Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ABRIL 2013

Situtulok nga Agsaksakripisioda—Iti Mexico

Situtulok nga Agsaksakripisioda—Iti Mexico

MAKAPAREGTA a makita ti yaadu dagiti agkabannuag a Saksi a mangpaspasimple iti biagda tapno mapalawada ti ministerioda. (Mat. 6:22) Ania a panagbalbaliw ti inaramidda? Ania dagiti tubeng a maipaspasango kadakuada? Tapno maammuantayo, am-ammuentayo ti sumagmamano nga agserserbi ita iti Mexico.

“MASAPUL A MANGARAMIDKAMI ITI PANAGBALBALIW”

Taga-Estados Unidos da Dustin ken Jassa a nagkasar idi Enero 2007. Di nagbayag kalpasanna, natungpal ti nabayagen nga arapaapda a maaddaan iti sailboat a pagtaengan. Nakasanglad ti bangkada iti asideg ti nagpintas nga ili ti Astoria, Oregon, U.S.A., a napalikmutan kadagiti kabakiran ken bambantay a naabbongan iti niebe ken saan unay nga adayo iti Taaw Pacifico. “Makapaamanga ti aglawlaw iti sadinoman a tumaliawam!” kuna ni Dustin. Impagarupda a simple idin ti panagbiagda ken agpampannurayda ken Jehova. Kinunada, ‘Agnanaedkami laeng iti bangka nga agatiddog iti 7.9 metro (26 pie), part-time laeng ti trabahomi, addakami iti kongregasion a sabali ti lengguahena, ken sagpaminsan met nga ag-auxiliary pioneer-kami.’ Ngem idi agangay, nabigbigda a kasla al-allilawenda ti bagbagida. “Imbes a masuportaranmi ti kongregasion, ad-adu met ti tiempomi a mangasikaso iti bangkami,” kuna ni Dustin. “Ammomi a no talaga nga iyun-unami ni  Jehova iti biagmi, masapul a mangaramidkami iti panagbalbaliw.”

Innayon ni Jassa: “Sakbay a nagkasarkami, agnanaedakon iti Mexico ken naikamengak iti maysa nga Ingles a kongregasion. Natagiragsakko ti agserbi sadiay ken magagaranak nga agsubli.” Tinarigagayan da Dustin ken Jassa ti agserbi iti sabali a pagilian isu nga iti family worship-da, binasada dagiti kapadasan ti kakabsat nga immakar kadagiti pagilian nga ayan ti adu pay a maani. (Juan 4:35) “Kayatmi met a mapasaran ti marikriknada a rag-o,” kuna ni Dustin. Idi naammuanda kadagiti gagayyemda iti Mexico nga adda kabbaro a grupo nga agkasapulan iti tulong, inkeddeng da Dustin ken Jassa ti tumulong. Nagikkatda iti trabahoda, inlakoda ti bangkada, ket napanda iti Mexico.

“TI KASAYAATAN PAY LAENG NGA INARAMIDMI”

Nagnaed da Dustin ken Jassa iti ili ti Tecomán—nga asideg met iti Taaw Pacifico ngem agarup 4,345 kilometro (2,700 milia) iti abagatan ti Astoria. “Imbes a nalamiis a pul-oy ti angin, makasinit ketdi a pudot ti mariknami, ken imbes a nangayed a kabambantayan, puro kayo ti dalayap (lemon) ti makitkitami,” kuna ni Dustin. Idi damo, awan mabirokanda a trabaho. Gapu ta agkurkurang ti gastuenda, innapuy ken bukbukel ti utong ti kanenda iti mamindua iti kada aldaw, iti agsasaruno a lawas. “Ngem idi kasla maumakamin kadagita a taraon,” kuna ni Jassa, “inikkandakami dagiti iyad-adalanmi iti Biblia kadagiti mangga, saba, papaya, ken sinaksako a dalayap!” Idi agangay, nakasarak da Dustin ken Jassa iti trabaho iti maysa nga online language school a nakabase iti Taiwan. Ti kuarta a mateggedanda ket umanayen para iti inaldaw a kasapulanda.

Ania ti makuna da Dustin ken Jassa iti baro a kasasaadda? “Daytoy nga iyaakarmi ti kasayaatan pay laeng nga inaramidmi,” kinunada. “Simminged ti relasionmi ken Jehova ken ti relasionmi nga agassawa. Adu a banag ti pagdanggayanmi nga aramiden iti tunggal aldaw—panangasaba, panagtungtong no kasano a matulonganmi dagiti iyad-adalanmi iti Biblia, panagsagana kadagiti gimong. Saan metten a kas iti dati a nakaad-adu ti pakakumikomanmi.” Innayonda: “Napaneknekanmi a pudno ti kari ti Salmo 34:8 a ‘Nanamenyo ken kitaenyo a ni Jehova naimbag.’”

RINIBU A BOLUNTARIO—ANIA TI NAKATIGNAYANDA?

Nasurok a 2,900 a kakabsat—naasawaan ken saan, nga adu kadakuada ti agedad iti 20 agingga iti nasurok a 30—ti immakar tapno agserbi iti nadumaduma a rehion ti Mexico nga agkasapulan pay laeng iti adu a manangaskasaba iti Pagarian. Apay nga inaramidda dayta? Idi naisaludsod dayta iti sumagmamano kadakuada,  adda tallo a kangrunaan a rason nga imbagada. Ania dagita?

Leticia ken Hermilo

Tapno ipakita ti ayat ken Jehova ken iti pada a tao. Nabautisaran ni Leticia idi agtawen iti 18. Kunana: “Idi indedikarko ti bagik ken Jehova, naawatak a masapul nga agserbiak kenkuana iti intero a puso ken kararuak. Isu a tapno maipakitak ti naimpusuan nga ayatko ken Jehova, kayatko nga usaren ti ad-adu a tiempo ken pigsak nga agserbi.” (Mar. 12:30) Ni Hermilo, nga asawa itan ni Leticia, ket nasurok la a 20 ti tawenna idi immakar iti lugar nga agkasapulan iti ad-adu a manangaskasaba iti Pagarian. Kinunana: “Nabigbigko a ti panangpennek iti naespirituan a kasapulan ti sabsabali ti kasayaatan a pamay-an a panangipakita iti ayat iti pada a tao.” (Mar. 12:31) Dayta ti makagapu a pinanawanna ti narang-ay a siudad ti Monterrey, a sadiay nga agtrabtrabaho idi iti banko ken nanam-ay ti biagna, ket immakar iti maysa a nanumo laeng nga ili.

Essly

Tapno marikna ti pudpudno ken manayon a rag-o. Di nagbayag kalpasan ti bautismo ni Leticia, simmurot iti maysa a nabayagen a payunir a babai iti nasulinek nga ili tapno mangasabada sadiay iti agarup makabulan. Malagip ni Leticia: “Masmasdaawak. Makaparagsak a makita a dumdumngeg dagiti tattao iti idandanonmi a mensahe ti Pagarian.” Iti ngudo dayta a bulan, kinunak iti bagik, ‘Daytoy ti kayatko a pangusaran iti biagko!’” Kasta met laeng ti narikna ni Essly, maysa a balasang nga agtawen itan iti nasurok a 20. Ti rag-o a nariknana ti nakatignayanna a sumrek iti daytoy a kita ti panagserbi. Idi hayskul pay laeng, naam-ammona ti adu a nareregta a Saksi nga agserserbi kadagiti lugar nga agkasapulan iti ad-adu a manangaskasaba. Kunana, “Idi nakitak dagiti naragsak a rupa dagidiay a kakabsat, tinartarigagayak met ti maaddaan iti kasta a kita ti biag.” Adu a kakabsat a babbai ti agsaksakripisio a kas ken Essly. Kinapudnona, iti Mexico, nasurok nga 680 a babbalasang ti boluntario nga agserserbi kadagiti lugar nga addaan dakkel a panagkasapulan. Anian a nagsayaat nga ulidan para kadagiti agtutubo ken nataengan!

Tapno maaddaan iti makagunggona ken makapnek a biag. Idi nagturpos ni Essly iti hayskul, naitukon kenkuana ti schorlaship iti maysa nga unibersidad. Indagadag dagiti kaedadna nga awatenna dayta ket maaddaan iti “normal a biag”—mangala iti karera iti kolehio, maaddaan iti lugan, ken agpasiar iti nadumaduma a pagilian. Ngem saan a nagpaimpluensia. Kuna ni Essly: “Kasta ti nagbalin nga ambision ti sumagmamano kadagiti gagayyemko a Saksi, ket nakitak a napukawen dagiti naespirituan a kalatda. Nakitak met a napaayda gapu kadagiti parikut nga imbunga ti kinaokupadoda iti ar-aramid ti lubong. Kayatko nga usaren ti kinaagtutubok tapno makapagserbiak a naan-anay ken Jehova.”

Racquel ken Phillip

 Nangala laeng ni Essly iti bokasional a kurso a nakatulong kenkuana nga agbirok iti trabaho a mangsuporta iti panagpayunirna, sa napan iti lugar nga agkasapulan unay kadagiti manangiwaragawag iti Pagarian. Nagsursuro pay ketdi kadagiti lengguahe nga us-usaren dagiti katutubo nga Otomi ken Tlapaneco. Kinunana maipapan iti tallo a tawen a panangaskasabana iti nasulinek a luglugar: “Ti panagserbi kadagiti lugar nga addaan dakdakkel a panagkasapulan ti nangyeg kaniak iti makagunggona ken makapnek a biag. Kangrunaan iti amin, dayta ti ad-adda a nangpasinged iti relasionko ken Jehova.” Umanamong iti dayta ti agassawa a da Phillip ken Racquel a taga-Estados Unidos nga agpada nga agtawen iti nasurok a 30. “Gapu ta napartak nga agbaliw ti lubong, marikna dagiti tattao a saan a natalged ti biagda. Ngem naaddaankami iti makapnek a biag gapu iti panagserbimi iti lugar nga adu pay laeng ti dumngeg iti mensahe ti Biblia. Nakaragragsakkami!”

NO KASANO A SANGUEN DAGITI PARIKUT

Verónica

Siempre adda dagiti parikut iti panagserbi iti lugar nga agkasapulan iti ad-adu manangiwaragawag iti Pagarian. Maysa kadagita isu ti parikut iti pinansial. Tapno marisut dayta, masapul a determinadoka a mangsango kadagiti masangpetam a kasasaad. Inlawlawag ni Verónica, nga eksperiensiado a payunir: “Iti maysa kadagiti lugar a nagpayunirak, nagluto ken naglakoak kadagiti saan a nangina a taraon. Iti sabali pay a nagpayunirak, naglakoak kadagiti lupot ken nagbalinak a mammukis. Iti agdama, paradalusak iti balay ken mangisursuroak iti klase para kadagiti agdadamo a nagannak tapno masursuroda ti makikomunikar kadagiti annakda.”

Talaga a narigat ti makibagay iti sabali a kultura ken kustombre nangruna no makipagnaedka kadagiti katutubo iti nasulinek a lugar. Kasta ti kapadasan da Phillip ken Racquel idi nagserbida iti lugar nga ayan dagiti tattao a Nahuatl ti lengguaheda. “Naiduma unay ti kultura iti lugarmi,” kuna ni Phillip. Ania ti nakatulong kadakuada a makibagay? “Nagpokuskami kadagiti positibo a kualidad dagiti Nahuatl—ti kinasingedda kadagiti kapamiliada, ti napudno a pannakilangenda iti maysa ken maysa, ken ti kinaparaburda.” Innayon ni Racquel: “Adu ti nasursuromi iti panagnaedmi sadiay ken iti panagserbimi a kadua dagiti kakabsat iti dayta a lugar dagiti katutubo.”

NO KASANO A MAKAPAGSAGANAKA

No kayatmo ti agserbi iti nasulinek a lugar nga agkasapulan iti tulong, kasano a makapagsaganaka? Kuna dagiti kakabsat a nakapadasen iti kastoy a kita ti panagserbi: Sakbay nga umakarka, rugiamon a pasimplien ti biagmo ken sursuruem ti agbalin a kontento. (Fil. 4:11, 12) Ania pay ti mabalinmo nga aramiden? Kuna ni Leticia: “Liniklikak dagiti trabaho nga agkalikagum iti mabayag a panagyanko iti maymaysa a lugar. Kayatko ti nalaka a makaakar iti sadinoman ken iti aniaman a kanito no kasapulan.” Kuna ni Hermilo: “Nasursurok ti agluto, aglaba, ken agplantsa.” Inyestoria ni Verónica: “Idi addaak pay laeng iti pagtaenganmi a kaduak dagiti nagannak ken kakabsatko, tumultulongak iti panagdalus ken nasursurok ti agluto iti saan a nangina ngem nasustansia a taraon. Nasursurok met ti agurnong.”

Amelia ken Levi

Da Levi ken Amelia ket taga-Estados Unidos ken walon a tawen nga agassawada. Inlawlawagda ti naitulong ti espesipiko a panagkararag tapno makapagsaganada nga agserbi iti Mexico. Kuna ni Levi: “Kinuentami no kasano kadakkel ti magastos iti makatawen a panagserbimi iti sabali a pagilian ket inkararagmi ken Jehova a makaurnongkami koma iti kasta a gatad.” Iti sumagmamano laeng a bulan, nakaurnongda iti gatad nga inkararagda, ket madagdagus nga immakarda. Kuna ni Levi: “Sinungbatan ni Jehova ti espesipiko a kiddawmi, isu a dakami met itan ti agtignay.” Innayon ni Amelia: “Pagarupmi no aginggakami laeng iti makatawen, ngem piton a tawenmi ditoy, ket awan ti planomi a pumanaw! Marikriknami ti tulong ni Jehova iti kaaddami ditoy. Inaldaw a makitkitami ti pammaneknek iti kinaimbagna.”

Adam ken Jennifer

Dakkel met ti naitulong ti kararag iti kaso da Adam ken Jennifer a taga-Estados Unidos ken agserserbi iti Ingles a kongregasion iti Mexico. Inrekomendada: “Dimo ur-urayen a sumayaat dagiti kasasaad. Ikararagmo ti tarigagaymo a makapagserbi iti sabali a pagilian, sa agtignayka maitunos iti dayta. Pasimpliem ti panagbiagmo, agsuratka iti sanga nga opisina iti pagilian a kayatmo a pagserbian, ket no nakapagdesisionkan, mabalinmon ti umakar!” * No kasta ti aramidem, manamnamam a maaddaankanto iti makapainteres a biag nga okupado iti naespirituan.

^ par. 21 Para iti kanayonan nga impormasion, kitaen ti artikulo a “Kabaelanyo Kadi ti ‘Umakar Idiay Macedonia’?” iti Agosto 2011 a ruar Ti Ministeriotayo iti Pagarian.

Ammuem ti Ad-adu Pay

Ania Dagiti Eskuelaan a Para Kadagiti Payunir?

Ania a naisangsangayan a pannakasanay ti maipapaay kadagiti mangbusbusbos iti amin a tiempoda iti trabaho a panangikasaba iti Pagarian?