Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan—Pagadalan nga Edision  |  Nobiembre 2013

No Kasano a Makatulongtayo Kadagiti Agkasapulan

No Kasano a Makatulongtayo Kadagiti Agkasapulan

“BIMTAK ti riribuk gapu iti mapagduaduaan a resulta ti eleksion, isu a napilitan a pumanaw ti rinibu a Saksi ni Jehova kadagiti pagtaenganda,” kinuna ni François, maysa a panglakayen iti rumangrang-ay a pagilian. “Bimmassit ti suplay a taraon ken agas, isu a ngimmina unay dagita. Nagserra dagiti banko, ken naibusan iti kuarta wenno nag-off-line dagiti ATM machine.”

Madagdagus a nangipatulod ti sanga nga opisina iti kuarta ken kasapulan a suplay para kadagiti Saksi a nagkamang kadagiti Kingdom Hall iti nadumaduma a paset ti pagilian. Ti agsinnumbangir a partido binarikadaanda dagiti kalsada, ngem gapu ta ammoda nga awan ti dasdasigan dagiti Saksi, pinalubosanda a lumasat dagiti lugan ti sanga nga opisina.

“Iti dalanmi a mapan iti maysa a Kingdom Hall, pinaltogan dagiti sniper ti luganmi,” kuna ni François. “Ngem awan ti napuntaan kadakami. Idi makitami nga adda armado a soldado nga agtartaray nga agturong kadakami, nagbueltakami sa pinaspasanmi a pinataray ti lugan ket nagsublikami iti sanga nga opisina. Anian a yamanmi ken Jehova ta nakalasatkami! Iti sumaganad nga aldaw, ti 130 a kakabsat nga adda iti daydiay a Kingdom Hall ket nakapagkamang iti natalged a lugar. Immay ti dadduma iti sanga nga opisina, ket impaaymi ti naespirituan ken material a kasapulanda agingga a nalpas ti riribuk.”

“Nakaawat ti sanga nga opisina idi agangay iti adu a surat manipud kadagiti kakabsat iti nadumaduma a paset ti pagilian a mangyeb-ebkas iti naimpusuan a panagyamanda,” kuna ni François. “Bimmileg ti panagtalekda ken Jehova gapu iti panangtulong kadakuada dagiti kakabsat iti nadumaduma a lugar.”

No mapasamak dagiti natural a didigra wenno riribuk, saantay nga ibaga kadagiti agkasapulan a kakabsat nga “aginudo ken agbussog[da].” (Sant. 2:15, 16) Imbes ketdi, ikagumaantayo nga ipaay dagiti pisikal a kasapulanda. Kasta met ti inaramid dagiti adalan idi umuna a siglo. Idi naipakdaar a dumteng ti nakaro a bisin, “inkeddengda, tunggal maysa kadakuada sigun iti kabaelan ti asinoman, a mangipatulodda iti tulong a pagserbi kadagiti kakabsat nga agnanaed idiay Judea.”—Ara. 11:28-30.

Kas ad-adipen ni Jehova, nakasaganatayo a tumulong kadagiti agkasapulan iti material. Ngem addaan met dagiti tattao iti naespirituan a kasapulan. (Mat. 5:3) Tapno matulonganda a mangbigbig ken mangpennek iti dayta, binilin ni Jesus dagiti pasurotna nga isuroda dagiti tattao ken pagbalinenda ida nga ad-adalan. (Mat. 28:19, 20) Kas indibidual, us-usarentayo ti adu a tiempo, pigsa, ken sanikuatayo iti panangitungpaltayo iti dayta nga annongen. Kas maysa nga organisasion, us-usarentayo ti dadduma a naidonar a pondo a pangtulong kadagiti agkasapulan a kakabsat, ngem kangrunaan a maar-aramat dagiti donasion para iti pannakayadelantar dagiti interes ti Pagarian ken iti pannakaisaknap ti naimbag a damag. Iti kasta a pamay-an, ipakpakitatayo ti ayattayo iti Dios ken iti padatayo a tao.—Mat. 22:37-39.

Dagidiay mangsupsuporta iti sangalubongan a trabaho dagiti Saksi ni Jehova masiguradoda a maus-usar dagiti donasionda iti umiso ken kasayaatan a pamay-an. Mabalinmo kadi ti tumulong kadagiti agkasapulan a kakabsat? Kayatmo kadi a suportaran ti trabaho a panagaramid iti ad-adalan? No wen, “saanmo a medmedan ti naimbag kadagidiay addaan karbengan iti dayta, no adda iti pannakabalin ta imam ti panangaramid iti dayta.”—Prov. 3:27.