. Maikadua, ti agdaton ket masapul a nadalus ken di namulitan. No narugit ti kasasaadna, masapul a mangipaay iti daton gapu iti basol wenno daton gapu iti babak tapno maisubli ti nadalus a takderna iti imatang ni Jehova sakbay a mangipaay iti boluntario a daton. (Lev. 5:5, 6, 15) Serioso daytoy a banag. Imbilin ni Jehova a mapapatay ti asinoman a saan a nadalus a mangan iti pakikaykaysa a sakripisio, a pakairamanan dagiti boluntario a daton. (Lev. 7:20, 21) Ngem no ti agidaton ket nadalus iti imatang ni Jehova ken awan depekto ti datonna, agbanag dayta iti dakkel a rag-o kenkuana.—Basaen ti 1 Cronicas 29:9.

DAGITI SAKRIPISIO A MAIPAPAAY ITA

7, 8. (a) Ania a rag-o ti sagsagrapen ti adu nga agsaksakripisio para iti Pagarian? (b) Ania a bambanag ti mabalintayo nga isakripisio ken Jehova?

7 Adu met ita ti mayat nga agserbi a naan-anay ken Jehova, ket maragsakan ni Jehova iti dayta. Mangyeg iti rag-o ti itutulong kadagiti kakabsattayo. Saan a mailadawan ti maysa a kabsat ti rag-ona manipud itutulongna nga agibangon iti Kingdom Hall ken mangsaranay kadagiti biktima ti natural a kalamidad. Kunana, “No makitak a naragsak ken agyamyaman dagiti lokal a kakabsat inton naibangonen ti baro a Kingdom Hall-da wenno no makaawatda iti tulong kalpasan ti kalamidad, mabigbigko a saan a sayang ti bannog ken panagreggetko.”

Adu idi ti maipapaay kas boluntario a daton, kas kadagiti sakripisio nga ipapaaytayo ita (Kitaen ti parapo 7-13)

8 Ti organisasion ita ni Jehova ket kanayon nga agbirbirok iti oportunidad a mangsuporta iti trabaho ni Jehova. Idi 1904, insurat ni Kabsat C. T. Russell: “Ibilang ti tunggal maysa ti bagina kas dinutokan ti Apo a mangusar iti bukodna a tiempo, impluensia, kuarta, kdpy., ket ikagumaan koma ti tunggal maysa a naan-anay nga usaren dagitoy agpaay a pakaidayawan ti Apo.” Nupay adda dagiti banag nga isaksakripisiotayo ken Jehova, dagita met ti mangipapaay  kadatayo iti adu a bendision. (2 Sam. 24:21-24) Mausartayo kadi iti nasaysayaat pay a pamay-an ti bambanag nga ik-ikutantayo para ken Jehova?

Dagiti kameng ti pamilia ti Bethel iti Australia

9. Mainaig iti panangusar iti tiempo, ania a prinsipio ti maadaltayo iti Lucas 10:2-4?

9 Ti tiempotayo. Adu a tiempo ken panagregget ti kasapulan iti pannakaipatarus ken pannakayimprenta dagiti literaturatayo, pannakaibangon dagiti Kingdom Hall ken Assembly Hall, pannakaorganisar dagiti kombension, panangsaranay kadagiti biktima ti kalamidad, ken dadduma pay a napapateg nga aktibidad. Limitado laeng ti orastayo iti agmalem. Ngem inikkannatay ni Jesus iti prinsipio a makatulong kadatayo. Idi imbaonna dagiti adalanna a mapan mangasaba, imbagana kadakuada a dida “arakupen ti asinoman iti dalan kas panangkablaaw.” (Luc. 10:2-4) Apay nga imbilin dayta ni Jesus? Kuna ti maysa nga eskolar ti Biblia: “Kadagiti taga-Daya, saan nga apagbiit a panagtamed wenno panaginnalamano ti kablaawda, no di ket ramanenna ti adu nga innarakup, panagdumog, ken panagrukob pay ketdi. Mangibus dagita iti tiempo.” Saan nga iparparegta ni Jesus kadagiti pasurotna ti kinaawan respeto. Imbes ketdi, ipagpaganetgetna a limitado laeng ti tiempoda ken kasapulan nga usarenda dayta iti napatpateg a bambanag. (Efe. 5:16) Mabalin kadi a mayaplikartayo daytoy a prinsipio tapno ad-adu ti tiempotayo para iti Pagarian?

Dagiti agibumbunannag iti Pagarian iti maysa a Kingdom Hall iti Kenya, Africa

10, 11. (a) Kadagiti ania a pamay-an a maus-usar dagiti donasiontayo para iti sangalubongan a trabaho? (b) Ania a prinsipio iti 1 Corinto 16:1, 2 ti makatulong kadatayo?

10 Ti kuartatayo. Dakkel a pondo ti kasapulan tapno masuportaran dagiti aktibidad ti Pagarian. Iti kada tawen, minilion a doliar ti maus-usar para iti kasapulan dagiti agdaldaliasat a manangaywan, special pioneer, ken misionero. Nanipud 1999, nasurok a 24,500 a Kingdom Hall ti naibangon kadagiti napanglaw a pagilian. Nupay kasta, kasapulan pay ti agarup 6,400 a kanayonan a Kingdom Hall. Iti kada bulan, agarup 100 milion a kopia ti Pagwanawanan ken Agriingkayo! ti mayim-imprenta. Amin dagitoy ket masupsuportaran babaen kadagiti boluntario a donasionmo.

11 Nangipaay ni apostol Pablo iti prinsipio a suroten mainaig iti panangted iti donasion. (Basaen ti 1 Corinto 16:1, 2.) Pinaregtana dagiti kakabsat idiay Corinto a saanda nga urayen ti ngudo ti lawas sada kitaen no adda nabati nga idonarda. Imbes ketdi, ikeddengdan no mano ti idonarda iti rugi pay laeng ti lawas. Kas idi umuna a siglo, nasaksakbay met nga agplano dagiti kakabsat ita tapno sipaparabur a makapagdonarda sigun iti kabaelanda. (Luc. 21:1-4; Ara. 4:32-35) Tagipatgen ni Jehova ti kasta a kinamanagparabur.

Boluntario iti Regional Building Committee iti Tuxedo, New York, U.S.A.

12, 13. Apay nga agkedked dagiti dadduma a mangipaay iti pigsa ken abilidadda? Kasano a matulongan ida ni Jehova?

12 Ti pigsa ken abilidadtayo. Suportarannatayo ni Jehova iti panagreggettayo a mangusar iti pigsa ken abilidadtayo para iti trabaho ti Pagarian. Inkarina a tulongannatayo no mabannogtayo. (Isa. 40:29-31) Ibagatay kadi a saantay a kualipikado iti dayta a trabaho, ket irasontayo a mas kualipikado ti sabsabali? Laglagipentay koma a kabaelan ni Jehova a pasayaaten ti aniaman nga abilidadtayo, kas iti inaramidna kada Bezalel ken Oholiab.—Ex. 31:1-6; kitaen ti ladawan iti rugi ti artikulo.

13 Paregtaennatayo ni Jehova nga aramidentay ti amin a kabaelantayo ken ipaaytayo ti kasayaatan. (Prov. 3:27) Bayat ti pannakatarimaan ti templo, imbaga ni Jehova kadagiti Judio idiay Jerusalem nga utobenda ti maipapaayda a suporta iti dayta a trabaho. (Hag. 1:2-5) Gapu ta nasingada, saanen a dayta ti nakaipamaysaanda. No kasta, nasayaat  nga usigentayo no dagiti prioridadtayo ket maitunos met laeng kadagiti prioridad ni Jehova. Mabalintayo kadi nga ‘isaad ti pusotayo iti daldalantayo’ tapno ad-adda a masuportarantayo ti trabaho ti Pagarian kadagitoy maudi nga al-aldaw?

PANAGSAKRIPISIO SIGUN ITI KABAELANTAYO

14, 15. (a) Kasanotayo a maparegta iti ulidan dagiti napanglaw a kakabsattayo? (b) Ania koma ti tarigagayantay nga aramiden?

14 Adu a tattao ti agnanaed kadagiti lugar a narigat ti panagbiag. Ikagkagumaan ti organisasiontayo nga “anayan” ti pagkurkurangan dagiti kakabsattayo nga agnanaed kadagita a pagilian. (2 Cor. 8:14) Nupay kasta, maragsakan met a mangted uray dagiti nakurapay a kakabsat. Maay-ayo ni Jehova no siraragsak nga ipapaay dagitoy a kakabsat ti kabaelanda nga ited.—2 Cor. 9:7.

15 Iti maysa a nakapangpanglaw a pagilian iti Africa, adda kakabsat a nangilasin iti maysa a paset ti mulmulaanda a daga tapno idonarda iti trabaho ti Pagarian ti aniaman a paglakuanda iti maapitda. Iti dayta met laeng a pagilian, nayeskediul ti pannakaibangon ti maysa a Kingdom Hall. Kayat dagiti lokal a kakabsat ti tumulong ngem nairana met ti panagmumula. Gapu ta determinadoda a tumulong, nakipagtrabahoda iti panagbangon iti aldaw sa napanda nagmula kadagiti talonda iti rabii. Anian a kinamanagsakripisio! Ipalagip daytoy kadatayo dagiti kakabsat idiay Macedonia idi umuna a siglo. ‘Nakaro ti kinakurapayda,’ ngem impakaasida a maipaayanda iti pribilehio a tumulong iti agdama idi a proyekto. (2 Cor. 8:1-4) Kas kadakuada, ipaaytay met koma ken Jehova ti ‘mairukod iti pamendisionna kadatayo.’—Basaen ti Deuteronomio 16:17.

16. Kasanotayo a masigurado a maay-ayo ni Jehova kadagiti sakripisiotayo?

16 Ngem masapul nga agannadtayo. Kas kadagidi nagkauna nga Israelita, siguraduentayo koma a makaay-ayo iti Dios dagiti boluntario a sakripisiotayo. Masapul a balansetayo tapno saantay a mabaybay-an ti kapatgan a responsabilidadtayo iti pamiliatayo ken iti personal a panagdayawtayo ken Jehova. Ti panangipaaytayo iti tiempo ken sanikuatayo para iti sabsabali ket saan koma nga isu ti makagapu a mabaybay-antayo ti naespirituan ken pisikal a kasapulan ti pamiliatayo. Ta no kasta, arigna ipapaaytayo ti banag nga awan kadatayo. (Basaen ti 2 Corinto 8:12.) Masapul met a pagtalinaedentayo a nabileg ti bukodtayo nga espiritualidad. (1 Cor. 9:26, 27) Ngem mangnamnamatayo a no surotentayo dagiti pagalagadan ti Biblia, agsagraptayo iti dakkel a rag-o ken pannakapnek gapu kadagiti sakripisiotayo, ken ‘nangnangruna nga awaten’ dagita ni Jehova.

NAKAPATPATEG DAGITI SAKRIPISIOTAYO

17, 18. Ania ti makunatayo kadagiti amin nga agsaksakripisio para iti Pagarian? Ania ti rumbeng nga usigen ti tunggal maysa kadatayo?

17 Adu kadagiti kakabsattayo ti ‘maiparparukpok a kasla daton nga inumen’ bayat a supsuportaranda ti napapateg a trabaho ti Pagarian. (Fil. 2:17) Naimpusuan nga agyamantayo kadagidiay mangipakpakita iti kasta a kinamanagparabur. Makomendaran met ti kinaparabur ken kinamanagsakripisio dagiti assawa ken annak dagiti kakabsat a lallaki a mangidadaulo iti trabaho ti Pagarian.

18 Adu pay a trabaho ti kasapulan tapno masuportaran dagiti interes ti Pagarian. Ikararagtay koma ken utobentayo a naimbag no kasano a maipaaytayo ti kasayaatan ken Jehova. Masiguradom a mangyeg dayta kenka iti adu a gunggona ita ken ad-adunto pay iti “um-umay a sistema ti bambanag.”—Mar. 10:28-30.

^ par. 2 Kitaen ti artikulo a “Panangipaay iti Amin-Kararua a Sakripisio ken Jehova” iti Pagwanawanan nga Enero 15, 2012, panid 21-25.