Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) SEPTIEMBRE 2013

Pagrag-oan Koma ta Pusom Dagiti Pammalagip ni Jehova

Pagrag-oan Koma ta Pusom Dagiti Pammalagip ni Jehova

“Innalak dagiti pammalagipmo kas sanikua agingga iti tiempo a di nakedngan.”—SAL. 119:111.

1. (a) Ania ti nadumaduma a reaksion dagiti tattao mainaig kadagiti pammalagip, ken apay? (b) Ania ti reaksion ti napannakkel a tao iti balakad?

NAGDUDUMA ti reaksion dagiti tattao iti maysa nga instruksion. Mabalin a nalaka nga akseptaren dayta no naggapu iti maysa nga addaan iti autoridad, idinto ta mabalin a di maikankano no impaay ti maysa laeng a kapatadan wenno nababbaba ti saadna. Nagduduma met ti reaksion dagiti tattao iti disiplina ken balakad. Adda dagidiay saan a maragsakan, maupay, wenno mabainan. Ngem adda met dagidiay maparegta, matignay, ken mangikagumaan nga agbalbaliw. Apay a nagduduma ti reaksion dagiti tattao? Ti maysa a makagapu ket kinapannakkel. Wen, ti kinapannakkel kullaapanna ti panangmatmat ti maysa a tao isu a dina ikankano ti balakad ken saan a magunggonaan iti napateg nga instruksion.—Prov. 16:18.

2. Apay a napateg kadagiti pudno a Kristiano ti balakad manipud iti Sao ti Dios?

2 Ngem naiduma dagiti pudno a Kristiano. Apresiarentayo ti makatulong a balakad, nangruna no naibatay dayta iti Sao ti Dios. Dagiti pammalagip ni Jehova tulongannatayo a mangammo iti dakes a pagbanagan ti di umiso nga aramid. Kas pagarigan, tulongannatayo a mangliklik kadagiti silo, kas iti materialismo, seksual nga immoralidad, ken panangabuso iti droga wenno arak. (Prov. 20:1; 2 Cor. 7:1; 1 Tes. 4:3-5; 1 Tim. 6:6-11) Kasta met, addaantayo iti “nasayaat a kasasaad ti puso” gapu ta agtultulnogtayo kadagiti pammalagip ti Dios.—Isa. 65:14.

3. Ania a kababalin ti salmista ti nasayaat a tuladentayo?

3 Tapno masaluadantayo ti napateg a relasiontayo iti nailangitan nga Amatayo, masapul nga itultuloytayo a yaplikar ti nainsiriban nga instruksion ni Jehova. Maaddaantay koma iti panangmatmat a kas iti salmista a nangisurat: “Innalak dagiti pammalagipmo kas sanikua agingga  iti tiempo a di nakedngan, ta isuda ti pagrag-oan ti pusok”! (Sal. 119:111) Maragsakantayo met kadi nga agtulnog kadagiti bilin ni Jehova, wenno ibilangtay no dadduma dagita kas makapadagsen? Ditay koma maupay no adda dagiti gundaway a marigatantayo a mangakseptar iti maysa a balakad. Kabaelantayo a patanoren ti di maisin a panagtalek kadagiti nainsiriban a bilbilin ti Dios! Usigentayo ti tallo a pamay-an no kasano a maaramidantayo dayta.

PABILGEM TI PANAGTALEKMO BABAEN TI KARARAG

4. Ania ti saan a pulos nagbalbaliw ken David?

4 Agpada a napadasan ni Ari David ti naragsak ken nariribuk a biag, ngem adda banag a saan a pulos nagbalbaliw kenkuana—ti naan-anay a panagtalekna iti Namarsua. Kinunana: “Kenka, O Jehova, itangadko ti mismo a kararuak. O Diosko, kenka inkabilko ti panagtalekko.” (Sal. 25:1, 2) Ania ti nakatulong ken David a maaddaan iti kasta a panagtalek iti nailangitan nga Amana?

5, 6. Ania ti ibaga kadatayo ti Sao ti Dios maipapan iti relasion ni David ken Jehova?

5 Adu a tattao ti sa la agkararag iti Dios no agrigatda. Ania ti makunam no sa la umasideg kenka ti maysa a gayyem wenno kabagiam no kasapulanna ti kuarta wenno adda kiddawenna? Inton agangay, amangan no pagduaduaamon ti motibona. Ngem saan a kasta ti relasion ni David ken Jehova. Iti intero a panagbiagna, nasayaat man wenno dakes ti kasasaad, impakita dagiti kararagna a pudpudno ti panagayat ken panagtalekna ken Jehova.—Sal. 40:8.

6 Paliiwem dagiti sasao ni David kas panangidayaw ken panagyamanna ken Jehova: “O Jehova nga Apomi, anian a nagdaeg ti naganmo iti intero a daga, sika a ti kinatan-okna maibinsabinsa iti ngatuen ti langlangit!” (Sal. 8:1) Madlawmo kadi ti nasinged a relasion ni David iti nailangitan nga Amana? Gapu iti panagamanga ni David iti kinatan-ok ken kinangayed ti Dios, natignay a mangidayaw ken Jehova iti “intero nga agmalem.”—Sal. 35:28.

7. Kasanotayo a magunggonaan no umadanitayo iti Dios babaen ti kararag?

7 Kas ken David, kasapulan a regular a makisaritatayo ken Jehova tapno bumileg ti panagtalektayo kenkuana. Kuna ti Biblia: “Umadanikayo iti Dios, ket isu umadaninto kadakayo.” (Sant. 4:8) Ti yaadani iti Dios babaen ti kararag ket nagpateg met a pamay-an a magun-odantayo ti nasantuan nga espiritu.—Basaen ti 1 Juan 3:22.

8. Apay a liklikantayo nga usaren ti isu met la a sasao wenno balikas tunggal agkararagtayo?

8 Masansan kadi nga isu met la a sasao wenno balikas ti ibagbagam tunggal agkararagka? No kasta, sakbay nga agkararagka, panunotem nga umuna ti kayatmo nga ibaga. Maragsakan ngata ti maysa a gayyem wenno kabagiantayo no isu la nga isu ti ibagbagatayo tunggal makisaritatayo kenkuana? Mabalin a dinatayton ikaskaso. Siempre, dinto pulos aramiden ni Jehova dayta kadagiti nasungdo nga adipenna a naimpusuan nga agkarkararag kenkuana. Ngem ikagumaantay koma a saan nga isu met la nga isu ti ibagbagatayo tunggal agkararagtayo.

9, 10. (a) Ania ti mabalin nga iramantayo kadagiti kararagtayo? (b) Ania ti makatulong tapno agbalin a naimpusuan dagiti kararagtayo?

9 Siempre, no kayattayo a nasingedtayo iti Dios, saan koma a parparawpaw dagiti kararagtayo. No ipeksatayo ken Jehova ti linaon ti pusotayo, ad-adda a suminged ken agtalektayo kenkuana. Ania ngarud ti masapul nga iramantayo kadagiti kararagtayo? Kuna ti Sao ti Dios: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” (Fil. 4:6) Wen, maitutop nga ikararagtayo ti aniaman a banag a mangapektar iti relasiontayo iti Dios wenno iti biagtayo kas adipenna.

10 Adu ti masursurotayo iti karkararag dagiti matalek a lallaki ken babbai a nairekord iti Biblia. (1 Sam. 1:10, 11; Ara. 4:24-31)  Naglaon ti libro a Salmo iti koleksion dagiti naimpusuan a kararag ken kankanta ken Jehova a pakakitaan iti nagduduma a rikna, a kas iti panagleddaang ken panagrag-o. Ti panangutob kadagita a kararag dagiti nasungdo tulongannatayo a mangpasayaat iti kalidad dagiti kararagtayo ken Jehova.

MENNAMENNAEM DAGITI PAMMALAGIP TI DIOS

11. Apay a masapul a mennamennaentayo ti balakad ti Biblia?

11 Inyebkas ni David: “Ti pammalagip ni Jehova mapagpiaran, mamagsirib iti daydiay awanan kapadasan.” (Sal. 19:7) Wen, uray kurang ti kapadasantayo, agbalintayo a masirib no agtulnogtayo kadagiti bilin ti Dios. Ngem adda dagiti balakad ti Kasuratan a masapul a mennamennaentayo tapno naan-anay a masurottayo. Masapul nga aramidentayo dayta tapno makapagtalinaedtayo a nasungdo no masuottayo iti eskuelaan wenno pagtrabahuan, no pilitendatayo a mangsalungasing iti pagalagadan ti Dios mainaig iti dara wenno mangikompromiso iti neutral a takdertayo, ken no ikagkagumaantayo a suroten dagiti prinsipio ti Biblia mainaig iti panagkawkawes ken panaglanglanga. Ti panangmennamenna iti balakad ti Biblia mainaig kadagitoy a banag matulongannatayo nga agsagana. Iti kasta, maikeddengtayo ti aramidentayo sakbay pay a tumaud dagita a situasion. Kas resultana, maliklikantayo dagiti nasaem a bunga ti panagkamali.—Prov. 15:28.

12. Aniada a saludsod ti nasken a panunotentayo tapno masalimetmetantayo dagiti pammalagip ti Dios?

12 Bayat nga ur-urayentayo a matungpal ti kari ti Dios, ipakpakita kadi ti panagbiagtayo nga agtaltalinaedtayo a siririing iti naespirituan? Kas pagarigan, talaga kadi a patientayo nga asidegen a madadael ti Babilonia a Dakkel? Dagiti kadi bendision iti masanguanan, kas iti agnanayon a biag iti paraiso a daga, ket napaypayso pay laeng kadatayo kas idi damo a naammuantayo dagita? Naregtatayo pay la kadi iti ministerio ken saantayo a yun-una dagiti personal a pakaseknantayo? Napateg pay laeng kadi kadatayo ti namnama a panagungar, ti pannakasantipikar ti nagan ni Jehova, ken ti pannakaalangon ti kinasoberanona? Ti panangmennamenna kadagiti kasta a saludsod matulongannatayo a mangsalimetmet kadagiti “pammalagip [ti Dios] kas sanikua agingga iti tiempo a di nakedngan.”—Sal. 119:111.

13. Apay nga adda sumagmamano a banag a narigat idi a matarusan dagiti nagkauna a Kristiano? Mangted iti pagarigan.

13 Mabalin nga adda bambanag a nadakamat iti Biblia a ditay naan-anay a maawatan ita gapu ta saan pay a tiempo a lawlawagan dagita ni Jehova. Maulit-ulit idi nga imbaga ni Jesus kadagiti apostolna a masapul nga agsagaba ken mapapatay. (Basaen ti Mateo 12:40; 16:21.) Ngem saanda a naawatan ti kayatna a sawen. Sada la natarusan dayta kalpasan a napagungar, nagpakita kadagiti adalanna, ken idi “linuktanna a naan-anay ti pampanunotda tapno matarusanda ti kaipapanan dagiti Kasuratan.” (Luc. 24:44-46; Ara. 1:3) Kasta met, idi laeng naiparukpok kadakuada ti nasantuan nga espiritu idi Pentecostes 33 C.E. a naawatan dagiti pasurot ni Kristo a ti Pagarian ti Dios ket maipasdek idiay langit.—Ara. 1:6-8.

14. Ania ti nagsayaat nga ulidan ti adu a kakabsat iti rugi ti maika-20 a siglo?

14 Umasping met iti dayta ti kasasaad dagiti pudno a Kristiano idi rugi ti maika-20 a siglo. Adda sumagmamano a di umiso a ninamnamada maipapan iti ‘maudi nga al-aldaw.’ (2 Tim. 3:1) Kas pagarigan, idi tawen 1914, adda dagiti nangipagarup nga asidegen nga agpalangitda. Idi saan a napasamak ti ninamnamada, sipapasnek manen nga inusigda ti Kasuratan ket naawatanda nga adda naindaklan a trabaho a panangasaba a masapul pay a maibanag. (Mar. 13:10) Gapuna idi 1922, ni J. F. Rutherford, a mangidadaulo  idi iti trabaho a panangasaba, imbagana kadagidiay timmabuno iti internasional a kombension iti Cedar Point, Ohio, U.S.A.: “Adtoy, agturturayen ti Ari! Dakayo dagiti ahentena a mangiwaragawag. Ngarud iwaragawagyo, iwaragawagyo, iwaragawagyo, ti Ari ken ti pagarianna.” Nanipud idin, ti pannakaiwaragawag ti “naimbag a damag ti pagarian” ti nagbalin a pakabigbigan dagiti adipen ni Jehova iti moderno a panawen.—Mat. 4:23; 24:14.

15. Apay a nasayaat a mennamennaentayo ti panangibanag ti Dios kadagiti karina iti ilina?

15 Nasayaat a mennamennaentayo ti nakaskasdaaw a panangibanag ni Jehova kadagiti karina iti ilina, idi ken ita. Dayta ti tumulong kadatayo nga ad-adda nga agtalek nga ibanagna ti pagayatan ken panggepna iti masanguanan. Dagiti pammalagip ti Dios paggagarennatayo met a manguray iti kaitungpalan dagiti padtona ken pabilgenna ti panagtalektayo kadagiti karina.

AGBALINKA NGA AKTIBO KADAGITI NATEOKRATIKUAN NGA AKTIBIDAD

16. Ania dagiti bendision iti panagtalinaedtayo nga aktibo iti ministerio?

16 Ti Diostayo a ni Jehova ket mannakabalin ken aktibo a Dios. “Siasino ti nakired a kas kenka, O Jah?” insaludsod ti salmista. Innayonna: “Ti imam napigsa, ti makannawan nga imam natan-ok.” (Sal. 89:8, 13) Maitunos iti dayta, ap-apresiaren ken bembendisionan ni Jehova ti panagreggettayo a mangitandudo kadagiti interes ti Pagarian. Siguraduenna nga amin nga adipenna—lallaki man wenno babbai, ubbing wenno natataengan—ket saan a ‘mangmangan iti tinapay ti kinasadut.’ Sigagaget nga agtrabtrabahoda. (Prov. 31:27) Tultuladentayo ti Namarsua no okupadotayo kadagiti nateokratikuan nga aktibidad. No naimpusuan nga agserserbitayo iti Dios, agbalintayo a naragsak ken maay-ayotayo ni Jehova.—Basaen ti Salmo 62:12.

17, 18. Kasano a mapabileg ti panagtalektayo ken Jehova no surotentayo dagiti instruksionna? Mangted iti pagarigan.

 17 Kasano a bumileg ti panagtalektayo ken Jehova no sisusungdo nga aramidentayo ti annongentayo? Usigem ti salaysay ti Kasuratan maipapan iti iseserrek ti Israel iti Naikari a Daga. Imbilin ni Jehova kadagiti padi a mangaw-awit iti lakasa ti tulag a lumasatda iti mismo a Karayan Jordan. Ngem bayat nga umas-asideg dagiti Israelita iti karayan, makitada nga agliplipias ti danum gapu iti naladaw a tudo iti Abril. Ania ngata ti aramidenda? Agkampoda ngata iti igid ti karayan sa urayenda nga ages-es ti danum kalpasan ti sumagmamano a lawas wenno nasursurok pay? Saan, naan-anay a nagtalekda ken Jehova ket sinurotda dagiti instruksionna. Ania ti resultana? Kunaen ti salaysay: “Iti kanito a . . . ti saksaka ti papadi a mangaw-awit iti Lakasa naitapogda iti igid ti dandanum . . . nangrugi nga agintek ti dandanum a sumalsalog manipud surong. . . . Bimmallasiw dagiti umili iti sanguanan ti Jerico. Kabayatanna ti papadi a mangaw-awit iti lakasa ti tulag ni Jehova nagtalinaedda a sitatakder a di aggargaraw iti namaga a daga iti tengnga ti Jordan bayat a bumalballasiw idi ti intero nga Israel iti namaga a daga.” (Jos. 3:12-17) Panunotem ti kasta unay a siddaaw dagiti Israelita idi nakitada a nagsardeng ti panagayus ti naapres a dandanum! Wen, napabileg ti pammatida ken Jehova gapu ta nagtalekda kadagiti instruksionna.

Agtaltalekka kadi ken Jehova kas kadagiti Israelita idi kaaldawan ni Josue? (Kitaen ti parapo 17, 18)

18 Pudno, saan a mangar-aramid ni Jehova iti kakasta a milagro para iti ilina ita, ngem bembendisionanna ti kinamatalekda. Pabpabilgenna ida babaen ti aktibo a puersana tapno maikasabada ti mensahe ti Pagarian iti intero a lubong. Ni napagungar a Kristo Jesus, kas kangrunaan a Saksi ni Jehova, impasiguradona kadagiti adalanna a tarabayenna ida iti daytoy nagpateg a trabaho. Kinunana: “Inkayo ngarud ket mangaramidkayo iti ad-adalan kadagiti tattao iti amin a nasion . . . Addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:19, 20) Personal a maibaga ti adu a managbabain a Saksi a ti nasantuan nga espiritu ti Dios ti nangpatured kadakuada a mangasaba kadagiti tattao a dida am-ammo.—Basaen ti Salmo 119:46; 2 Corinto 4:7.

19. Ania ti masiguradotayo iti laksid dagiti limitasiontayo?

19 Limitado ti maar-aramidan ti sumagmamano a kakabsat gapu iti sakit wenno panaglakay. Ngem masiguradoda a “ti Ama dagiti nadungngo nga asi ken ti Dios ti amin a liwliwa” matarusanna ti kasasaad ti tunggal pudno a Kristiano. (2 Cor. 1:3) Apresiarenna ti amin nga ar-aramidentayo a mangsuporta kadagiti interes ti Pagarian. Ngem laglagipentayo koma a ti pannakaisalakantayo ket nangnangruna nga agpannuray iti pammatitayo iti daton a subbot ni Kristo.—Heb. 10:39.

20, 21. Ania ti sumagmamano a pamay-an a maipakitatayo ti panagtalektayo ken Jehova?

20 Karaman iti panagdayawtayo iti Dios ti naan-anay a panangusartayo iti panawen, pigsa, ken sanikuatayo. Wen, kayattayo a naimpusuan nga ‘aramiden ti trabaho ti managebanghelio.’ (2 Tim. 4:5) Kinapudnona, maragsakantayo a tumulong iti sabsabali a maaddaan iti “umiso a pannakaammo iti kinapudno.” (1 Tim. 2:4) Nalawag a ti panangidayaw ken Jehova ti mamagbalin kadatayo a nabaknang iti naespirituan. (Prov. 10:22) Dayta met ti tumulong kadatayo a mangpatanor iti di maisin a panagtalektayo iti Namarsua.—Roma 8:35-39.

21 Kas nausigtayon, kasapulan ti panagregget tapno makapagtalektayo iti nainsiriban a panangiwanwan ni Jehova. Isu a pabilgentayo ti panagtalektayo ken Jehova babaen ti kararag. Mennamennaentayo no kasano ti panangibanagna iti pagayatanna iti napalabas kasta met iti masanguanan. Ken itultuloytayo a pabilgen ti panagtalektayo kenkuana babaen ti panagbalintayo nga aktibo iti trabaho ti Pagarian. Wen, agtalinaed iti agnanayon dagiti pammalagip ni Jehova. Ket agtalinaedka met iti agnanayon no ipangagmo dagita!