Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) NOBIEMBRE 2013

Papastor, Tuladenyo Dagiti Naindaklan a Pastor

Papastor, Tuladenyo Dagiti Naindaklan a Pastor

“Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.”—1 PED. 2:21.

1, 2. (a) Ania ti resultana no maaywanan a naimbag dagiti karnero? (b) Idi kaaldawan ni Jesus, apay nga adu a tattao ti kasla karkarnero nga awanan pastor?

NASALUN-AT dagiti karnero no maseknan kadakuada ti pastorda. Sigun iti maysa a libro maipapan iti panagtaraken iti karnero, “no ibulos lattan ti maysa a pastor dagiti karnerona iti pagaraban sa baybay-anna ida, di agbayag kumapuy ken agsakitda.” Ngem no maaywananda a naimbag, nakaradkad ken nasalun-atda.

2 Pudno met dayta iti kongregasion. Ti kalidad ti panangaywan ken atension nga ipapaay dagiti Kristiano a papastor iti tunggal karnero ket adda epektona iti naespirituan a salun-at ti intero a kongregasion. Mabalin a malagipyo a naasian ni Jesus kadagiti tattao gapu ta “nalalatan ken naiwarawarada a kasla karkarnero nga awanan pastor.” (Mat. 9:36) Apay a kasta ti kasasaadda? Agsipud ta dagidiay naespirituan a lider ti Israel a mangisuro koma kadakuada iti Linteg ti Dios ket nagubsang, naturay, ken managinsisingpet. Imbes a tulongan ken aywananda dagiti adda iti arbanda, pinabaklayanda ketdi ida kadagiti “nadagsen nga awit.”—Mat. 23:4.

3. Ania koma ti laglagipen dagiti panglakayen bayat nga itungtungpalda ti annongenda kas naespirituan a papastor?

3 No kasta, adda serioso a responsabilidad dagiti Kristiano a papastor ita—dagiti nadutokan a panglakayen. Dagiti karnero iti arban nga ay-aywananda ket kukua ni Jehova ken ni Jesus, a nangtukoy iti bagina kas “ti nasayaat a pastor.” (Juan 10:11) ‘Ginatang’ ida ni Jesus babaen ti ‘napateg a darana.’ (1 Cor. 6:20; 1 Ped. 1:18, 19) Ay-ayatenna dagiti karnero nga uray la insakripisiona ti biagna para kadakuada. Kanayon koma a laglagipen dagiti panglakayen nga isuda ket katulongan a papastor, a masapul nga agpasakup iti naayat nga Anak ti Dios a ni Jesu-Kristo, ti “naindaklan a pastor dagiti karnero.”—Heb. 13:20.

4. Ania ti mausig iti daytoy nga artikulo?

 4 Kasano ngarud ti rumbeng a panangtrato dagiti Kristiano a papastor kadagiti karnero? Maiparparegta kadagiti kameng ti kongregasion nga ‘agtulnogda kadagidiay mangidadaulo’ kadakuada. Ngem maidagdagadag met kadagiti Kristiano a panglakayen a saanda nga ‘iturayan dagidiay tawid ti Dios.’ (Heb. 13:17; basaen ti 1 Pedro 5:2, 3.) Kasano ngarud nga idauluan dagiti panglakayen ti arban a saanda nga iturayan dayta? Iti sabali a pannao, kasano a maaywanan ken maipaayda ti kasapulan dagiti karnero a dida lumbes iti autoridad nga inted ti Dios kadakuada?

‘AWITENNANTO IDA ITI BARUKONGNA’

5. Ania ti ipakita kadatayo ti ilustrasion iti Isaias 40:11 maipapan ken Jehova?

5 Kinuna ni propeta Isaias maipapan ken Jehova: “Kas iti maysa a pastor ipastorannanto ti bukodna a pangen. Babaen ti takiagna ummongennanto a sangsangkamaysa dagiti kordero; ket iti barukongna awitennanto ida. Dagidiay agpaspasuso siaannad nga idalannanto ida.” (Isa. 40:11) Ipakita daytoy nga ilustrasion a maseknan ni Jehova iti kasapulan dagiti nakapuy ken agpegpeggad a kameng ti kongregasion. No kasano nga ammo ti maysa a pastor ti kasapulan ti tunggal karnero iti arbanna ken madadaan a mangasikaso kadakuada, ammo met ni Jehova ti kasapulan dagiti kameng ti kongregasion ken madadaan a tumulong kadakuada. Ti maysa a pastor ubbaenna ti kayyanak a karnero no kasapulan. Kasta met, ni Jehova—“ti Ama dagiti nadungngo nga asi”—aywanannatayo no adda pakarigatantayo. Liwliwaennatayo no maipasangotayo iti narigat a suot wenno no kasapulantayo unay ti tulong.—2 Cor. 1:3, 4.

6. Kas maysa a naespirituan a pastor, kasano a matulad ti maysa a panglakayen ti ulidan ni Jehova?

6 Anian a nagsayaat dayta a leksion a maadal ti maysa a naespirituan a pastor manipud iti nailangitan nga Amatayo! Kas ken Jehova, masapul nga alerto ti pastor iti kasapulan dagiti karnero. Babaen ti panangammona kadagiti karit a pakaipaspasanguanda ken kadagiti mismo a kasapulanda, makaipaay ti maysa a panglakayen iti pammaregta ken suporta. (Prov. 27:23) Nasken ngarud a mangiwaya iti panawen a makisarita ken dumngeg kadagiti kakabsat. Nupay saanna a pakibiangan ti pribado a biagda, asikasuenna ti aniaman a mapalpaliiw ken mangmangngegna iti kongregasion ken siaayat a ‘badanganna dagidiay nakapuy.’—Ara. 20:35; 1 Tes. 4:11.

7. (a) Kasano a natrato dagiti karnero ti Dios idi kaaldawan da Ezequiel ken Jeremias? (b) Ania ti maadaltayo iti panangkondenar ni Jehova kadagiti di matalek a papastor?

7 Usigentayo ti kababalin dagiti papastor a kinondenar ti Dios idi kaaldawan da Ezequiel ken Jeremias. Inlaksid ida ni Jehova gapu ta saanda nga inaramid ti rebbengenda a mangaywan kadagiti karnerona. No awan ti agbantay, mawarawara dagiti karnero ken lamuten ida dagiti atap nga animal. Imbes a taraonan dagidiay a papastor dagiti karnero, ginundawayanda ketdi ida ket ‘bagbagida ti pinakpakanda.’ (Ezeq. 34:7-10; Jer. 23:1) Kasta met laeng ti makagapu a kinondenar ti Dios dagiti lider ti Kakristianuan. Ipaganetget daytoy a rumbeng a mangipaay dagiti Kristiano a panglakayen iti umiso ken naayat a pannakaseknan iti arban ni Jehova.

“IMPASDEKKO TI PAGTULADAN MAIPAAY KADAKAYO”

8. Kasano nga impakita ni Jesus ti ulidan iti panangilinteg iti di umiso a kababalin?

8 Gapu iti kinaimperpekto, mabalin a saan a naan-anay a maawatan ti dadduma a kakabsat no ania ti kalikaguman ni Jehova kadakuada. Mabalin a makaaramidda kadagiti banag a di maitunos iti prinsipio ti Biblia, wenno ipakita ti tigtignayda  a saanda pay a nataengan iti naespirituan. Ania ti rumbeng nga aramiden dagiti panglakayen? Masapul a tuladenda ti kinaanus ni Jesus kadagiti adalanna idi nagsusupiatda no siasino kadakuada ti agbalinto a katan-okan iti Pagarian. Imbes nga ungtan ida ni Jesus, siaanus nga insuro ken binalakadanna ida maipapan iti kinapakumbaba. (Luc. 9:46-48; 22:24-27) Babaen ti panangbuggona iti saksakada, impakitana no ania ti kaipapanan ti panagbalin a napakumbaba, ti kualidad a masapul nga ipakita dagiti Kristiano a manangaywan.—Basaen ti Juan 13:12-15; 1 Ped. 2:21.

9. Ania a kababalin dagiti adalan ni Jesus ti inlintegna?

9 Ti panangmatmat ni Jesus maipapan iti annongen dagiti naespirituan a pastor ket naiduma iti dati a panangmatmat da Santiago ken Juan. Tinarigagayan dagitoy nga apostol ti natan-ok a saad iti Pagarian. Ngem inlinteg ni Jesus ti panangmatmatda, ket kinunana: “Ammoyo a dagiti agturay kadagiti nasion dominaranda ida ket dagiti naindaklan a tattao aramatenda ti autoridad kadakuada. Saan a kastoy kadakayo; no di ket siasinoman a kayatna ti agbalin a naindaklan kadakayo masapul nga agserbi kadakayo.” (Mat. 20:25, 26) Masapul a parmeken dagiti apostol ti pagannayasanda a ‘mangdominar’ wenno mangituray kadagiti sabsabali.

10. Kasano ti kayat ni Jesus a panangtrato dagiti panglakayen iti arban? Ania ti nagsayaat nga ulidan ni Pablo iti daytoy a banag?

10 Namnamaen ni Jesus a dagiti panglakayen tratuenda ti arban kas iti panangtratona iti dayta. Sidadaanda koma nga agserbi kadagiti kakabsatda imbes nga iturayanda ida. Sipapakumbaba a nagserbian ni apostol Pablo ti sabsabali, ta kinunana kadagiti lallakay iti kongregasion idiay Efeso: “Pagaammoyo unay no kasano a manipud idi umuna nga aldaw a bimmaddekak iti distrito ti Asia kaduadak iti amin a tiempo, a nagpapaadipenak iti Apo buyogen ti naindaklan unay a kinapakumbaba iti panagpampanunot.” Kayat ti apostol a dagidiay a papanglakayen sipapasnek ken sipapakumbaba a tulonganda dagiti sabsabali. Kunana: “Impakitak kadakayo iti amin a bambanag a babaen ti kasta a panagbannog masapul a badanganyo dagidiay nakapuy.” (Ara. 20:18, 19, 35) Imbaga ni Pablo kadagiti taga-Corinto a saan nga isu ti agturay iti pammatida. Imbes ketdi, sipapakumbaba a nagserbi a katrabahuanda maipaay iti rag-oda. (2 Cor. 1:24) Nagsayaat nga ulidan ni Pablo kadagiti panglakayen ita no maipapan iti kinapakumbaba ken kinagaget.

‘KUMPET A SITITIBKER ITI MATALEK A SAO’

11, 12. Kasano a matulongan ti panglakayen ti maysa a kabsat nga agdesision?

11 Ti maysa a panglakayen iti kongregasion masapul a ‘kumpet a sititibker iti matalek a sao no maipapan iti arte ti panangisurona.’ (Tito 1:9) Ngem aramidenna koma dayta buyogen ti “espiritu ti kinaalumamay.” (Gal. 6:1) Imbes nga idiktarna ti aramiden dagiti kakabsat, ti nasayaat a naespirituan a pastor tulonganna ida nga agdesision maibatay iti panagayatda ken Jehova ken iti Saona. Kas pagarigan, mabalin a dakamaten ti panglakayen dagiti prinsipio ti Biblia a masapul nga usigen ti maysa a kabsat no adda napateg a desisionanna. Mabalin a kaduaenna a mangrepaso kadagiti publikasiontayo. Mabalin met a paregtaenna ti kabsat a mangpanunot no ania ti epekto ti desisionna iti relasionna ken Jehova. Mabalin nga ipaganetget ti panglakayen a napateg ti panagpaiwanwan iti Dios babaen ti kararag sakbay nga agdesision. (Prov. 3:5, 6) Kalpasan a mailawlawagna dagitoy, bay-an ti panglakayen a ti kabsat ti agdesision.—Roma 14:1-4.

12 Ti kakaisuna a pagibatayan dagiti panglakayen iti ipaayda a balakad ket ti kunaen ti Kasuratan. Gapuna, napateg nga  usarenda a naimbag ti Biblia ken surotenda no ania ti ibagana. No kasta ti aramidenda, maliklikanda ti lumbes iti autoridad nga inted ti Dios kadakuada. Saanda a kukua dagiti karnero ta katulonganda laeng a papastor. Maysa pay, aniaman ti desision ti tunggal kameng ti kongregasion, sungsungbatanna dayta ken Jehova ken ni Jesus.—Gal. 6:5, 7, 8.

“PAGULIDANAN TI ARBAN”

Tultulongan dagiti panglakayen ti pamiliada nga agsagana para iti ministerio (Kitaen ti parapo 13)

13, 14. Kadagiti ania nga aspeto a masapul nga agbalin nga ulidan iti arban ti maysa a panglakayen?

13 Kalpasan nga imbaga ni apostol Pedro kadagiti lallakay iti kongregasion a dida ‘iturayan dagidiay tawid ti Dios,’ pinaregtana ida nga ‘agbalinda a pagulidanan iti arban.’ (1 Ped. 5:3) Kasano a maaramidan dayta ti maysa a panglakayen? Usigentayo ti dua a kualipikasion para iti maysa a ‘rumagragpat iti akem a manangaywan.’ Masapul a ‘nasimbeng ti panunotna’ ken “mangidadaulo iti bukodna a sangakabbalayan iti nasayaat a pamay-an.” No adda pamilia ti panglakayen, masapul a mapagulidanan ti panangidaulona, ta “iti kinapudnona no ti asinoman a lalaki saanna nga ammo ti mangidaulo iti bukodna a sangakabbalayan, kasanonto ti panangaywanna iti kongregasion ti Dios?” (1 Tim. 3:1, 2, 4, 5) Tapno kualipikado nga agbalin a manangaywan ti maysa a lalaki, masapul a nasimbeng ti panagpampanunotna; kayatna a sawen, nalawag a maawatanna dagiti nadiosan a prinsipio ken no kasano a yaplikarna dagita iti biagna. Natanang ken saan a nadarasudos nga agdesision. Bumileg ti panagtalek dagiti kakabsat kadagiti panglakayen no kastoy ti ipakpakitada a kualidad.

14 Maipakita pay dagiti panglakayen ti nasayaat nga ulidan babaen ti panangidauloda iti trabaho a panangasaba kas iti inaramid ni Jesus. Nagpateg a paset ti biag ni Jesus ditoy daga ti panangikasaba iti naimbag a damag ti Pagarian. Impakitana no kasano nga aramiden daytoy. (Mar. 1:38; Luc. 8:1) Iti kaaldawantayo, mapabileg la ketdi dagiti kakabsat no makaduada a mangasaba dagiti nareregta a panglakayen. Makasursuroda met iti pamay-an dagiti panglakayen a mangisuro. No regular nga usaren dagiti panglakayen ti tiempo ken pigsada a mangikasaba iti naimbag a damag uray no okupadoda, matulad ti intero a kongregasion ti regtada. Agbalin met a nasayaat nga ulidan dagiti panglakayen babaen ti panagsagana ken panagkomentoda kadagiti gimong ti kongregasion ken iti dadduma pay nga aktibidad, kas iti panagdalus ken panangmantener iti Kingdom Hall.—Efe. 5:15, 16; basaen ti Hebreo 13:7.

Mangipakpakita dagiti manangaywan iti nasayaat nga ulidan iti ministerio (Kitaen ti parapo 14)

“SARANAYENYO DAGITI NAKAPUY”

15. Ania ti sumagmamano a rason a mangipastor dagiti panglakayen?

15 Ti naimbag a pastor ket alerto a tumulong no adda madangran wenno agsakit a karnero. Umasping iti dayta, nasken nga asikasuen a dagus dagiti panglakayen ti asinoman a kameng ti kongregasion nga addaan iti parikut wenno agkasapulan iti  naespirituan a tulong. Mabalin nga agkasapulan iti material a tulong dagiti nataengan ken masakit, ngem nangnangruna a kasapulanda ti naespirituan a tulong ken pammaregta. (1 Tes. 5:14) Mabalin a maipaspasango dagiti agtutubo a kameng ti kongregasion iti nadumaduma a karit, kas iti panangsaranget kadagiti “tarigagay a naikasigudan iti kinaagtutubo.” (2 Tim. 2:22) Ti ngarud panangipastor ramanenna ti regular a panangsarungkar kadagiti kameng ti kongregasion tapno maammuan ti kasasaadda ken maipaayan ida iti Nainkasuratan a pammaregta. No dagus a mangipaay dagiti panglakayen iti tulong, mabalin a masolbar dagiti parikut sakbay a kumaro dagita.

16. Kasano a matulongan dagiti panglakayen ti maysa a kabsat a masaksakit iti naespirituan?

16 Ania ti mabalin nga aramiden ti maysa a kameng ti kongregasion no agpegpeggad ti naespirituan a salun-atna? “Adda aya asinoman a masaksakit kadakayo?” insaludsod ni Santiago a mannurat ti Biblia. “Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Ket ti kararag ti pammati paimbagennanto ti addaan sagubanit, ket isu ibangonto ni Jehova. Kasta met, no nakaaramid kadagiti basol, mapakawanto dayta kenkuana.” (Sant. 5:14, 15) Uray no ti masaksakit iti naespirituan saanna nga ‘ayaban dagiti lallakay,’ alerto koma a tumulong dagiti panglakayen apaman a maammuanda ti kasasaadna. No ikararaganda dagiti kakabsat ken kaduada ida nga agkararag ken no saranayenda ida iti panawen ti rigat, ipakpakita dagiti panglakayen a nasayaatda a papastor a mangipapaay iti bang-ar ken pammaregta kadagiti karnero nga adda iti aywanda.—Basaen ti Isaias 32:1, 2.

17. Ania ti pagimbaganna no tuladen dagiti panglakayen ti “naindaklan a pastor”?

17 Iti amin nga ar-aramiden dagiti Kristiano a papastor para iti organisasion ni Jehova, ikagkagumaanda a tuladen ti “naindaklan a pastor,” ni Jesu-Kristo. Ti naespirituan a tulong nga ipapaay dagitoy a nadutokan a lallaki ti mamagtalinaed iti arban a nasalun-at ken matalek iti Dios. Maikari laeng ngarud nga idayaw ken pagyamanantayo ti nakaim-imbag a Pastortayo, ni Jehova.