Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Oktubre 2013

Situtulok nga Agsaksakripisioda iti Pilipinas

Situtulok nga Agsaksakripisioda iti Pilipinas

AGARUP sangapulo a tawenen ti napalabas, da Gregorio ken Marilou, agassawa nga agtawen idi iti nasurok a 30, ket agserserbi kas payunir iti Manila. Nupay okupadoda iti sekular a trabahoda, nakapagtultuloyda latta kas payunir. Idi agangay, nai-promote ni Marilou kas manedyer iti bangko a pagtrabtrabahuanna. “Gapu iti nasayaat a trabahomi, naaddaankami iti komportable a panagbiag,” kinunana. Gapu ta dakkel ti sueldoda, inkeddengda nga ipatakder ti ar-arapaapenda a balay iti maysa a napintas a lokasion, agarup 19 kilometro (12 milia) iti daya ti Manila. Nakikontratada iti maysa a kompania nga agibangbangon iti balay, ket immanamongda a binulan a tinnaganda dayta iti uneg ti sangapulo a tawen.

“NARIKNAK A KASLA TAKTAKAWAK NI JEHOVA”

Kinuna ni Marilou: “Kalikaguman ti baro a trabahok ti adu a tiempo ken pigsa isu a naksayan ti regtak kadagiti naespirituan nga aktibidad. Nariknak a kasla taktakawak ni Jehova.” Inlawlawagna: “Diakon mait-ited ken Jehova ti oras nga inkarik kenkuana.” Gapu ta saanda a naragsak iti situasionda, nagtungtongan da Gregorio ken Marilou no ania a talaga ti pangus-usaranda iti biagda. Kuna ni Gregorio: “Kayatmi a balbaliwan ti kasasaadmi ngem dimi ammo no ania  a talaga ti aramidenmi. Pinagsaritaanmi no kasano a naan-anay a mausarmi ti biagmi nga agserbi ken Jehova, nangruna ta awan anakmi. Inkararagmi nga iwanwannakami ni Jehova.”

Iti daydi a tiempo, nakangngegda kadagiti palawag maipapan iti panagserbi iti lugar nga addaan iti dakdakkel a panagkasapulan kadagiti agibumbunannag iti Pagarian. “Nariknami a dagitoy a palawag ti sungbat ni Jehova kadagiti kararagmi,” kinuna ni Gregorio. Inkararagda a maaddaanda koma iti dakdakkel a pammati tapno maikeddengda no ania ti umiso nga aramidenda. Ngem dakkel a lapped ti madama idi a maipatpatakder a balayda. Tallo a tawen idin a tintinnaganda dayta. Ania itan ti aramidenda? Kuna ni Marilou: “No dimi ituloy ti kontrata, saanmi a mapasubli ti dakkel a gatad a naibayadmi. Ngem pinampanunotmi a rumbeng a yun-unami ti pagayatan ni Jehova imbes a ti personal a tarigagaymi.” Gapu ta inkabilanganda ti kinuna ni apostol Pablo nga ‘inawatna kas pukaw’ ti dadduma a bambanag, didan intuloy ti proyektoda a balay, nagikkatda iti trabahoda, inlakoda ti adu kadagiti sanikuada, ken immakarda iti nasulinek a purok iti isla ti Palawan, agarup 480 kilometro (300 milia) iti abagatan ti Manila.—Fil. 3:8.

‘NAADALDA TI PALIMED’

Sakbay nga immakar da Gregorio ken Marilou, pinadasda ti agbiag a simple, ngem dida ninamnama a nasimsimple pay gayam ti biag iti lugar a pagboluntarioanda. “Nasdaawkami,” kuna ni Marilou. “Awan koriente, awan dagiti bambanag a pagnam-ayan. Imbes nga isaksakmi latta koman ti rice cooker, masapul nga agbalsigkami pay iti pagsungrodmi. Mailiwak a mapan iti mall, mangan iti restawran, ken iti dadduma pay a bambanag iti siudad.” Ngem kanayon a laglagipenda no apay nga immakarda, ket nairuamda met laeng idi agangay iti kasta a kasasaad. Kuna ni Marilou: “Maragragsakanak a mangbuya iti napintas nga aglawlaw, a kas iti naraniag a bitbituen iti rabii. Kangrunaanna, maayatanak a makakita kadagiti naragsak a ruprupa dagiti tattao a kaskasabaanmi. Iti panagserbimi ditoy, ‘naadalmi ti palimed’ iti panagbalin a kontento.”—Fil. 4:12.

“Awan umasping iti rag-omi a makakita iti irarang-ay ti kongregasion. Mariknami nga ad-adda itan a makapnek ti biagmi.”—Gregorio ken Marilou

Kinuna ni Gregorio: “Adda laeng uppat a Saksi idi simmangpetkami ditoy. Maragragsakanda idi rugiak ti mangipaay iti palawag publiko iti linawas ken usarek ti gitarak a mangakompaniar kadagiti kanta ti Pagarian.” Iti uneg ti makatawen, naimatanganda nga agassawa no kasano a rimmang-ay ti bassit a grupo a nagbalin a kongregasion nga addaan iti 24 nga agibumbunannag. Imbaga ni Gregorio: “Natukay ti riknami iti ayat nga ipakpakita kadakami daytoy a kongregasion.” Ita, no lagipenda ti nasuroken nga innem a tawen a panagserbida iti dayta a nasulinek a lugar, kastoy ti makunada: “Awan umasping iti rag-omi a makakita iti irarang-ay ti kongregasion. Mariknami nga ad-adda itan a makapnek ti biagmi.”

 “TALAGA A ‘NANANAMKO KEN NAKITAK A NI JEHOVA NAIMBAG’!”

Iti Pilipinas, dandani 3,000 a kakabsat a lallaki ken babbai ti immakar kadagiti lugar nga addaan iti dakkel a panagkasapulan iti agibumbunannag ti Pagarian. Agarup 500 kadakuada ti babbalasang. Alaentay a pagarigan ni Karen.

Karen

Agtawen itan ni Karen iti agarup 25 ken dimmakkel iti Baggao, Cagayan. Idi tin-edyer pay laeng, pinampanunotnan no kasano a mapalawana ti ministeriona. Kinunana: “Gapu ta ammok nga ababan ti nabatbati a tiempo ken masapul a mangngeg ti amin a kita ti tao ti mensahe ti Pagarian, kayatko ti agserbi iti lugar nga addaan dakdakkel a panagkasapulan.” Nupay ibagbaga ti dadduma a miembro ti pamiliana nga agkolehio laengen imbes nga umakar iti nasulinek a lugar ken mangasaba sadiay, inkararag ni Karen ti panangiwanwan ni Jehova. Nakisarita met kadagidiay agserserbi iti nasulinek a luglugar. Iti edad a 18, immakar iti maysa a nasulinek a lugar nga agarup 64 kilometro (40 milia) ti kaadayona iti ilida.

Karaman iti teritoria ti bassit a kongregasion a supsuportaran ni Karen ket ti maysa a kabambantayan iti igid ti Taaw Pasipiko. Malagip ni Karen: “Tapno makadanonkami iti dayta a baro a kongregasion, magmagnakami iti tallo nga aldaw manipud Baggao, a sumang-at ken sumalogkami kadagiti bambantay ken lumasatkami iti karayan iti nasurok a 30 a daras.” Innayonna: “Tapno madanonko ti dadduma a yad-adalak iti Biblia, magmagnaak iti innem nga oras, umyanak iti balayda, ket iti kabigatanna magmagnaak manen iti innem nga oras nga agawid.” Sayang kadi ti panagreggetna? “Uray naut-ot dagiti sakak no dadduma, ngem,” siiisem nga innayon ni Karen, “makaikonkonduktaak met iti 18 a panagadal iti Biblia. Talaga a ‘nananamko ken nakitak a ni Jehova naimbag’!”—Sal. 34:8.

“NASURSUROK TI AGPANNURAY KEN JEHOVA”

Sukhi

Ania ti nakatignayan ni Sukhi, maysa a balasang a nasurok a 40 ti tawenna ken taga-Estados Unidos, nga umakar iti Pilipinas? Iti asamblea sirkito idi 2011, nangngeganna ti pannakainterbiu ti maysa a pagassawaan. Insalaysayda no kasano nga inlakoda ti kaaduan a sanikuada ken immakarda iti Mexico tapno tumulong iti trabaho a panangasaba. “Dayta nga interbiu,” kinuna ni Sukhi, “ti namagpanunot kaniak kadagiti kalat a diak man la napampanunot idi.” Maysa nga Indian ni Sukhi. Ket idi naammuanna nga adu ti Punjabi iti Pilipinas, inkeddengna ti umakar tapno tumulong iti panangasaba kadagita a tattao. Adda kadi dagiti lapped a nakaipasanguanna?

“Nagrigat gayam nga ikeddeng no ania a banag ti ilakok ken no ania ti ibatik,” kuna ni Sukhi. “Kasta met, kalpasan ti 13 a tawen a komportable ti biagko iti bukodko nga apartment, nakipagnaedak iti pamiliak nupay saanak a komportable a kas iti dati. Ngem nakatulong dayta tapno maisaganak ti bagik iti simple a panagbiag.” Ania dagiti karit a nakaipasanguanna idi  immakar iti Pilipinas? “Ti kangrunaan a karit kaniak ket ti nakaro a butengko kadagiti agkarayam nga insekto ken ti pannakariknak iti iliw. Ita pay laeng a naan-anay a nasursurok ti agpannuray ken Jehova!” Sayang kadi ti panagreggetna? Maragragsakan ni Sukhi a nagkuna: “Ibagbaga ni Jehova kadatayo, ‘Subokendak, ket ibukbokkonto kadakayo ti bendision.’ Napaneknekak a pudno dagitoy a sasao idi insaludsod kaniak ti maysa a bumalay, ‘Kaanoka ngarud nga agsubli? Adu pay ti kayatko a damagen.’ Makaparagsak ti tumulong kadagiti tattao a mabisin iti naespirituan!” (Mal. 3:10) Innayon ni Sukhi: “Talaga a maysa a dakkel a karit ti panagdesision nga umakar. Ngem apaman a nakapagdesisionak, nakitak ti nakaskasdaaw a panangimaniobra ni Jehova iti bambanag para kaniak.”

“NAPARMEKKO TI BUTENGKO”

Maysa a naasawaan a kabsat a lalaki a taga-Pilipinas nga agnagan Sime ken dandanin 40 ti tawenna ti napan nagtrabaho iti Middle East para iti dakkel a sueldo. Iti kaaddana sadiay, natignay ni Sime a mangyun-una ken Jehova gapu iti pammaregta ti manangaywan sirkito ken ti palawag ti maysa a miembro ti Bagi a Manarawidwid. “Ngem mabutengak a mapukawan iti trabaho,” kuna ni Sime. Uray no kasta, nagikkat iti trabahona ken nagawid iti Pilipinas. Ita, ni Sime ken ni Haidee a baketna ket agserserbin iti Davao del Sur, iti makin-abagatan a paset ti Pilipinas, a nalawa ti teritoriana ken agkasapulan iti adu nga agibumbunannag. Kuna ni Sime: “Agyamyamanak ta naparmekko ti butengko a mapukawan iti trabaho ken inyun-unak ni Jehova. Awanen ti naragragsak pay ngem ti panangipaaymo ken Jehova iti kasayaatan nga adda kenka!”

Sime ken Haidee

“DAYTA TI MANGIPAPAAY KADAKAMI ITI NAGPAIDUMA A RAGSAK!”

Agserserbi kas payunir da Ramilo ken Juliet, agassawa nga agedad iti nasurok a 30. Naammuanda nga agkasapulan iti tulong ti maysa a kongregasion a 30 kilometro (20 milia) manipud iti pagtaenganda isu a nagboluntarioda a sumuporta. Agtudo man wenno aginit, agmotorda a mapan sumuporta kadagiti linawas a gimong ken panangasaba iti dayta a kongregasion. Saan a kaskarina ti lumasat kadagiti lasonglasong a kalsada ken kadagiti hanging bridge, ngem maragsakanda a mangpalawa iti ministerioda. Kinuna ni Ramilo: “Mangikonkonduktakami ken baketko iti 11 a panagadal iti Biblia! Adu a sakripisio ti karaman iti panagserbi iti lugar a dakdakkel ti panagkasapulan, ngem dayta ti mangipapaay kadakami iti nagpaiduma a ragsak!”—1 Cor. 15:58.

Juliet ken Ramilo

Kayatmo kadi a maammuan ti ad-adu pay maipapan iti panagserbi iti lugar nga agkasapulan kadagiti agibumbunannag iti pagilianyo wenno iti sabali a pagilian? No kasta, makisaritaka iti manangaywan iti sirkitoyo, ken basaem ti artikulo a “Kabaelanyo Kadi ti ‘Umakar Idiay Macedonia’?” iti Agosto 2011 a ruar Ti Ministeriotayo iti Pagarian.

Ammuem ti Ad-adu Pay

SIASINO ITA DAGITI MANGAR-ARAMID ITI PAGAYATAN NI JEHOVA?

Ania Dagiti Eskuelaan a Para Kadagiti Payunir?

Ania a naisangsangayan a pannakasanay ti maipapaay kadagiti mangbusbusbos iti amin a tiempoda iti trabaho a panangikasaba iti Pagarian?