Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ABRIL 2013

‘Ditay Koma Mabannog’

‘Ditay Koma Mabannog’

“Ditay koma sumuko nga agaramid iti nasayaat.”—GAL. 6:9.

1, 2. Kasano a mapabileg ti panagtalektayo no utobentayo ti intero nga organisasion ni Jehova?

ANIAN a nakaskasdaaw a panunoten a pasettayo ti nakadakdakkel nga organisasion a saklawna ti intero nga uniberso. Dagiti sirmata a nairekord iti Ezequiel kapitulo 1 ken Daniel kapitulo 7 silalawag nga iladawanda nga imanmaniobra ni Jehova ti bambanag tapno matungpal ti panggepna. Idadauluan ni Jesus ti naindagaan a paset ti organisasion ni Jehova tapno mayun-una ti panangasaba iti naimbag a damag, maipaay ti naespirituan a kasapulan dagidiay mangitungtungpal iti daytoy a trabaho, ken maitandudo ti pudno a panagdayaw ken Jehova. Gapu iti dayta, magutugottayo nga agtalek iti organisasion ni Jehova.—Mat. 24:45.

2 Personal kadi a makidangdanggaytayo iti daytoy a naisangsangayan nga organisasion? Narayray pay la kadi ti regtatayo, wenno bimmaawen? Mabalin a mariknatayo a nabannogtayon wenno nalabit napukawtayon ti dati a regtatayo. Posible a mapasamak dayta. Idi umuna a siglo, pinaregta ni apostol Pablo dagiti padana a Kristiano nga usigenda ti kinaregta ni Jesus tapno saan a ‘mabannog ken agkapuy dagiti kararuada.’ (Heb. 12:3) Iti napalabas nga artikulo, inusigtayo ti naindaklan a trabaho nga itungtungpal ita ti organisasion ni Jehova. No kasano a napabileg dagiti Kristiano idi umuna a siglo iti ulidan ni Kristo, mapabilegtayo met ita iti ulidan ti organisasion ni Jehova tapno makapagibturtayo ken agtalinaedtayo a naregta.

3. Ania ti kasapulan tapno saantay a mabannog, ken ania ti usigentayo iti daytoy nga artikulo?

3 Ngem kuna ni Pablo a saan laeng a dayta ti kasapulan tapno saantay a mabannog. Imbagana a masapul nga agreggettayo nga “agaramid iti nasayaat.” (Gal. 6:9) Kasapulantay ngarud ti agtignay. Usigentay ti lima a banag a makatulong tapno makapagtultuloytayo a natibker ken madanggayantayo ti organisasion ni Jehova. Iti kasta, makitatayo no ania ti masapul a parang-ayentayo kas indibidual wenno kas pamilia.

 PANAGTATARIPNONG TAPNO AGPIPINNAREGTA KEN MAKAPAGDAYDAYAW ITI DIOS

4. Apay a makunatayo a napateg a paset ti panagdaydayawtayo ti panagtataripnong?

4 Sipud idi damo, napategen ti panagtataripnong kadagiti adipen ni Jehova. Adda dagiti gundaway a maawis dagiti espiritu a parsua idiay langit tapno dumatagda iti sanguanan ni Jehova. (1 Ar. 22:19; Job 1:6; 2:1; Dan. 7:10) Iti nagkauna nga Israel, naibilin nga aguummong dagiti umili tapno ‘makapagimdeng ken makasursuroda.’ (Deut. 31:10-12) Kaugalian dagiti Judio idi umuna a siglo ti mapan kadagiti sinagoga tapno agbasa iti Kasuratan. (Luc. 4:16; Ara. 15:21) Nagtultuloy a napateg ti panagtataripnong idi nabuangay ti kongregasion Kristiano, ken paset pay laeng dayta ti panagdaydayawtayo ita. Dagiti pudno a Kristiano ‘agpipinnanunotda iti maysa ken maysa tapno makapagpipinnaregtada iti ayat ken nasayaat nga ar-aramid.’ Kasapulan nga “agpipinnaregtatayo, ket nangnangruna a kasta bayat a makitkitayo nga umas-asidegen ti aldaw [ni Jehova].”—Heb. 10:24, 25.

5. Kasano a makapagpipinnaregtatayo kadagiti gimong?

5 Ti maysa a pamay-an a makapagpipinnaregtatayo ket ti pannakipasettayo kadagiti gimong. Mabalin nga iyebkastayo ti pammatitayo babaen ti panangsungbat kadagiti saludsod iti parapo, panangkomento iti kasuratan, wenno panangisalaysay iti ababa a kapadasan no kasano a nakatulong dagiti prinsipio ti Biblia, wenno iti dadduma pay a pamay-an. (Sal. 22:22; 40:9) Sigurado nga umanamongka nga uray nabayagkan a makigimgimong, maparegtaka latta iti naimpusuan a komento dagiti kakabsattayo—agtutubo man wenno nataengan.

6. Kasano a makatulong dagiti gimong tapno agtultuloy nga aktibotayo iti naespirituan?

6 Ania pay dagiti rason no apay nga impaganetget ti Dios ti regular a panagtataripnongtayo? Makatulong dagiti gimong, asamblea, ken kombension tapno tumuredtayo nga agsao uray no bumusbusor wenno di mangikankano dagiti tattao iti teritoriatayo. (Ara. 4:23, 31) Maparegtatayo ken tumibker ti pammatitayo gapu kadagiti diskusion a naibatay iti Kasuratan. (Ara. 15:32; Roma 1:11, 12) Ti panagpipinnaregta ken pannakaisurotayo kadagiti gimong ket mangyeg iti pudpudno a kinaragsak ken liwliwa. (Sal. 94:12, 13) Ti Teaching Committee ti Bagi a Manarawidwid ti mangay-aywan iti pannakaisagana ti amin a naespirituan a programa a pakaisuruan ti ili ni Jehova iti intero a lubong. Anian a yamantayo kadagiti nagsayaat a pannursuro a maipapaay kadatayo kadagiti linawas a gimong!

7, 8. (a) Ania ti kangrunaan a panggep dagiti gimong ti kongregasion? (b) Kasano a mapabileg ti espiritualidadmo kadagiti gimong?

7 Ngem saantay laeng a mapan kadagiti gimong gapu kadagiti gunggona a magun-odantayo. Ti kangrunaan a panggep ti panagtataripnongtayo ket tapno agdaydayawtayo ken Jehova. (Basaen ti Salmo 95:6.) Anian a pribilehio ti mangidaydayaw iti naimbag a Diostayo! (Col. 3:16) Maikari a kanayon a pagdayawantayo ni Jehova babaen ti itatabuno ken pannakipasettayo kadagiti nateokratikuan a panagtataripnong. (Apoc. 4:11) Isu a naiparegta a “saantay a baybay-an ti panagtataripnongtayo a sangsangkamaysa, kas iti kaugalian ti dadduma”!—Heb. 10:25.

8 Ibilbilangtayo kadi dagiti Nakristianuan a gimong kas probision a tumulong kadatayo nga agibtur agingga nga agtignay ni Jehova maibusor iti daytoy dakes a sistema ti bambanag? No kasta, karaman dagiti gimong kadagiti “napatpateg a bambanag” a masapul nga iwayaantayo, uray no okupadotayo. (Fil. 1:10) Saantay koma a pulos liwayan ti makikaykaysa kadagiti kakabsattayo nga agdaydayaw ken Jehova, malaksid no adda nainkalintegan a rason.

SIREREGTA A MANGASABA

9. Kasanotay nga ammo a napateg ti trabaho a panangasaba?

9 Madanggayantayo met ti organisasion ni Jehova no naan-anay a makiramantayo iti trabaho a panangasaba. Ni Jesus ti nangirugi iti daytoy a trabaho idi adda ditoy daga. (Mat. 28:19, 20) Sipud idin, naipamaysan ti intero nga organisasion ni Jehova iti pannakaikasaba ti Pagarian ken panagaramid iti ad-adalan. Paneknekan dagiti kapadasan iti kaaldawantayo a supsuportaran dagiti anghel ti trabahotayo ken iturturongdatayo kadagidiay “siuumiso nga agannayas iti agnanayon a biag.” (Ara. 13:48; Apoc. 14:6, 7) Ti panggep ti naindagaan a paset ti organisasion ni Jehova ket tapno organisaren ken suportaran ti trabaho a panangasaba. Naipamaysa met kadi ti biagtayo iti ministerio?

10. (a) Mangted iti pagarigan no kasano nga agtalinaed ti gagartayo maipaay iti kinapudno. (b) Kasano a nakatulong kenka ti ministerio tapno saanka a mabannog?

10 No naregtatayo iti ministerio, agtalinaed ti gagartayo maipaay iti kinapudno. Usigem ti komento ni Mitchel a nabayagen a panglakayen ken regular pioneer. Kunana: “Magustuak nga isarsarita ti kinapudno kadagiti tattao. Pampanunotek ti nagustuak nga artikulo iti baro a Ti Pagwanawanan wenno Agriingkayo! gapu iti linaonna a sirib, pannakaawat, ken balanse nga impormasion. Kayatko ti mangasaba tapno maammuak ti reaksion dagiti tattao, ken no kasanok a mariing ti interesda. Ti ministeriok  ti nakatulong kaniak nga agtultuloy a naregta. Siguraduek nga awan makasinga iti tiempo nga inlatangko para iti ministerio.” Makapagtultuloytayo met a matalek kadagitoy maudi nga al-aldaw no okupadotayo nga agserbi iti Dios.—Basaen ti 1 Corinto 15:58.

PANANGSAGRAP KADAGITI NAESPIRITUAN A PROBISION

11. Apay a rumbeng a basaen ken utobentayo dagiti naespirituan a taraon nga ipapaay ni Jehova?

11 Mangipapaay ni Jehova iti nawadwad a naespirituan a taraon tapno bumilegtayo. Kalpasan a nabasam ti maysa a publikasiontayo, mabalin a naikunam: ‘Dayta a talaga ti kasapulak! Kasla impaisurat dayta ni Jehova para kaniak!’ Saan a naiparparna dayta no di ket talaga nga isursuro ken iwanwanwannatayo ni Jehova babaen kadagitoy a probision. Kinunana: “Pagbalinenkanto nga addaan iti pannakatarus ket isuroka iti dalan a rebbeng a papanam.” (Sal. 32:8) Ikagkagumaam kadi a basaen ken utoben dagiti amin a naespirituan a taraon a maaw-awattayo? No kasta ti aramidentayo, makapagtultuloytayo a nabunga ken saantay a malaylay iti naespirituan kadagitoy maudi nga al-aldaw.—Basaen ti Salmo 1:1-3; 35:28; 119:97.

12. Kasanotayo a matagipateg dagiti maipapaay a naespirituan a probision?

12 Nasayaat nga usigentayo no ania dagiti nainaig iti regular a pannakaipaay kadatayo ti makapasalun-at a naespirituan a probision. Imatmatonan ti Writing Committee ti Bagi a Manarawidwid ti panagsukimat, pannakaisurat, pannaka-proofread, pannakadisenio, ken pannakaipatarus dagiti nayimprenta a publikasiontayo ken dagiti material a maikabil iti Web site-tayo. Dagiti sanga nga opisina nga agim-imprenta ipatulodda dagiti literatura kadagiti kongregasion iti teritoriada. Apay a maar-aramid amin dagitoy? Tapno mataraonan a naimbag iti naespirituan dagiti adipen ni Jehova. (Isa. 65:13) Tagipatgentay koma ti naespirituan a taraon nga aw-awatentayo manipud iti organisasion ni Jehova.—Sal. 119:27.

PANANGSUPORTA KADAGITI URNOS TI ORGANISASION

13, 14. Siasino dagiti mangsupsuporta kadagiti urnos ni Jehova idiay langit, ken kasanotayo met a maipakita ti suportatayo?

13 Iti sirmata ni apostol Juan, nailadawan ni Jesus a nakasakay iti puraw a kabalio tapno parmekenna dagidiay bumusbusor iti Dios. (Apoc. 19:11-15) Anian a makapabileg a maammuan a sumursurot kenkuana dagiti matalek nga anghel ken dagiti napulotan manipud ditoy daga a napagungaren idiay langit! (Apoc. 2:26, 27) Anian a nagsayaat nga ulidan iti panangsuporta kadagiti urnos ni Jehova!

14 Naan-anay met a supsuportaran ti dakkel a bunggoy ti trabaho dagiti napulotan a kakabsat ni Kristo nga adda pay laeng ditoy daga ken mangidadaulo ita iti organisasion. (Basaen ti Zacarias 8:23.) Kasano a maipakitatayo kas indibidual ti suportatayo kadagiti urnos ni Jehova? Ti maysa a pamay-an isu ti panagpasakuptayo kadagidiay mangidadaulo. (Heb. 13:7, 17) Mangrugi dayta iti bukodtayo a kongregasion. Ipakita kadi dagiti komentotayo maipapan kadagiti panglakayen a raraementayo ida ken ti panangaywanda? Iparparegtatayo kadi kadagiti annaktayo a raemenda dagitoy a matalek a lallaki ken dumngegda kadagiti Nainkasuratan a balakadda? Pagsasaritaan kadi ti pamiliayo no kasano a masuportaranyo ti sangalubongan a trabaho babaen ti panangted iti donasion? (Prov. 3:9; 1 Cor. 16:2; 2 Cor. 8:12) Ibilbilangtayo kadi a napateg a pribilehio ti itutulong iti panangmantener iti Kingdom Hall? Sibubulos nga agayus ti espiritu ni Jehova no adda kasta a panagraem ken panagkaykaysa. Babaen iti dayta nga espiritu, agtultuloy a maipapaayantayo iti tulong tapno saantay a mabannog kadagitoy maudi nga al-aldaw.—Isa. 40:29-31.

 PANAGBIAG MAITUNOS ITI MENSAHETAYO

15. Apay a masapul nga itultuloytayo nga ikagumaan ti agbiag a maitunos iti panggep ni Jehova?

15 Tapno makapagibtur ken madanggayantayo ti organisasion ni Jehova, masapul nga itunostayo ti biagtayo iti mensahe nga awittayo babaen iti ‘panangsiguradotayo no ania ti makaay-ayo iti Apo.’ (Efe. 5:10, 11) Marigatantayo a mangaramid iti umiso gapu iti kinaimperpektotayo ken iti dakes nga impluensia ni Satanas ken daytoy a lubong. Dadduma kadakayo a patgenmi a kakabsat ti inaldaw a mangikagkagumaan a mangsalimetmet iti relasionyo ken Jehova. Ay-ayatennakayo ni Jehova gapu iti kasta a panagreggetyo. Dikay koma sumuksuko! No agbiagtayo maitunos iti panggep ni Jehova, agbalin a naragsak ti biagtayo ken masiguradotayo nga anamongannatayo.—1 Cor. 9:24-27.

Siaanep a tulongan dagiti dadduma nga agbalin a paset ti nakadakdakkel nga organisasion ni Jehova

16, 17. (a) Ania ti masapul nga aramidentayo no nakaaramidtayo iti nadagsen a basol? (b) Ania ti maadaltayo iti kapadasan ni Anne?

16 Ngem ania ti masapul nga aramidem no nakaaramidka iti nadagsen a basol? Agpatulongka a dagus. Kumaro laeng dayta no ilimedmo. Laglagipem a kinuna ni David nga idi saanna pay nga impudno dagiti basolna, ‘narunot dagiti tulangna gapu iti panagasugna iti intero nga agmalem.’ (Sal. 32:3) Wen, ti panangilimed iti basol pukawenna ti rag-otayo ken uray pay ti relasiontayo ken Jehova. Ngem “daydiay mangipudno ken mangpanaw kadakuada maipakitaanto iti asi.”—Prov. 28:13.

17 Kitaentayo ti kapadasan ni Anne. * Nagserbi ni Anne kas regular pioneer iti maudi a tawtawenna kas tin-edyer. Ngem naaddaan iti doble a panagbiag, ket inapitna dagiti nasaem a resulta. Kinunana: “Maduddudog ti konsiensiak. Saanak a naragsak ken kanayonak a naliday.” Ania ti inaramidna? Imbagana nga iti maysa a gimong, nailawlawag ti Santiago 5:14, 15. Nabigbig ni Anne a kasapulanna ti tulong ket immasideg kadagiti panglakayen. Malagipna: “Dagita a teksto ket reseta nga insurat ni Jehova a mangpaimbag iti naespirituan. Nupay saan a nalaka a tilmonen, talaga a makapaimbag dayta. Impangagko ti balakad kadagita a teksto, ket nalainganak.” Natibker itan ni Anne ken naregta manen nga agserserbi ken Jehova buyogen ti nadalus a konsiensia.

18. Ania koma ti determinasiontayo?

18 Anian a pribilehio ti agbiag iti maudi nga al-aldaw ken agbalin a paset ti naisangsangayan nga organisasion ni Jehova! Determinadotayo koma a mangtagipateg kadagiti ipapaayna a probision. Agtitinnulongtayo koma kas pamilia nga agbalin a regular kadagiti gimong ti kongregasion, siaanep a mangbirok kadagiti interesado a tattao iti teritoriatayo, ken mangtagipateg kadagiti maaw-awattayo a regular a naespirituan a taraon. Suportarantayo met koma dagidiay mangidadaulo ken agbiagtayo maitunos iti mensahe nga awittayo. No kasta ti aramidentayo, makidangdanggaytayo iti organisasion ni Jehova ken saantayto a mabannog nga agaramid iti nasayaat!

^ par. 17 Nabaliwan ti nagan.