Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Enero 2013

Nagbunga ti Nasayaat a Panagplano

Nagbunga ti Nasayaat a Panagplano

Ni María Isabel ket naregta nga agtutubo iti siudad ti San Bernardo idiay Chile, South America. Karaman ti pamiliada kadagiti katutubo a Mapuche a sireregta a tumultulong iti pannakabukel ti baro a kongregasion iti lengguahe a Mapuche, a maawagan met iti Mapudungun.

Idi naipakaammo a maangay met iti lengguahe a Mapudungun ti Memorial iti ipapatay ni Kristo ken adda 2,000 nga imbitasion a maiwaras, nagpanunot ni María Isabel no ania ti maaramidanna. Ania ngata ti mabalin a maitulongna? Nalagipna dagiti kapadasan ti dadduma nga agtutubo a Saksi a nakapangasaba kadagiti kaeskuelaan ken mannursuroda. Imbagana dayta kadagiti nagannakna, ket tinulonganda a mangpanunot iti pamay-an tapno makaiwaras iti imbitasion iti eskuelaanda. Ania ti planona?

Umuna, dimmawat ni María Isabel iti pammalubos kadagiti opisial iti eskuelaan tapno mangipaskil iti imbitasion iti kangrunaan a pagserkan ti eskuelaan. Pinatganda ti kiddawna ket dinayawda ti panagreggetna. Iti maysa nga agsapa bayat ti roll call, uray la naka-loudspeaker ti prinsipal a nangipakaammo iti dayta nga imbitasion!

Kalpasanna, impakada ni María Isabel a mapan iti tunggal kuarto ket pinalubosan dagiti mannursuro. Insaludsodna iti tunggal klase no adda Mapuche kadakuada. “Impagarupko a 10 wenno 15 laeng ti estudiante a Mapuche iti intero nga eskuelaan,” kinunana, “ngem aduda met gayam. Nakaitedak iti 150 nga imbitasion!”

“IMPAGARUPNA A NATAENGAN TI AGIM-IMBITAR”

Nakita ti maysa a babai ti naipaskil nga imbitasion iti ruangan ti eskuelaan ket nagsaludsod no asino ti mabalin a pagdamaganna maipapan iti dayta. Nasdaaw idi naibaga a mapan iti balasitang nga agedad laeng iti sangapulo! “Impagarupna a nataengan ti agim-imbitar,” siiisem a kinuna ni María Isabel. Idi naikkannan iti imbitasion ken nailawlawagna bassit dayta, dinamag ni María Isabel ti adres ti babai tapno masarungkaranna a kaduana dagiti nagannakna ket mailawlawagda ti ad-adu pay maipapan iti Pagarian ti Dios. Anian a ragsak dagiti 20 nga agibumbunannag iti Mapudungun a grupo idi timmabuno iti Memorial ti babai ken ti 26 a dadduma pay nga interesado a Mapuche. Dayta a grupo ket maysa itan a narang-ay a kongregasion!

Aniaman ti edadmo, matuladmo met kadi ti kasta a panagregget a mangimbitar kadagiti kaeskuelaam wenno katrabahuam a tumabuno iti Memorial, palawag publiko, wenno kombension distrito? Apay a dika agsukimat kadagiti publikasiontayo maipapan kadagiti kapadasan a makatulong kenka? Ikararagmo met ti nasantuan nga espiritu ni Jehova tapno matulonganka nga agurnong iti tured nga agsao maipapan kenkuana. (Luc. 11:13) No kasta ti aramidem, masdaaw ken mapabilegka met kadagiti resulta ti nasayaat a panagplano.