Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Disiembre 2012

Agtultuloy nga Agbiag Kas “Temporario nga Agnanaed”

Agtultuloy nga Agbiag Kas “Temporario nga Agnanaed”

“Bagbagaankayo kas ganggannaet ken temporario nga agnanaed nga itultuloyyo ti umadayo kadagiti nainlasagan a tarigagay.”—1 PED. 2:11.

1, 2. Siasino ‘dagiti napili’ a tuktukoyen ni Pedro, ken apay nga inawaganna ida a “temporario nga agnanaed”?

AGARUP 30 a tawen kalpasan ti iyuuli ni Jesus idiay langit, nagsurat ni apostol Pedro “kadagiti temporario nga agnanaed a naiwarawara idiay Ponto, Galacia, Capadocia, Asia, ken Bitinia, agpaay kadagiti napili.” (1 Ped. 1:1) Nalawag a ti tuktukoyen ni Pedro a ‘dagiti napili’ ket dagiti kas kenkuana a napulotan iti nasantuan nga espiritu ken naipaayan iti “baro a pannakayanak nga agturong iti maysa a sibibiag a namnama” a panagturay a kadua ni Kristo idiay langit. (Basaen ti 1 Pedro 1:3, 4.) Ngem apay nga inawaganna idi agangay dagitoy a napili kas “ganggannaet ken temporario nga agnanaed”? (1 Ped. 2:11) Ken apay koma nga interesadotayo amin iti daytoy idinto ta awan pay 1 iti kada 650 nga aktibo a Saksi iti intero a lubong ti agkuna a napulotan wenno napili?

2 Maitutop a maawagan iti “temporario nga agnanaed” dagiti napulotan idi umuna a siglo. Saan a permanente ti kaaddada ditoy daga, a kas met kadagiti napulotan a natda a sibibiag ita. Ni apostol Pablo, a kameng ti napulotan a “bassit nga ipastoran,” kinunana: “No maipapan kadatayo, ti pannakipagilitayo adda iti langlangit, a manipud met iti dayta a lugar sigagagar nga ur-urayentayo ti manangisalakan, ni Apo Jesu-Kristo.” (Luc. 12:32; Fil. 3:20) Yantangay ‘makipagilida iti langlangit,’ panawanda ti daga apaman a matayda ket awatenda ti adayo a nasaysayaat a gunggona, ti imortal a biag idiay langit. (Basaen ti Filipos 1:21-23.) No kasta, literal a maawaganda kas “temporario nga agnanaed” ditoy daga nga iturturayan ni Satanas.

3. Ania a saludsod ti tumaud maipapan iti “sabsabali a karnero”?

3 Ngem ania met ti kasasaad dagiti “sabsabali a karnero”? (Juan 10:16) Addaanda iti Nainkasuratan a  namnama nga agbalin a permanente nga agindeg ditoy daga. Agbiagdanto nga agnanayon iti dayta. Ngem iti agdama, maibilbilangda met kas temporario nga agnanaed. Kasano a kasta?

“TI INTERO A SANGAPARSUAAN AGTULTULOY NGA AGAS-ASUG”

4. Ania ti saan a kabaelan a lapdan dagiti agtuturay?

4 Bayat nga adda ti dakes a sistema ni Satanas, tunggal maysa, pakairamanan dagiti Kristiano, ket agtultuloy nga agsagaba iti epekto ti panagrebelde ni Satanas maibusor ken Jehova. Mabasatayo iti Roma 8:22: “Ammotayo a ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.” Kasanoman kapasnek dagiti agtuturay, sientista, ken pilantropo, saanda a kabaelan a lapdan ti panagsagaba.

5. Nanipud 1914, ania ti pinili ti minilion a tattao, ken apay?

5 Nanipud 1914, pinili ti minilion a tattao ti agbalin nga iturayan ni Kristo Jesus, ti Ari nga introno ti Dios. Saanda a tarigagayan ti agbalin a paset ti lubong ni Satanas ken dida met supsuportaran dayta. Imbes ketdi, us-usarenda ti biag ken sanikuada agpaay iti Pagarian ti Dios.—Roma 14:7, 8.

6. Apay a maibilang a ganggannaet dagiti Saksi ni Jehova?

6 Iti nasurok a 200 a pagilian, pagaammo dagiti Saksi ni Jehova kas natulnog nga umili. Ngem sadinoman ti pagnanaedanda, agbibiagda a kasla ganggannaet. Determinadoda nga agtalinaed a neutral iti politika ken kadagiti isyu iti kagimongan. Uray pay ita, ibilbilangdan ti bagbagida kas umili ti maysa a baro a lubong nga inkari ti Dios. Maragragsakanda ta saanen nga agpaut ti temporario a panagnaedda iti daytoy imperpekto a lubong.

Ditay ikagkagumaan a salbaren ti lubong ni Satanas. Itantandudotayo ti baro a lubong ti Dios

7. Kasanonto nga agbalin a permanente nga agindeg ditoy daga dagiti adipen ti Dios?

7 Iti mabiiten, usarenton ni Kristo ti autoridadna a mangdadael iti dakes a sistema ni Satanas. Ti perpekto a gobierno ni Kristo wayawayaannanto ti lubong manipud iti basol ken ladingit. Ikkatennanto ti amin a makita ken di makita a rebelde a bumusbusor  iti kinasoberano ni Jehova. Dagiti nasungdo nga adipen ti Dios agbalindanton a permanente nga agindeg iti Paraiso a daga. (Basaen ti Apocalipsis 21:1-5.) Naan-anayton a ‘mawayawayaan ti sangaparsuaan manipud iti pannakaadipen iti panagrupsa ken maaddaan iti nadayag a wayawaya ti annak ti Dios.’—Roma 8:21.

ANIA TI MAINANAMA KADAGITI PUDNO A KRISTIANO?

8, 9. Ilawlawagmo ti kaipapanan ti kuna ni Pedro nga “umadayo kadagiti nainlasagan a tarigagay”?

8 Inlawlawag ni Pedro no ania ti mainanama kadagiti Kristiano idi kinunana: “Dungdungnguen, bagbagaankayo kas ganggannaet ken temporario nga agnanaed nga itultuloyyo ti umadayo kadagiti nainlasagan a tarigagay, nga isuda a mismo ti makibimbinnusor iti kararua.” (1 Ped. 2:11) Umuna a naiturong dayta a balakad kadagiti napulotan a Kristiano, ngem agpaay met dayta iti sabsabali a karnero ni Jesus.

9 Saan a dakes a penken ti dadduma a tarigagay, no la ket maitunos iti pagayatan ti Namarsua. Dagita ti mangnayon iti ragsak iti biag. Kas pagarigan, normal a tarigagayantayo ti naimas a taraon ken inumen, makapabang-ar a paglinglingayan, ken naragsak a panaglalangen. Natural laeng a tarigagayan dagiti agassawa ti seksual a panagragsak. (1 Cor. 7:3-5) Ngem nalawag a ti tuktukoyen ni Pedro a “nainlasagan a tarigagay” ket dagiti aramid a “makibimbinnusor iti kararua” wenno di umiso a nainlasagan a tartarigagay. Iti sabali a patarus, natukoy dagita kas “derderrep a linalasag.” (Ti Biblia) Gapuna, masapul a labanantayo ti aniaman a tarigagay a saan a maitunos iti panggep ni Jehova ken makadadael iti relasiontayo iti Dios. Ta no saan, agpeggad ti mismo a biagtayo.

10. Ania ti sumagmamano a silo ni Satanas tapno mapagbalinna dagiti Kristiano a paset ti lubongna?

10 Ti panggep ni Satanas ket pakapuyenna ti determinasion dagiti pudno a Kristiano nga agtultuloy nga agbiag kas “temporario nga agnanaed” iti agdama a sistema. Karaman kadagiti silo ni Satanas a masapul a siputantayo ket ti materialismo, imoralidad, panagbalin a nalatak, panagimbubukodan, ken nasionalismo. No determinadotayo a mangliklik kadagitoy a di umiso a nainlasagan a tarigagay, ipakpakitatayo a saantayo a kayat ti agbalin a paset ti dakes a lubong ni Satanas. Pampaneknekantay met a temporario laeng ti panagnaedtayo iti daytoy a lubong. Ti talaga a tarigagay ken pagregreggetantayo a gun-oden ket ti permanente a panagnaed iti nalinteg a baro a lubong ti Dios.

NASAYAAT A KABABALIN

11, 12. Ania ti panangmatmat ti dadduma a tattao kadagiti ganggannaet, ken ania met ti komentoda kadagiti Saksi ni Jehova?

11 Intuloy ni Pedro nga ilawlawag no ania ti manamnama kadagiti Kristiano a “temporario nga agnanaed.” Kinunana iti bersikulo 12: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsasawanda iti maibusor kadakayo a kasla managaramid iti dakes, dayawenda koma ti Dios iti aldaw a panangsukimatna.” No dadduma, maum-umsi dagiti ganggannaet, wenno temporario nga agnanaed iti maysa a pagilian. Maibilangda pay ketdi a dakes a tattao gapu ta naiduma ti panagsasao, tigtignay, panagkawkawes, ken nalabit ti panaglanglangada. Ngem no naimbag ti ar-aramidenda, wenno nasayaat ti kababalinda, mapaneknekan a saan nga agpayso dagiti negatibo a komento maipapan kadakuada.

 12 Kasta met, mabalin a naiduma dagiti pudno a Kristiano iti adu kadagiti kaarrubada no maipapan iti panagsasao wenno panagpili iti paglinglingayan. Masansan a malasin ida gapu iti naiduma a panagkawkawesda. Dagitoy a nakaidumaanda ti rason no apay a padpadaksen ida ti dadduma. Ngem adda met dagidiay mangap-apresiar kadakuada gapu iti nasayaat a konduktada.

13, 14. Kasano a ti kinasirib “mapaneknekan a nalinteg babaen iti ar-aramidna”? Mangted iti pagarigan.

13 Wen, masumra dagita a di nainkalintegan a kritisismo gapu iti nasayaat a kababalin. Uray ni Jesus, a naan-anay a matalek iti Dios, ket napadpadakes. Adda dagiti nangibaga nga isu ket “nabuklis ken kaay-ayona ti aginum iti arak, gayyem dagiti agsingsingir iti buis ken dagiti managbasol.” Ngem pinaneknekan ti nasayaat a kababalinna nga ulbod dagita a pammadakes. Kinuna ni Jesus: “Ti kinasirib mapaneknekan a nalinteg babaen iti ar-aramidna.” (Mat. 11:19) Kasta met laeng kadatayo ita. Kas pagarigan, dagiti kakabsat nga agserserbi iti Bethel idiay Selters, Germany ket ibilbilang ti sumagmamano a kaarrubada kas estranghero. Ngem indepensa ida ti mayor iti komunidad. Kinunana: “Agpayso a naiduma ti wagas ti panagbiag dagiti Saksi nga agserserbi sadiay, ngem saanda a mangrirriribuk iti komunidad.”

Nakatulong ti Biblia a mamagkaykaysa iti daytoy a Ruso a pamilia

14 Umasping iti dayta ti maysa a konklusion maipapan kadagiti Saksi ni Jehova nga agnanaed iti Moscow, Russia. Maak-akusaranda nga agar-aramid iti dakes. Ngem idi Hunio 2010, inyetnag ti European Court of Human Rights idiay Strasbourg, France: “Natakuatan ti Korte a di nainkalintegan ti panangipaidam [ti Moscow] iti wayawaya ti relihion ken panagtataripnong [dagiti Saksi ni Jehova]. Awan ti ‘napateg ken umdas’ a rason tapno ikeddeng dagiti lokal a korte” a nakabasol dagiti Saksi ni Jehova iti panamagsisina kadagiti pamilia, panangirekomenda iti panagpakamatay, panagkedked nga agpaagas, ken dadduma pay. Gapuna, “nadagsen unay ken di nainkalintegan ti dusa nga inyetnag dagiti lokal a korte” kontra kadagiti Saksi ni Jehova.

UMISO A PANAGPASAKUP

15. Ania a prinsipio ti Biblia ti sursuroten dagiti pudno a Kristiano iti intero a lubong?

15 Dagiti Saksi ni Jehova idiay Moscow ken iti intero a lubong sursurotenda ti maysa pay a makalikaguman a dinakamat ni Pedro para kadagiti Kristiano. Insuratna: “Maigapu iti Apo agpasakupkayo iti tunggal natauan a parsua: uray pay iti ari a kas nangatngato wenno kadagiti gobernador.” (1 Ped. 2:13, 14) Dagiti pudno a Kristiano ket saan a paset daytoy dakes a lubong. Ngem kas imbilin kadakuada ni Pablo, situtulok nga agpaspasakupda  kadagiti agtuturay nga inkabil ti Dios iti “relatibo a saad[da].”—Basaen ti Roma 13:1, 5-7.

16, 17. (a) Ania ti pammaneknek a saantayo a kumonkontra kadagiti gobierno? (b) Ania ti binigbig ti dadduma nga opisial ti gobierno?

16 Agbibiag dagiti Saksi ni Jehova kas “temporario nga agnanaed” iti agdama a sistema, ngem dina kaipapanan a kumonkontrada iti gobierno wenno babbabalawenda ti sabsabali. Bigbigenda a nagduduma ti opinion ti tunggal indibidual no maipapan iti politika wenno kadagiti parikut iti kagimongan. Saan a kas iti dadduma a relihion, dida makinamnamin iti politika. Saanda a dikdiktaran dagiti agtuturay iti wagas a panangiturayda iti gobierno. Awan a pulos ti natibker a nakaibatayan ti akusasion a panggepda a riribuken ti komunidad wenno agrebelde iti gobierno!

17 Kas panagtulnogda iti balakad ni Pedro a ‘panangpadayaw iti ari,’ ipakpakita dagiti Kristiano a raraemen ken padpadayawanda dagiti opisial ti gobierno. (1 Ped. 2:17) Bigbigen ti dadduma nga opisial nga awan ti rumbeng a pakadanaganda kadagiti Saksi ni Jehova. Kas pagarigan, kuna ni Steffen Reiche a dati a ministro ti gabinete iti Brandenburg ken nagbalin idi agangay kas miembro ti parliamento ti Germany: “Nagsayaat ti kababalin nga impakita dagiti Saksi ni Jehova kadagiti kampo ken pagbaludan, banag a kasapulan agingga iti agdama tapno agtalinaed ti maysa a demokratiko nga estado. Natibker ti determinasionda maibusor iti SS ken naasida kadagiti padada a balud. Nasayaat a tuladen dagiti umili iti pagiliantayo dagitoy a kababalin gapu iti lumanlanlan a kinaranggas maibusor kadagiti ganggannaet ken kadagidiay naiduma ti patpatien ken napolitikaan nga opinionda.”

PANANGIPAKITA ITI AYAT

18. (a) Apay a natural laeng nga ayatentayo ti intero a timpuyog dagiti kakabsat? (b) Ania ti komento ti dadduma a saan a Saksi?

18 Insurat pay ni apostol Pedro: “Maaddaankayo iti ayat iti intero a timpuyog dagiti kakabsat, agbutengkayo iti Dios.” (1 Ped. 2:17) Gapu ta addaan dagiti Saksi ni Jehova iti umiso a panagbuteng iti Dios, liklikanda ti bambanag a di makaay-ayo kenkuana ket dayta pay ti pakatignayanda a mangaramid iti pagayatanna. Naragsakda kas paset ti maysa a sangalubongan a timpuyog dagiti kakabsat a sangsangkamaysa nga agserserbi ken Jehova. Natural laeng ngarud nga ‘addaanda iti ayat iti intero a timpuyog dagiti kakabsat.’ Masmasdaaw no dadduma dagiti saan a Saksi gapu iti kasta a nainkabsatan nga ayat, a manmano a masarakan iti managimbubukod a kagimongan. Kas pagarigan, nasdaaw ti tour guide iti maysa nga American travel agency gapu iti panagayat ken tulong nga impakita dagiti Saksi kadagiti ganggannaet a delegado iti maysa nga internasional a kombension idiay Germany idi 2009. Kinunana a di pay nakakitkita iti kasta bayat ti adun a tawen a panagtrabahona kas tour guide. Idi agangay, kinuna met ti maysa a Saksi maipapan kenkuana: “Talaga a masmasdaaw a nangibaga iti nakitana.” Adda kadin nangngegmo nga umasping a komento dagiti tattao kadagiti Saksi maipapan iti kombension a natabunuam?

19. Ania koma ti determinasiontayo, ken apay?

19 Kadagiti nadakamaten ken iti dadduma pay a pamay-an, ipakpakita dagiti Saksi ni Jehova a “temporario[da] nga agnanaed” iti agdama a sistema ni Satanas. Siraragsakda a mangar-aramid iti dayta ken determinadoda nga agtalinaed a kasta. Natibker ti namnamada nga asidegen nga agbalinda a permanente nga agindeg iti nalinteg a baro a lubong ti Dios. Segseggaam kadi dayta?