Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ABRIL 2013

Naan-anay a Magunggonaan iti Panagbasa iti Biblia

Naan-anay a Magunggonaan iti Panagbasa iti Biblia

“Pudno a pagragsakak ti linteg ti Dios.”—ROMA 7:22.

1-3. Ania dagiti gunggona iti panangbasa iti Biblia ken panangyaplikar kadagiti pannursuro a linaonna?

“BINIGAT nga agyamanak ken Jehova gapu ta tultulongannak a mangtarus iti Biblia.” Dayta ti komento ti maysa a baket a Kristiano a nakabasan iti Biblia iti nasurok nga 40 a daras, ken agtultuloy pay laeng agingga ita. Insurat met ti ub-ubing a kabsat a babai a gapu iti panagbasbasana iti Biblia, nagbalin a napaypayso kenkuana ni Jehova ken nasingsinged iti nailangitan nga Amatayo. Kinunana, “Ita pay la a mariknak ti kastoy a ragsak!”

2 Imparegta ni apostol Pedro a “patanoren[tayo] ti panagtarigagay iti awan lalaokna a gatas a kukua ti sao.” (1 Ped. 2:2) No penkentayo dayta a tarigagay babaen ti panangadal ken panangyaplikartayo kadagiti pannursuro ti Biblia, maaddaantayo iti nadalus a konsiensia ken makagunggona a biag. Maaddaantayo iti nasayaat a gagayyem a mangay-ayat ken agserserbi iti pudno a Dios. Amin dagitoy ti panggapuantayo nga ‘agragsak iti linteg ti Dios.’ (Roma 7:22) Ngem ad-adu pay ti magunggona iti dayta. Ania ti sumagmamano kadagita?

3 No ad-adu ti masursurom maipapan ken Jehova ken iti Anakna, ad-adda met a dumakkel ti panagayatmo kadakuada ken iti padam a tao. Maadalmo met iti Biblia no kasano nga isalakan ti Dios dagiti natulnog a tattao iti daytoy agngangabiten a lubong. Iti ministeriom, adda naimbag a damag a mabalinmo nga iranud kadagiti tattao. Bendisionannaka ni Jehova bayat nga isursurom iti sabsabali ti maipapan kadagiti naammuam iti panagbasam iti Sao ti Dios.

AGBASA KEN AGMENNAMENNA

4. Ania ti kayat a sawen ti panangbasa iti Biblia iti “nababa a timek”?

4 Saan a kayat ni Jehova nga agap-apura dagiti adipenna a mangbasa iti Saona. Imbilinna ken Josue: “Daytoy a libro ti linteg saan koma a sumina iti ngiwatmo,  ket masapul nga iti nababa a timek agbasaka iti dayta iti aldaw ken rabii.” (Jos. 1:8; Sal. 1:2) Kayatna kadi a sawen a masapul a basaem iti nababa a timek ti amin a sasao manipud Genesis agingga’t Apocalipsis? Saan. Kaipapananna nga agbasaka iti nainayad tapno makapagmennamennaka. No basaem ti Biblia iti “nababa a timek,” masiputam dagiti punto a napateg ken makapabileg kenka iti dayta a gundaway. No madanonmo dagita a paset, bersikulo, wenno salaysay, ibambannayatmo a basaen, a nalabit iyebkasmo pay ketdi. Makitamto a dumanon iti pusom ti kababagas ti basbasaem. Apay a napateg daytoy? Gapu ta no maawatam ti anag ti balakad ti Dios, ad-adda a matignayka a mangyaplikar iti dayta.

5-7. Ilawlawagmo no kasano a ti panagbasa iti Biblia iti nababa a timek matulongannaka nga (a) agtalinaed a nadalus iti moral; (b) agbalin a naanus ken naasi iti sabsabali; (c) agtalek ken Jehova uray kadagiti narigat a kasasaad.

5 Makatulong no basaem iti nababa a timek dagiti libro ti Biblia a saan a pamiliar kenka. Usigem dagitoy tallo a kasasaad. Umuna, ti iskediul ti panagbasa ti maysa nga agtutubo a lalaki ket addan iti padto ni Oseas. Iti kapitulo 4, nagsardeng biit kalpasan a binasana iti nababa a timek ti bersikulo 11 agingga’t 13. (Basaen ti Oseas 4:11-13.) Apay? Naginteresanna dagita a bersikulo ta sulsulisogen dagiti kaeskuelaanna nga agaramid iti immoralidad. Inut-utobna dagita ket napanunotna: ‘Makitkita ni Jehova dagiti dakes nga ar-aramiden dagiti tattao uray no awan ti sabali a makakitkita. Diak kayat a masaktan ti riknana.’ Inkeddeng daytoy a kabsat nga agtalinaed a nadalus iti moral iti imatang ti Dios.

6 Maikadua, basbasaen ti maysa a kabsat a babai ti padto ni Joel ket nadanonna ti kapitulo 2, bersikulo 13. (Basaen ti Joel 2:13.) Bayat a basbasaenna dayta iti nababa a timek, inut-utobna no kasano a matuladna ni Jehova, a “managparabur ken naasi, nabannayat nga agunget ken naruay iti naayat a kinamanangngaasi.” Inkeddengna nga isardengnan ti makainsulto ken nagubsang a panagsasaona kas iti ar-aramidenna no dadduma ken lakayna ken iti sabsabali.

7 Maikatlo, ipapanmo nga adda Kristiano nga ama a naawanan iti trabaho ket madandanagan no kasano a maipaayna ti kasapulan ni baketna ken dagiti annakda. Binasana iti nababa a timek ti Nahum 1:7, nga agkuna a “siaammo [ni Jehova] kadagidiay agkamkamang kenkuana” ken salaknibanna ida kas “maysa a salindeg iti aldaw ti rigat.” Naliwliwa iti nabasana. Nariknana nga ay-aywanan ida ni Jehova ket saan unayen a madanagan. Idi kuan, binasana met ti bersikulo 15 iti nababa a timek. (Basaen ti Nahum 1:15.) Nabigbig daytoy a kabsat a babaen ti panangikasabana iti naimbag a damag iti laksid dagiti narigat a kasasaad, ibilbilangna ni Jehova kas salindegna. Bayat nga agsapsapul iti trabaho, natignay met a mangsuporta iti panangasaba iti tengnga ti lawas.

8. Mangibagaka iti maysa a naespirituan a saniata a nasarakam iti panagbasam iti Biblia.

8 Dagiti napateg a punto a nadakamat ket manipud kadagiti libro ti Biblia nga ipagarup ti dadduma a narigat a matarusan. Bayat nga us-usigem ken ad-adalem ti libro nga Oseas, Joel, ken Nahum, nasayaat no basaem iti nababa a timek ti dadduma pay a bersikulo dagita. Panunotem ti kaadu ti magun-odmo a sirib ken liwliwa kadagita a sinurat dagiti propeta! Kasta met laeng ti maaramidan kenka ti dadduma pay a paset ti Biblia. Mayarig ti Sao ti Dios iti pagminasan nga aduan iti diamante. Bayat a basbasaem ti intero a Biblia, ikagumaam a biroken dagiti arig saniata a panangiwanwan ken pammaregta ti Dios.

IKAGUMAAM A TARUSAN TI BASBASAEM

9. Kasanotayo a mapauneg ti pannakaawattayo iti pagayatan ti Dios?

9 Nupay napateg ti inaldaw a panagbasa iti Biblia, siguraduem met a maawatam ti basbasaem.  Nasayaat no agsukisokka kadagiti publikasion ti organisasion ni Jehova tapno maammuam ti maipapan iti tattao, luglugar, ken paspasamak a basbasaem. No kayatmo nga ammuen no kasano nga agaplikar kenka ti maysa a punto iti Biblia, agpatulongka iti maysa a panglakayen wenno iti sabali pay a nataengan a Kristiano. Tapno maammuantayo no apay a nasken a paunegentayo ti pannakaawattayo, usigentayo ti ulidan ti maysa a Kristiano idi umuna a siglo—ni Apolos.

10, 11. (a) Kasano a natulongan ni Apolos a rumang-ay kas ministro iti naimbag a damag? (b) Ania ti maadaltayo iti salaysay maipapan ken Apolos? (Kitaen ti kahon a “Maitunos Kadi ti Isursurom iti Kabaruan a Lawag?”)

10 Ni Apolos ket maysa a Judio a Kristiano a “nalaing iti Kasuratan” ken “nasged iti espiritu.” Kastoy ti kuna ti libro ti Aramid: “Insasao ken insursurona a siuumiso ti bambanag maipapan ken Jesus, ngem ti laeng pammautisar ni Juan ti ammona.” Saan nga ammo ni Apolos a saanen a maitunos iti kabaruan a lawag ti isursurona maipapan iti bautismo. Idi nangngegan dagiti Kristiano nga agassawa a da Priscila ken Aquila ti panangisuro ni Apolos idiay Efeso, inlawlawagda kenkuana ti ‘umiso maipapan iti dalan ti Dios.’ (Ara. 18:24-26) Kasano a nagunggonaan ni Apolos?

11 Kalpasan ti panangasaba ni Apolos idiay Efeso, napan met idiay Acaya. “Idi nakagteng sadiay, tinulonganna iti kasta unay dagidiay namati maigapu iti di kaikarian a kinamanangngaasi ti Dios; ta buyogen ti kinanasged naan-anay a pinaneknekanna iti publiko a dagiti Judio saanda nga umiso, bayat nga imparangarangna babaen kadagiti Kasuratan a ni Jesus isu daydi Kristo.” (Ara. 18:27, 28) Siuumiso idin a mailawlawag ni Apolos ti kaipapanan ti Nakristianuan a bautismo. Gapu ta nalawlawagen ti pannakaawatna, dakkel ti naitulongna kadagiti kabbaro a rumang-ay iti kinapudno. Ania ti  maadaltayo iti daytoy? Kas ken Apolos, ikagumaantayo koma a tarusan ti mabasbasatayo iti Biblia. Ngem no adda isingasing ti maysa nga eksperiensiado a kapammatiantayo a mangpasayaat iti panangisurotayo, sipapakumbaba ken siyayaman koma nga awatentayo dayta.

USAREM TI NASURSUROM A PANGTULONG ITI SABSABALI

12, 13. Iladawam no kasano a makatulong iti irarang-ay dagiti mayad-adalan iti Biblia ti nataktika a panangusar iti Kasuratan.

12 Kas kada Priscila, Aquila, ken Apolos, makatulongtayo met iti sabsabali. Ania ti mariknam no natulongam ti maysa nga interesado nga agbalbaliw ken rumang-ay iti kinapudno? Wenno kas panglakayen, ania ti mariknam no agyaman kenka ti maysa a kabsat gapu ta nakatulong kenkuana ti Nainkasuratan a balakadmo? Pudno a mangyeg iti rag-o ti panangaramat iti Sao ti Dios tapno tulongan ti sabsabali a mangpasayaat iti biagda. * Kasano a maaramidam dayta?

13 Idi kaaldawan ni Elias, saan a maikeddeng ti adu nga Israelita no ania ti annurotenda—ti pudno a panagdayaw wenno ti palso a panagdayaw. Ti imbalakad ni Elias ket makatulong iti di rumangrang-ay a mayad-adalan iti Biblia. (Basaen ti 1 Ar-ari 18:21.) Usigem ti sabali pay a kasasaad: No ti maysa nga interesado ket maamak iti reaksion dagiti gagayyem wenno kapamiliana, pabilgem ti determinasionna nga agdayaw ken Jehova babaen ti panangaramatmo iti Isaias 51:12, 13.Basaen.

14. Ania ti makatulong kenka a manglagip kadagiti teksto ti Biblia a kasapulam iti panangtulongmo iti sabsabali?

14 Nabatad a makaparegta, makailinteg, wenno makapabileg ti adu a linaon ti Biblia. Ngem nalabit maisaludsodmo, ‘Ania ti aramidek tapno nalakak a malagip ti kasapulak a kasuratan?’ Basaem ti Biblia ken inaldaw a mennamennaem ti pampanunot ti Dios. Iti kasta, maipempen iti panunotmo dagiti teksto a mabalin nga ipalagip ti espiritu ni Jehova no kasapulam.—Mar. 13:11; basaen ti Juan 14:26. *

15. Ania ti makatulong kenka tapno naan-anay a matarusam ti Sao ti Dios?

15 Kas ken Ari Solomon, ikararagmo ken Jehova nga ipaayannaka iti sirib tapno maitungpalmo dagiti nateokratikuan nga annongem. (2 Cron. 1:7-10) Kas kadagiti propeta idi ugma, ‘sigaganetget nga agsukimatka ken siaannad nga agsirarakka’ iti Sao ti Dios tapno maammuam ti umiso a pannakaammo ken Jehova ken iti pagayatanna. (1 Ped. 1:10-12) Pinaregta ni apostol Pablo ni Timoteo nga adalenna ti ‘sasao ti pammati ken ti nasayaat a sursuro.’ (1 Tim. 4:6) No kasta ti aramidem, matulongamto ti sabsabali a rumang-ay iti naespirituan ken bumileg pay ti pammatim.

MAYSA A PROTEKSION TI PANAGBASA ITI SAO TI DIOS

16. (a) Kasano a nagunggonaan dagiti taga-Berea iti ‘naannad a panagsukimatda iti Kasuratan iti inaldaw’? (b) Apay a nakapatpateg ita kadatayo ti inaldaw a panagbasa iti Biblia?

16 Nakairuaman dagiti Judio iti siudad ti Berea idiay Macedonia a ‘siaannad a sukimaten ti Kasuratan iti inaldaw.’ Idi inkasaba kadakuada ni Pablo ti naimbag a damag, indiligda ti imbagana iti nagun-odandan a pannakaammo iti Kasuratan. Ania ti nagbanaganna? Adu ti nakombinsir a kinapudno ti isursurona, ket “nagbalin[da] a manamati.” (Ara. 17:10-12) Ipakita daytoy a bumileg ti pammatim ken Jehova no inaldaw a basaem ti Biblia. Kasapulantayo ti kasta a pammati,  “ti sigurado a panangsegsegga iti bambanag nga in-inanamaen,” tapno makalasattayo nga agturong iti baro a lubong ti Dios.—Heb. 11:1.

17, 18. (a) Kasano a ti nabileg a pammati ken ayat masalaknibanda ti piguratibo a puso ti maysa a Kristiano? (b) Kasano a masalaknibannatayo ti namnama?

17 Kinuna ni Pablo: “No maipapan kadatayo a kukua ti aldaw, agtalinaedtay koma a sipupuot ket ikapettayo ti kabal ti barukong nga isu ti pammati ken ayat ket ti namnama ti pannakaisalakan kas kabal ti ulo.” (1 Tes. 5:8) Masapul a masalakniban ti puso ti maysa a soldado manipud iti kabusor. Umasping iti dayta, masapul a masalakniban ti piguratibo a puso ti maysa a Kristiano manipud iti basol. Ania ti resultana no nabileg ti pammati dayta a Kristiano ken ay-ayatenna ti Dios ken ti padana a tao? Arigna ikapkapetna ti kalagdaan a naespirituan a kabal iti barukongna. Iti kasta, maliklikanna ti agaramid iti banag a saan nga anamongan ti Dios.

18 Dinakamat met ni Pablo ti kabal ti ulo, “ti namnama ti pannakaisalakan.” Idi tiempo ti Biblia, agpegpeggad ti biag ti soldado nga awanan iti kabal ti ulo. Ngem no nalagda ti kabal ti ulona, maliklikanna ti nakaro a pannakadangran ti ulona. No adalentayo ti Sao ti Dios, bumileg ti namnamatayo iti pannakabalinna a mangisalakan. Tumulong kadatayo ti nabileg a namnama tapno masarangettayo dagiti apostata ken dagiti arig gangrena nga “ubbaw a panagsasao[da].” (2 Tim. 2:16-19) Dayta met ti mangpabileg iti determinasiontayo a mangliklik iti dakes nga ar-aramid a kondenaren ni Jehova.

KASAPULAN ITI PANNAKAISALAKAN

19, 20. Apay a nasken a tagipatgentayo ti Sao ti Dios, ken kasano a maipakitatayo ti panagyamantayo iti dayta? (Kitaen ti kahon a “Talaga nga Ipapaay ni Jehova ti Mismo a Kasapulak.”)

19 Bayat nga umas-asideg ti panungpalan daytoy a lubong, ad-adda a kasapulantay ti agpannuray iti Sao ni Jehova. Dagiti linaonna a balakad matulongannatayo a mangisardeng kadagiti dakes a kababalin ken mangparmek kadagiti dakes a panagem. Paregtaen ken liwliwaennatayo dayta a mangibtur iti aniaman a suot nga ipaay ni Satanas ken ti lubongna. Iti panangiwanwan ni Jehova babaen ti Saona, makapagtalinaedtayo iti dalan nga agturong iti biag.

20 Laglagipentayo a pagayatan ti Dios a “maisalakan koma dagiti amin a kita ti tattao.” Karaman kadagita dagiti adipen ni Jehova ken dagidiay dumngeg iti naimbag a damag ken agpayadal iti Biblia. Ngem masapul a gumun-od iti “umiso a pannakaammo iti kinapudno” ti amin a mayat a maisalakan. (1 Tim. 2:4) Nasken ngarud a basaentayo ti Biblia ken iyaplikartayo dagiti naipaltiing nga instruksion a linaonna. Wen, no inaldaw a basaentayo dayta, ipakpakitatayo a tagtagipatgentayo ti kinapudno a linaon ti Sao ni Jehova.—Juan 17:17.

^ par. 12 Siempre, saantayo nga usaren ti balakad ti Biblia a mangpilit wenno mangkondenar iti sabsabali. Naanus ken naasitayo koma iti iyad-adalantayo iti Biblia, no kasano a kasta met kadatayo ni Jehova.—Sal. 103:8.

^ par. 14 Ania ti aramidem no dagiti laeng kangrunaan a sasao ti malagipmo imbes a ti libro, kapitulo, ken bersikulo? Mabalin a makatulong kenka ti indise iti likud ti Biblia, ti Watchtower Library, wenno ti konkordansia ti New World Translation.