Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2013

 PAKASARITAAN ITI BIAG

Gunggonaan ni Jehova Dagidiay Agtalek Kenkuana

Gunggonaan ni Jehova Dagidiay Agtalek Kenkuana

Adda dagiti gundaway a ditay maibaga ti mapasamak iti biag, ditay masierto, ken marigatantay pay a mangsango iti dayta. Ngem bendisionan ni Jehova dagidiay agpannuray kenkuana imbes nga iti bukodda a pannakaawat. Napaneknekanmi daytoy ken baketko iti napaut ken makapnek a biagmi. Kastoy ti ababa a pakasaritaanmi.

NAGAM-AMMO da Tatang ken Nanang idi 1919 iti maysa a kombension dagiti International Bible Students iti Cedar Point, Ohio, U.S.A. Nagkasarda iti daydi met la a tawen. Nayanakak idi 1922, ket kalpasan ti dua a tawen, simmaruno met ni adingko a Paul. Ni met Grace a baketko ket naipasngay idi 1930. Dagiti nagannakna a da Roy ken Ruth Howell ket agpada a dimmakkel iti pamilia dagiti Bible Students. Agpada met a Bible Students dagiti nagannak ni nanangna ken gagayyem ida ni Kabsat Charles Taze Russell.

Naam-ammok ni Grace idi 1947, ket nagkasarkami idi Hulio 16, 1949. Sakbay a nagasawakami, nagsaritaanmi dagiti planomi. Inkeddengmi nga agbalinkami nga amin-tiempo a ministro ken saankami a maaddaan iti anak. Isu a naggiddankami a nagpayunir idi Oktubre 1, 1950. Sa idi 1952, naawiskami nga agserbi iti sirkito.

PANAGDALIASAT A TRABAHO KEN PANAGESKUELA ITI GILEAD

Mariknami a kasapulanmi ti ad-adu a tulong tapno maitungpalmi ti baro nga annongenmi. Bayat nga agpatpatulongak kadagiti aduan kapadasan a kakabsat, nagbirokak met iti tumulong ken Grace. Immasidegak ken Marvin Holien, a nabayagen a gayyem ti pamiliami ken dati nga agdaldaliasat a manangaywan. Dinamagko, “Adda kadi am-ammoyo a mabalin a makatulong ken Grace? Ubing pay ngamin ken awan pay unay ti kapadasanna.” Insungbatna, “Wen adda, ni Edna Winkle, adu ti maitulongna ta nalaing a payunir.” Kinuna ni Grace idi agangay maipapan ken Edna: “Tinulongannak a makisarita a kalmado ken sinuruannak iti aramidek no adda agkedked a makisarita. Sinuruannak met a dumngeg iti bumalay tapno maammuak no ania ti maitutop nga isungbatko. Talaga nga isu ti kasapulak!”

Manipud kannigid: Nathan Knorr, Malcolm Allen, Fred Rusk, Lyle Reusch, Andrew Wagner

Nagserbikami ken Grace iti dua a sirkito iti estado ti Iowa, a pakairamanan ti dadduma a paset ti estado ti Minnesota ken South Dakota. Kalpasanna, nayakarkami iti New York Circuit 1, a pakairamanan ti Brooklyn ken Queens. Diminto  pulos malipatan ti pannakariknami a nagbassit pay ti kapadasanmi iti panagdaliasat a trabaho. Karaman iti daytoy a sirkito ti Brooklyn Heights Congregation, a mangus-usar iti Kingdom Hall iti Bethel ket adu sadiay ti nabayagen a Bethelite. Kalpasan a naiparangko ti umuna a palawag serbisio, immasideg kaniak ni Kabsat Nathan Knorr sa kinunana: “Malcolm, binalakadannakami maipapan iti sumagmamano a banag, ket nasayaat dayta. Ngem laglagipem a no saannakami a siaayat a balakadan, saanka unay a makatulong iti organisasion. Itultuloymo ti nasayaat nga ar-aramidem.” Imbagak daytoy ken Grace kalpasan ti gimong. Idi nakaulikamin iti kuartomi iti Bethel, uraykam la nagsangsangit gapu iti nerbiosmi.

“Laglagipem a no saannakami a siaayat a balakadan, saanka unay a makatulong iti organisasion. Itultuloymo ti nasayaat nga ar-aramidem”

Kalpasan ti sumagmamano a bulan, nakaawatkami iti imbitasion para iti maika-24 a klase ti Gilead, nga agturpos iti Pebrero 1955. Naibaga kadakami a ti panggep ti panageskuelami ket tapno ad-adda nga epektibokami iti panagdaliasat a trabaho imbes a maibaonkami kas misionero. Naisangsangayan a kapadasan ti panageskuelami ket nakitami nga adu pay ti parang-ayenmi.

Da Fern ken George Couch a nakaduami ken Grace iti Gilead, 1954

Idi nalpasen ti panageskuelami, nadutokankami nga agbisita iti distrito. Karaman iti distritomi ti estado ti Indiana, Michigan, ken Ohio. Ngem nasdaawkami ta idi Disiembre 1955, nakaawatkami iti surat manipud ken Kabsat Knorr. Kunana: “Ibagam ti agpayso. Ania ti kaykayatmo, agserbika ditoy Bethel a permanente . . . wenno kalpasan ti sumagmamano a tawenmo ditoy, agserbika iti sabali a pagilian? Ngem no kaykayatmo ti agserbi iti distrito wenno sirkito, ibagam laeng.” Nagsubalitkami ket imbagami a maragsakankami iti aniaman nga annongen a maipaay kadakami. Madagdagus a naawiskami nga agreport iti Bethel!

NARAGSAK A TAWTAWEN ITI BETHEL

Karaman kadagiti naragsak a tawtawen ti panagserbik iti Bethel ti pribilehio a panagpalawag ken panangisuro iti nadumaduma a paset ti Estados Unidos. Nakiramanak iti panangsanay ken panangtulong iti adu nga agkabannuag a lallaki a nakaitalkan idi agangay ti dadakkel a pribilehio iti uneg ti organisasion ni Jehova. Di nagbayag, nagbalinak a sekretario ni Kabsat Knorr iti opisina a mangor-organisar iti sangalubongan a trabaho a panangasaba.

Panagtrabahok iti Service Department, 1956

Natagiragsakko ti adu a tawtawen a panagtrabahok iti Service Department. Sadiay a nakaduak ni T. J. (Bud) Sullivan, a dati a manangaywan iti dayta a departamento. Ngem adu met ti naadalko iti dadduma pay a kakabsat a kas ken Fred Rusk  a nadutokan a mangsanay kaniak. Malagipko nga adda naminsan a sipapasig a dinamagko kenkuana, “Fred, apay a nakaad-adu ti balbaliwam kadagiti ar-aramidek a surat?” Nagkatawa ngem serioso nga imbagana: “Malcolm, no makisarsaritaka, nalakam laeng nga ilawlawag ti kayatmo a sawen. Ngem no agaramidka iti surat, nangruna no aggapu ditoy, masapul a nalawag ken umiso agingga’t mabalin.” Sa innayonna, “Ngem dika agdanag—nasayaat ti maar-aramidam, ket nasaysayaatto pay inton agangay.”

Nagduduma ti trabaho ni Grace iti Bethel iti panaglabas ti tawtawen, pakairamanan ti panagdalus kadagiti kuarto. Natagiragsakna dayta a trabaho. Agingga ita, no masabetmi ti dadduma a kakabsat iti Bethel nga agtutubo pay laeng kadagidi a tawtawen, maragsakanda a mangibaga ken Grace, “Nagsayaat ti panangisurom kaniak a mangurnos iti kamak, ket ap-apresiaren dayta ni nanangko.” Natagiragsak met ni Grace ti agtrabaho iti Magazine, Correspondence, ken Tape Duplicating Department. Gapu kadagitoy a nagduduma a trabaho, imbilangna a pribilehio ken bendision aniaman ti trabahotayo iti organisasion ni Jehova wenno sadinoman ti pagserserbiantayo. Kasta pay laeng ti panangmatmatna agingga ita.

DAGITI PANAGBALBALIW NGA INARAMIDMI

Idi katengngaan ti dekada ‘70, nakitami a kasapulan nga aywananmi dagiti tumataenganen a nagannakmi, isu a kasapulan nga agdesisionkami. Saanmi koma a kayat a panawan ti Bethel ken dagiti kakabsat sadiay a nagbalinen a nasinged kadakami. Ngem kaskasdi a mariknak a responsabilidadmi nga aywanan dagiti nagannakmi. Isu a rimmuarkami iti Bethel, ngem mangnamnamakami a makasublikaminto met laeng inton agbaliw ti kasasaadmi.

Tapno masuportarak ti pinansial a kasapulanmi, nagbalinak nga ahente ti insurance. Diakto pulos malipatan ti imbaga kaniak ti maysa a manedyer bayat ti training-ko: “Para rabii daytoy a trabaho ta isu ti kaadda dagiti tattao iti balayda. Isu a masapul nga agtrabahoka iti tunggal rabii.” Insungbatko, “Wen, ammok nga adun ti kapadasam, ket maawatanka. Ngem adda met dagiti naespirituan a responsabilidadko a diak pay pulos binaybay-an, ket diak kayat a baybay-an dagita. Agtrabahoak iti rabii, ngem iti Martes ken Huebes, masapul a tumabunoak kadagiti nakapatpateg a gimong.” Talaga a binendisionan ni Jehova ti diak pananglangan kadagiti gimong gapu laeng iti trabaho.

Addakami iti sibay ni nanangko idi pimmusay idi Hulio 1987 iti maysa a nursing home. Kinuna ti head nurse ken Grace: “Mrs. Allen, agawidkan tapno aginanaka. Apresiarenmi ti kanayon a kaaddam ditoy para ken katugangam. Ammom nga inaramidmo ti amin a kabaelam para kenkuana.”

 Idi Disiembre 1987, nagaplikarkami manen nga agserbi iti Bethel, ti lugar nga ipatpategmi. Ngem sumagmamano laeng nga aldaw kalpasanna, natakuatan nga addaan ni Grace iti kanser ti bagis isu a kasapulan a maoperaan. Di nagbayag, immimbag ket naagasan ti kanserna. Kabayatanna, nakaawatkami iti surat manipud iti Bethel a mangirekrekomenda nga itultuloymi laengen ti ministeriomi iti kongregasionmi. Determinadokami a mangitultuloy iti naregta a pannakiramanmi iti trabaho ti Pagarian.

Idi agangay, nakabirokak iti trabaho idiay Texas. Inkeddengmi ti umakar ta magustuanmi ti nabarbara a klima sadiay. Agarup 25 a tawenmin ditoy Texas, ket naaddaankami iti nakasingsinged a singgalut kadagiti kakabsat.

DAGITI NASURSUROMI

Nagsakit ni Grace iti kanser ti bagis ken thyroid, ken iti nabiit pay, kanser ti suso. Ngem saan a pulos nagreklamo iti kasasaadna ken nagtalinaed a managpasakup ken mannakikooperar. Masansan a maisaludsod kenkuana, “Ania ti sekreto ti naragsak ken naballigi a panagasawayo?” Mangdakamat iti uppat a banag: “Nasingedkami nga aggayyem. Inaldawkami nga agtungtong. Kanayonkami nga agkadua. Ken saankami a maturog nga adda pay laeng sakit ti nakemmi iti maysa ken maysa.” Siempre, adda latta dagiti dimi pagkinnaawatan, ngem agpinnakawankami ken lipatenmi dagita—ket talaga nga epektibo dayta.

“Kanayon nga agtalekka ken Jehova ken akseptarem no ania dagiti ipalubosna a kasasaad”

Kadagiti narigat a kasasaad a napasaranmi, dagitoy ti sumagmamano a napateg a nasursuromi:

  1.  Kanayon nga agtalekka ken Jehova ken akseptarem no ania dagiti ipalubosna a kasasaad. Dika agtalek iti bukodmo a pannakaawat.—Prov. 3:5, 6; Jer. 17:7.

  2.  Agpaiwanwanka iti Sao ni Jehova iti aniaman a situasion. Nakapatpateg ti panagtulnog ken Jehova ken kadagiti lintegna. Adda laeng dua a pagpiliam—agtulnogka wenno saan.—Roma 6:16; Heb. 4:12.

  3.  Ti kapatgan isu ti panangaramid iti naimbag a nagan ken Jehova. Yun-unam ti pagayatanna, saan a ti panagbirok iti material a kinabaknang.—Prov. 28:20; Ecl. 7:1; Mat. 6:33, 34.

  4.  Ikararagmo nga agbalinka a nabunga ken aktibo iti panagserbim ken Jehova. Ipamaysam nga aramiden no ania ti kabaelam, saan a ti dimo kabaelan.—Mat. 22:37; 2 Tim. 4:2.

  5.  Bigbigem nga awanen ti sabali pay nga organisasion a bembendisionan ken an-anamongan ni Jehova.—Juan 6:68.

Agpadakami ken Grace a nakapagserbin ken Jehova iti nasurok a 75 a tawen. Kas agassawa, dandani 65 a tawenmin nga agserserbi kenkuana. Talaga a nagragsak ti panagkaduami nga agserbi ken Jehova agingga ita. Namnamaen ken ikarkararagmi a mapadasan met koma ti amin a kakabsattayo ti nariknami a pannakapnek gapu iti panagtalekmi ken Jehova.