Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2013

Ni Jehova ti Pagnaedantayo

Ni Jehova ti Pagnaedantayo

“O Jehova, sika nagbalinka a pudpudno a pagnaedan maipaay kadakami bayat ti kinapkaputotan.”—SAL. 90:1.

1, 2. Ania ti panagrikna dagiti adipen ti Dios iti kaaddada iti daytoy a sistema ti bambanag, ken kasano a makuna nga adda pagtaenganda?

 MARIKNAM kadi a natalgedka iti daytoy a lubong? No saan, kapadam ti dadduma pay nga adipen ni Jehova. Manipud pay idi ugma, amin a pudpudno a mangay-ayat ken Jehova imbilangda ti bagbagida kas ganggannaet iti daytoy a sistema ti bambanag. Kas pagarigan, bayat ti panagakar-akarda iti pagnaedan idi addada iti daga ti Canaan, dagiti matalek nga agdaydayaw iti Dios “silalatak nga indeklarada a ganggannaetda ken temporarioda nga agnanaed.”—Heb. 11:13.

2 Dagiti napulotan a pasurot ni Kristo, dagidiay ‘makipagili iti langlangit,’ ibilangda met ti bagbagida kas ‘ganggannaet ken temporario nga agnanaed’ iti daytoy a sistema ti bambanag. (Fil. 3:20; 1 Ped. 2:11) Ti “sabsabali a karnero” ni Kristo “saanda [met] a paset ti lubong, a kas [ken Jesus] a saan a paset ti lubong.” (Juan 10:16; 17:16) Nupay kasta, adda “pagtaengan” ti ili ti Dios. Kinapudnona, aggigiantayo iti katalgedan ken kasayaatan pay laeng a pagtaengan, a makita laeng babaen ti mata ti pammati. Insurat ni Moises: “O Jehova, sika nagbalinka a pudpudno a pagnaedan maipaay kadakami bayat ti kinapkaputotan.” * (Sal. 90:1) Kasano a ni Jehova ti “pudpudno a pagnaedan” dagiti nasungdo nga adipenna idi ugma? Kasano nga isu ti “pudpudno a pagnaedan” ti ilina ita? Ken kasano nga isu laeng ti natalged a pagnaedan iti masanguanan?

NI JEHOVA—TI “PUDPUDNO A PAGNAEDAN” DAGITI ADIPENNA IDI UGMA

3. Ania ti nakayaspingan ni Jehova iti Salmo 90:1, ken apay?

3 No dadduma, ti Biblia iyaspingna ni Jehova iti bambanag a makitatayo tapno ad-adda a maawatantayo ti personalidadna. Kas pagarigan, iladawan ti Salmo 90:1  ni Jehova kas “pagnaedan,” wenno pagtaengan. No dakamatentayo ti pagtaengan, mapanunottayo ti lugar nga addaan ayat, talna, ken pannalaknib. Apay a nayasping ni Jehova iti pagtaengan? Kuna ti Biblia a ti Dios ket ayat. (1 Juan 4:8) Isu met ti Dios ti talna, ket ‘pagnaedenna a sitatalged’ dagiti nasungdo kenkuana. (Sal. 4:8) Kas pagarigan, usigem ti pannakilangenna kadagiti matalek a patriarka, manipud ken Abraham.

4, 5. Kasano a nagbalin ti Dios a “pudpudno a pagnaedan” ni Abraham?

4 Nalabit mailadawantayo ti narikna ni Abraham, a naawagan idi iti Abram, idi imbaga kenkuana ni Jehova: “Pumanawka iti pagiliam ken kadagiti kabagiam . . . [ket] agturong[ka] iti pagilian nga ipakitakto kenka.” No nariribukan man ni Abraham, sigurado a naliwliwa iti simmaganad a kinuna ni Jehova: “Mangaramidakto iti dakkel a nasion manipud kenka ket bendisionankanto ket pagbalinekto a naindaklan ti naganmo . . . Ket bendisionakto dagidiay mangbendision kenka, ket ti mangidawdawat ti pakadaksam ilunodkonto.”—Gen. 12:1-3.

5 Babaen kadagitoy a sasao, inkari ni Jehova nga Isu ti agbalin a natalged a pagnaedan ni Abraham ken dagiti kaputotanna. (Gen. 26:1-6) Tinungpal ni Jehova ti karina. Kas pagarigan, linapdanna ti agturay iti Egipto a ni Faraon ken ni Abimelec nga ari ti Gerar tapno saanda a mamulitan ti dayaw ni Sara ken tapno maispal ti biag ni Abraham. Kasta met laeng ti panangsalaknibna kada Isaac ken Rebecca. (Gen. 12:14-20; 20:1-14; 26:6-11) Kastoy ti mabasatayo: “[Ni Jehova] saanna nga impalubos a sauren ida ti asinoman a tao, no di ket maipagapu kadakuada nangtubngar iti ar-ari, a kunkunana: ‘Saanyo a sagiden dagidiay pinulotak, ket kadagiti mammadtok dikay agaramid iti aniaman a dakes.’”—Sal. 105:14, 15.

“Saankanto a baybay-an”

6. Ania ti imbaga ni Isaac nga aramiden ni Jacob, ken ania ti nalabit narikna ni Jacob?

6 Karaman kadagidiay a propeta ti apoko ni Abraham a ni Jacob. Idi tiempon a mangasawa ni Jacob, kinuna kenkuana ni Isaac nga amana: “Dika mangala iti asawa manipud iti annak a babbai ti Canaan. Tumakderka, mapanka idiay Padan-aram iti balay ni Betuel nga ama ni inam ket manipud sadiay iyalaam ti bagim iti asawa manipud iti annak a babbai ni Laban.” (Gen. 28:1, 2) Nagtulnog a dagus ni Jacob. Pinanawanna ti natalged a biag ti pamiliana idiay Canaan, ket nalabit agmaymaysa a napan idiay Haran a ginasut a kilometro ti kaadayona. (Gen. 28:10) Nalabit naisaludsodna: ‘Kasano ngata kabayag a mayadayoak? Awatennakto ngata ni ulitegko ken ikkannak iti asawa a managbuteng iti Dios?’ No nariribukan man ni Jacob, sigurado a nabang-aran idi nakadanon idiay Luz, agarup  100 kilometro (60 milia) manipud Beer-seba. Ania ti napasamak idiay Luz?

7. Ania ti impasigurado ti Dios ken Jacob iti maysa a tagtagainep?

7 Idiay Luz, nagparang ni Jehova ken Jacob iti tagtagainep, ket kinunana: “Adtoy addaak kenka ket aywanankanto iti isuamin a dalan a papanam ket isublikanto iti daytoy a daga, agsipud ta saankanto a baybay-an agingga a pudno a naaramidkon ti sinaok kenka.” (Gen. 28:15) Sigurado a napabileg ken naliwliwa ni Jacob kadagita a sasao! Mailadawam kadi a magmagna, a sigagagar a makakita no kasano a tungpalen ti Dios ti karina? No pinanawam ti pagtaenganyo, nalabit tapno agserbika iti sabali a pagilian, mabalin a maawatam ti rikrikna ni Jacob. Ngem awan duadua a nariknam no kasano nga inaywanannaka ni Jehova.

8, 9. Kadagiti ania a pamay-an a nagbalin ni Jehova a “pudpudno a pagnaedan” ni Jacob, ken ania ti maadaltayo iti daytoy?

8 Idi nakadanon ni Jacob idiay Haran, sibabara nga inawat ni ulitegna a Laban. Idi agangay, intedna kenkuana da Lea ken Raquel kas assawa. Ngem iti panaglabas ti panawen, sinaur ni Laban ni Jacob, a naminsangapulo a binaliwanna dagiti tangdanna! (Gen. 31:41, 42) Kaskasdi nga inibturan ni Jacob dagitoy a di nainkalintegan nga aramid ket nagtalek a di baybay-an ni Jehova. Pudno a kasta ti inaramid ti Dios. Kinapudnona, idi imbaga ti Dios ken Jacob nga agsubli idiay Canaan, addaanen daytoy a patriarka iti “dakkel nga ar-arban ken ad-adipen a babbai ken ad-adipen a lallaki ken kamkamelio ken as-asno.” (Gen. 30:43) Naimpusuan a nagyaman ni Jacob ket inkararagna: “Saanak a maikari kadagiti amin a naayat a kinamanangngaasi ken iti isuamin a kinamatalek a winatwatmo maipaay iti adipenmo, ta binallasiwko daytoy a Jordan a ti sarukodko laeng ti kaduak ket ita nagbalinak a dua a pakarso.”—Gen. 32:10.

9 Wen, agpayso ti kinuna ni Moises iti kararagna: “O Jehova, sika nagbalinka a pudpudno a pagnaedan maipaay kadakami bayat ti kinapkaputotan”! (Sal. 90:1) Agaplikar met ita dagita a sasao agsipud ta ken Jehova “awan ti panagbaliw ti pagturongan ti anniniwan” ket itultuloyna ti agbalin a natalged a pagnaedan dagidiay nasungdo kenkuana. (Sant. 1:17) Usigentayo no kasano.

NI JEHOVA—TI ‘PUDPUDNO A PAGNAEDANTAYO’ ITA

10. Apay a masiguradotayo nga agtultuloy ni Jehova kas natalged a pagnaedan dagiti adipenna?

10 Ipapanmo nga agtestestigoka kontra iti internasional a sindikato a ti liderna ket nakasiksikap, nabileg, naulbod, ken mammapatay. Ania ngata ti riknam no rummuarka iti korte kalpasan ti maysa a bista? Natalged ngata? Siempre saan! Nainkalintegan laeng ngarud nga agkiddawka iti proteksion. Umasping iti dayta ti kasasaad dagiti adipen ni Jehova, a situtured a mangsaksaksi ken Jehova ken mangibutbutaktak iti naranggas a kabusorna, ni Satanas! (Basaen ti Apocalipsis 12:17.) Ngem napagulimek kadi ni Satanas ti ili ti Dios? Saan! Kinapudnona, agtultuloy ti irarang-aytayo. Maymaysa laeng ti makagapu: Agingga ita, ni Jehova ti kamangtayo, ti “pudpudno a pagnaedan[tayo],” nangnangruna kadagitoy maudi nga al-aldaw. (Basaen ti Isaias 54:14, 17.) Ngem saan nga agbalin ni Jehova a natalged a pagnaedantayo no agpaallilawtayo ken Satanas.

Dagiti anghel ti Dios supsuportaran ken salsalaknibanda dagiti adipenna

11. Ania ti maadaltayo kadagiti patriarka?

11 Adda pay maadaltayo kadagiti patriarka. Nupay nagnaedda iti daga ti Canaan, nagtalinaedda a naisina kadagiti lumugar ta ginurada ti nadangkes ken immoral a kabibiag dagita a tattao. (Gen. 27:46) Adda salsalimetmetanda a prinsipio. Saanda a kasapulan ti atiddog a listaan dagiti rumbeng  ken di rumbeng nga aramiden. Umanayen ti pannakaammoda ken Jehova ken iti personalidadna. Gapu ta ni Jehova ti pagnaedanda, inkagumaanda ti saan nga agbalin a paset ti lubong. Anian a nagsayaat nga ulidan para kadatayo! Ikagkagumaam kadi a tuladen dagiti matalek a patriarka no maipapan iti panangpilim kadagiti kakaduam ken iti paglinglingayam? Makapaladingit ta ti sumagmamano a kameng ti kongregasion magusgustuanda ti dadduma a banag iti lubong ni Satanas. No adda kasta a riknam, uray bassit laeng, ikararagmo ti tulong ni Jehova. Laglagipem a kukua ni Satanas daytoy a lubong. Awan ti pannakaseknanna ken managimbubukodan.—2 Cor. 4:4; Efe. 2:1, 2.

12. (a) Kasano nga ay-aywanan ni Jehova ti naespirituan a sangakabbalayanna? (b) Ania ti makunam kadagitoy a probision?

12 Tapno masarangettayo dagiti pangallilaw ni Satanas, nasken a naan-anay a tagipatgentayo dagiti probision nga ipapaay ni Jehova iti naespirituan a sangakabbalayanna. Karaman kadagitoy a probision dagiti Nakristianuan a gimong, ti panagdaydayaw ti pamilia, ken dagiti “sagut a tattao”—dagiti pastor a dinutokan ti Dios a mangipaay iti liwliwa ken suporta tapno madaerantayo dagiti parikut iti biag. (Efe. 4:8-12) Insurat ni Kabsat George Gangas, nga adu a tawen a nagserbi a kameng ti Bagi a Manarawidwid: “No kaduak [dagiti adipen ti Dios], kasla addaak iti bukodko a pagtaengan a kaduak ti pamiliak, iti naespirituan a paraiso.” Kasta kadi met ti riknam?

13. Ania ti napateg a maadaltayo iti Hebreo 11:13?

13 Ti sabali pay a kualidad dagiti patriarka a nagsayaat a tuladen ket ti determinasionda a maiduma kadagiti tattao iti aglawlawda. Kas nadakamat iti  parapo 1, “silalatak nga indeklarada a ganggannaetda ken temporarioda nga agnanaed iti daga.” (Heb. 11:13) Determinadoka kadi nga agbalin a naiduma? Pudno a saan a kanayon a nalaka dayta. Ngem kabaelam babaen ti tulong ti Dios ken suporta dagiti padam a Kristiano. Laglagipem a saanka nga agmaymaysa. Amin dagidiay mayat nga agserbi ken Jehova ket masapul a makidangadang! (Efe. 6:12) Ngem makapagballigitayo no agtalektayo ken Jehova ken pagbalinentayo a natalged a pagnaedantayo.

14. Ania a “siudad” ti inur-uray ni Abraham?

14 Kas ken Abraham, sipapanunottayo met koma iti gunggona. (2 Cor. 4:18) Insurat ni apostol Pablo nga “inur-uray [ni Abraham] ti siudad nga addaan kadagiti pudpudno a pamuon, a ti nangibangon ken nangaramid iti dayta a siudad isu ti Dios.” (Heb. 11:10) Dayta a “siudad” ket isu ti Mesianiko a Pagarian. Inur-uray dayta ni Abraham.  Ngem saantayon a masapul nga urayen dayta agsipud ta agturturayen dayta idiay langit. Ken nakaad-adu ti pammaneknek nga asidegen nga iturayanna ti intero a daga. Pudpudno kadi kenka dayta a Pagarian? Im-impluensiaanna kadi ti panirigam iti biag, ti panangmatmatmo iti lubong, ken dagiti prioridadmo?—Basaen ti 2 Pedro 3:11, 12.

TI ‘PUDPUDNO A PAGNAEDANTAYO’ BAYAT NGA UMAS-ASIDEG TI PANUNGPALAN

15. Anianto ti mapasamak kadagidiay agtaltalek iti daytoy a lubong?

15 Bayat nga umas-asideg ti panungpalan ti lubong ni Satanas, ad-adda pay a kumaro “dagiti ut-ot ti panagrigat.” (Mat. 24:7, 8) Sigurado nga ad-addanto a rumigat ti kasasaad bayat ti dakkel a rigat. Marpuogto dagiti pasdek ken malapunos iti buteng dagiti tattao. (Hab. 3:16, 17) Gapu ta desperadoda unay, uraydanto la agkamang “kadagiti rukib ken kadagiti dadakkel a bato ti bambantay.” (Apoc. 6:15-17) Ngem dinto masalakniban ida uray dagiti literal a rukib wenno dagiti arig bantay a napolitikaan ken komersial nga organisasion.

16. Ania ti rumbeng a panangmatmattayo iti kongregasion Kristiano, ken apay?

16 Ngem agtultuloyto a natalged ti ili ni Jehova iti “pudpudno a pagnaedan[da],” ni Jehova a Dios. Kas ken propeta Habakuk, “agragsak[danto] ken Jehova a mismo. Agrag-o[danto] iti Dios ti pannakaisalakan[da].” (Hab. 3:18) Kadagiti ania a pamay-an nga agbalinto ni Jehova a “pudpudno a pagnaedan” bayat dayta a nariribuk a tiempo? Saantay pay nga ammo ita. Ngem manamnamatayo daytoy: Kas kadagidi Israelita a pimmanaw idiay Egipto, agtalinaedto nga organisado ti “dakkel a bunggoy” ken sisasagana nga agtungpal iti instruksion ti Dios. (Apoc. 7:9; basaen ti Exodo 13:18.) Mabalin nga ipakaammonto ni Jehova dagita nga instruksion babaen kadagiti kongregasion. Mabalin a dagiti rinibribu a kongregasion iti intero a lubong ket isu dagiti ‘makin-uneg a siled’ a naipadto iti Isaias 26:20. (Basaen.) Tagtagipatgem met laeng kadi dagiti gimong ti kongregasion? Dagus kadi nga iyap-aplikarmo ti instruksion nga ipapaay ni Jehova babaen iti kongregasion?—Heb. 13:17.

17. Kasano a ni Jehova ti “pudpudno a pagnaedan” uray dagidiay natayen a nasungdo nga adipenna?

17 Agtalinaedto ni Jehova kas ‘pudpudno a pagnaedan’ uray dagidiay matay a matalek sakbay a mangrugi ti dakkel a rigat. Kasano? Nabayagen a natay dagiti matalek a patriarka idi imbaga ni Jehova ken Moises: “Siak ti Dios ni . . . Abraham, ti Dios ni Isaac ken ti Dios ni Jacob.” (Ex. 3:6) Kalpasan nga inadaw ni Jesus dagitoy a sasao, innayonna: “Isu ket Dios, saan a dagiti natay, no di ket dagiti sibibiag, ta sibibiagda amin kenkuana.” (Luc. 20:38) Wen, sibibiag iti panangmatmat ni Jehova dagidiay nasungdo nga adipenna. Sigurado a pagungarennanto ida.—Ecl. 7:1.

18. Iti baro a lubong, kasano nga agbalin ni Jehova a “pudpudno a pagnaedan” dagiti adipenna iti naisangsangayan a pamay-an?

18 Iti asidegen a baro a lubong, agbalinto ni Jehova a “pudpudno a pagnaedan” dagiti adipenna iti sabali pay a pamay-an. Kuna ti Apocalipsis 21:3: “Adtoy! Ti tolda ti Dios adda iti sangatauan, ket isu makipagnaedto kadakuada.” Umuna, makipagnaedto ni Jehova kadagiti iturayanna ditoy daga babaen ken Kristo-Jesus. Iti ngudo ti sangaribu a tawen, inton naitungpalen ni Jesus ti panggep ti Dios ditoy daga, iyawatnanto ti Pagarian ken Amana. (1 Cor. 15:28) Kalpasan ti sangaribu a tawen, saanton a kasapulan ti perpekto a sangatauan ti panangibabaet ni Jesus; makipagnaedto kadakuada ni Jehova. Anian a nagsayaat dayta a namnamatayo! Gapuna, kas kadagiti matalek nga adipen ni Jehova idi ugma, pagbalinentayo ni Jehova a “pudpudno a pagnaedan[tayo].”

^ par. 2 Kastoy ti pannakaipatarus ti Salmo 90:1 iti bersion a Ti Biblia: “Apo, sica ti nagtataenganmi cadagiti amin a capcaputotan.”