Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2012

Mapagtalkanka a Mayordomo!

Mapagtalkanka a Mayordomo!

“Saanyo a kukua ti bagbagiyo.”—1 COR. 6:19.

1. Ania ti makuna ti kaaduan maipapan iti pannakaadipen?

AGARUP 2,500 a tawen ti napalabasen, insurat ti maysa a Griego a mannurat: “Awan ti asinoman a situtulok nga agpaadipen.” Adu ita ti umanamong kadagita a sasao. No mapagsasaritaan ti pannakaadipen, mapanunottayo dagiti mairurrurumen ken nakakawar a tattao, a saan nga isuda ti mismo a mabembenepisiaran iti bannog ken sakripisioda no di ket dagidiay makinkukua ken mangdomdominar kadakuada.

2, 3. (a) Ania a saad ti tagtagiragsaken dagiti adipen ni Kristo? (b) Ania dagiti usigentayo a salsaludsod maipapan iti annongen kas mayordomo?

2 Nupay kasta, impasimudaag ni Jesus nga agbalin dagiti adalanna a nanumo nga ad-adipen. Ngem daytoy a panagpaadipen dagiti pudno a Kristiano ket saan a mangipababa wenno mangirurumen. Addaan dagitoy nga adipen iti nadayaw, mapagtalkan, ken mararaem a saadda. Kas pagarigan, usigem ti komento ni Jesus maipapan iti maysa nga “adipen.” Sakbay ti ipapatayna, impadtona nga addanto ipatrabahona iti “matalek ken masirib nga adipen.”—Mat. 24:45-47.

3 Makapainteres ta iti umasping a salaysay, dayta nga adipen ket naawagan iti “mayordomo.” (Basaen ti Lucas 12:42-44.) Ti kaaduan a matalek a Kristiano nga agbibiag ita ket saan a kameng iti dayta a klase matalek a mayordomo. Nupay kasta, ipakita ti Kasuratan nga amin nga agserserbi iti Dios ket addaan iti annongen kas mayordomo. Ania dagiti responsabilidad a nainaig iti dayta? Ania ti rumbeng a panangmatmattayo kadagita? Tapno maammuantayo, usigentayo ti akem idi dagiti mayordomo.

AKEM DAGITI MAYORDOMO

4, 5. Ania dagiti responsabilidad dagiti nagkauna a mayordomo? Mangted kadagiti pagarigan.

4 Idi un-unana, ti mayordomo ket kaaduanna nga isu ti pagtaltalkan nga adipen a nadutokan a mangaywan  iti sangakabbalayan wenno negosio ti apona. Gagangay a naitalek kadagiti mayordomo ti pannakaaywan ti sanikua ken kuarta, ken adda met autoridadda iti dadduma pay nga adipen iti sangakabbalayan ti apoda. Ti maysa a pagarigan ket ni Eliezer a nakaitalkan ti adu a sanikua ni Abraham. Mabalin nga isu ti imbaon ni Abraham a mapan idiay Mesopotamia nga agpili iti asawa para iti anakna a ni Isaac. Anian a nagpateg ken serioso dayta nga annongen!—Gen. 13:2; 15:2; 24:2-4.

5 Ti apoko-iti-tumeng ni Abraham a ni Jose ti nadutokan a mangaywan iti sangakabbalayan ni Potifar. (Gen. 39:1, 2) Idi agangay, naaddaan met ni Jose iti bukod a mayordomo iti sangakabbalayanna, a nadutokan a mangaywan iti “balay ni Jose.” Daytoy a mayordomo ti nangasikaso iti sangapulo a kakabsat ni Jose. Kas imbilin ni Jose, immaniobrana ti bambanag mainaig iti “natakaw” a kopa a pirak. Nabatad a mapagtaltalkan unay dagiti mayordomo.—Gen. 43:19-25; 44:1-12.

6. Kas mayordomo, ania ti nadumaduma nga annongen dagiti Kristiano a panglakayen?

6 Adu a siglo kalpasanna, insurat ni apostol Pablo a dagiti Kristiano a panglakayen ket “mayordomo ti Dios.” (Tito 1:7) Kas nadutokan a papastor iti “arban ti Dios,” iwanwanwan ken idadauluanda dagiti kongregasion. (1 Ped. 5:1, 2) Siempre, nagduduma ti responsabilidadda. Kas pagarigan, kaaduan a panglakayen ket agserserbi iti maysa a kongregasion. Dagiti agdaldaliasat a manangaywan agserserbida met iti adu a kongregasion. Ket dagiti kameng ti Komite ti Sanga ti mangay-aywan kadagiti kongregasion iti intero a pagilian. Ngem mainanama iti amin a manangaywan a simamatalek nga itungpalda dagiti annongenda. ‘Manungsungbatda’ amin iti Dios.—Heb. 13:17.

7. Kasanotayo nga ammo a maibilang a mayordomo ti amin a Kristiano?

7 Ania met ngata ti annongen dagiti nasungdo a Kristiano a saan a panglakayen? Kinuna ni apostol Pedro kadagiti padana a Kristiano: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios a nayebkas iti nadumaduma a pamay-an.” (1 Ped. 1:1; 4:10) Gapu iti di kaikarian a kinamanangngaasi ti Dios, impaayannatayo amin iti sagut, saguday, abilidad, wenno paglaingan a mausartayo agpaay a pakagunggonaan dagiti kapammatiantayo. Isu nga amin nga agserserbi iti Dios ket mayordomo, maysa nga annongen a napakuyogan iti dayaw, panagtalek, ken responsabilidad.

KUKUANATAYO TI DIOS

8. Ania ti maysa a prinsipio a masapul a laglagipentayo?

8 Kitaentay ita ti tallo a prinsipio a masapul a laglagipentayo kas mayordomo. Umuna: Kukuanatayo amin ti Dios ken manungsungbattayo kenkuana. Insurat ni Pablo: “Saanyo a kukua ti bagbagiyo, ta nagatangkayo iti maysa a gatad,” ti naisakripisio a dara ni Kristo. (1 Cor. 6:19, 20) Yantangay kukuanatayo ni Jehova, obligadotayo a mangtungpal kadagiti bilinna, a saan met a makapadagsen. (Roma 14:8; 1 Juan 5:3) Ad-adipennatayo met ni Kristo. Kas kadagiti nagkauna a mayordomo, naipaayantayo iti dakkel a wayawaya—ngem adda limitasion ti wayawayatayo. Masapul nga itungpaltayo dagiti naibilin a responsabilidadtayo. Aniaman a pribilehio ti naipaannong kadatayo, agpadpada nga adipennatayo ti Dios ken ni Kristo.

9. Kasano nga inlawlawag ni Jesus no ania ti namnamaen ti apo iti adipenna?

9 Ilawlawag ni Jesus no ania ti namnamaen ti apo iti adipenna. Insalaysayna kadagiti adalanna ti maipapan iti maysa nga adipen a nagawid iti pagtaenganna kalpasan ti agmalem a panagtrabahona. Kinuna kadi ti apo: “Umayka ditoy a madagdagus ket agsadagka iti panganan”? Saan. Imbes ketdi, kinunana:  “Isaganaannak tapno makapangrabiiak, ket mangikaweska iti bidang ket agserbika kaniak agingga a malpasak a mangan ken uminum, ket kalpasanna mabalinmon ti mangan ken uminum.” Ania ti nangyaplikaran ni Jesus iti dayta nga ilustrasion? “Gapuna dakayo met, inton naaramidyon ti amin a bambanag a naituding kadakayo, kunaenyo, ‘Awan kaes-eskanmi nga ad-adipen. Ti naaramidanmi isu ti rebbeng nga aramidenmi.’”—Luc. 17:7-10.

10. Ania ti mangipakita a napateg ken Jehova ti panagreggettayo nga agserbi kenkuana?

10 Siempre, napateg ken Jehova ti panagreggettayo nga agserbi kenkuana. Ipasigurado kadatayo ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Heb. 6:10) Kanayon a nainkalintegan ti kiddawen ni Jehova kadatayo. Kasta met, pagsayaatantayo ti aniaman a kiddawenna ken saan a pulos makapadagsen dagita. Kaskasdi, maitunos iti pangngarig ni Jesus, ti maysa nga adipen saanna nga ay-aywen ti bagina ken dina iyun-una dagiti pagimbaganna. Nalawag ti punto: Idi indedikartayo ti bagitayo iti Dios, pinilitayo nga iyun-una dagiti interesna. Umanamongka kadi iti dayta?

TI KALIKAGUMAN NI JEHOVA KADATAYO AMIN

11, 12. Kas mayordomo, ania ti rumbeng a kababalintayo, ken ania dagiti masapul a liklikantayo?

11 Maikadua: Kas mayordomo, agpapada dagiti pamunganayan a pagalagadan nga an-annurotentayo. Pudno, adda dagiti responsabilidad a naited iti sumagmamano a kameng ti kongregasion Kristiano. Ngem kaaduanna nga adda pagpapadaan ti kalikaguman ti Dios kadatayo. Kas pagarigan, kas ad-adalan ni Kristo ken kas Saksi ni Jehova, naibilin kadatayo nga agiinnayattayo. Kinuna ni Jesus nga ayat ti kangrunaan a pakailasinan dagiti pudno a Kristiano. (Juan 13:35) Ngem saan laeng a dagiti kakabsattayo ti ayatentayo. Ikagumaantay met nga ipakita ti ayat kadagidiay saantayo a kapammatian. Kabaelantayo amin dayta ken masapul nga aramidentayo.

12 Makalikaguman met nga ipakitatayo ti nasayaat a kababalin. Kayattayo a liklikan ti kababalin ken kabibiag a kondenaren ti Sao ti Dios. Insurat ni Pablo: “Uray dagiti mannakiabig, wenno dagiti managrukbab iti idolo, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” (1 Cor. 6:9, 10) Kinapudnona, dakkel a panagregget ti kasapulan tapno maannurottayo dagiti nalinteg a pagalagadan ti Dios. Ngem adu a gunggona ti ipaayna—nasayaat a salun-at, nasayaat a relasion iti sabsabali, ken naanamongan a takder iti Dios.—Basaen ti Isaias 48:17, 18.

13, 14. Ania a responsabilidad ti naited iti amin a Kristiano, ken ania koma ti panangmatmattayo iti dayta?

13 Laglagipentayo met nga adda trabaho a masapul nga aramiden ti maysa a mayordomo. Kasta met kadatayo. Naipaayantayo iti napateg a sagut—ti pannakaammo iti kinapudno. Namnamaen ti Dios nga iranudtayo iti sabsabali dayta a pannakaammo. (Mat. 28:19, 20) Insurat ni Pablo: “[Ibilangdakami] koma a kas dagiti sakup ni Kristo ken dagiti mayordomo ti sagrado a palpalimed ti Dios.” (1 Cor. 4:1) Kas mayordomo, bigbigen ni Pablo a naitalek kenkuana ti “sagrado a palpalimed” ken responsabilidadna nga iranud dayta kadagiti dadduma sigun iti imbilin ni Apo Jesu-Kristo.—1 Cor. 9:16.

14 Ipakpakitatayo ti ayattayo no iranudtayo ti kinapudno. Siempre nagduduma ti kasasaad ti tunggal Kristiano ket saan nga  agpapada ti maaramidanda iti ministerio. Maawatan dayta ni Jehova. Ti napateg isu ti panangaramidtayo iti amin a kabaelantayo. No kasta ti aramidentayo, iparparangarangtayo ti di managimbubukodan nga ayat iti Dios ken iti padatayo a tao.

Simamatalek koma nga itungpaltayo ti trabaho a naitalek kadatayo

TI PATEG TI KINAMATALEK

15-17. (a) Apay a napateg nga agbalin a matalek ti maysa a mayordomo? (b) Kasano nga inyilustrar ni Jesus ti dakes a pagbanagan ti di panagmatalek?

15 Ti maikatlo a prinsipio ket: Masapul nga agbalintayo a matalek ken mapagpiaran. Mabalin nga adu ti nasasayaat a kualidad ken abilidad ti maysa a mayordomo, ngem awan ti mamaay dagita no iresponsable wenno di nasungdo iti apona. Napateg ti kinamatalek tapno agbalin nga epektibo ken naballigi ti maysa a mayordomo. Laglagipentayo ti insurat ni Pablo: “Ti sapsapulen kadagiti mayordomo ket ti maysa a tao masarakan a matalek.”—1 Cor. 4:2.

16 Sigurado a magunggonaantayto no matalektayo. Ngem dakkel ti pukawtayo no ditay agmatalek. Naipasimudaag dayta iti ilustrasion ni Jesus maipapan kadagiti talento. Nakomendaran ken nagunggonaan dagiti adipen a simamatalek a ‘nanginegosio’ iti kuarta ti apoda. Ngem ti iresponsable nga adipen a saan a nangaramat iti intalek kenkuana ti apona ket naukom kas “nadangkes,” “nabuntog,” ken “awan kaes-eskanna.” Naala ti talento a naited kenkuana, ken naipalladaw isuna iti ruar.—Basaen ti Mateo 25:14-18, 23, 26, 28-30.

17 Iti sabali pay a gundaway, impaganetget ni Jesus ti dakes a pagbanagan ti saan a panagmatalek. Kinunana: “Adda idi maysa a tao a nabaknang ket addaan iti mayordomo, ket naidarum kenkuana daytoy a saysayangenna dagiti sanikuana. Gapuna inayabanna ket kinunana kenkuana, ‘Ania daytoy mangmangngegko maipapan kenka? Iyawatmo ti kuentaan ti kinamayordomom, ta  saanmon a maaywanan ti balay.’” (Luc. 16:1, 2) Gapu ta sinayang ti adipen ti sanikua ti apona, inkeddeng ti apo a maikkat kas mayordomo. Nagsayaat a leksion dayta para kadatayo! Sigurado a ditay kayat ti agbalin a di matalek iti annongentayo.

NAINSIRIBAN KADI NGA IDILIGTAYO TI BAGITAYO ITI SABSABALI?

18. Apay a ditay koma idildilig ti bagitayo iti sabsabali?

18 Mabalin nga isaludsodtayo iti bagitayo, ‘Kasano ti panangmatmatko iti annongek kas mayordomo?’ Saan a nasayaat nga idiligtayo ti bagitayo iti sabsabali. Ibalakad kadatayo ti Biblia: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.” (Gal. 6:4) Imbes nga idiligtayo ti maar-aramidantayo iti maar-aramidan ti sabsabali, aramidentayo no ania laeng ti kabaelantayo. Iti kasta, maliklikantayo ti agpannakkel ken maupay. Bigbigentay koma nga agbalbaliw ti kasasaad. Nalabit saantayon a kabaelan ti dati a maar-aramidantayo ta kimmapuyen ti salun-attayo, nataengantayon, wenno immadu ti pagrebbengantayo. Iti sabali a bangir, nalabit kabaelantayo ti mangaramid iti ad-adu pay ngem iti agdama a maar-aramidantayo. No kasta, apay a ditay nayonan dagiti aktibidadtayo?

19. Apay a saantay koma a maupay no ditay nagun-od ti tartarigagayantayo a pribilehio?

19 Napateg met nga usigentayo no ania dagiti pribilehiotayo wenno dagiti tartarigagayantayo a pribilehio. Kas pagarigan, mabalin a kayat ti maysa a kabsat ti agbalin a panglakayen wenno maaddaan iti paset iti asamblea ken iti kombension. Awan dakesna no ikagumaantayo a ragpaten dagiti kasta a pribilehio, ngem saantay koma a maupay no saan a mapasamak ti namnamaentayo. Mabalin a saantay a maawatan ita no apay a saan a dagus a mapatgan ti tarigagaytayo. Laglagipentayo nga impagarup idi ni Moises a nakasaganan a mangidaulo kadagiti Israelita a pumanaw idiay Egipto, ngem naguray pay iti 40 a tawen sakbay a naipaay kenkuana dayta nga annongen. Gapu iti dayta, napatanorna dagiti kualidad a kasapulan iti panangidaulona iti nasubeg ken rebelioso nga ili.—Ara. 7:22-25, 30-34.

20. Ania ti maadaltayo iti kapadasan ni Jonatan?

20 No dadduma, mabalin a saantay a pulos magun-od ti maysa a pribilehio. Kasta ti napasamak ken Jonatan. Gapu ta isu ket anak ni Saul, isu koma ti sumaruno nga ari ti Israel. Ngem ni David, nga adayo nga ub-ubing, ti pinili ti Dios nga agbalin nga ari. Ania ti reaksion ni Jonatan? Inakseptarna dayta ken sinuportaranna ni David uray agpeggad ti biagna. Kinunana ken David: “Sika agarikanto iti Israel, ket siak agbalinakto a maikadua kenka.” (1 Sam. 23:17) Ania ti maadaltayo ken Jonatan? Inakseptarna ti kasasaadna, ken saan a kas ken amana a nagimon ken David. Imbes nga apalantayo ti annongen a naited iti sabsabali, nasayaat nga ipamaysatayo nga aramiden dagiti responsabilidad a naited kadatayo. Masiguradotayo nga inton baro a lubong, penken ni Jehova dagiti umiso a tarigagay ti amin nga adipenna.

21. Ania koma ti panangmatmattayo iti annongentayo kas mayordomo?

21 Laglagipentay koma a kas pagtaltalkan a mayordomo, saantay a kas kadagiti adipen a mairurrurumen ken agsagsagaba. Imbes ketdi, nadayaw dayta a saad agsipud ta naitalek kadatayo ti dinton maulit a trabaho—ti panangikasaba iti naimbag a damag iti maudi nga al-aldaw daytoy a sistema ti bambanag. Tagtagiragsakentayo ti dakkel a wayawaya bayat ti panangibanagtayo iti responsabilidadtayo. Gapuna, agbalintayo koma a matalek a mayordomo ken ipategtayo ti pribilehiotayo nga agserbi iti Katan-okan iti intero a uniberso.