Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2013

Usigem no Ania a Kita ti Tao ti Rebbeng a Pagbalinam

Usigem no Ania a Kita ti Tao ti Rebbeng a Pagbalinam

“Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion!”—2 PED. 3:11.

1, 2. ‘Ania koma a kita ti tattao ti pagbalinantayo’ tapno magun-odtayo ti anamong ti Dios?

NATURAL laeng a maseknantayo no ania ti makuna kadatayo ti sabsabali. Ngem kas Kristiano, saan kadi nga ad-adda a maseknantayo iti makuna ni Jehova kadatayo? Wen ta isu ti katan-okan a Persona iti uniberso, ken isu ti “ubbog ti biag.”—Sal. 36:9.

2 Iti panangipaganetget ni apostol Pedro maipapan iti ‘kita ti tattao a rumbeng a pagbalinantayo’ iti imatang ni Jehova, indagadagna a ‘nasantuan koma ti panagbibiagtayo ken ipakitatayo ti ar-aramid ti nadiosan a debosion.’ (Basaen ti 2 Pedro 3:11.) Tapno magun-odtayo ti anamong ti Dios, masapul a nasantuan ti ‘panagbibiagtayo,’ kayatna a sawen, nadalus—iti moral, mental, ken naespirituan. Masapul met nga iparangarangtayo dagiti “ar-aramid ti nadiosan a debosion” kas panagraem iti Dios ken kinasungdo kenkuana. Saan laeng ngarud a ti kababalintayo ti karaman iti pananggun-od iti anamongna no di pay ket ti makin-uneg a kinataotayo. Yantangay ni Jehova ti “manangsukimat iti puso,” ammona no nasantuan ti ar-aramidtayo ken no naipamaysa ti debosiontayo kenkuana wenno saan.—1 Cron. 29:17.

3. Maipapan iti relasiontayo iti Dios, ania dagiti saludsod a masapul nga usigentayo?

3 Ti kabusortayo a ni Satanas a Diablo saanna a kayat a magun-odantayo ti anamong ti Dios. Kinapudnona, ar-aramidenna ti amin a kabaelanna tapno tallikudantayo ni Jehova. Kanayon nga ar-aramatenna ti kinaulbod ken kinasikap tapno maallilaw ken mayadayonatayo iti Dios a pagdaydayawantayo. (Juan 8:44; 2 Cor. 11:13-15) Rumbeng laeng ngarud nga isaludsodtayo iti bagitayo: ‘Kasano nga al-allilawen ni Satanas dagiti tattao? Ania ti maaramidak tapno masaluadak ti relasionko ken Jehova?’

KASANO NGA AL-ALLILAWEN NI SATANAS DAGITI TATTAO?

4. Iti panagregget ni Satanas a mangdadael iti relasiontayo iti Dios, ania ti pumpuntiriaenna, ken apay?

4 “Tunggal maysa masuot babaen ti pananggargari ken panangsulbog ti bukodna a derrep,” insurat ti adalan a ni Santiago. “Kalpasanna ti derrep, inton nayinawen, mangipasngay iti basol; kalpasanna, ti basol, inton naibanagen, mangpatanor iti ipapatay.” (Sant. 1:14, 15) Iti panagregget ni Satanas a mangdadael iti relasiontayo iti Dios, pumpuntiriaenna ti pagtataudan dagiti tarigagaytayo—ti pusotayo.

5, 6. (a) Kadagiti ania a pamay-an a pumpuntiriaennatayo ni Satanas? (b) Ania dagiti pangallilaw nga ar-aramaten ni Satanas tapno agbalin a dakes dagiti tarigagay ti pusotayo, ken kasano kalaingna a mangaramat kadagita?

5 Kasano a pumpuntiriaen ni Satanas ti pusotayo? “Ti intero a lubong adda iti pannakabalin daydiay nadangkes,” kuna ti Biblia. (1 Juan 5:19) Karaman kadagiti igam ni Satanas ket “ti bambanag nga adda iti lubong.” (Basaen ti 1 Juan 2:15, 16.) Iti las-ud ti rinibun a tawtawen, sisisikap a dinisenio ti Diablo daytoy a lubong tapno maallilawna dagiti tattao. Yantangay agbibiagtayo iti daytoy a lubong, masapul nga agannadtayo kadagiti nasikap a taktikana.—Juan 17:15.

6 Nangbukel ni Satanas kadagiti pamay-an tapno agbalin a dakes dagiti tarigagay ti puso. Nangdakamat ni apostol Juan iti tallo a pangallilaw nga ar-aramaten ni Satanas: (1) “ti derrep ti lasag,” (2) “ti derrep dagiti mata,” ken (3) “ti panangiparammag iti sanikua a pagbiag ti maysa.” Dagita ti inaramat ni Satanas iti panangsulisogna ken Jesus idiay let-ang. Yantangay nabayagen nga ar-aramaten dagita ni Satanas, ammona no ania ti epektibo a silo iti tunggal indibidual. Sakbay nga usigentayo no kasano a masaluadantayo ti bagitayo, kitaentayo no kasano a ti Diablo naallilawna ni Eva ngem saanna a naallilaw ti Anak ti Dios.

“TI DERREP TI LASAG”

Ti “derrep ti lasag” ti nakaallilawan ni Eva (Kitaen ti parapo 7)

7. Kasano nga inaramat ni Satanas ti “derrep ti lasag” iti panangsulisogna ken Eva?

7 Kasapulan ti tao ti taraon tapno agbiag. Ti Namarsua diniseniona ti daga a mangpataud iti nawadwad a taraon. Mabalin a puntiriaen ni Satanas ti natural a panagtarigagaytayo iti taraon tapno sulisogennatayo nga agaramid iti banag a di makaay-ayo iti Dios. Usigentayo no kasano a nagballigi ken Eva. (Basaen ti Genesis 3:1-6.) Imbaga ni Satanas a mabalin ni Eva ti mangan iti bunga ti “kayo ti pannakaammo iti naimbag ken dakes” ket saan a matay. Imbagana nga iti aldaw a pannangan ni Eva iti dayta, agbalinto a kas iti Dios. (Gen. 2:9) Imparipirip ngarud ti Diablo a saan a kasapulan ni Eva ti agtulnog iti Dios tapno agbiag. Anian a kinaulbod! Idi naimulan dayta a kapanunotan iti isip ni Eva, adda dua a pagpilianna: Mabalin nga iwaksina dayta, wenno pagtalinaedenna iti panunotna, a bay-anna a tumubo ti tarigagayna a mangan iti dayta a bunga. Nupay mabalinna ti mangan iti bunga ti amin a kayo iti minuyongan,  pinampanunotna ti kinuna ni Satanas maipapan iti kayo iti tengnga ti minuyongan, ket “rinugianna ti nangala iti bungana ket kinnanna dayta.” Pinatanor ngarud ni Satanas iti puso ni Eva ti panagtarigagay iti banag nga iparparit ti Namarsua.

Kanayon a linaglagip ni Jesus ti banag a kapatgan (Kitaen ti parapo 8)

8. Kasano a pinadas ni Satanas nga allilawen ni Jesus babaen ti tarigagay ti lasag, ken apay a saan a nagballigi?

8 Kasta met laeng a taktika ti inaramat ni Satanas idi sinulisogna ni Jesus idiay let-ang. Kalpasan a nagayunar ni Jesus iti 40 nga aldaw ken 40 a rabii, pinuntiria ni Satanas ti panagtarigagayna iti taraon. “No sika ket anak ti Dios,” kinuna ni Satanas, “ibagam itoy a bato nga agbalin a tinapay.” (Luc. 4:1-3) Adda dua a pagpilian ni Jesus: Usarenna ti pannakabalinna tapno mapennekna ti bisinna, wenno saan. Ammo ni Jesus a saan a rumbeng nga usarenna ti pannakabalinna agpaay iti bukodna a pagimbagan. Napatpateg kenkuana ti relasionna ken Jehova ngem ti panangpennekna iti bisinna. “Adda a naisurat,” insungbat ni Jesus, “‘Ti tao saan nga agbiag babaen iti tinapay laeng, no di ket iti tunggal sao a rumrummuar iti ngiwat ni Jehova.’”—Mat. 4:4.

“TI DERREP DAGITI MATA”

9. Ania ti ipasimudaag ti sasao a “ti derrep dagiti mata,” ket kasano a ginuyugoy ni Satanas daytoy a tarigagay iti puso ni Eva?

9 Dinakamat met ni Juan ti “derrep dagiti mata” kas maysa a silo. Ipasimudaag dayta a sasao a mabalin a mangrugi a tarigagayan ti maysa a tao ti maysa a banag babaen laeng ti ikikitana iti dayta. Daytoy idi a tarigagay ti puntiria ni Satanas idi kinunana ken Eva: “Sigurado a maluktan dagiti matayo.” Bayat a matmatmatan ni Eva ti maiparit a bunga, ad-adda met a nagbalin a makaay-ayo dayta kenkuana. Nakitana a ti kayo ket “maysa a banag a pakailiwan dagiti mata.”

10. Kasano nga inaramat ni Satanas ti tarigagay dagiti mata iti panangsulisogna ken Jesus, ken ania ti sungbat ni Jesus?

10 Kasano nga inaramat dayta ni Satanas iti biang ni Jesus? “Imparangna [ken Jesus] dagiti amin a pagarian ti mapagnaedan a daga; ket kinuna kenkuana ti Diablo: ‘Itedkonto kenka amin daytoy nga autoridad ken ti dayagda.’” (Luc. 4:5, 6) Saan a literal a nakita ni Jesus ti amin a pagpagarian ditoy daga, no di ket nasirmatana laeng ti dayagda. Impagarup la ketdi ni Satanas a maatrakarna ni Jesus babaen ti banag a makitana. Awanan bain a kinuna ni Satanas: “No mangaramidka iti tignay a panagdayaw iti sanguanak, kukuamto amin dayta.” (Luc. 4:7) Saan la ketdi a tumulok ni Jesus iti kayat ni Satanas nga aramidenna. Dagus nga insungbat ni Jesus: “Adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’”—Luc. 4:8.

“TI PANANGIPARAMMAG ITI SANIKUA A PAGBIAG TI MAYSA”

11. Kasano a naallilaw ni Satanas ni Eva?

11 Karaman iti bambanag iti lubong a dinakamat ni Juan ket ti “panangiparammag iti  sanikua a pagbiag ti maysa.” Idi da Adan ken Eva pay laeng ti tattao ditoy daga, siempre saanda a ‘maiparammag’ iti sabali a tao ti ‘aniaman a sanikua a pagbiagda.’ Ngem impakitada a napannakkelda. Idi allilawen ni Satanas ni Eva, imparipiripna nga adda nagsayaat a banag nga ipapaidam kenkuana ti Dios. Imbaga ti Diablo nga iti mismo nga aldaw a mangan ni Eva iti bunga ti “kayo ti pannakaammo iti naimbag ken dakes,” ‘sigurado nga agbalin a kas iti Dios, a makaammo iti naimbag ken dakes.’ (Gen. 2:17; 3:5) Imbaga ngarud ni Satanas a mabalin ni Eva ti agbiag uray awan ni Jehova. Nalawag a kinapannakkel ti makagapu nga inawatna dayta a kinaulbod. Kinnan ni Eva ti maiparit a bunga, ket namati a saan nga agpayso a matay. Anian a pannakaallilaw!

12. Ania ti sabali pay a pamay-an nga inaramat ni Satanas a pangsulisog ken Jesus, ken ania ti sungbat ni Jesus?

12 Saan a kas ken Eva, ni Jesus ket nagsayaat nga ulidan ti kinapakumbaba! Pinadas ni Satanas nga allilawen ni Jesus iti sabali pay a pamay-an, ngem inwaksina uray pay ti kapanunotan a mangaramid iti banag a mangsubok iti Dios ta kinapannakkel dayta. Imbes ketdi, nalawag ken direkta ti sungbat ni Jesus: “Adda a naikuna, ‘Dika suboken ni Jehova a Diosmo.’”—Basaen ti Lucas 4:9-12.

KASANOTAYO A MASALUADAN TI RELASIONTAYO KEN JEHOVA?

13, 14. Ilawlawag no kasano nga us-usaren ita ni Satanas ti sumagmamano a silo.

13 Ar-aramaten met ita ni Satanas dagiti isu met laeng a pangallilaw nga inusarna kada Eva ken Jesus. Tapno maguyugoyna ti “derrep ti lasag,” ar-aramatenna ti lubongna tapno itandudona ti immoralidad ken nalabes a pampannangan ken panagin-inum. Babaen ti pornograpia, nangruna iti Internet, maalana ti atension ti di naannad nga agbuybuya ken maguyugoyna ti “derrep dagiti mata[na].” Ket anian a nagbileg ti materialismo, pannakabalin, ken dayaw para iti maysa a napannakkel ken kadagidiay agannayas a ‘mangiparammag kadagiti sanikuada’!

Ania dagiti Nainkasuratan a prinsipio a masapul a laglagipentayo no maipasangotayo kadagitoy a kasasaad? (Kitaen ti parapo 13, 14)

14 “Ti bambanag nga adda iti lubong” ket kas kadagiti appan ti mangngalap. Makaatrakar dagita, ngem tunggal maysa ket naikabit iti banniit. Ar-aramaten ni Satanas ti ibilbilang dagiti tattao kas inaldaw a kasapulan tapno tignayenna ida a mangaramid iti banag a maisalungasing kadagiti linteg ti Dios. Ngem dagita a nasikap a pannulisog ket nadisenio a mangimpluensia kadagiti tarigagaytayo ken mamagbalin a dakes iti pusotayo. Kayat ni Satanas a patientayo a napatpateg ti panangasikaso kadagiti personal  a kasapulan ken pagnam-ayantayo ngem iti panangaramid iti pagayatan ti Dios. Agpaallilawtayo kadi kadagitoy a silo?

15. Kasanotayo a matulad ti saan nga itutulok ni Jesus kadagiti pannulisog ni Satanas?

15 Timmulok ni Eva kadagiti pannulisog ni Satanas, ngem saan ni Jesus. Iti tunggal gundaway, nangipaay ni Jesus iti Nainkasuratan a sungbat, a kinunana: “Adda a naisurat” wenno, “Adda a naikuna.” No nasaettayo nga agadal iti Biblia, agbalintayo a pamiliar iti Kasuratan ket maipalagip dagiti teksto a makatulong kadatayo bayat a maipaspasangotayo iti sulisog. (Sal. 1:1, 2) No lagipentayo dagiti matalek nga indibidual iti Biblia a nagbalin a nasungdo iti Dios, matignaytayo a mangtulad iti ulidanda. (Roma 15:4) Agserbi a salaknibtayo ti kaadda ti nauneg a panagraemtayo ken Jehova, a kaipapananna nga ayatentayo ti ayatenna ken guraentayo ti kagurana.—Sal. 97:10.

16, 17. Ania ti epekto iti kinataotayo ti ‘pannakabalintayo nga agrason’?

16 Paregtaennatayo ni apostol Pablo a mangusar iti ‘pannakabalintayo nga agrason’ tapno agbalintayo a kita ti tao a nasukog maitunos iti pampanunot ti Dios, saan nga iti lubong. (Roma 12:1, 2) Impaganetget pay ni Pablo a kasapulantayo a pilien ti ipastrektayo iti panunottayo: “Ibalbalintuagmi dagiti panagrasrason ken tunggal natan-ok a banag a naibangon maibusor iti pannakaammo iti Dios; ket kautibuenmi ti tunggal panunot tapno pagbalinen a natulnog iti Kristo.” (2 Cor. 10:5) Dakkel ti epekto ti pampanunottayo iti kita ti tao a pagbalinantayo, isu a masapul nga “itultuloy[ta]yo nga utoben” ti makaparegta a bambanag.—Fil. 4:8.

17 Saantay nga agbalin a nasantuan no ipaspastrektayo iti panunottayo dagiti di umiso a kapanunotan ken tarigagay. Masapul nga ayatentayo ni Jehova buyogen ti “nadalus a puso.” (1 Tim. 1:5) Ngem nagulib ti puso, ket mabalin a saantay a madmadlaw a nakaro gayamen ti impluensia kadatayo ti “bambanag nga adda iti lubong.” (Jer. 17:9) Gapuna, saan kadi a rumbeng nga ‘itultuloytayo a suboken no addatayo iti pammati, ken itultuloytayo a paneknekan no aniatayo’ babaen ti napudno a panangusigtayo iti bagitayo maitunos kadagiti maad-adaltayo iti Biblia?—2 Cor. 13:5.

18, 19. Apay a determinadotayo koma nga agbalin a kas iti kita ti tao a kayat ni Jehova a pagbalinantayo?

18 Ti sabali pay a makatulong tapno maidiantayo ti “bambanag nga adda iti lubong” ket ti pananglaglagip iti naipaltiing a sasao ni Juan: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Nupay agparang a kasla permanente ken natalged ti sistema ni Satanas, dumtengto ti aldaw nga agpatingga. Awan ti aniaman a permanente a maipaay ti lubong ni Satanas. No laglagipentayo dayta, saantayto a maallukoy kadagiti pangallilaw ti Diablo.

19 Imparegta ni apostol Pedro a datayo koma ti kita ti tao nga anamongan ti Dios bayat nga “ur-urayen[tayo] ken agtaltalinaed[tayo] a silalagip unay iti kaadda ti aldaw ni Jehova, a babaen iti dayta marunawto ti langlangit yantangay maur-uramda ket malunagto ti el-elemento yantangay nakapudpudotda unay!” (2 Ped. 3:12) Din agbayag, dumtengton dayta nga aldaw, ket dadaelento ni Jehova ti amin a paset ti lubong ni Satanas. Ngem agingga a di pay dimteng dayta, itultuloy ni Satanas nga aramaten ti “bambanag nga adda iti lubong” a pangsulisog kadatayo, kas iti inaramidna kada Eva ken Jesus. Saantayo koma a kas ken Eva a nangpennek kadagiti bukodna a tarigagay. No tuladentayo ni Eva, arigna bigbigbigentayo ni Satanas kas diostayo. Ni koma Jesus ti tuladentayo ket sarangtentayo dagiti kasta a pannulisog, nupay kasla makaguyugoy ken makaatrakar dagita. Sapay koma ta determinadotayo amin nga agbalin a kita ti tao a kas iti kayat ni Jehova a pagbalinantayo.