Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2013

Agpipinnanunot ken Agpipinnaregtatayo

Agpipinnanunot ken Agpipinnaregtatayo

“Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid.”—HEB. 10:24.

1, 2. Ania ti nakatulong kadagiti 230 a Saksi ni Jehova a makalasat iti “martsa ni patay” idi agngudon ti Gubat Sangalubongan II?

IDI marmarpuogen ti turay a Nazi idi agngudon ti Sangalubongan a Gubat II, naibilin a mapapatay ti rinibu a balud nga adda kadagiti kampo konsentrasion. Dagiti balud iti kampo ti Sachsenhausen ket naiplano a maipan kadagiti sangladan iti igid ti baybay tapno mailuganda iti barko a mabay-an a lumned. Paset dayta ti plano a naawagan idi agangay iti “martsa ni patay” (death march).

2 Naikeddeng a ti 33,000 a balud manipud iti kampo konsentrasion iti Sachsenhausen ket magna iti 250 kilometro (155 milia) a mapan kadagiti sangladan iti siudad ti Lübeck iti Germany. Ti 230 kadakuada ket Saksi ni Jehova manipud iti innem a pagilian. Kimmapsutda amin gapu iti bisin ken sakit. Kasano a nalasatan dagiti kakabsattayo dayta a martsa? “Kanayon a pabilgenmi ti maysa ken maysa nga agtultuloy a magna,” kinuna ti maysa kadakuada. Iti tulong ti inted-Dios a “pannakabalin a nalablabes ngem ti gagangay” ken ti ayatda iti maysa ken maysa, nalasatanda dayta a narigat a kasasaad.—2 Cor. 4:7.

3. Apay a masapul nga agpipinnaregtatayo?

3 Awantayo iti kasta a martsa, ngem mapaspasarantayo ita ti adu a pakarigatan. Kalpasan ti pannakaipasdek ti Pagarian ti Dios idi 1914, napaksiat ni Satanas idiay langit ket naitapuak ditoy daga nga addaan “dakkel nga unget, yantangay ammona nga ababan ti periodo ti tiempona.” (Apoc. 12:7-9, 12) Bayat nga umad-adani ti Armagedon, us-usaren ni Satanas dagiti pakarigatan ken parikut tapno kumapuy ti espiritualidadtayo. Degdegan pay dayta dagiti inaldaw a pakaburiborantayo. (Job 14:1; Ecl. 2:23) No dadduma, mapaksuyantayo gapu iti agnanaay nga epekto dagiti pakarigatantayo nga uray la maibus ti emosional ken naespirituan a pigsatayo a mangdaer iti pannakaupay. Kas pagarigan, iti unos ti adu a tawtawen, pinarparegta ti maysa a kabsat ti adu nga indibidual nga agmatalek ken Jehova. Ngem idi lakayen, nagsakitda ken baketna ket nangrugi a maupay. Kas iti dayta a kabsat, kasapulantayo amin ti “pannakabalin a nalablabes ngem ti  gagangay” manipud ken Jehova kasta met ti pammaregta dagiti kakabsat.

4. Tapno makaipaaytayo iti pammaregta, ania a balakad ni apostol Pablo ti nasken nga ipapusotayo?

4 Tapno makaipaaytayo iti pammaregta, nasken nga ipapusotayo ti balakad ni apostol Pablo kadagiti Hebreo a Kristiano. Kinunana: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Heb. 10:24, 25) Kasanotayo a mayaplikar daytoy a nagpateg a balakad?

“AGPIPINNANUNOTTAYO KOMA ITI MAYSA KEN MAYSA”

5. Ania ti kaipapanan ti ‘panagpipinnanunot iti maysa ken maysa,’ ken ania ti masapul nga aramidentayo?

5 Ti ‘panagpipinnanunot iti maysa ken maysa’ kaipapananna ti “panangammo iti kasapulan ti sabsabali, panangikabilangan kadakuada.” Ikabkabilangantay ngata ti kasapulan ti sabsabali no limitarantayo met ti pannakisaritatayo kadakuada babaen ti ababa a kablaawtayo iti Kingdom Hall wenno makisaritatayo met kadakuada ngem maipapan laeng kadagiti banag a di napateg? Saan. Siempre, kayattayo ti agannad tapno ti laeng ‘bukodtayo nga aramid ti asikasuentayo’ ket saantayo nga agbalin a ‘mannakibiang iti ar-aramid ti sabsabali a tattao.’ (1 Tes. 4:11; 1 Tim. 5:13) Ngem no kayattayo a paregtaen dagiti kakabsattayo, masapul nga am-ammuentay ida—no ania ti kasasaadda iti biag, dagiti kualidadda, ti espiritualidadda, dagiti paglainganda, ken dagiti pagkapuyanda. Napateg nga ibilangdatayo kas gagayyem ken mariknada nga ay-ayatentay ida. Agkasapulan daytoy iti panangipaaytayo iti panawen kadakuada—saan laeng a no adda problemada ken no maupayda, no di ket iti dadduma pay a gundaway.—Roma 12:13.

6. Ania ti makatulong iti maysa a panglakayen tapno maipakitana a maseknan kadagidiay adda iti aywanna?

6 Naidagadag kadagiti panglakayen nga ‘ipastoranda ti arban ti Dios nga adda iti aywanda,’ a situtulok ken sigagagar nga aramidenda dayta. (1 Ped. 5:1-3) Kasanoda ngata a maitungpal dayta nga annongen no dida met am-ammo dagiti karnero nga adda iti aywanda? (Basaen ti Proverbio 27:23.) No ipakita dagiti panglakayen a sisasaganada a tumulong ken maragsakanda a makikadua kadagiti kapammatianda, mas komportable ti rikna dagiti kakabsat nga agkiddaw iti tulong no kasapulanda. Nalaklakanto met a yebkas dagiti kakabsat ti pudno a rikrikna ken pakaseknanda. Kas resultana, maipaay dagiti panglakayen ti tulong a kasapulan ti tunggal maysa nga adda iti aywanda.

7. Ania koma ti panangmatmattayo iti ‘nadawel a sarita’ dagidiay maup-upay?

7 Kinuna ni Pablo idi nagsurat iti kongregasion ti Tesalonica: “Saranayenyo dagiti nakapuy.” (Basaen ti 1 Tesalonica 5:14.) Maibilang a nakapuy dagiti “malmaldaangan a kararua” kasta met dagiti maup-upay. Kuna ti Proverbio 24:10: “Impakitam kadi a naupayka iti aldaw ti rigat? Kurangto ti bilegmo.” Nalabit mabuyogan iti ‘nadawel a sarita’ ti sasao ti tao a maup-upay unay. (Job 6:2, 3) Kas panangsuporta kadagiti kasta nga indibidual, laglagipentayo a makaisaoda no dadduma iti banag a dida nagayatan. Kasta ti napaliiw ni Rachelle iti nanangna nga agsagsagaba iti depresion. Kinuna ni Rachelle: “Masansan a nasakit ti panagsasao ni Nanang. Ngem palpalagipak no kua ti bagik no ania a talaga a kita ti tao ni Nanang—nadungngo, nasingpet, ken naparabur. Nadlawko a dagiti madepdepres a tattao ket di inggagara a makaisawang iti nasakit a sasao. Saan a nasayaat no tutopantayo dagita iti sasao wenno tigtignay.” Kuna ti Proverbio 19:11: “Ti pannakatarus ti maysa a tao pudno unay a pabannayatenna ti ungetna, ket kinapintas iti biangna ti panangpalabas iti salungasing.”

8. Siasino ti nangnangruna a ‘pangipatalgedantayo’ iti ayattayo, ken apay?

 8 Kasanotayo a maipakita a ‘sipapanunottayo’ iti maysa a malmaldaangan gapu iti napalabas a basolna? Uray no nailintegnan ti kamalina, mabalin a mabain pay laeng gapu iti naaramidanna. Insurat ni Pablo maipapan iti agbabbabawi a nakabasol idiay Corinto: “Siaasi a pakawanenyo ken liwliwaenyo, tapno ti kasta a tao uray kasano saan nga alimonen ti nalabes unay a panaglidayna. Gapuna bagbagaankayo a patalgedanyo ti ayatyo kenkuana.” (2 Cor. 2:7, 8) Sigun iti maysa a diksionario, ti sao a naipatarus a ‘patalgedan’ kaipapananna ti “pananganamong, panangpasingked, pagbalinen a legal.” Saan a maammuan ti maysa a kabsat nga ay-ayaten ken maseknantayo kenkuana malaksid no ipakitatayo dayta iti sasao ken tigtignaytayo.

“MANGPAREGTA ITI AYAT KEN NASAYAAT NGA AR-ARAMID”

9. Ania ti kayat a sawen ti ‘panangparegta iti ayat ken nasayaat nga ar-aramid’?

9 “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid,” insurat ni Pablo. No agngangabit a maiddep ti apuy, kasapulan a paypayantayo dagiti beggangna tapno rumangrang manen dayta. (2 Tim. 1:6) Iti umasping a pamay-an, magutugottayo dagiti kakabsat a mangipakita iti ayatda iti Dios ken iti padada a tao. Ti maysa a nasayaat a pamay-an ket ti panangted iti mayanatup a komendasion.

Kaduaem dagiti kakabsat iti ministerio

10, 11. (a) Siasino kadatayo ti agkasapulan iti komendasion? (b) Mangted iti pagarigan no kasano a nakatulong ti komendasion iti maysa a ‘nakaaramid iti di umiso nga addang.’

10 Kasapulantayo amin ti komendasion, maup-upaytayo man wenno saan. “Diak pulos nangngeg nga imbaga ni tatangko nga adda naimbag a naaramidak,” insurat ti maysa a panglakayen. “Isu a dimmakkelak nga awan kompiansak iti bagik. . . . Nupay agtawenakon iti 50, agyamyamanak no ipatalged kaniak dagiti gagayyemko a nasayaat ti maar-aramidak kas maysa a panglakayen. . . . Nasursurok iti kapadasak a nakapatpateg ti panangparegta iti sabsabali, ket ikagkagumaak ita nga aramiden dayta.” Ti komendasion ket makaparegta  iti amin—pakairamanan dagiti payunir, natataengan, ken dagidiay maup-upay.—Roma 12:10.

11 No ‘dagidiay addaan kadagiti naespirituan a kualipikasion padasenda nga aturen ti maysa a nakaaramid iti di umiso nga addang,’ ti naayat a balakad ken mayanatup a komendasionda mabalin a tignayenna ti nakabasol nga agbalbaliw. (Gal. 6:1) Pudno daytoy iti maysa a kabsat nga agnagan Miriam. Insuratna: “Kasta unay ti ladingitko idi pimmanaw iti kinapudno ti dadduma a nasinged a gagayyemko sa na-brain hemorrhage pay ni tatangko. Isu a nakinobioak iti saan a Saksi ta impagarupko a dayta ti mangpalag-an iti riknak.” Ngem nagbunga laeng dayta iti pannakariknana a din maikari iti ayat ni Jehova, isu a pinanunotna a panawan ti kinapudno. Nupay kasta, impalagip kenkuana ti maysa a panglakayen dagiti naaramidanna a panagserbi ken Jehova ken impasiguradona nga ay-ayaten pay laeng ni Jehova. Gapu iti dayta, rimmayray manen ti panagayatna iti Dios. Insinana ti nobiona ket intultuloyna ti agserbi ken Jehova.

Gutugotem ida a mangipakita iti ayat ken nasayaat nga ar-aramid

12. Ania ti mabalin nga epektona no usarentayo ti panangpabain, panangkritikar, wenno panangkonsiensia a manggutugot iti sabsabali?

12 Mabalin a madagdag nga agtignay ti maysa no mapabainan gapu iti di nainkalintegan a panangidilig kenkuana iti sabsabali, panangkritikar kenkuana maibatay kadagiti bukodmo a pagalagadan, wenno panangkonsiensia kenkuana iti bassit a naaramidanna. Ngem di agbayag ti epekto ti kasta a pamay-an ti pananggutugot. Iti sabali a bangir, nasayaat ken manayon ti epekto ti panangkomendar kadagiti kapammatiantayo ken ti panangipatalged kadakuada nga agserserbida iti Dios gapu iti ayatda Kenkuana.—Basaen ti Filipos 2:1-4.

‘AGPIPINNAREGTATAYO’

13. Ania ti ramanen ti panangparegta iti sabsabali? (Kitaen ti ladawan iti rugi ti artikulo.)

13 Masapul nga ‘agpipinnaregtatayo nangnangruna ta umas-asidegen ti aldaw.’ Karaman iti panangparegta iti sabsabali isu ti panangtignay kadakuada nga agtultuloy nga agserbi iti Dios. No kasano a ti pananggutugot iti ayat ken nasayaat nga ar-aramid ket mayarig iti panangbiag iti maid-iddepen nga apuy, ti panangparegta iti dadduma ket mayarig met iti panangnayon iti uging wenno sungrod tapno agtultuloy wenno rumubrob ti apuy. Isu a karaman iti panangparegta iti sabsabali ti panangpabileg ken panangliwliwa kadagidiay maup-upay. No adda parparegtaentayo a kasta a tao, agsaotayo koma a sipapasnek ken siaalumamay. (Prov. 12:18) Mainayon pay, ‘nasiglattayo koma no iti panagdengngeg’ ken “nainayad no iti panagsao.” (Sant. 1:19) No sipapasnektayo a dumngeg, maammuantayo no ania dagiti pakaup-upayan ti maysa a kabsat ket makaibagatayo iti sasao a makatulong kenkuana a mangsango kadagiti parikutna.

Makilangen kadagiti kakabsat iti kongregasion

14. Kasano a natulongan ti maysa a maup-upay a kabsat?

14 Usigentayo no kasano a ti maysa a maseknan a panglakayen natulonganna ti  maysa a kabsat nga inaktibon iti sumagmamano a tawen. Bayat nga umim-imdeng ti panglakayen, natarusanna nga adda pay laeng nauneg a panagayat dayta a kabsat ken Jehova. Sipapasnek nga ad-adalen daytoy a kabsat ti tunggal ruar Ti Pagwanawanan ken ikagkagumaanna ti regular a tumabuno kadagiti gimong. Ngem naupay ken nagsakit ti nakemna gapu iti tigtignay ti dadduma a kakabsat iti kongregasion. Dimngeg a naimbag ti panglakayen, saanna a krinitikar ti kabsat, ken inyebkasna ti naayat a pannakaseknanna kenkuana ken iti pamiliana. In-inut a nabigbig daytoy a kabsat nga itultulokna a malapdan ti panagserbina iti Dios gapu kadagiti di nasayaat a kapadasanna iti napalabas. Inyawis ti panglakayen nga agkaduada a mangasaba. Iti tulong ti panglakayen, aktibon ti kabsat iti panangasaba ken idi agangay nakualipikar manen nga agserbi kas panglakayen.

Siaanus nga umimdengka iti agkasapulan ti pammaregta (Kitaen ti parapo 14, 15)

15. Ania ti maadaltayo ken Jehova maipapan iti panangparegta kadagiti maup-upay?

15 Ti maup-upay a tao mabalin a saanna a nalaka a mailiwliwag ti nasaktan a riknana wenno saanna nga awaten a dagus ti ipaaytayo a tulong. Kasapulan ngarud nga itultuloytayo a suportaran. Kinuna ni Pablo: “Tulonganyo dagiti nakapuy. Anusanyo amin ida.” (1 Tes. 5:14, Ti Baro a Naimbag a Damag Biblia) Imbes nga alistotayo a mauma, itultuloytay koma a ‘tulongan’ ken suportaran ida. Inan-anusan ni Jehova dagiti nagkauna nga adipenna kadagiti tiempo a naupayda. Kas pagarigan, nakaan-anus ken Elias ken inkabilanganna ti rikriknana. Impaay ni Jehova ti kasapulan ti propeta tapno maitultuloyna ti annongenna. (1 Ar. 19:1-18) Gapu ta pudpudno nga agbabbabawi ni David, siaasi a pinakawan ni Jehova. (Sal. 51:7, 17) Ti Dios tinulonganna met ti nangisurat iti Salmo 73, a gistay simmuko nga agserbi Kenkuana. (Sal. 73:13, 16, 17) Nakonsiderar ken naasi kadatayo ni Jehova, nangruna no naladingit ken maup-upaytayo. (Ex. 34:6) Dagiti asina ket ‘kabbaro tunggal bigat,’ ket “sigurado a saandanto nga agngudo.” (Un. 3:22, 23) Namnamaen ni Jehova a tuladentayo ti ulidanna ket sidudungngo a tratuentayo dagiti malmaldaangan.

PAREGTAEN TI MAYSA KEN MAYSA NGA AGTALINAED ITI DALAN TI BIAG

16, 17. Bayat nga umas-asideg ti panungpalan daytoy a sistema, ania koma ti determinasiontayo, ken apay?

16 Rinibu ti natay kadagiti 33,000 a balud a naggapu iti kampo konsentrasion iti Sachsenhausen. Ngem nakalasat ti amin a 230 a Saksi ni Jehova a nagpasar iti dayta a rigat. Dakkel ti naitulong ti panangparegta ken panangsuportada iti maysa ken maysa. Para kadakuada, dayta a martsa ni patay ket nagbalin a martsa ti pannakaispal.

17 Iti agdama, addatayo iti “dalan nga agturong iti biag.” (Mat. 7:14) Din agbayag, amin nga agdaydayaw ken Jehova sangsangkamaysadanton a magna nga agturong iti nalinteg a baro a lubong. (2 Ped. 3:13) Determinadotayo koma a tumulong iti maysa ken maysa iti dalan nga agturong iti agnanayon a biag.