Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) NOBIEMBRE 2013

Agtulnog Kadagiti Papastor ni Jehova

Agtulnog Kadagiti Papastor ni Jehova

“Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo.”—HEB. 13:17.

1, 2. Apay nga inyarig ni Jehova ti bagina iti maysa a pastor?

INYARIG ni Jehova ti bagina iti maysa a pastor. (Ezeq. 34:11-14) Daytoy ti tumulong kadatayo a mangtarus no ania a kita ti Dios ni Jehova. Marikna ti naayat a pastor a responsabilidadna a salakniban ken aywanan dagiti karnero a tarakenna. Iturongna ida kadagiti lugar a pagaraban ken paginumanda (Sal. 23:1, 2); bantayanna ida iti aldaw ken rabii (Luc. 2:8); salaknibanna ida kadagiti animal a mangkaan kadakuada (1 Sam. 17:34, 35); ubbaenna dagiti urbon (Isa. 40:11); birokenna dagiti nayaw-awan, ken agasanna dagiti nadunor a karnero.—Ezeq. 34:16.

2 Gapu ta agpaspastor ken agtaltalon ti kaaduan nga adipen ni Jehova idi ugma, nalakada a maawatan no apay nga inyarig ni Jehova a Dios ti bagina iti maysa a naayat a pastor. Ammoda a kasapulan a maaywanan ken maasikaso dagiti karnero tapno nasalun-atda. Iti umasping a pamay-an, kasapulan met dagiti tattao ti panangaywan ken panangiwanwan ni Jehova. (Mar. 6:34) No awan dayta, nalakada la a mayaw-awan ken madangran, kas iti naiwarawara a “karkarnero nga awanan iti pastor.” (1 Ar. 22:17) Nupay kasta, siaayat nga ipapaay ni Jehova dagiti kasapulan ti ilina.

3. Ania ti usigentayo iti daytoy nga artikulo?

3 Matarusantayo met ita no kasano a kasla maysa a pastor ni Jehova. Agingga ita, ipapaayna ti kasapulan dagiti arig karnero nga ad-adipenna. Ammuentayo no kasano nga iwanwanwan ken ay-aywananna ita dagiti karnerona. Usigentayo met no ania ti rumbeng nga aramiden dagiti karnero tapno magunggonaanda iti naayat a panangaywan ni Jehova.

TI NASAYAAT A PASTOR MANGDUTOK KADAGITI KATULONGANNA A PAPASTOR

4. Kasano nga ay-aywanan ni Jesus dagiti karnero ni Jehova?

4 Dinutokan ni Jehova ni Jesus kas Ulo ti kongregasion Kristiano. (Efe. 1:22, 23) Kas “ti nasayaat a pastor,” iparparangarang ni Jesus ti pannakaseknan, pangpanggep, ken  dagiti kualidad ni Amana. ‘Insukona pay ketdi ti kararuana maigapu kadagiti karnero.’ (Juan 10:11, 15) Anian a nagsayaat a sagut ti subbot nga impaayna para iti sangatauan! (Mat. 20:28) Panggep ni Jehova a “tunggal maysa a mangwatwat iti pammati [ken Jesus] saan koma a madadael no di ket maaddaan iti agnanayon a biag.”—Juan 3:16.

5, 6. (a) Siasino dagiti dinutokan ni Jesus nga agaywan kadagiti karnerona, ken ania ti aramiden dagiti karnero tapno magunggonaanda? (b) Ania koma ti kangrunaan a rason nga agtulnogtayo kadagiti panglakayen iti kongregasion?

5 Kasano a maipakita dagiti karnero a bigbigenda ni Jesu-Kristo kas ti Nasayaat a Pastorda? “Imdengan dagiti karnerok ti timekko,” kuna ni Jesus, “ket am-ammok ida, ket surotendak.” (Juan 10:27) Ti panagimdeng iti timek ti Nasayaat a Pastor kaipapananna ti kanayon a panangsurot iti panangiwanwanna. Ramanenna met ti panagtulnog kadagiti dinutokanna a katulongan a papastor. Imbaga ni Jesus nga itultuloyto dagiti apostol ken ad-adalanna ti trabaho nga inrugina, nga ‘isuro’ ken ‘pakanenda dagiti babassit a karnerona.’ (Mat. 28:20; basaen ti Juan 21:15-17.) Bayat a maisaksaknap ti naimbag a damag, umad-adu ti bilang dagiti adalan ni Kristo. Isu nga inyurnosna nga adda nataengan a Kristiano a papastor a mangaywan kadagiti kongregasion.—Efe. 4:11, 12.

6 Idi sinuratan ni apostol Pablo dagiti manangaywan iti kongregasion ti Efeso idi umuna a siglo, kinunana a ti nasantuan nga espiritu dinutokanna ida kas manangaywan ‘tapno ipastoranda ti kongregasion ti Dios.’ (Ara. 20:28) Kasta met ti annongen ita dagiti Kristiano a manangaywan, yantangay nadutokanda sigun kadagiti Nainkasuratan a kualipikasion nga impaltiing ti nasantuan nga espiritu. No ngarud agtulnogtayo kadagiti manangaywan, raraementayo ni Jehova ken ni Jesus, dagiti dua a naindaklan a Pastor. (Luc. 10:16) Daytoy koma ti kangrunaan a makagapu a situtulok nga agpasakuptayo kadagiti panglakayen. Ngem adda pay dadduma a rason a masapul nga agtulnogtayo iti panangiwanwanda.

7. Kasano a tultulongannaka dagiti panglakayen a mangtaginayon iti nasayaat a relasionmo ken Jehova?

7 Ti pammaregta ken balakad nga ipapaay dagiti panglakayen ket kanayon a naibatay iti mismo a Biblia wenno kadagiti Nainkasuratan a prinsipio. Saanda a dikdiktaran dagiti kapammatianda no ania ti rumbeng nga aramidenda. (2 Cor. 1:24) Imbes ketdi, ar-aramatenda dagiti Nainkasuratan a pagalagadan a tumulong kadagiti padada a Kristiano a mangaramid kadagiti nasayaat a desision ken mangitandudo iti talna ken panagkaykaysa iti kongregasion. (1 Cor. 14:33, 40) Kuna ti Biblia a dagiti panglakayen ‘bambantayanda dagiti kararuatayo.’ Kaipapanan daytoy a kayatda a tulongan ti amin a kameng ti kongregasion a mangtaginayon iti nasayaat a relasionda ken Jehova. Alertoda ngarud a tumulong iti maysa a kabsat a nakaaramid, wenno sakbay pay a makaaramid, iti “di umiso nga addang.” (Gal. 6:1, 2; Jud. 22) Saan kadi a karaman dagitoy kadagiti rason nga ‘agtulnogtayo kadagiti mangidadaulo kadatayo’?—Basaen ti Hebreo 13:17.

8. Kasano a salsalakniban dagiti panglakayen ti arban ti Dios?

8 Ni apostol Pablo, a maysa met a naespirituan a pastor, insuratna kadagiti kakabsat idiay Colosas: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.” (Col. 2:8) Ipakita daytoy a pakdaar ti sabali pay a rason no apay nga ipangagtayo dagiti Nainkasuratan a balakad dagiti panglakayen. Salsalaknibanda dagiti kakabsat iti asinoman a mangdadael iti pammatida. Impakdaar ni apostol Pedro nga addanto dagiti “ulbod a mammadto” ken “ulbod a mannursuro” a mangsulisog kadagiti nakapuy a Kristiano nga agsukir  ken Jehova. (2 Ped. 2:1, 14) Nasken met a mangipaay dagiti panglakayen ita kadagiti umasping a pakdaar no kasapulan. Adun ti kapadasan dagitoy a nataengan a Kristiano a lallaki. Kasta met, sakbay a nadutokanda, naipakitada nga addaanda iti nalawag a pannakaawat iti Kasuratan ken kualipikadoda a mangisuro iti kinapudno a linaon ti Biblia. (1 Tim. 3:2; Tito 1:9) Gapu iti kinanataenganda, balanse a panangmatmatda, ken siribda a naibatay iti Biblia, makaipaayda iti nasayaat a panangiwanwan iti arban.

Kas iti pastor a mangsalsalaknib iti arbanna, salsalakniban met dagiti panglakayen dagiti karnero a naitalek kadakuada (Kitaen ti parapo 8)

TI NASAYAAT A PASTOR TARAONAN KEN SALAKNIBANNA DAGITI KARNERO

9. Kasano a tartaraonan ken iwanwanwan ita ni Jesus ti kongregasion Kristiano?

9 Babaen ti organisasionna, mangipapaay ni Jehova iti naruay a naespirituan a taraon kadagiti amin nga adipenna iti intero a lubong. Adu a Nainkasuratan a balakad ti maaw-awattayo babaen kadagiti publikasiontayo. No dadduma, mangipapaay ti organisasion iti direkta a panangiwanwan kadagiti panglakayen ti kongregasion babaen kadagiti surat wenno kadagiti instruksion nga iyal-allatiw dagiti agdaldaliasat a manangaywan. Kadagita a pamay-an, maipapaayan dagiti karnero iti nalawag nga instruksion.

10. Ania ti responsabilidad dagiti naespirituan a papastor mainaig kadagidiay naiwawa?

10 Responsabilidad dagiti manangaywan a salakniban ken aywanan ti naespirituan a salun-at dagiti kameng ti kongregasion, nangnangruna dagidiay nakapuy wenno nakaaramid iti nadagsen a basol. (Basaen ti Santiago 5:14, 15.) Dadduma kadagitoy ti mabalin a  naiwawa manipud iti kongregasion ken saandan nga agserserbi iti Dios. Saan kadi nga aramiden ti naasi a panglakayen ti amin a kabaelanna a mangsapul iti tunggal napukaw a karnero ken paregtaenna nga agsubli iti arban? Sigurado a kasta! Inlawlawag ni Jesus: “Di matarigagayan a banag ken ni Amak nga adda sadi langit a mapukaw ti maysa kadagitoy a babassit.”—Mat. 18:12-14.

ANIA KOMA TI PANANGMATMATTAYO KADAGITI PAGKAPUYAN DAGITI KATULONGAN A PAPASTOR?

11. Apay a marigatan ti dadduma nga agpasakup iti panangidaulo dagiti panglakayen?

11 Ni Jehova ken ni Jesus ket perpekto a Papastor. Ngem saan a kasta dagiti tattao a dinutokanda kas katulongan a papastor a mangaywan kadagiti kongregasion. Gapu iti dayta, mabalin a marigatan ti dadduma nga agpasakup iti panangidaulo dagiti panglakayen. Mabalin nga irasonda: ‘Apay koma a denggek ti balakadda ket imperpektoda met a kas kaniak?’ Agpayso a saan a perpekto dagiti panglakayen. Ngem masapul a maaddaantayo iti umiso a panangmatmat kadagiti pagkapuyan ken biddutda.

12, 13. (a) Ania dagiti biddut a naaramidan ti dadduma a lallaki a dinutokan ti Dios? (b) Apay a nailanad iti Biblia dagiti kamali dagiti nadutokan a lallaki?

12 Sibabatad a dakamaten ti Kasuratan dagiti biddut dagiti indibidual nga inaramat ni Jehova a mangidaulo iti nagkauna nga ilina. Kas pagarigan, nadutokan ni David kas ari ken lider ti Israel. Ngem timmulok iti sulisog ket nakabasol iti pannakikamalala ken pammapatay. (2 Sam. 12:7-9) Usigentay met ti naaramidan ni apostol Pedro. Nupay adda dakkel a responsabilidad a naitalek kenkuana iti kongregasion Kristiano idi umuna a siglo, nakaaramid kadagiti nakaro a biddut. (Mat. 16:18, 19; Juan 13:38; 18:27; Gal. 2:11-14) Malaksid ken Jesus, awanen ti perpekto a tao a simmaruno kada Adan ken Eva.

13 Apay nga impaisurat ni Jehova iti Biblia dagiti biddut a naaramidan dagiti lallaki a dinutokanna? Ti maysa a makagapu ket tapno ipakitana a mabalinna nga usaren dagiti imperpekto a lallaki a mangidaulo iti ilina. Kinapudnona, kanayon nga us-usarenna dagiti imperpekto a tattao. Gapuna, saan koma a dagiti kinaimperpekto dagiti mangidadaulo kadatayo ti panggapuantay nga agtanabutob wenno di agtulnog kadakuada. Inanamaen ni Jehova a raemen ken pagtulnogantayo dagitoy a kakabsat a lallaki.—Basaen ti Exodo 16:2, 8.

14, 15. Ania ti maadaltayo iti pamay-an a panangted ni Jehova kadagiti instruksion iti nagkauna nga ilina?

14 Nasken a pagtulnogantayo dagiti mangidadaulo kadatayo. Panunotem no kasano a nangipaay idi ni Jehova kadagiti instruksion iti ilina bayat dagiti kritikal a tiempo. Idi pimmanaw dagiti Israelita iti nagkauna nga Egipto, da Moises ken Aaron ti inaramat ti Dios a mangipaay kadagiti napateg nga instruksion. Tapno maispal dagiti Israelita iti maikasangapulo a saplit, masapul nga agtulnogda kadagiti instruksion. Kas pagarigan, naibilin a mangaramidda iti espesial a pannangan, mangpartida iti karnero, ken iwarsida ti dadduma a darana kadagiti hamba ti ruangan ti balbalayda. Direkta kadi a nagsao ni Jehova kadagiti umili? Saan, masapul nga ipangagda dagiti lallakay ti Israel, a nakaibagaan dagiti espesipiko nga instruksion a naggapu ken Moises. (Ex. 12:1-7, 21-23, 29) Kadagita a kasasaad, ni Moises ken dagiti lallakay ti nangyallatiw kadagiti instruksion ni Jehova agpaay iti ilina. Umasping met iti dayta ti akem dagiti Kristiano a panglakayen ita.

15 Mabalin nga adu pay ti malagipmo a pasamak iti Biblia a nangusaran ni Jehova iti tao wenno anghel a mangyallatiw kadagiti mangispal-biag nga instruksion agpaay iti ilina. Kadagita a pasamak, adda dagiti lallaki nga inikkan ti Dios iti autoridad nga agsao  iti naganna ken mangibaga iti ilina iti rumbeng nga aramidenda kadagiti napeggad a tiempo. Saan ngata a kastanto met ti aramiden ni Jehova inton Armagedon? Gapuna, dagiti panglakayen ita a nakaitalkan iti responsabilidad a mangirepresentar ken Jehova wenno iti organisasionna masapul nga agannadda tapno dida lumbes iti autoridad a naitalek kadakuada.

“MAYMAYSA NGA ARBAN, MAYMAYSA A PASTOR”

16. Ania a “sao” ti masapul nga ipangagtayo?

16 Ti ili ni Jehova ket “maymaysa nga arban” nga ay-aywanan ti ‘maysa a pastor,’ ni Jesu-Kristo. (Juan 10:16) Imbaga ni Jesus nga isu ket addanto kadagiti adalanna iti “amin nga al-aldaw agingga iti panungpalan ti sistema ti bambanag.” (Mat. 28:20) Kas Ari idiay langit, kontroladona ti amin a mapasamak sakbay a dadaelenna ti lubong ni Satanas. Tapno agtalinaedtayo a naikaykaysa ken natalged iti arban ti Dios, masapul nga imdengantayo ti ‘sao iti likudantayo,’ a mangibagbaga iti dalan a rumbeng a pagnaantayo. Daytoy a “sao” ramanenna ti kunaen ti nasantuan nga espiritu ti Dios a nailanad iti Biblia ken ti kunaen ni Jehova ken ni Jesus babaen kadagiti dinutokanda a katulongan a papastor.—Basaen ti Isaias 30:21; Apocalipsis 3:22.

Ikagumaan dagiti panglakayen a salakniban ti pamilia dagiti agsolsolo a nagannak manipud iti dakes a kakadua (Kitaen ti parapo 17, 18)

17, 18. (a) Apay nga agpegpeggad ti arban ti Dios, ngem ania ti manamnamatayo? (b) Ania ti mausig iti sumaruno nga artikulo?

17 Kuna ti Biblia nga agpagnapagna ni Satanas a “kasla leon a ngumerngernger, nga agsapsapul iti alun-onenna.” (1 Ped. 5:8) Kas iti narungsot ken mabisin nga animal, sipsiputanna ti arban ket agur-uray iti umiso a gundaway a mangkemmeg kadagidiay nakapuy wenno naiwawa. Dayta ti rason a masapul nga agtalinaedtayo a nasinged iti arban ken ni Jehova, ti “pastor ken manangaywan dagiti kararua[tayo].” (1 Ped. 2:25) Kuna ti Apocalipsis 7:17 maipapan kadagiti makalasat iti dakkel a rigat: “Ti Kordero [ni Jesus] . . . ipastorannanto ida, ket idalannanto ida kadagiti ubbog ti dandanum ti biag. Ket ti Dios punasennanto ti amin a lua kadagiti matada.” Anian a nagsayaat daytoy a kari!

18 Ita ta nausigtayon ti nakapatpateg nga akem dagiti Kristiano a panglakayen kas katulongan a papastor, nasayaat nga isaludsodtayo, Kasano a masigurado dagitoy a nadutokan a lallaki nga umiso ti panangtratoda kadagiti karnero ni Jesus? Mausig ti sungbat iti sumaruno nga artikulo.