Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2013

Daytoy ti Naespirituan a Tawidtayo

Daytoy ti Naespirituan a Tawidtayo

“Daytoy ti pagtatawidan a sanikua dagiti adipen ni Jehova.”—ISA. 54:17.

1. Ania ti sinaluadan ni Jehova agpaay a pagimbagan ti sangatauan?

NI Jehova, “ti sibibiag ken agnanayon a Dios,” sinaluadanna ti makaited-biag a mensahena para iti sangatauan. Sigurado nga agpaut dayta, ta “ti sasao ni Jehova agtalinaed iti agnanayon.” (1 Ped. 1:23-25) Anian a yamantayo ta sinaluadan ni Jehova ti kasta a napateg nga impormasion iti naisurat a Saona, ti Biblia!

2. Iti naisurat a Saona, ania ti sinaluadan ti Dios nga usaren dagiti adipenna?

2 Iti Saona, sinaluadan ti Dios ti mismo a naganna a pinilina tapno usaren dagiti adipenna. Immuna a nadakamat ni “Jehova a Dios” iti salaysay ti “pakasaritaan ti langlangit ken ti daga.” (Gen. 2:4) Simimilagro a naisurat ti nagan ti Dios iti sumagmamano a daras iti taptapi ti bato a naglaon iti Sangapulo a Bilin. Kas pagarigan, kastoy ti rugi ti umuna a bilin: “Siak ni Jehova a Diosmo.” (Ex. 20:1-17) Nasaluadan ti nagan ti Dios gapu ta ti Soberano nga Apo Jehova sinaluadanna ti Saona ken ti naganna manipud iti amin a panagregget ni Satanas a mangpukaw kadagita.—Sal. 73:28.

3. Nupay agraraira ti narelihiosuan a kinaulbod, ania ti sinaluadan ti Dios?

3 Sinaluadan met ni Jehova ti kinapudno iti Biblia. Nupay agraraira ti narelihiosuan a kinaulbod, anian a yamantayo ta inikkannatayo ti Dios iti naespirituan a lawag ken kinapudno! (Basaen ti Salmo 43:3, 4.) Magmagna ti sangatauan iti kasipngetan idinto ta sirarag-o a magmagnatayo iti naespirituan a lawag nga inted ti Dios.—1 Juan 1:6, 7.

ADDAANTAYO ITI TAWID A RUMBENG NGA IPATEG

4, 5. Ania a naisangsangayan a pribilehio ti naadda kadatayo sipud idi 1931?

4 Kas Kristiano, addaantayo iti nakapatpateg a tawid. Kuna ti Collins Cobuild English Dictionary: “Ti tawid  ti maysa a pagilian ket ti amin a kualidad, tradision, wenno kabibiag a nagtultuloy sadiay iti adu a tawen ken naipasapasa iti agsasaruno a henerasion.” Ti naespirituan a tawidtayo saklawenna ti tagtagiragsakentayo nga umiso a pannakaammo iti Sao ti Dios ken ti nalawag a pannakatarustayo iti kinapudno maipapan Kenkuana ken iti pangpanggepna. Ramanenna met ti maysa a naisangsangayan a pribilehio.

Siraragsak nga inawattayo ti nagan a Saksi ni Jehova iti kombension idi 1931

5 Dayta a pribilehio ti nagbalin a paset ti naespirituan a pakasaritaantayo iti kombension idiay Columbus, Ohio, U.S.A., idi 1931. Nagparang dagiti letra a “JW” iti nayimprenta a programa. Kuna ti maysa a kabsat a babai: “Nagduduma ti opinion no ania ti JW—Just Wait, Just Watch, ken ti umiso a kaipapananna [Jehovah’s Witnesses].” Idi damo, maawagantayo iti Estudiante ti Biblia, ngem inawattayo ti nagan a Saksi ni Jehova babaen iti maysa a resolusion idi Domingo, Hulio 26, 1931. Anian a ragsak dagiti kakabsat nga umawat iti dayta a Nainkasuratan a nagan. (Basaen ti Isaias 43:12.) “Diakto pulos malipatan ti panagdir-i ken panagpalpalakpak a nagallungogan iti dayta a nagtataripnonganmi,” malagip ti maysa a kabsat. Awan sabalin ditoy lubong a mangayat iti dayta a nagan, ngem pinaraburannatayo ti Dios a mangusar iti dayta iti nasuroken a walopulo a tawen. Anian a naisangsangayan a pribilehio ti panagbalin a Saksi ni Jehova!

6. Ania nga umiso nga impormasion ti ramanen ti naespirituan a tawidtayo?

6 Ti naespirituan a tawidtayo ramanenna pay ti aglaplapusanan nga umiso ken napateg nga impormasion manipud iti napalabas. Kas pagarigan, usigentayo ti napasamak kada Abraham, Isaac, ken Jacob. Nagsasaritaan la ketdi dagitoy a patriarka ken dagiti pamiliada ti maipapan iti panangay-ayo ken Jehova. Ditay ngarud masdaaw a ni nalinteg a Jose liniklikanna ti seksual nga imoralidad tapno saan nga ‘agbasol iti Dios.’ (Gen. 39:7-9) Idi umuna a siglo, dagiti Nakristianuan nga alagaden ket nayallatiw babaen iti sao ken aramid. Karaman kadagitoy dagiti detalye maipapan iti Pangrabii ti Apo nga inyallatiw ni apostol Pablo kadagiti kongregasion. (1 Cor. 11:2, 23) Iti agdama, dagiti detalye a makatulong kadatayo nga agdayaw iti Dios “buyogen ti espiritu ken kinapudno” ket paset ti naisurat a Saona. (Basaen ti Juan 4:23, 24.) Ti Biblia ket agpaay a pakalawlawagan ti sangatauan, ngem nangnangruna koma a tagipatgentayo dayta kas Saksi ni Jehova.

7. Ania a makapabileg a kari ti paset ti naespirituan a tawidtayo?

7 Karaman met iti naespirituan a tawidtayo dagiti nabiit pay a naipablaak a salaysay a mangpaneknek nga ‘adda ni Jehova iti dasigtayo.’ (Sal. 118:7) Gapu iti dayta, mariknatayo a natalgedtayo, uray no maidaddadanestayo. Ti makapabileg a paset ti umad-adu a naespirituan a tawidtayo isu daytoy a kari: “‘Aniaman nga igam a mabukelto maibusor kenka saanto nga agballigi, ket aniaman a dila a tumakderto a bumusor kenka iti panangukom  kondenaremto. Daytoy ti pagtatawidan a sanikua [wenno, “tawid,” Ti Biblia] dagiti adipen ni Jehova, ket ti kinalintegda aggapu kaniak,’ kuna ni Jehova.” (Isa. 54:17) Awan ti aniaman nga igam ni Satanas a naan-anay a makadangran kadatayo.

8. Ania ti usigentayo iti daytoy nga artikulo ken iti sumaganad?

8 Pinadas ni Satanas a dadaelen ti Sao ti Dios, pukawen ti nagan ni Jehova, ken ilemmeng ti kinapudno. Ngem awan gawayna ken Jehova, a nangtungday kadagiti amin a panangikagumaanna. Iti daytoy nga artikulo ken iti sumaganad, makitatayo (1) no kasano a sinaluadan ti Dios ti Saona; (2) no kasano a sinigurado ni Jehova ti pannakasaluad ti naganna; ken (3) no kasano a ti nailangitan nga Amatayo ti Gubuayan ken Manangsaluad iti kinapudno.

SINALUADAN NI JEHOVA TI SAONA

9-11. Ania dagiti pagarigan a mangipakita a nalasatan ti Biblia ti nadumaduma nga ibubusor?

9 Sinaluadan ni Jehova ti Saona manipud iti amin nga ibubusor. Kuna ti Enciclopedia Cattolica (Catholic Encyclopedia): “Idi 1229, pinaritan ti Konsilio ti Toulouse dagiti gagangay a tattao a mangaramat kadagita [dagiti Biblia a naipatarus iti lokal a lengguahe] tapno mapasardeng dagiti Albigenses ken Waldenses . . . Iti taripnong a naangay idi 1234 idiay Tarragona, Espania, nga indauluan ni James I, nayetnag ti umasping a panangiparit. . . Nakibiang ti Sede Romana iti dayta a banag iti umuna a gundaway idi 1559, idi a ti Index ni Paul IV imparitna ti pannakayimprenta ken panagtagikua kadagiti B[iblia] a naipatarus iti lokal a pagsasao no awan ti pammalubos ti Nasantuan nga Opisina.”

10 Nasaluadan ti Biblia iti laksid ti nagduduma nga ibubusor. Idi agarup 1382, ni John Wycliffe ken dagiti kakaduana impatarusda ti kaunaan nga Ingles a bersion ti Biblia. Ti sabali pay a nagipatarus iti Biblia ket ni William Tyndale, a napapatay idi 1536. Bayat a nakagalut iti poste, impukkawna, “Apo, luktam koma dagiti mata ti ari ti England.” Kalpasanna, binitayda sada pinuoran.

11 Nalasatan ti Biblia ti adu nga ibubusor. Kas pagarigan idi 1535, naaramid ti Ingles a patarus ti Biblia ni Miles Coverdale. Inusar ni Coverdale ti patarus ni Tyndale a “New Testament” ken “Old Testament” manipud Genesis agingga iti Cronicas. Impatarusna ti dadduma a paset ti Kasuratan manipud iti Latin ken iti German a Biblia ni Martin Luther. Iti agdama, maap-apresiar ti New World Translation of the Holy Scriptures gapu ta nalaka a maawatan, umiso, ken dakkel ti maitulongna iti ministeriotayo. Maragsakantayo ta awan bileg dagiti demonio wenno tattao a manglapped iti pannakasaluad ti Sao ni Jehova.

PANNAKASALUAD TI NAGAN NI JEHOVA

Karaman ni Tyndale kadagidiay nangisakripisio iti biagna maigapu iti Sao ti Dios

12. Ania ti naaramidan ti New World Translation iti pannakasaluad ti nagan ti Dios?

12 Sinigurado ni Jehova a Dios a masaluadan ti naganna iti Saona. Dakkel ti  naaramidan ti New World Translation mainaig iti daytoy a banag. Iti introduksion, insurat ti nagipatarus a komite: “Ti kangrunaan nga aspeto daytoy a patarus ket ti pannakaisubli ti nadibinuan a nagan iti nainkalintegan nga ayanna iti Ingles a teksto. Naaramiden dayta, a naaramat ti kadawyan nga Ingles a porma a ‘Jehovah’ iti 6,973 a daras iti Hebreo a Kasuratan ken 237 a daras iti Kristiano a Griego a Kasuratan.” Ti intero a New World Translation wenno iti kapasetna ket magun-odanen iti nasurok a 116 a lengguahe, ken nayimprenta iti nasurok a 178,545,862 a kopia.

13. Apay a maibagatayo nga ammon dagiti tattao ti nagan ti Dios sipud pay pannakaparsua ti tao?

13 Ammon ti tao ti nagan ti Dios sipud pay pannakaparsua ti tao. Ammo dayta da Adan ken Eva, ken ammoda ti eksakto a pannakaibalikasna. Idi saan a rinaem ni Ham ti amana kalpasan ti Layus, imbaga ni Noe: “Bendito koma ni Jehova, ti Dios ni Sem, ket agbalin koma ni Canaan [nga anak ni Ham] nga adipenna.” (Gen. 4:1; 9:26) Kinuna a mismo ti Dios: “Siak ni Jehova. Dayta ti naganko; ket iti asinoman a sabali saanko nga ited ti bukodko a dayag.” Imbagana pay: “Siak ni Jehova, ket awanen ti sabali. Malaksid kaniak awan ti Dios.” (Isa. 42:8; 45:5) Sinigurado ni Jehova a masaluadan ti naganna ken maipakaammo kadagiti tattao iti intero a daga. Anian a pribilehiotayo nga usaren ti nagan ni Jehova ken agserbi kenkuana kas Saksina! Arigna idirdir-itayo: “Iti nagan ti Diosmi ibayogminto dagiti wagaywaymi.”—Sal. 20:5.

14. Sadino pay ti pakasarakan ti nagan ti Dios malaksid iti Biblia?

14 Saan laeng nga iti Biblia ti pagparangan ti nagan ti Dios. Usigentayo ti Moabite Stone, a nasarakan iti Dhiban (Dibon), 21 kilometro (13 milia) iti daya ti Natay a Baybay. Dayta a bato dakamatenna ni Omri nga ari ti Israel ken ti bersion ni Mesa nga ari ti Moab maipapan iti iyaalsana iti Israel. (1 Ar. 16:28; 2 Ar. 1:1; 3:4, 5) Ngem makapainteres ta agparang ti Tetragrammaton iti Moabite Stone. Maulit-ulit met nga agparang ti Tetragrammaton iti Lachish Letters a naisurat kadagiti ribak ti damili a nasarakan iti Israel.

15. Ania ti Septuagint, ken kasano a napataud?

15 Dakkel ti naaramidan dagiti nagkauna a managipatarus iti Biblia iti pannakasaluad ti nagan ti Dios. Kalpasan ti pannakaidestiero dagiti Judio idiay Babilonia manipud 607 B.C.E. aginggat’ 537 B.C.E., adu kadakuada ti saanen a nagsubli idiay Juda ken Israel. Idi maikatlo a siglo B.C.E., nagbalin ti Alexandria, Egipto, kas taeng ti adu a Judio ket agkasapulanda iti Griego a patarus ti Hebreo a Kasuratan. Griego idi ti internasional a lengguahe. Nakompleto dayta a bersion idi maikadua a siglo B.C.E., ket naawagan iti Septuagint. Iti sumagmamano a kopia daytoy, makita ti nagan a Jehova iti Hebreo a pormana.

16. Kasano a nausar ti nagan ti Dios iti maysa a libro a naipablaak idi 1640?

16 Masarakan ti nagan ti Dios iti Bay Psalm Book, ti kaunaan a literatura a naipablaak kadagiti kolonia ti England iti America. Ti orihinal nga edisionna (nayimprenta idi 1640) ket naglaon kadagiti Salmo, a naipatarus iti Ingles manipud iti Hebreo. Inaramat dayta a bersion ti nagan ti Dios kadagiti teksto a kas iti Salmo 1:1, 2, nga agkuna a “bendito ti tao” a saan a nagna iti balakad ti nadangkes, “ngem pakaragsakanna ti linteg ni Iehovah.” Para iti ad-adu nga impormasion, kitaen ti broshur a Ti Nasantuan a Nagan nga Agtalinaed iti Agnanayon.

SINALUADAN NI JEHOVA TI NAESPIRITUAN A KINAPUDNO

17, 18. (a) Ania ti “kinapudno”? (b) Ania ti saklawen ti “kinapudno ti naimbag a damag”?

17 Sirarag-o nga agserserbitayo ken “Jehova a Dios ti kinapudno.” (Sal. 31:5) “Ti kinapudno maipapan iti maysa a banag ket ti amin a detalye maipapan iti dayta, imbes a ti bambanag a pagarup laeng wenno naimbento,” kuna ti Collins Cobuild English Dictionary.  Iti lengguahe a Hebreo iti Biblia, ti termino a masansan a naipatarus a “kinapudno” tukoyenna ti maysa a banag nga umiso, mapagpiaran, mapagtalkan, wenno agpayso. Ti Griego a sao a naipatarus a “kinapudno” ket tumukoy iti banag a pudpudno, umiso, ken mapagtalkan.

18 Sinaluadan ni Jehova ti naespirituan a kinapudno ken tultulongannatayo a mangtarus iti dayta. (2 Juan 1, 2) Ti pannakatarustayo iti kinapudno ket agtultuloy a lumawlawag, ta ‘ti dana dagidiay nalinteg ket kas iti naraniag a lawag a lumawlawag a lumawlawag agingga nga umaldawen.’ (Prov. 4:18) Siempre, naan-anay nga umanamongtayo ken Jesus, a nagkuna iti kararagna iti Dios: “Ti saom ket kinapudno.” (Juan 17:17) Naglaon ti naisurat a Sao ti Dios iti “kinapudno ti naimbag a damag,” a buklen ti intero a Nakristianuan a pannursuro. (Gal. 2:14) Karaman kadagitoy dagiti detalye maipapan iti nagan ni Jehova, ti kinasoberanona, ti subbot a daton ni Jesus, ti panagungar, ken ti Pagarian. Usigentay ita no kasano a sinaluadan ti Dios ti kinapudno iti laksid dagiti panagregget ni Satanas a mangilemmeng iti dayta.

PINAAY NI JEHOVA TI IBUBUSOR ITI KINAPUDNO

19, 20. Siasino ni Nimrod, ken ania a gakat ti natungday idi kaaldawanna?

19 Kalpasan ti Layus, adda pagsasao a: “Kas ken Nimrod a mannakabalin a mangnganup maibusor ken Jehova.” (Gen. 10:9) Kas bumusbusor ken Jehova a Dios, arigna nagdaydayawan ni Nimrod ni Satanas. Kapadana dagiti bumusbusor a nagkunaan ni Jesus: “Naggapukayo iti amayo a Diablo, ket kayatyo nga aramiden dagiti tarigagay ni amayo. Dayta . . . ket saan a nagtakder a di maisin iti kinapudno, agsipud ta awan kenkuana ti kinapudno.”—Juan 8:44.

20 Ti pagarian ni Nimrod saklawenna ti Babel ken ti dadduma pay a siudad iti nagbaetan dagiti karayan a Tigris ken Eufrates. (Gen. 10:10) Mabalin nga isu ti nangibilin iti pannakaibangon ti Babel ken ti torrena a nangrugi idi agarup 2269 B.C.E. Maikaniwas iti pagayatan ni Jehova nga agwaras dagiti tattao iti intero a daga, kinuna dagidiay a managbangon: “Umaykayo! Ibangonantayo ti bagbagitayo ti maysa a siudad ken kasta met ti maysa a torre a ti tuktokna dumanon iti langlangit, ket mangaramidtayo iti agdindinamag a nagan maipaay iti bagbagitayo, ta amangan no maiwarawaratayo iti isuamin a rabaw ti daga.” Ngem saan a naituloy dayta a gakat idi “riniribuk ni Jehova ti pagsasao ti intero a daga” ken inwarawarana dagidiay a mangbangon koma iti torre. (Gen. 11:1-4, 8, 9) No plano man idi ni Satanas ti mangbuangay iti maysa a relihion tapno agdayaw kenkuana ti amin a tattao, napaay la ketdi dayta. Iti intero a pakasaritaan ti tao, nagballigi ti panagdaydayaw ken Jehova ken agtultuloy nga umad-adu dagiti agdaydayaw kenkuana iti inaldaw.

21, 22. (a) Apay nga awan ti naaramidan ti palso a relihion tapno malapdan ti pudno a panagdayaw? (b) Ania ti usigentayo iti sumaganad nga artikulo?

21 Kinapudnona, awan ti naaramidan ti palso a relihion tapno malapdan ti pudno a panagdayaw. Apay? Agsipud ta ti Naindaklan nga Instruktortayo siniguradona a masaluadan ti naisurat a Saona, masaluadan ti naganna agpaay iti sangatauan, ken isu ti Gubuayan ti naespirituan a kinapudno. (Isa. 30:20, 21) Ti panagdayaw iti Dios maitunos iti kinapudno ket mangyeg iti rag-o. Ngem masapul nga agtalinaedtayo a naridam iti naespirituan, a naan-anay nga agtalektayo ken Jehova ken agtulnog iti panangiwanwan ti nasantuan nga espirituna.

22 Iti sumaganad nga artikulo, usigentayo no kasano a timmaud ti sumagmamano a palso a doktrina. Matakuatantayo a saan nga umiso dagitoy no idilig iti kuna ti Kasuratan. Makitatayo met no kasano a binendisionannatayo ni Jehova iti pudno a sursuro a nagbalin a paset ti naespirituan a tawidtayo.