Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ABRIL 2013

‘Siguraduenyo ti Napatpateg a Bambanag’

‘Siguraduenyo ti Napatpateg a Bambanag’

‘Siguraduenyo ti napatpateg a bambanag.’—FIL. 1:10.

1, 2. Ania a padto maipapan iti maudi nga al-aldaw ti sigurado a naginteresan dagiti adalan ni Jesus, ken apay?

KADUA da Pedro, Santiago, Juan, ken Andres ti Apoda a ni Jesus. Presko pay idi iti panunotda ti kinuna ni Jesus maipapan iti pannakadadael ti templo. (Mar. 13:1-4) Isu nga insaludsodda: “Ibagam kadakami, Kaanonto a mapasamak dagitoy a banag, ket anianto ti pagilasinan ti kaaddam ken ti panungpalan ti sistema ti bambanag?” (Mat. 24:1-3) Imbaga kadakuada ni Jesus dagiti pasamak, wenno kasasaad, a saan laeng nga agresulta iti dakkel a panagbalbaliw no ket agserbi pay a pagilasinan iti maudi nga al-aldaw ti dakes a sistema ni Satanas. Adda maysa a pasamak a naginteresan unay dagiti adalan ni Jesus. Kalpasan a dinakamat ni Jesus ti maipapan kadagiti gubat, kinakirang ti taraon, ken panagsaknap ti kinadakes, impadtona ti maysa a positibo a banag a mapasamak met iti maudi nga al-aldaw. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mat. 24:7-14.

2 Nakaragragsak dagiti adalan ni Jesus a kimmuyog kenkuana a mangikasaba iti naimbag a damag ti Pagarian. (Luc. 8:1; 9:1, 2) Mabalin a nalagipda ti kinunana: “Kinapudnona, dakkel ti anien, ngem bassit dagiti trabahador. Gapuna ipakaasiyo iti Apo ti panagani a mangibaon kadagiti trabahador iti panaganina.” (Luc. 10:2) Ngem kasano a mangasabada iti “intero a mapagnaedan a daga” ken ‘mangsaksida kadagiti amin a nasion’? Paggapuanto ngata dagiti trabahador? No la koma makitada ti masanguanan a kaduada ni Jesus iti tronona! Sigurado a masdaawda a makaimatang iti kaitungpalan dagita a sasao a mabasa itan iti Mateo 24:14.

3. Kasano a matungtungpal ita ti Lucas 21:34, ken ania ti nasayaat nga isaludsodtayo iti bagitayo?

 3 Agbibiagtayon iti panawen a matungtungpal ti padto ni Jesus. Minilionen ti mangikaskasaba iti naimbag a damag ti Pagarian iti intero a daga. (Isa. 60:22) Ngem impasimudaag ni Jesus nga addanto dagidiay marigatan a mangipamaysa iti biagda iti dayta a trabaho. Masingada ken ‘madagsenanda.’ (Basaen ti Lucas 21:34.) Makitkitatayo ti kaitungpalan dagitoy a sasao. Dadduma nga adipen ti Dios ti saanen a mangyun-una kadagiti kapatgan a bambanag. Makita dayta kadagiti desisionda mainaig iti pagtrabahuan, nangato nga edukasion, ken material a bambanag, kasta met ti kaadu ti tiempo a busbusbosenda iti isports ken panagpalpaliwa. Kumapkapuy met ti espiritualidad ti dadduma gapu kadagiti pakarigatan ken pakaringgoran iti inaldaw a panagbiag. Isaludsodmo iti bagim: ‘Ipakpakita kadi dagiti desisionko nga iyun-unak dagiti napatpateg a bambanag?’

4. (a) Ania ti inkararag ni Pablo maipapan kadagiti Kristiano idiay Filipos, ken apay? (b) Ania ti usigentayo iti daytoy nga artikulo ken iti sumaruno, ken ania ti maitulong dagitoy?

4 Masapul nga agregget dagiti Kristiano idi umuna a siglo tapno mayun-unada ti agserbi iti Dios. Iti kararag ni apostol Pablo maipapan kadagiti taga-Filipos, indawatna a ‘masiguradoda koma ti napatpateg a bambanag.’ (Basaen ti Filipos 1:9-11.) Kas ken apostol Pablo, kaaduan idi a Kristiano ket ‘mangipakpakita iti ad-adda pay a tured tapno awanan buteng a maisaoda ti sao ti Dios.’ (Fil. 1:12-14) Adu met ita kadatayo ti situtured a mangikaskasaba iti Sao ti Dios. Ngem makatulong kadi ti panangutobtayo iti maar-aramidan ita ti organisasion ni Jehova tapno mayun-unatayo ti nakapatpateg a trabaho a panangasaba? Sigurado a kasta! Iti daytoy nga artikulo, usigentayo ti urnos nga inaramid ni Jehova iti pannakaitungpal ti Mateo 24:14. Ania ti nakaipamaysaan ti organisasionna, ken kasano a makapabileg dayta kadatayo ken iti pamiliatayo? Iti sumaruno nga artikulo, usigentayo met no ania ti makatulong tapno makapagibturtayo ken madanggayantayo ti organisasion ni Jehova.

UMAB-ABANTE TI NAILANGITAN A PASET TI ORGANISASION NI JEHOVA

5, 6. (a) Apay a nangipaay ni Jehova kadagiti sirmata maipapan iti nailangitan a paset ti organisasionna? (b) Ania ti nakita ni Ezequiel iti sirmata?

5 Adu a banag ti saan nga inraman ni Jehova iti naisurat a Saona. Kas pagarigan, saan a nangipaay kadagiti detalye maipapan iti panagandar ti utektayo wenno ti uniberso, nupay makapagagar koma a maammuan dagita! Nangipaay laeng ni Jehova iti impormasion a kasapulan tapno maawatantayo dagiti panggepna ken tapno makapagbiagtayo maitunos kadagita. (2 Tim. 3:16, 17) Makapainteres ngarud ta nangipaay ti Biblia iti pamalatpatan iti di makita a paset ti organisasion ni Jehova! Makapagagar a mabasa ti pannakailadawan ti urnos ni Jehova idiay langit nga insurat da Isaias, Ezequiel, ken Daniel ken iti salaysay ni Juan iti librona nga Apocalipsis. (Isa. 6:1-4; Ezeq. 1:4-14, 22-24; Dan. 7:9-14; Apoc. 4:1-11) Kasla adda kortina nga inwalin ni Jehova tapno maimatangantayo ti mapaspasamak idiay langit. Apay nga impaayna daytoy nga impormasion?

6 Kayat ni Jehova a ditay koma liplipatan a pasetnatayo ti maysa nga unibersal nga organisasion. Kinapudnona, adu ti ar-aramiden ti di makita a paset ti organisasion ni Jehova iti pannakaibanag dagiti panggepna. Kas pagarigan, nasirmata dayta ni Ezequiel kas dakkel a nailangitan a karuahe, a  sipapartak a makapaggunay ken makapagbaliw ti turongenna. (Ezeq. 1:15-21) Adayo ti madanon ti maminsan laeng a panagrikus dagiti pilidna. Nakita met ni Ezequiel ti Nakasakay iti karuahe. Kinunana: “Nakitak ti maysa a banag a kas iti rangrang ti elektrum, kas iti langa ti apuy iti intero nga aglikmut . . . Dayta ti langa a kaasping ti dayag ni Jehova.” (Ezeq. 1:25-28) Nagamanga la ketdi ni Ezequiel bayat a kitkitaenna daytoy a sirmata! Nakitana a naan-anay a kontrolado ni Jehova ti organisasionna ken us-usarenna ti nasantuan nga espirituna a mangiturong iti dayta. Anian a nagsayaat daytoy a pannakailadawan ti umab-abante a nailangitan a paset ti organisasion ni Jehova!

7. Kasano a mapabilegtayo iti sirmata ni Daniel?

7 Mapabilegtayo met iti nasirmata ni Daniel. Nakitana ni Jehova kas “ti Kadaanan iti Al-aldaw” a situtugaw iti trono, nga addaan iti gumilgil-ayab nga apuy ken pilpilid. (Dan. 7:9) Kayat ni Jehova a makita ni Daniel nga umab-abante ti organisasionna a mangitungpal iti panggepna. Nakita met ni Daniel ti “maysa a kasla anak ti tao,” ni Jesus, a nakaitalkan ti pannakaiwanwan ti naindagaan a paset ti organisasion ni Jehova. Saan a sumagmamano laeng a tawen ti perpekto a panagturay ni Kristo no di ket “di nakedngan ti kapautna [ken] saanto nga aglabas, ket ti pagarianna maysa a saanto a madadael.” (Dan. 7:13, 14) Daytoy a sirmata tignayennatayo nga agtalek ken Jehova ken mangapresiar iti ar-aramidenna. Intedna ti “panagturay ken dayaw ken pagarian” iti mapangnamnamaan nga Anakna, ni Jesus, gapu ta agtalek kenkuana. Agtalektay met koma iti panangidaulo ni Jesus.

8. Ania ti narikna da Ezequiel ken Isaias maipapan kadagiti sirmata nga impakita kadakuada ni Jehova, ken ania koma ti epekto dagita kadatayo?

 8 Ania koma ti epekto kadatayo dagitoy a sirmata maipapan iti di makita a paset ti organisasion ni Jehova? Kas ken Ezequiel, sigurado met a masdaawtayo kadagiti banag nga itungtungpal ni Jehova. (Ezeq. 1:28) No mennamennaentayo ti organisasion ni Jehova, magutugottayo met nga agtignay, kas inaramid ni Isaias. Idi naitukon kenkuana ti pribilehio a mangiwaragawag iti banag nga ar-aramiden ni Jehova, di nagkedked a nangawat iti dayta. (Basaen ti Isaias 6:5, 8.) Gapu ta agtalek a tumulong ni Jehova, natalged ti rikna ni Isaias nga agballigi iti aniaman a rigat a pakaipasanguanna. Kas ken Isaias, matignaytay met koma a mangsuporta iti organisasion ni Jehova babaen ti sireregta a panagserbitayo. Pudno a makaparegta a mennamennaen dayta nga organisasion, a kanayon nga umab-abante ken naipamaysa a mangitungpal kadagiti panggep ni Jehova!

TI NAINDAGAAN A PASET TI ORGANISASION NI JEHOVA

9, 10. Apay a masapul nga adda makita a paset ti organisasion ni Jehova?

9 Babaen iti Anakna, nangaramid ni Jehova iti urnos ditoy daga a makidanggay iti di makita a paset ti organisasionna. Apay a masapul nga adda makita nga urnos tapno maibanag ti trabaho a nailadawan iti Mateo 24:14? Adtoy ti tallo a makagapu.

10 Umuna, imbaga ni Jesus a mangasabanto dagiti adalanna “agingga iti kaadaywan a paset ti daga.” (Ara. 1:8) Maikadua, masapul a mataraonan iti naespirituan ken maaywanan dagidiay makiramraman iti daytoy a trabaho. (Juan 21:15-17) Maikatlo, masapul nga agtataripnongda tapno maidaydayawda ni Jehova ken masursuroda ti mangasaba. (Heb. 10:24, 25) Tapno maibanag amin dagitoy, masapul nga organisado dagiti pasurot ni Kristo.

11. Kasanotayo a maipakita ti suportatayo kadagiti urnos ti organisasion ni Jehova?

11 Kasanotayo a maipakita ti suportatayo kadagiti urnos ti organisasion ni Jehova? Ti maysa a napateg a pamay-an ket ti kanayon a panagtalek kadagidiay mangidadaulo iti trabahotayo a panangasaba. Dagitoy a kakabsat ket pagtaltalkan ni Jehova ken ni Jesus. Adu a banag ditoy lubong ti mabalin koma a mangagaw iti atension dagiti mangidadaulo kadatayo. Ngem ania ti kangrunaan nga ar-aramiden ti makita a paset ti organisasion ni Jehova?

NAIPAMAYSA ITI “NAPATPATEG A BAMBANAG”

12, 13. Kasano nga ar-aramiden dagiti panglakayen ti annongenda, ken apay a makaparegta kenka dayta?

12 Dagiti nasanay a panglakayen iti intero a lubong ti nadutokan a mangimaton ken mangidaulo iti pannakaikasaba ti Pagarian iti pagilian a pagserserbianda. Sakbay nga agdesisionda, agpaiwanwanda iti Sao ti Dios, a pagbalinenda dayta kas ‘pagsilawan iti sakada ken silaw iti danada,’ ken sipapasnek nga ikararagda ti panangidalan ni Jehova.—Sal. 119:105; Mat. 7:7, 8.

13 Kas kadagiti mangidadaulo idi umuna a siglo, sipapasnek met nga idadauluan dagiti panglakayen ita ti trabaho a panangasaba. (Ara. 6:4) Nakaragragsakda ta dumurdur-as ti pannakaikasaba ti naimbag a damag iti lugarda ken iti intero a lubong. (Ara. 21:19, 20) Imbes a mangaramidda iti nakaad-adu a paglintegan para iti kongregasion, sursurotenda ti Kasuratan ken ti panangiwanwan ti nasantuan nga espiritu ti Dios no mangaramidda kadagiti urnos para iti pannakayadelantar ti trabaho a panangasaba. (Basaen ti Aramid 15:28.) Iti kastoy a pamay-an, mangipapaay dagitoy a kakabsat  iti nasayaat nga ulidan kadagiti amin a kongregasion.—Efe. 4:11, 12.

14, 15. (a) Ania dagiti naaramid nga urnos tapno masuportaran ti sangalubongan a trabaho a panangasaba? (b) Ania ti panagriknam maipapan iti pribilehiom a mangsuporta iti pannakaikasaba iti Pagarian?

14 Adu kadagiti kakabsattayo ti inaldaw nga agtrabaho tapno maisagana ti naespirituan a taraontayo para kadagiti publikasion, gimong, ken kombension. Rinibu a boluntario ti siaanep a mangipatpatarus iti daytoy a naespirituan a taraon iti agarup 600 a lengguahe tapno adu ti makasursuro maipapan iti “natan-ok a bambanag ti Dios” iti bukodda a lengguahe. (Ara. 2:7-11) Agtitinnulong dagiti agkabannuag a lallaki ken babbai iti pannakaaramid dagiti publikasiontayo babaen kadagiti napartak a pagimprentaan ken bindery equipment. Kalpasanna, maipatulod dagitoy a literatura kadagiti kongregasion, uray kadagiti nasulinek a lugar.

15 Kadagiti lokal a kongregasion, adu nga urnos ti maipatpatungpal tapno maipamaysatayo iti panangikasaba iti naimbag a damag. Kas pagarigan, rinibu ti agbolboluntario a tumulong iti pannakaibangon dagiti Kingdom Hall ken Assembly Hall, pannakasaranay dagidiay naapektaran iti kalamidad wenno maipaspasango iti medikal nga emerhensia, ken pannakaorganisar dagiti asamblea ken kombensiontayo. Mangisuroda met kadagiti nadumaduma a teokratiko nga eskuelaan. Sumagmamano laeng dagita kadagiti trabaho a saan a makitkita ti kaaduan. Ania ti panggep dagitoy a trabaho? Maar-aramid dagitoy tapno maikasaba ti naimbag a damag, mapabileg ti espiritualidad dagidiay karaman iti daytoy a trabaho, ken matulongan ti ad-adu pay nga agbalin nga adipen ni Jehova. Talaga nga inyun-una ti naindagaan a paset ti organisasion ni Jehova ti napatpateg a bambanag!

TULADEN TI ULIDAN TI ORGANISASION NI JEHOVA

16. Ania ti nasayaat nga iramanyo iti personal wenno sangapamiliaan a panagadalyo iti Biblia?

16 Ut-utobentayo met laeng kadi dagiti nadumaduma a trabaho iti organisasion ni Jehova? Inyurnos ti dadduma nga iramanda ti panagsukimat ken panagmennamenna maipapan kadagita iti tiempo ti panagdaydayaw ti pamiliada wenno iti personal a panagadalda. Makapainteres nga adalen dagiti sirmata da Isaias, Ezequiel, Daniel, ken Juan. Adu pay ti maammuantayo maipapan iti organisasion iti libro a Dagiti Saksi ni Jehova—Manangiwaragawag iti Pagarian ti Dios ken iti dadduma pay a publikasion wenno DVD a magun-odan iti lengguaheyo.

17, 18. (a) Ania ti naitulong kenka daytoy nga artikulo? (b) Ania dagiti saludsod nga usigentayo?

17 Makatulong no utobentayo dagiti ar-aramiden ni Jehova babaen iti organisasionna. Makidanggaytay koma iti daytoy a naisangsangayan nga organisasion a determinado a mangipamaysa iti napatpateg a bambanag. No kasta ti aramidentayo, matuladtayo ti determinasion ni Pablo a nagkuna: “Yantangay adda kadakami daytoy a ministerio sigun iti asi a naipakita kadakami, saankami a sumuko.” (2 Cor. 4:1) Imparegtana pay kadagiti katrabahuanna: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.”—Gal. 6:9.

18 Adda kadi masapul a balbaliwantayo kas indibidual wenno pamilia tapno masiguradotayo dagiti napatpateg a bambanag iti inaldaw a rutinatayo? Mabalintay kadi a pasimplien ti biagtayo wenno kissayan dagiti pakasingaantayo tapno ad-adu ti tiempotayo iti nakapatpateg a trabaho a panangasaba? Iti sumaruno nga artikulo, usigentayo ti lima a banag a makatulong tapno madanggayantayo ti organisasion ni Jehova.