Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2013

Dika Koma ‘Agpungtot Maibusor ken Jehova’

Dika Koma ‘Agpungtot Maibusor ken Jehova’

“Ti kinamaag ti naindagaan a tao isu ti mangkilkillo iti dalanna, ket ngarud ti pusona makapungtot a maibusor ken Jehova a mismo.”—PROV. 19:3.

1, 2. Apay a ditay rumbeng a pabasolen ni Jehova iti adu a parikut ti sangatauan? Mangted iti pagarigan.

IPAPANTAYON nga adun a tawen a naragsak ti biagmo kas naasawaan. Ngem iti maysa nga aldaw, nasangpetam nga agkaiwara ti amin a bambanag iti balayyo. Naperdi dagiti muebles, nabuong dagiti alikamen iti kosina, ken awan nagbalbalinan ti karpet. Kasla adda allawig a limmabas iti il-ilalaem a pagtaengan. Sidadarasudos kadi a kunaem, “Apay nga inaramid daytoy ni baketko?” Wenno ibagam, “Asino ti nangaramid iti daytoy?” Ti la ketdi maikadua a saludsod ti dagus a mapanunotmo. Apay? Gapu ta ammom nga adayo a maaramid dayta ti dungdungnguem nga asawa.

2 Iti agdama, makitkitatayo a madaddadael ti pagtaengan ti tao gapu iti polusion, kinaranggas, ken immoralidad. Kas agad-adal iti Biblia, ammotayo a saan la ketdi a ni Jehova ti makinggapuanan kadagitoy a parikut. Pinarsuana daytoy a planeta tapno agbalin a makaay-ayo a paraiso. (Gen. 2:8, 15) Ni Jehova ket naayat a Dios. (1 Juan 4:8) Iti panagadaltayo iti Kasuratan, naammuantayo no asino ti pudpudno a makinggapuanan iti adu a panagsagaba ditoy daga—ni Satanas a Diablo, ti “agturay iti lubong.”—Juan 14:30; 2 Cor. 4:4.

3. Kasano nga agbalin a di umiso ti panangmatmattayo kadagiti parikuttayo?

3 Ngem saantay met a maipabasol ken Satanas ti amin a sagsagabaentayo. Apay? Gapu ta datayo a mismo ti makinggapuanan iti dadduma a parikuttayo. (Basaen ti Deuteronomio 32:4-6.) Mabalin nga admitirentayo dayta. Ngem gapu iti kinaimperpektotayo, mabalin a di umiso ti panangmatmattayo kadagiti parikuttayo ket surotentayo ti dana a mangituggod iti panagsagabatayo inton agangay. (Prov. 14:12) Iti ania a pamay-an? Imbes a pabasolentayo ti bagbagitayo wenno ni Satanas, mabalin a ni Jehova  ti ibagatayo a makimbasol kadagiti problematayo. Amangan no ‘makapungtottayo pay ketdi maibusor ken Jehova a mismo.’—Prov. 19:3.

4, 5. Kasano a mabalin a “makapungtot a maibusor ken Jehova” ti maysa a Kristiano?

4 Talaga kadi a mabalin a “makapungtot[tayo] a maibusor ken Jehova”? Sigurado nga awan ti maganabtayo no aramidentayo dayta. (Isa. 41:11) Kinuna ti maysa a dumadaniw: “Saan a pulos dumanon dagiti danogmo iti Dios.” Mabalin a ditay met ketdi direkta a yebkas ti reklamotayo maibusor ken Jehova. Ngem kuna ti Proverbio 19:3 a ti kinamaag ti tao ti “mangkilkillo iti dalanna, ket ngarud ti pusona makapungtot a maibusor ken Jehova a mismo.” Wen, iti puso ti maysa a tao, mabalin nga agpungtot ken agsakit ti nakemna iti Dios. Nalabit madlaw daytoy iti tigtignayna. Kas pagarigan, mabalin nga isardengnan ti makitimpuyog iti kongregasion wenno saannan a naan-anay a suportaran dagiti urnos iti panagdaydayaw ken Jehova.

5 Ania ti mabalin a makagapu a ‘makapungtottayo ken Jehova’? Kasanotayo a maliklikan dayta a silo? Nagpateg a maammuantayo ti sungbat dagitoy a saludsod ta nainaig dagita iti mismo a relasiontayo ken Jehova a Dios.

ANIA TI POSIBLE A MAKAGAPU A ‘MAKAPUNGTOTTAYO KEN JEHOVA’?

6, 7. Apay a dagiti Israelita idi tiempo ni Moises nagreklamoda maibusor ken Jehova?

6 Ania ti posible a mangituggod iti puso ti matalek nga adipen ni Jehova nga agreklamo maibusor iti Diosna? Usigentayo ti lima a makagapu ket amirisentayo dagiti pagarigan iti Biblia no kasano a natnag ti dadduma iti daytoy a silo.—1 Cor. 10:11, 12.

Adda pagdaksanna no denggem ti negatibo a kunaen ti sabsabali (Kitaen ti parapo 7)

7 Mabalin a maimpluensiaantayo kadagiti negatibo a kunaen ti sabsabali. (Basaen ti Deuteronomio 1:26-28.) Kalkalpas laeng idi a naispal dagiti Israelita manipud pannakaadipenda idiay Egipto. Simimilagro nga inyeg ni Jehova ti sangapulo a saplit iti dayta a manangirurumen a nasion sa dinadaelna ni Faraon ken ti buyotna iti Nalabaga a Baybay. (Ex. 12:29-32, 51; 14:29-31; Sal. 136:15) Nakasagana idin a sumrek ti ili ti Dios iti Naikari a Daga. Ngem nangrugi nga agreklamo dagiti Israelita maibusor ken Jehova. Apay a kimmapuy ti pammatida? Naupay ken nalapunosda iti buteng gapu iti negatibo nga impadamag ti kaaduan kadagiti naibaon a mangsimisim iti daga. (Num. 14:1-4) Ania ti nagbanaganna? Daydi a kaputotan ket saan a napalubosan a sumrek iti “nasayaat a daga.” (Deut. 1:34, 35) Palpalubosantayo kadi no dadduma a dagiti negatibo nga ibagbaga ti sabsabali ti mangpakapuy iti pammatitayo ket agreklamotayo maipapan iti wagas a panangiwanwan ni Jehova kadatayo?

8. Ania ti makagapu a ti ili ti Dios idi kaaldawan ni Isaias pinabasolda ni Jehova iti narigat a kasasaadda?

8 Mabalin a maupaytayo gapu kadagiti pakarigatan ken parikut. (Basaen ti Isaias 8:21, 22.) Idi kaaldawan ni Isaias, nagsagaba ti nasion ti Juda iti nakaro a parikut. Napalikmutanda kadagiti kabusor. Nakirang ti taraon. Adu ti mabisbisinan. Nakarkaro pay, agsagsagabada iti naespirituan a panagbisin. (Amos 8:11) Imbes nga agpatulongda ken Jehova, ‘indawdawatda ketdi ti pagdaksan’ ti arida ken ti Diosda. Wen, ni Jehova ti pinabasolda kadagiti problemada. No agsagsagabatayo iti didigra wenno personal a problema, kunaentay met kadi iti pusotayo, ‘Ayan ni Jehova idi kasapulak?’

9. Apay a naaddaan iti di umiso a panangmatmat dagiti Israelita idi kaaldawan ni Ezequiel?

9 Ditay ammo ti amin a detalye. Gapu ta dida ammo ti amin a detalye, dagiti Israelita idi kaaldawan ni Ezequiel imbilangda a ‘saan a naatur’ wenno saan a nalinteg ti dalan ni Jehova. (Ezeq. 18:29) Arigna nga isuda a mismo ti nangukom iti Dios. Imbilangda a nasaysayaat dagiti pagalagadanda iti kinahustisia ngem kadagiti pagalagadan ni Jehova ket inukomda ti Dios maibatay iti limitado a pannakatarusda iti paspasamak.  No ditay naan-anay a matarusan ti maysa a salaysay iti Biblia wenno dagiti paspasamak iti biagtayo, ipapantayo met kadi a ti dalan ni Jehova ket di nainkalintegan, wenno ‘saan a naatur’?—Job 35:2.

10. Kasano a tultuladen ti dadduma ti di umiso nga inaramid ni Adan?

10 Pabasolentayo ti sabsabali gapu iti bukodtayo a basol ken kamali. Idi rugrugi ti pakasaritaan ti tao, binabalaw ni Adan ti Dios gapu iti naaramidanna a basol. (Gen. 3:12) Nupay inggagara ni Adan ti agbasol ken ammona dagiti pagbanagan ti panangsalungasingna iti linteg ti Dios, kaskasdi a pinabasolna ni Jehova. Kasla imbagana ken Jehova a nangipaay iti dakes nga asawa. Sipud idin, addan dagidiay kas ken Adan a mangipabpabasol iti Dios kadagiti naaramidanda a kamali. Nasayaat nga isaludsodtayo iti bagbagitayo, ‘Ibilbilangko kadi nga istrikto unay dagiti pagalagadan ni Jehova gapu iti pannakadismayak kadagiti naaramidak a kamali?’

11. Ania ti masursurotayo ken Jonas?

11 Bagbagitayo laeng ti pampanunotentayo. Saan a naragsakan ni propeta Jonas idi naasian ni Jehova iti siudad ti Nineve. (Jon. 4:1-3) Apay? Nalawag a maseknan unay iti reputasionna no saan a matungpal ti inwaragawagna a pannakadadael. Minatmatanna a napatpateg ti reputasionna ngem iti panangngaasina koma kadagiti agbabbabawi nga umili ti Nineve. Posible met kadi a ti bagbagitayo laeng ti pampanunotentayo, nga uray la ‘makapungtottayo ken Jehova’ ta dina met la iyegen ti panungpalan? No adun a tawtawen nga ikaskasabatayo nga asidegen ti aldaw ni Jehova, masurontayo kadi ken Jehova no uyawen ti dadduma ti panangiwaragawagtayo iti kunaen ti Biblia?—2 Ped. 3:3, 4, 9.

NO KASANO A MALIKLIKAN TI ‘AGPUNGTOT MAIBUSOR KEN JEHOVA’

12, 13. No mangrugi a kuestionaran ti pusotayo ti sumagmamano nga ar-aramid ni Jehova, ania ti masapul nga aramidentayo?

12 Ania ti mabalin nga aramidentayo no mangrugi a kuestionaran ti managbasol a pusotayo ti dadduma nga ar-aramid ni Jehova? Laglagipentayo a di nainsiriban dayta. Kuna ti sabali pay a patarus ti Proverbio 19:3: “Adda tattao a mangdadael kadagiti bagbagida babaen kadagiti minamaag nga aramidda sada pabasolen ti Apo.” (Ti Baro a Naimbag a  Damag Biblia) Mainaig iti dayta, usigentayo ita ti lima a banag a makatulong tapno ditay babalawen ni Jehova gapu kadagiti pannakapaay iti biag.

13 Pagtalinaedem a nasinged ti relasionmo ken Jehova. No nasingedtayo ken Jehova, saantayto a makapungtot kenkuana. (Basaen ti Proverbio 3:5, 6.) Masapul nga agtalektayo ken Jehova ken liklikantayo ti agbalin a masirib kadagiti bukodtayo a mata wenno agbalin a managimbubukodan. (Prov. 3:7; Ecl. 7:16) Iti kasta, saantayto a babalawen ni Jehova no adda dakes a mapasamak.

14, 15. Ania ti makatulong kadatayo tapno saantay a maapektaran iti negatibo nga ibagbaga ti sabsabali?

14 Dimo itulok a maapektaranka iti negatibo nga ibagbaga ti sabsabali. Adu ti panggapuan dagiti Israelita idi kaaldawan ni Moises a mamati a kabaelan ni Jehova a sibaballigi nga iturong ida iti Naikari a Daga. (Sal. 78:43-53) Ngem idi nangngegda ti negatibo nga impadamag dagiti sangapulo a di matalek nga espia, saanda a “linagip ti ima [ni Jehova].” (Sal. 78:42) No mennamennaentayo ti ar-aramid ni Jehova, a laglagipentayo ti amin a naimbag a banag nga inaramidna para kadatayo, bumileg ti relasiontayo kenkuana. Kas resultana, ditayto itulok a mayadayotayo ken Jehova gapu laeng iti negatibo a kapanunotan ti sabsabali.—Sal. 77:11, 12.

15 Kasanon no negatibo ti panangmatmattayo kadagiti kapammatiantayo? Ti kasta a panangmatmat apektaranna ti relasiontayo ken Jehova. (1 Juan 4:20) Idi kinuestionaran dagiti Israelita ti pannakadutok ni Aaron kas nangato a padi, imbilang dayta ni Jehova kas panagtanabutob maibusor Kenkuana. (Num. 17:10) Kasta met, no agtanabutobtayo maibusor kadagidiay ar-aramaten ni Jehova a mangiturong iti naindagaan a paset ti organisasionna, ipampamatmattayo nga agrekreklamotayo maibusor Kenkuana.—Heb. 13:7, 17.

16, 17. Ania ti masapul a laglagipentayo no addaantay kadagiti problema?

16 Laglagipem a saan a ni Jehova ti makinggapuanan kadagiti parikuttayo. Nupay timmallikud ken Jehova dagiti Israelita idi kaaldawan ni Isaias, kaskasdi a kayatna ida a tulongan. (Isa. 1:16-19) Aniaman a problema ti pakaipasanguantayo, makaliwliwa a maammuan a maseknan kadatayo ni Jehova ken kayatnatay a tulongan. (1 Ped. 5:7) Kinapudnona, inkarina nga itedna ti kasapulantay a pigsa tapno makapagtultuloytayo nga agibtur.—1 Cor. 10:13.

17 No agsagsagabatayo iti di kinahustisia—kas idi ken matalek a Job—laglagipentayo a saan a ni Jehova ti makinggapuanan iti dayta. Kagura ni Jehova ti di kinahustisia, ngem ayatenna ti kinalinteg. (Sal. 33:5) Kas ken Eliu a gayyem ni Job, bigbigentayo met koma nga: “Adayo . . . iti pudno a Dios nga agtignay a sidadangkes, ken iti Mannakabalin-amin nga agtignay a di nainkalintegan!” (Job 34:10) Saan a ni Jehova ti makinggapuanan kadagiti problematayo. Imbes ketdi, ipapaayna kadatayo ti “tunggal naimbag a sagut ken tunggal naan-anay a rangkap.”—Sant. 1:13, 17.

18, 19. Apay a ditay koma pulos pagduaduaan ni Jehova? Mangted iti ilustrasion.

18 Dimo pulos pagduaduaan ni Jehova. Ti Dios ket perpekto, ket nangatngato ti pampanunotna ngem iti pampanunottayo. (Isa. 55:8, 9) Napateg ngarud ti kinapakumbaba ken kinaemma tapno maaklontayo a limitado ti pannakaawattayo. (Roma 9:20) Kaaduanna a saantay nga ammo ti amin a detalye ti maysa a situasion. Sigurado a napaneknekamon nga agpayso daytoy a proverbio: “Kasla pudno ti amin a sao ti umuna a mangikalintegan iti bagina iti pangukoman agingga nga iparang met ti bangir ti kalinteganna.”—Prov. 18:17, Ti Baro a Naimbag a Damag Biblia.

19 No adda talkentayo a gayyem a nakaaramid iti banag a ditay maawatan wenno kasla karkarna, dagus kadi nga ipapantayo nga adda dakes nga ar-aramidenna? Wenno  agtalektay latta kenkuana, nangnangruna no adun a tawen nga am-ammotayo dayta a tao? No kasta ti panangtratotayo kadagiti imperpekto a gagayyemtayo, anian nga ad-adda nga agtalektayo iti nailangitan nga Amatayo, nga adayo a nangatngato ti daldalan ken pampanunotna ngem kadatayo!

20, 21. Apay a ditay rumbeng a pabasolen ni Jehova kadagiti problematayo?

20 Pabasolem ti rumbeng a pabasolen. Apay? Mabalin ngamin a datayo met laeng ti makinggapuanan iti dadduma a problematayo, ket bigbigentayo koma dayta. (Gal. 6:7) Ditay koma ipabasol ken Jehova dagiti problematayo. Apay a di nainkalintegan dayta? Usigem daytoy: Ania ti mapasamak no ti drayber ti maysa a lugan ket napartak unay ti panagpatarayna iti kurbada? Mabalin a maaksidente. Panagkunam, umiso kadi a pabasolen ti drayber ti paktoria a nangaramid iti lugan? Siempre saan! Umasping iti dayta, ni Jehova pinarsuanatayo nga addaan iti wayawaya nga agpili. Ngem inikkannatay met kadagiti pagannurotan a tumulong kadatayo a mangaramid kadagiti nainsiriban a desision. Isu nga apay koma a pabasolentayo ti Namarsua gapu kadagiti kamalitayo?

21 Siempre, saan nga amin a problematayo ket resulta ti bukodtayo a kamali. Adda dagiti pasamak a resulta ti “tiempo ken ti di mapakpakadaan a pasamak.” (Ecl. 9:11) Ngem ditay koma liplipatan a ni Satanas ti kangrunaan a makagapu iti kinadakes. (1 Juan 5:19; Apoc. 12:9) Isu ti kabusor—saan a ni Jehova!—1 Ped. 5:8.

TAGIPATGEM TI NAPATEG A RELASIONMO KEN JEHOVA

Nabendisionan da Josue ken Caleb gapu iti panagtalekda ken Jehova (Kitaen ti parapo  22)

22, 23. Ania koma ti laglagipentayo no maupaytayo gapu kadagiti problematayo?

22 No agpaspasarka kadagiti nadagsen a parikut, laglagipem ti ulidan da Josue ken Caleb. Saan a kas iti sangapulo nga espia a kakaduada, nangipaay dagitoy a matalek a lallaki iti positibo a damag. (Num. 14:6-9) Nabileg ti pammatida ken Jehova. Nupay kasta, nairamanda a nagallaalla iti 40 a tawen a kadua dagiti Israelita. Nagreklamoda kadi wenno nagsakit ti nakemda, ket impapanda a di nainkalintegan ni Jehova? Saan, no di ket nagtalekda Kenkuana. Nabendisionanda kadi? Wen. Nupay daydi a kaputotan ket natay idiay let-ang, agpada a nakastrek dagitoy a lallaki iti Naikari a Daga. (Num. 14:30) Umasping iti dayta, awatentay met ti bendision ni Jehova no ditay “mabannog” nga agaramid iti pagayatanna.—Gal. 6:9; Heb. 6:10.

23 Ania ti masapul nga aramidem no maup-upayka gapu kadagiti problema, kinaimperpekto ti sabsabali, wenno iti mismo a kinaimperpektom? Ipamaysam a panunoten dagiti nagsasayaat a kualidad ni Jehova. Panunotem ti agbalin a kasasaadmo inton tungpalenen ni Jehova dagiti karina. Saludsodam ti bagim, ‘Kasanoak ngatan no awan ni Jehova?’ Agtalinaedka a nasinged kenkuana, ket dimo itulok a makapungtotka maibusor kenkuana!