Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2012

Ti Napasimple a Watchtower—Apay a Nairuar?

Ti Napasimple a Watchtower—Apay a Nairuar?

ITI intero a lubong, adun a tawtawen a mabembenepisiaran dagiti tattao iti naibatay-Biblia nga impormasion a linaon ti Pagwanawanan. Idi Hulio 2011, ti kaunaan a ruar ti napasimple a pagadalan nga edision daytoy a magasin ket naipablaak iti Ingles. Inlawlawag dayta a ruar: “Pamadasan daytoy iti makatawen ket no makatulong, agtultuloy a mayimprenta.”

Ita, maragsakankami a mangipakaammo nga inkeddengmi nga itultuloy nga ipablaak daytoy nga edision. Inton agangay, addanto metten napasimple nga edision iti Pranses, Portugues, ken Espaniol.

NO APAY A MAGUSTUAN TI ADU

Idi naawat dayta ti sumagmamano a kakabsat iti Abagatan a Pacifico, kinunada: “Naan-anay itan a maawatan dagiti kakabsat ti kaipapanan dagiti punto a mapagad-adalan iti Pagwanawanan.” Kunaen pay ti sabali a surat: “Ti adu a tiempo a dati a maus-usarko a mangbirok ken mangilawlawag kadagiti termino ket us-usarek itan a mangtarus kadagiti naisitar a teksto ken ti koneksionda iti mapagad-adalan.”

“Ti adu a tiempo a dati a maus-usarko a mangbirok ken mangilawlawag kadagiti termino ket us-usarek itan a mangtarus kadagiti naisitar a teksto ken ti koneksionda iti mapagad-adalan”

Maysa a babai a graduado iti kolehio iti Estados Unidos ti nagkuna: “Iti las-ud ti 18 a tawen, nauuneg a termino ti us-usarek nga agsao ken agsurat a gagangay kadagiti de adal a tattao. Nairuamak nga agsao ken agpanunot iti komplikado a pamay-an, nupay saan met a kasapulan. Nabigbigko a masapul a baliwak ti wagas ti panagpampanunot ken panagsasaok.” Ita ta maysan nga epektibo nga ebanghelisador, insuratna: “Dakkel a tulong kaniak ti napasimple a Watchtower. Nakatulong daytoy  tapno mayebkasko ti bambanag iti simple a pamay-an.”

Maysa a babai iti England a nabautisaran idi 1972 insuratna maipapan iti napasimple a Watchtower: “Idi binasak ti kaunaan a ruar, nariknak a kasla kaab-abayko ni Jehova ken kalkallabayennak ket kasla agbasbasakami a dua. Kasla iti ama nga ibasbasaanna ti anakna iti maysa nga estoria sakbay a maturog.”

Sigun iti maysa a babai a Bethelite iti Estados Unidos a nasurok nga 40 a tawenen a bautisado, immuneg ti pannakaawatna iti sumagmamano a banag gapu iti napasimple nga edision. Kas pagarigan, ti kahon a “Some Expressions Explained” iti Setiembre 15, 2011 a Watchtower dineskribirna ti termino nga “ulep dagiti saksi” iti Hebreo 12:1 babaen kadagitoy a sasao: “Nakaad-aduda nga uray la di mabilang.” Kinunana: “Nalawlawagan ti pannakaawatko iti dayta a teksto.” Imbagana met mainaig iti linawas a gimong: “Uray no direkta a basaen ti ubing ti sungbatna manipud iti napasimple nga edision, naiduma dayta iti sasao a naaramat iti regular nga edision ti Pagwanawanan nga iggem ti kaaduan. Isu a kasla agkomkomento ti ubing iti bukodna a sasao.”

Insurat pay ti maysa a babai a Bethelite: “Magagaranak a dumngeg iti komento dagiti ubbing iti kongregasion. Ti napasimple a Watchtower tinulonganna ida a mangyebkas iti adda iti pusoda. Maparparegtaak kadagiti komentoda.”

 Inyebkas ti maysa a babai a nabautisaran idi 1984 ti apresasionna iti napasimple nga edision: “Kasla naisurat dayta para kaniak. Nalaklakak itan a maawatan ti basbasaek. Adda kompiansakon nga agkomento iti Panagadal iti Pagwanawanan.”

DAKKEL A TULONG PARA KADAGITI NAGANNAK

Maysa nga ina nga addaan iti anak nga agtawen iti pito ti nagkuna: “Nakabaybayag ken makabannog idi ti panagsaganami para iti Panagadal iti Pagwanawanan gapu ta adu a sasao ti kasapulan nga ilawlawagko.” Kasano a nakatulong ti napasimple nga edision? Insuratna: “Nasdaawak ta makipaspaseten nga agbasa kadagiti parapo ken maawatannan dagita. Gapu ta nalaka a maawatan dagiti sasao ken ab-ababa dagiti sentensia, matagiragsaknan ti agadal. Kabaelannan nga isagana dagiti komentona iti gimong uray no diak tulongan, ket nakapokus ti atensionna iti magasin agingga a malpas ti panagadal.”

“Nasdaawak ta makipaspaseten nga agbasa kadagiti parapo ken maawatannan dagita”

Insurat met ti ina ti maysa nga ubing a 9 ti tawenna: “Dati a tultulonganmi ti anakmi a mangisagana iti komentona. Ngem ita, makapagsaganan nga is-isuna. Saanen a kanayon a saggaysaenmi nga ilawlawag dagiti sasao wenno termino. Gapu ta matarusannan dagiti naaramat a sasao, mariknanan a karaman iti Panagadal iti Pagwanawanan.”

ANIA TI MAKUNA DAGITI UBBING?

Marikna ti adu nga ubbing a nairanta kadakuada ti napasimple a Watchtower. Kiniddaw ni Rebecca a 12 ti tawenna: “Itultuloyyo koma ti baro nga edision!” Innayonna: “Magustuak ti seksion a ‘Some Expressions Explained.’ Nalakami a maawatan dayta.”

Kasta met ti nakuna ni Nicolette a 7 ti tawenna: “Narigatko idi a maawatan ti Watchtower. Ngem ita, ad-adun ti maikomentok iti bukodko a sasao.” Insurat met ni Emma a 9 ti tawenna: “Dakkel ti naitulong dayta kadakami ken adingko nga innem ti tawenna. Ad-adu itan ti maawatanmi! Agyamankami!”

Nalawag nga adu ti mabembenepisiaran iti napasimple a Watchtower gapu kadagiti naaramat a simple a sasao ken sentensia. Gapuna, agtultuloy a maipablaak dayta a kadua ti regular nga edision kas napateg a probision sipud pay idi 1879.