Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2013

 MANIPUD ITI ARCHIVES

Nagmatalekda iti “Oras ti Pannakasubok”

Nagmatalekda iti “Oras ti Pannakasubok”

TI NEUTRAL a takder dagiti Estudiante ti Biblia ket damo a naammuan ti lubong idi bimtak ti Gubat Sangalubongan I idi 1914. (Isa. 2:2-4; Juan 18:36; Efe. 6:12) Ania ti napasamak kadagiti adipen ti Dios idiay Britania?

Henry Hudson

Inyetnag ti Military Service Act ti 1916 ti Britania nga agsoldado dagiti di naasawaan a lallaki nga agtawen iti 18 agingga’t 40. Ngem nangipaay iti probision a mangipuera kadagidiay agkedked sigun iti “narelihiosuan wenno moral a prinsipio[da].” Nangbuangay ti gobierno kadagiti korte a mangtingiting no asino ti maikkan iti eksepsion ken no ania ti saklawen dayta.

Di nagbayag, agarup 40 nga Estudiante ti Biblia ti naipan kadagiti pagbaludan iti kampo militar, ken 8 ti naibaon iti paggugubatan idiay France. Gapu iti daytoy a di nainkalintegan a tignay, nagsurat dagiti kakabsat a taga-Britania ken ni Primero Ministro Herbert Asquith kas panagprotesta iti pannakaibalud dagiti Estudiante ti Biblia. Nairagpin iti dayta a surat ti petision a naglaon iti 5,500 a pirma.

Naipadamag a naipan idiay France dagiti walo a kakabsat a nasentensiaan a mapaltogan gapu iti panagkedkedda nga agsoldado. Ngem idi nakaliniadan tapno mapaltogan, naibaba ti sentensiada iti sangapulo a tawen a pannakaibalud. Naisublida iti England tapno ikaroda ti sentensiada kadagiti sibil a pagbaludan.

James Frederick Scott

Bayat ti panagtultuloy ti gubat, nairaman a napagsoldado uray dagiti naasawaan a lallaki. Iti maysa a kaso iti Manchester, England, naidarum ni Henry Hudson, maysa a doktor ken Estudiante ti Biblia. Idi Agosto 3, 1916, inkeddeng ti korte a mamulta ni Henry ken mayawat iti militar gapu iti saanna a panangtungpal iti linteg. Iti daydi met laeng a tiempo, maysa pay a kaso ti nadengngeg iti Edinburgh, Scotland. Ngem naikeddeng nga awan basol ti naisaklang a ni James Frederick Scott, maysa a colporteur nga agtawen iti 25. Nagapelar ti prosekiutor ngem naibasura dayta maibatay iti sabali pay a kaso iti London. Iti daytoy a gundaway, inkeddeng ti korte a nakabasol ti maysa a kabsat nga agnagan Herbert Kipps, mamulta, ken mayawat iti militar.

Idi Septiembre 1916, kiniddaw ti 264 a kakabsat a lallaki a maipuerada iti panagserbi iti militar. Napatgan ti 5 kadagitoy, 154 ti naikkan iti “trabaho a napateg iti pagilian,” 23 ti napagtrabaho iti kampo militar, 82 ti nayawat iti militar, ken sumagmamano ti nausig iti korte militar gapu iti panagkedkedda nga agsoldado. Adu ti nagreklamo iti naulpit a pannakatrato dagitoy a lallaki, isu nga inyakar ida ti gobierno kadagiti kampo a pagtrabahuan.

Pryce Hughes

Da Edgar Clay ken Pryce Hughes, a nagserbi idi agangay kas manangaywan iti sanga nga opisina iti Britania, ket napagtrabaho iti maysa a  dam iti Wales. Iti sabali a bangir, ni Herbert Senior, a karaman kadagiti walo a naibaon idiay France, ket naisubli sa naipan iti Wakefield Prison iti Yorkshire. Naipan ti dadduma iti Dartmoor Prison tapno ikaroda ti sentensiada nga inkapilitan a panagtrabaho iti narigat a kasasaad. Daytoy idi a pagbaludan ti nakaipanan ti kaaduan nga agkedked nga agsoldado gapu iti konsiensiada.

Ni Frank Platt, maysa nga Estudiante ti Biblia, ket immanamong nga agtrabaho iti kampo militar ngem di agiggem iti armas. Ngem nagsagaba iti napaut ken naulpit a pannakaidadanes idi naipan iti paggugubatan gapu ta agkedked a makilaban. Gapu ta naammuan ni Atkinson Padgett ti kinapudno di nagbayag kalpasan a napilit nga agsoldado, nagkedked a makigubat ken nagsagaba met iti naulpit a pannakatrato iti ima dagiti opisial ti militar.

Herbert Senior

Nupay saan a naan-anay a natarusan dagitoy a kakabsattayo ti neutral a takdertayo kas Kristiano agarup sangagasut a tawenen ti napalabas, inkagumaanda nga ay-aywen ni Jehova a Dios. Dagidiay nainaganan iti daytoy a report nagbalinda a nasayaat a pagtuladan iti panangsalimetmet iti neutralidad bayat ti nakarigrigat nga “oras ti pannakasubok.” (Apoc. 3:10)—Manipud iti archives-tayo iti Britania.

Ammuem ti Ad-adu Pay

Apay a Saan a Makiramraman iti Politika Dagiti Saksi ni Jehova?

Pangta kadi ida iti seguridad ti pagilian?