Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2013

Salsaludsod Dagiti Agbasbasa

Salsaludsod Dagiti Agbasbasa

Mayanatup kadi a katugaw dagiti Kristiano a nagannak ti nailaksid a menor de-edad nga anakda bayat dagiti gimong ti kongregasion?

Awan ti nainkalintegan a rason a pakaseknantay unay no sadino ti pagtugawan ti maysa a nailaksid bayat ti gimong iti Kingdom Hall. Parparegtaen daytoy a magasin dagiti Kristiano a nagannak a tulonganda iti naespirituan ti nailaksid nga anakda nga adda pay laeng iti poderda, no mayanatup nga aramidenda dayta. Kas nadakamat iti panid 19 ken 20 ti Nobiembre 15, 1988 a Ti Pagwanawanan, mabalin pay ketdi dagiti nagannak a yadalan iti Biblia ti nailaksid nga anakda a menor de-edad nga aggigian pay laeng kadakuada. Manamnama a maipaayan dayta nga anak iti pammaregta a kasapulanna tapno mailinteg ti danana.

No maipapan iti panagtugaw iti Kingdom Hall, umiso laeng a ti nailaksid a menor de-edad ket siuulimek a makikatugaw kadagiti nagannakna. Yantangay saan a maikalikagum iti maysa a nailaksid nga agtugaw iti likud, awan dakesna no ti nailaksid nga anak ket makikatugaw kadagiti nagannakna, sadinoman ti pagtugawanda. Bayat nga ay-aywanan dagiti nagannak ti espiritualidad ti anakda, kayatda la ketdi a siguraduen a magunggonaan isuna kadagiti gimong. Isu a mabalin a makatulong ti panagtugaw ti anakda iti sibayda, imbes a komporme lattan ti pagtugawanna.

Ngem kasanon no ti nailaksid nga anak ket awanen iti poder dagiti nagannakna? Kayatna kadi a sawen a saannan a mabalin ti makikatugaw kadakuada? Iti napalabas, inlawlawag daytoy a magasin ti umiso a takder dagiti Kristiano maipapan iti pannakilangen iti maysa a nailaksid a kabagian a saanda a kabbalay. * Ngem ti panagtugaw a siuulimek ti maysa a nailaksid iti sibay dagiti kabagianna kabayatan ti gimong ket naiduma unay iti inggagara ken di nasken a pannakilangen kenkuana dagiti kabagianna. No umiso ti panangmatmat dagiti matalek a miembro ti pamilia ken sursurotenda ti Nainkasuratan a balakad mainaig iti pannakilangen iti nailaksid a kabagianda, awan ngarud koma ti tumaud nga isyu.—1 Cor. 5:11, 13; 2 Juan 11.

No la ket saan a makaistorbo ti maysa a nailaksid, saantay koma a rumbeng a pakaseknan sadinoman ti pagtugawanna, iti man sibay ti kabagianna wenno ti sabali a miembro ti kongregasion. Ti panangikeddeng iti pagtugawan ti maysa a tao ket mangpataud laeng iti nadumaduma a parikut, depende iti kasasaad. No ti tunggal tumabuno, pakairamanan dagiti matalek a kakabagian, ikagumaanna a raemen dagiti prinsipio ti Biblia mainaig iti pannakailaksid, ken saan a pakaitibkolan dayta ti dadduma a kakabsat, saantay koma a pagbalinen nga isyu no sadino ti pagtugawan dagiti umatender kadagiti Nakristianuan a gimong. *

^ par. 5 Kitaen Ti Pagwanawanan a Marso 15, 1982, panid 24 ken 25, kasta met ti libro nga Agtalinaedka iti Ayat ti Dios, panid 207-209.

^ par. 6 Daytoy ti mangsukat iti nailawlawag iti The Watchtower nga Abril 1, 1953, panid 223.