Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2013

Papanglakayen—Bangbang-aranyo Kadi ti “Nabannog a Kararua”?

Papanglakayen—Bangbang-aranyo Kadi ti “Nabannog a Kararua”?

Medio madanagan ni Angela, * maysa a balasang nga agtawen iti nasurok a 30 bayat nga ur-urayenna dagiti panglakayen. Ania ngata ti ibagada kenkuana? Pudno a saan a nakatabuno iti sumagmamano a gimong ta mabambannog unay iti agmalem a panagtrabahona kas paraaywan kadagiti natataengan. Malaksid iti inaldaw a trabahona, maburburiboran pay iti salun-at ni nanangna.

No sika ti bumisita ken Angela, kasano a maparegtam daytoy a “nabannog a kararua”? (Jer. 31:25) Kasano a makapagsaganaka tapno makapabang-ar ti ibibisitam?

PANUNOTEM TI KASASAAD DAGITI KAKABSAT

No dadduma, mabannogtayo gapu iti sekular a trabaho wenno nateokratikuan a pagrebbengantayo. Kas pagarigan, ‘napaksuyan’ ni propeta Daniel idi naikkan iti sirmata a saanna a matarusan. (Dan. 8:27) Nagparang kenkuana ni anghel Gabriel. Dayta a mensahero ti Dios tinulonganna ni Daniel a mangtarus iti sirmata, impanamnamana a dinengngeg ni Jehova dagiti kararagna, sa imbagana nga isu ket “makaay-ayo unay.” (Dan. 9:21-23) Iti sabali pay a gundaway, adda manen anghel a nangpabileg iti napaksuyan a propeta babaen iti napili a sasao.—Dan. 10:19.

Sakbay a bumisitaka, usigem ti kasasaad ti kabsat

Umasping iti dayta, sakbay a bisitaem ti maysa a kabsat a mabalin a nabannog  wenno maup-upay, panunotem nga umuna ti kasasaadna. Ania dagiti parikutna? Dagitoy kadi ti mangib-ibus iti pigsana? Ania dagiti nasayaat a kualidadna? “Laglagipek dagiti positibo a kababalin dagiti kakabsat,” kuna ni Richard a panglakayen iti nasuroken a 20 a tawen. “No panunotek ti kasasaadda sakbay a bumisitaak,” innayonna, “nalaklaka a makaipaayak iti kasapulanda a pammaregta.” No adda kaduam a panglakayen a mapan mangipastor, apay a saanyo nga usigen a dua ti situasion ti kabsat?

PAREGTAEM DAGITI KAKABSAT A MANGYEBKAS ITI RIKNADA

Nalabit umanamongka a kasla nakababain a yebkas ti personal a rikrikna. Kas pagarigan, mabalin a marigatan ti maysa a kabsat a mangyebkas iti rikriknana kadagiti bumisita a panglakayen. Kasanom a rugian ti saritaan? Mabalin a makatulong ti panagisem ken sumagmamano a makapabang-ar a sasao. Ni Michael a panglakayen iti nasuroken nga 40 a tawen masansan a rugianna ti ibibisitana iti kastoy a sasao: “Ammom, ti maysa kadagiti kasayaatan a pribilehio ti panglakayen ket ti ibibisita kadagiti kakabsat iti pagtaenganda ken ti panangam-ammo a naimbag kadakuada. Isu a talaga a magagarankami a sumarungkar kenka.”

Mabalin a rugiam ti ibibisita babaen iti naimpusuan a kararag. Kadagiti kararag ni apostol Pablo, dinakamatna ti pammati, ayat, ken panagibtur dagiti kakabsat. (1 Tes. 1:2, 3) No yebkasmo ti riknam maipapan iti nasasayaat a kualidad ti kabsat, isagsaganam ti pusom ken ti pusona para iti makapabileg a saritaan. Mabalin met a maliwliwa kadagiti sasaom. “No dadduma, malipatantayo dagiti naimbag a maar-aramidantayo,” kuna ni Ray nga eksperiensiado a panglakayen. “Isu a no adda mangipalagip kadagita, mabang-aran ti kararuatayo.”

MANGIRANUD ITI NAESPIRITUAN A SAGUT

Kas ken Pablo, makairanudka iti “naespirituan a sagut,” kas iti panangibasa iti kuna  ti Kasuratan, uray maysa laeng a bersikulo. (Roma 1:11) Kas pagarigan, ti maysa a maup-upay a kabsat mabalin a mariknana a kasla awan serserbina, kas iti salmista a nangyasping iti bagina iti kimbet a “lalat a botelia iti kaasukan.” (Sal. 119:83, 176) Kalpasan ti ababa a panangilawlawagmo iti dayta a sasao, mabalin nga ipatalgedmo kenkuana nga agtalekka a ‘saanna pay a linipat’ dagiti bilin ti Dios.

Umasping iti dayta, mabalin a makatulong iti maysa a kabsat a babai a kimmapuy iti naespirituan wenno immadayo iti kongregasion ti ilustrasion ti napukaw a drakma a sinsilio. (Luc. 15:8-10) Dayta a napukaw a sinsilio ket mabalin a paset ti maysa a nangina a kuentas a naaramid iti adu a pirak a sinsilio. Babaen ti panangilawlawagmo iti dayta nga ilustrasion, mabalin a matulongam a mangbigbig a maysa isuna a napateg a paset ti kongregasion Kristiano. Kalpasanna, mabalin nga ipaganetgetmo a maseknan unay ni Jehova kenkuana kas maysa kadagiti babassit a karnerona.

Kaaduanna a maragsakan dagiti kakabsat a mangyebkas iti kapanunotanda maipapan iti nabasada iti Biblia. Isu a saanmo a bukbukodan ti agsao! Kalpasan a binasam ti maysa a bersikulo nga agaplikar iti situasionda, mabalin nga ipaganetgetmo ti maysa a napateg a sao wenno sasao sa kiddawem no ania ti makunada iti dayta. Kas pagarigan, kalpasan a mabasa ti maysa a panglakayen ti 2 Corinto 4:16, mabalin nga isaludsodna, “Adda kadin gundaway a nariknam a pinabaro ni Jehova ti pigsam?” Ti kasta a saritaan ket mabalin nga agresulta iti “panagsisinnukat iti pammaregta.”—Roma 1:12.

Kaaduanna a maragsakan dagiti kakabsat a mangyebkas iti kapanunotanda maipapan kadagiti nabasada iti Biblia

Mabalin met a mabang-aram ti maysa a kabsat no ilawlawagmo kenkuana ti maipapan iti maysa a karakter ti Biblia nga umasping iti kasasaadna. Mabalin a matarusan ti maysa a malidliday ti narikna idi ni Anna wenno ni Epafrodito, nga adda dagiti kanito a naladingitda ngem nagtalinaedda a napateg iti imatang ti Dios. (1 Sam. 1:9-11, 20; Fil. 2:25-30) Adu pay a nasayaat nga ulidan iti Biblia ti mabalinmo nga usaren.

KOMUSTAEM TI KABSAT

Maipakitam a pudpudno a maseknanka kadagiti kakabsat no komustaem ti kasasaadda sipud idi bimmisitaka. (Ara. 15:36) Sakbay nga agpakadaka iti ibibisitam, nalabit katulagmo nga agkaduakayto iti ministerio. Kastoy ti kuna ti eksperiensiadon a panglakayen a ni Bernard no makitana manen ti kabsat a nabiit pay a binisitana, “Komustan ti nagsasaritaantayo?” No mangipakitaka iti kasta a personal nga interes iti kabsat, maammuam no kasapulanna pay ti kanayonan a tulong.

Nangnangruna a nasken ita a marikna dagiti kakabsat a maseknan, matarusan, ken ipatpategtayo ida. (1 Tes. 5:11) Gapuna, sakbay a mapanka mangipastor, panunotem nga umuna ti kasasaad ti kabsat a bisitaem. Agkararagka ken mangpilika kadagiti mayanatup a teksto. Iti kasta, makasarakka iti umiso a sasao a makapabang-ar iti “nabannog a kararua”!

^ par. 2 Nabaliwan dagiti nagan.