Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2013

Agpaliwliwa ken Mangliwliwa

Agpaliwliwa ken Mangliwliwa

Gapu ta imperpektotayo, agsakittayo amin, ket adda pay ketdi dagidiay agsagaba iti nakaro a sakit. Ania ti makatulong kadatayo no maipasangotayo iti kasta a parikut?

Ti maysa a makatulong isu ti liwliwa a maipaay ti pamilia, gagayyem, ken kapammatian.

Ti makaay-ayo a sasao ti maysa a gayyem ket mayarig iti makapabang-ar ken makaagas a sapsapo. (Prov. 16:24; 18:24; 25:11) Ti pakaseknan dagiti pudno a Kristiano ket saan laeng a ti magun-odda a liwliwa. Ikagkagumaanda met a “liwliwaen dagidiay adda iti aniaman a kita ti rigat babaen ti liwliwa a pinangliwliwa [kadakuada] ti Dios.” (2 Cor. 1:4; Luc. 6:31) Kasta ti nasursuro ni Antonio, maysa a manangaywan iti distrito idiay Mexico.

Nalapunos ni Antonio iti liday idi natakuatan nga addaan iti lymphoma, maysa a kita ti kanser iti dara. Nupay kasta, inkarkarigatanna a kontrolen ti negatibo a rikriknana. Kasano? Lagipenna dagiti kanta ti Pagarian ket kantaenna dagita ken mennamennaenna dagiti liriko. Nakaliwliwa met kenkuana ti napigsa a panagkararag ken panagbasa iti Biblia.

Nupay kasta, bigbigen ni Antonio a nakadakdakkel ti naitulong dagiti kapammatiantayo. Kunana: “No kasta a marirriribukankami ken baketko, kiddawenmi iti maysa a panglakayen a kabagianmi nga umaynakam ikararagan. Dayta ti nangliwliwa ken nangpakalma iti riknami. Kinapudnona,” innayonna, “gapu iti suporta ti pamiliami ken dagiti kakabsattayo iti pammati, alisto a nadaeranmi ti negatibo a rikriknami.” Agyamyaman unay ni Antonio ta addaan kadagiti nadungngo ken mannakipagrikna a gagayyem!

Ti sabali pay a makatulong no kasta nga agsagsagabatayo ket ti naikari a nasantuan nga espiritu. Kinuna ni apostol Pedro a ti nasantuan nga espiritu ti Dios ket “awan bayadna a sagut.” (Ara. 2:38) Natungpal dayta idi napulotan ti adu a tattao idi Pentecostes 33 C.E. Ngem ti nasantuan nga espiritu ket sagut a mabalin a magun-odantayo amin. Di pulos maibus dayta, isu a kanayontay koma a kiddawen iti Dios.—Isa. 40:28-31.

IPAKITA TI NAIMPUSUAN A PANNAKASEKNAN KADAGIDIAY AGSAGSAGABA

Adu a rigat ti inibturan ni apostol Pablo, ket adda pay ketdi dagiti gundaway a gistay natay. (2 Cor. 1:8-10) Ngem saan a mabuteng a matay. Naliwliwa ta ammona a tartarabayen ti Dios. Insuratna: “Bendito koma ti Dios ken Ama ni Apotayo a Jesu-Kristo, ti Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi.” (2 Cor. 1:3, 4) Saan nga inay-ay ni Pablo ti bagina. Imbes ketdi, dagita a napasaranna ti nakatulong kenkuana nga agbalin a mannakipagrikna. Gapu iti dayta, ammona no kasano a liwliwaen dagiti agsagsagaba.

Idi nalainganen ni Antonio, nagserbi manen kas agdaldaliasat a manangaywan. Nupay kanayon idi a mangipakpakita iti pannakaseknan kadagiti kapammatianna, ad-adda itan a pagregreggetanda ken baketna a bisitaen ken paregtaen dagiti masakit. Kas pagarigan, kalpasan a bimmisitada iti maysa a Kristiano nga agsagsagaba iti nakaro a sakit, naammuan ni Antonio a saan a kayat daytoy a kabsat ti mapan makigimong. Kuna ni Antonio: “Saan a gapu ta dina ay-ayaten ni Jehova wenno dagiti kakabsat, no di ket naapektaran ti emosionna gapu iti sakitna, nga uray la mariknana nga awan serserbina.”

Tapno maparegta ni Antonio dayta a kabsat, kiniddawna kenkuana nga isu ti mangidaulo iti kararag iti maysa a pasken. Nupay impapan ti kabsat a dina kabaelan, inkagumaanna latta ti mangikararag. Kinuna ni Antonio: “Nakasaysayaat ti panangikararagna. Manipud idin, nariknana manen nga adda serbina.”

Wen, mabalin a nagsagabatayon iti maysa a kita ti pakarigatan. Ngem kas iti kinuna ni Pablo, mabalin a daytoy ti makatulong kadatayo a mangliwliwa iti sabsabali. Gapuna, maseknantay koma kadagiti kapammatiantayo nga agsagsagaba ken tuladentayo ti Diostayo, ni Jehova, babaen ti panangliwliwatayo iti sabsabali.