Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2013

Salsaludsod Dagiti Agbasbasa

Salsaludsod Dagiti Agbasbasa

Siasino dagiti “annak ti pudno a Dios” a nadakamat iti Genesis 6:2, 4 nga addan sakbay ti Layus?

Adda dagiti pammaneknek a dagiti espiritu nga annak ti Dios ti tuktukoyen dagitoy a sasao. Apay a makunatayo a kasta?

Kastoy ti mabasa iti umuna kadagita a bersikulo: “Ti annak ti pudno a Dios nangrugi a mapaliiwda ti annak a babbai ti tattao, a napipintasda; ket nangalada iti assawa a maipaay iti bagbagida, awan sabali, dagiti amin a pinilida.”—Gen. 6:2.

Iti Hebreo a Kasuratan, ti sasao a ti “annak ti pudno a Dios” ken “annak ti Dios” ket agparang iti Genesis 6:2, 4; Job 1:6; 2:1; 38:7; ken Salmo 89:6. Ania ti ipakpakita dagita a teksto?

Nalawag a ti “annak ti pudno a Dios” a mabasatayo iti Job 1:6 ket espiritu a parparsua a naguummong iti sanguanan ti Dios. Karaman kadakuada ni Satanas, a ‘nagsursursor iti daga.’ (Job 1:7; 2:1, 2) Kasta met, mabasatayo iti Job 38:4-7 a dagiti “annak ti Dios” ket “nagdir-i[da] buyogen ti panangpadayaw” idi a ti Dios ‘insaadna ti bato a pasuli’ ti daga. Anghel la ketdi dagita yantangay saan pay idi a naparsua ti tao. Sigurado a dagiti “annak ti Dios” a nadakamat iti Salmo 89:6 ket parparsua idiay langit a kadua ti Dios, saan ketdi a tattao.

Siasino ngarud dagiti “annak ti pudno a Dios” a nadakamat iti Genesis 6:2, 4? Maitunos kadagiti nadakamat a teksto, ti tuktukoyen dayta a salaysay ket dagiti espiritu nga annak ti Dios nga immay ditoy daga.

Adda dagiti saan a mamati nga aginteres dagiti anghel iti seksual a pannakidenna. Ti sasao ni Jesus a nailanad iti Mateo 22:30 ipakitana nga awan ti panagasawa ken seksual a pannakidenna idiay langit. Nupay kasta, adda dagiti gundaway a naglasag dagiti anghel, a nakipangan ken nakiinumda pay ketdi kadagiti tattao. (Gen. 18:1-8; 19:1-3) Gapuna, umiso a kunaen a mabalinda ti makidenna kadagiti babbai.

Adda ebidensia iti Biblia a kasta ti inaramid ti dadduma nga anghel. Iti Judas 6, 7, ti basol dagiti lallaki iti Sodoma, a naaddaan iti di gagangay a panaggartem iti sekso, ket nayarig iti inaramid dagiti “anghel a saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan.” Agpada a dagiti anghel ken dagiti taga-Sodoma “nakiabigda nga aglablabes unay . . . ken simmurotda iti lasag maipaay iti di nakaisigudan a pannakausar.” Tuktukoyen met ti 1 Pedro 3:19, 20 dagiti anghel a nagsukir idi “kaaldawan ni Noe.” (2 Ped. 2:4, 5) Gapuna, ti panagsukir dagita nga anghel idi kaaldawan ni Noe ket mayarig iti basol ti Sodoma ken Gomorra.

Kasta ti konklusiontayo no bigbigentayo a dagiti “annak ti pudno a Dios” a nadakamat iti Genesis 6:2, 4 ket isu dagiti anghel a naglasag ken nakidenna idi kadagiti babbai.

 Kuna ti Biblia a ni Jesus ket “nangasaba kadagiti espiritu a sibabalud.” (1 Ped. 3:19) Ania ti kaipapanan dayta?

Kuna ni apostol Pedro a dagitoy nga espiritu “nagsukirda idi a ti kinaanus ti Dios nagur-uray idi kaaldawan ni Noe.” (1 Ped. 3:20) Nalawag a tuktukoyen ni Pedro dagiti espiritu a parsua a kimmappon iti panagrebelde ni Satanas. Dinakamat met ni Judas nga adda dagiti anghel a “saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan,” ket kinunana nga ‘insagana ti Dios para kadakuada dagiti agnanayon a pannakaparaut iti sidong ti napuskol a kinasipnget maipaay iti pannakaukom iti naindaklan nga aldaw.’—Jud. 6.

Kasano a nagsukir dagitoy nga espiritu a parsua idi kaaldawan ni Noe? Sakbay ti Layus, naglasag dagitoy a dakes nga espiritu—banag a saan a pinanggep ti Dios agpaay kadakuada. (Gen. 6:2, 4) Maysa pay, nakidenna dagitoy nga anghel kadagiti babbai, a nakadakdakes a banag gapu ta saan ida a pinarsua ti Dios iti kasta panggep. (Gen. 5:2) Dagitoy a dakes ken nasukir nga anghel madadaeldanto iti tiempo nga inkeddeng ti Dios. Ngem iti agdama, kas kinuna ni Judas, addada iti “napuskol a kinasipnget”—maysa a naespirituan a pagbaludan.

Kaano ken kasano a nangasaba ni Jesus kadagitoy nga “espiritu a sibabalud”? Insurat ni Pedro a napasamak daytoy kalpasan a ni Jesus “napagbiag iti espiritu.” (1 Ped. 3:18, 19) Laglagipentayo met a kinuna ni Pedro a “nangasaba” ni Jesus, a kayatna a sawen a napasamaken dayta a panangasaba sakbay nga insurat ni Pedro ti immuna a suratna. Agparang ngarud a kalpasan ti panagungar ni Jesus, impakaammona kadagiti dakes nga espiritu ti nainkalintegan a pannusa a lak-amendanto. Dayta ket saan a panangasaba a mangyeg kadakuada iti aniaman a namnama. Panangasaba dayta a nangipakaammo iti pannakaukom. (Jon. 1:1, 2) Idi naipakitan ni Jesus ti pammati ken kinamatalekna agingga ken patay sa napagungar—pammaneknek nga awan pannakabalin kenkuana ti Diablo—naaddaan iti pangibatayan a mangipakaammo iti kasta a panangkondenar.—Juan 14:30; 16:8-11.

Iti masanguanan, ni Jesus parautanna ni Satanas ken dagiti anghelna ken itapuaknanto ida iti mangliwengliweng nga abut. (Luc. 8:30, 31; Apoc. 20:1-3) Agingga iti dayta a tiempo, adda pay laeng dagitoy a nasukir nga espiritu iti napuskol a naespirituan a kinasipnget, ket sigurado a madadaeldanto.—Apoc. 20:7-10.