Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2012

 Pakasaritaan ti Biag

Panaggagayyem iti 60 a Tawen Ngem Kasla Rugrugina Pay Laeng

Panaggagayyem iti 60 a Tawen Ngem Kasla Rugrugina Pay Laeng

Iti maysa a rabii idi 1951 idiay Ithaca, New York, U.S.A., uppat a babbaro nga agpapada nga agedad iti nasurok laeng a 20 ti sitatakder kadagiti agaabay a phone booth ket magagaranda a tumawag idiay Michigan, Iowa, ken California. Adda naragsak a damag a kayatda nga ibaga!

ITI napalabas a Pebrero, simmangpet ti 122 a payunir idiay South Lansing, New York, para iti maika-17 a klase ti Gilead School. Karaman kadagiti mainanama a misionero isu da Lowell Turner, William (Bill) Kasten, Richard Kelsey, ken Ramon Templeton. Agpada a taga-Michigan da Lowell ken Bill, taga-Iowa ni Richard, ken taga-California met ni Ramon. Nagbalin dagitoy a nasinged nga aggagayyem idi agangay.

Agpakannawan: Da Richard, Lowell, Ramon, ken Bill ket nagbalin nga aggagayyem iti Gilead

Agarup lima a bulan kalpasanna, magagaran ti amin idi naipakaammo a ni Kabsat Nathan Knorr manipud sangalubongan a hedkuarter ti agpalawag iti panagturpos dagiti estudiante. Kayat dagitoy nga uppat nga agkakaduada koma nga agserbi iti maymaysa a pagilian. Maammuanda ngata itan ti pagilian a pakaibaonanda kas misionero? Wen!

Ad-adda manen ti gagar ti intero a klase idi ipakaammon ni Kabsat Knorr ti pagilian a pakaibaonanda. Immuna a naawagan dagiti uppat a madandanagan a babbaro, ngem anian a bang-arda idi naammuanda nga isuda met laeng ti agkakadua! Ngem sadino ti pakaibaonanda? Nasorpresa unay dagiti kaklaseda ken nagpapalakpakda iti napaut idi naipakaammo a maibaon dagitoy nga aggagayyem idiay Germany.

Pagsidsiddaawan dagiti Saksi ni Jehova iti amin a suli ti lubong ti kinamatalek dagiti kapammatianda idiay Germany kabayatan ti panagturay ni Hitler a nangrugi idi 1933. Malagip ti adu nga estudiante ti mismo a panagisaganada iti kawkawes ken dagiti tulong ti organisasion a CARE para kadagiti kakabsatda iti Europa kalpasan ti Gubat Sangalubongan II. Mapagwadan dagiti adipen ti Dios idiay Germany gapu iti nagpaiduma a pammati, determinasion, tured, ken panagtalekda ken Jehova. ‘Maam-ammomi met laengen a mismo dagitoy a patpatgen a kakabsat,’ napampanunot idi ni Lowell. Dayta ti makagapu a magaggagaran ti amin iti daydi a rabii ken no apay a kayatda ti tumawag kadagiti pamilia ken gagayyemda!

PANAGTURONGDA IDIAY GERMANY

Ni Ramon a mangisursuro iti maysa a klase iti Kingdom Ministry School

Idi Hulio 27, 1951, nagluas ti barko nga SS Homeland manipud iti East River ti New York, ket nagbiahen dagiti uppat nga aggagayyem iti 11 nga  aldaw nga agturong idiay Germany. Ni Kabsat Albert Schroeder, maysa kadagiti instruktor iti Gilead ken nagbalin idi agangay a kameng ti Bagi a Manarawidwid, ti nangisuro kadakuada iti umuna a sasao a German. Ita, mangnamnamada nga adu pay ti masursuroda iti sumagmamano a German a nakalugananda. Ngem anian ta sabali met gayam a dialekto iti Germany ti us-usaren dagita!

Iti agsapa ti Martes, Agosto 7, kalpasan ti makaulaw a biahe, nakagteng met laengen dagitoy a kakabsat idiay Hamburg, Germany. Naladingitanda a nakakita iti namsaakan ti gubat innem a tawenen ti napalabas. Rabiin idi nagbiaheda iti tren nga agpa-Wiesbaden, nga ayan idi ti sanga nga opisina.

Ni Richard a mangus-usar iti Addressograph iti Bethel idiay Wiesbaden

Iti agsapa ti Mierkoles, nakagtengda iti estasion ti tren ket sinabat ida ni Hans—ti kaunaan a Saksi a naam-ammoda idiay Germany. Immanehuanna ida a mapan iti Bethel, ket imbatina ida iti istrikto a baket a di makasao iti Ingles. Impagarup ti baket a no ipigsana ti timekna, maawatanda ti ibagbagana, ngem ad-adda met a dida agkikinnaawatan. Ngem anian a bang-arda idi immay ni Kabsat Frost, ti adipen ti sanga, ket sibabara a kinablaawanna ida iti Ingles.

Idi agngudon ti Agosto, inatenderan dagiti uppat ti “Nadalus a Panagdayaw” nga Asamblea idiay Frankfurt am Main. Dayta ti damo a German a kombension a naatendaranda. Adda 47,432 a kangatuan a bilang ti timmabuno ket 2,373 met ti bilang ti nabautisaran. Dayta ti ad-adda a nangparayray iti tarigagayda nga agserbi kas misionero ken ti gagarda a mangasaba. Ngem sumagmamano nga aldaw kalpasanna, imbaga ni Kabsat Knorr nga agserbida iti Bethel.

Kombinsidoda a kanayon nga ammo ni Jehova ti kasayaatan gapu iti rag-o a nariknada iti panangitungpalda iti annongenda

Gapu iti tarigagayna nga agmisionero, pinagkedkedan idin ni Ramon ti awis nga agtrabaho iti Bethel iti Estados Unidos. Saan met a pinanunot da Richard ken Bill ti agserbi iti Bethel. Ngem ti nariknada a rag-o idi agangay iti trabahoda ti naan-anay a nakakombinsiranda a kanayon nga ammo ni Jehova ti kasayaatan. Talaga a nainsiriban ti agtalek Kenkuana imbes nga iti bukod a tarigagay!  No kasta ti panangmatmat ti maysa nga indibidual, siraragsakto nga agserbi ken Jehova iti sadinoman ken iti aniaman nga annongen a maited kenkuana.

VERBOTEN!

Maragragsakan ti adu a miembro ti pamilia ti Bethel iti Germany iti kaadda dagiti Americano ta impagarupda a makasursurodan iti Ingles. Ngem bigla a nalpay ti namnamada iti maysa nga aldaw iti dining room. Ni Kabsat Frost, a natural a nabiag ti panagsasaona, inrugina ti agsao iti German maipapan iti kasla serioso a banag. Siuulimek a nakadumog ti kaaduan a miembro ti pamilia. Nupay saan a maawatan idi damo dagiti kassangpet a babbaro no ania ti imbaga ni Kabsat Frost, naawatanda met la idi agangay a mainaig dayta kadakuada. Isu nga idi sipipigsa a kinunana, “VERBOTEN!” (“Maiparit!”) sa impigpigsana pay nga inulit, saanen a makaidna dagiti kassangpet. Ania ngata ti naaramidanda a nakaigapuan ti kasta a reaksion?

Ni Kabsat Frost (kannawan) ken ti dadduma pay bayat ti ibibisita ni Kabsat Knorr (kannigid)

Idi nalpasen ti pannangan, nagdardaras ti amin a napan kadagiti kuartoda. Idi agangay, inlawlawag ti maysa a kabsat: “Tapno matulongandakami, masapul a makapagsaokayo iti German. Isu nga imbaga ni Kabsat Frost nga agingga a dikay makasursuro iti German, VERBOTEN a kasaritadakayo iti Ingles.”

Dagus nga impangag dayta ti pamilia ti Bethel. Saan laeng a natulongan dagiti kassangpet nga agsursuro iti German no di ket nasursuroda pay a ti balakad ti maysa a naayat a kabsat, uray no narigat nga aramiden iti damo, ket masansan a pagimbagantayo. Dayta a balakad ti mangipakita nga interesado ni Kabsat Frost iti pagsayaatan ti organisasion ni Jehova ken ay-ayatenna dagiti kakabsatna. * Isu a dagitoy a babbaro naapresiarda met laeng ni Kabsat Frost idi agangay.

MAKASURSUROTAYO KADAGITI GAGAYYEMTAYO

Idi nagbakasionda idiay Switzerland idi 1952

Adda napapateg a maadaltayo kadagiti gagayyemtayo a matalek iti Dios. Makatulong ti ulidanda tapno agbalintayo a nasaysayaat a gagayyem ni Jehova. Adu ti nasursuro dagitoy nga uppat manipud kadagiti matalek a German a kakabsat a lallaki ken babbai—a ditay mainaganan amin gapu iti kaaduda—ngem adda met nasursuroda iti tunggal maysa. Inlawlawag ni Richard: “Medio ammo ni Lowell ti ag-German ken alisto a nakasursuro, ngem narigatankami a tallo. Gapu ta isu ti kalakayan, isu ti pangidauluenmi ken pagpatulonganmi no adda dimi maawatan a sao.” Malagip ni Ramon: “Maay-ayatanak unay idi pinagyannakami  ti maysa a Swiss a kabsat iti bassit a balayna idiay Switzerland iti damo a panagbakasionmi kalpasan ti makatawen a kaaddami idiay Germany! Kaipapanan dayta a dikam agsao iti German iti dua a lawas! Ngem diak ninamnama nga ipapilit ni Lowell nga agsaokami iti German no pagsasaritaanmi ti inaldaw a teksto. Awan ti naaramidak. Ngem adda napateg a banag a naadalmi. Agpasakupka iti panangidaulo dagidiay maseknan iti pagimbagam, uray no dika umanamong no dadduma. Nakatulong dayta kadakami iti panaglabas ti tawtawen ken nalaklaka ti panagpasakupmi iti nateokratikuan nga instruksion.”

Nasursuro met dagiti uppat nga aggagayyem nga apresiaren ti paglaingan ti tunggal maysa, kas kinuna ti Filipos 2:3: “Buyogen ti kinapakumbaba iti isip . . . ibilangyo a ti dadduma nangatngatoda ngem dakayo.” Isu a dagiti tallo masansan nga italekda ken Bill dagiti banag nga ammoda a nasaysayaat no isuna ti mangaramid. “No adda napateg ken narikut a situasion a dimi masigurado ti aramidenmi, ni Bill ti asitganmi,” malagip ni Lowell. “Nalaing a mangrisut kadagiti narigat a situasion ta anamonganmi amin ti pamay-anna ngem dimi maitured wenno kabaelan nga aramiden.”

NARARAGSAK A PANAGASAWA

Nagsasaruno a nangasawa dagiti uppat. Naibatay ti panaggagayyemda iti panagayatda ken Jehova ken iti amin-tiempo a ministerio, isu a bimmirokda kadagiti kapareha a situtulok a mangyun-una iti panagserbi ken Jehova. Iti amin-tiempo a panagserbida, nasursuroda nga ad-adda a makagunggona ti panangted ngem iti panangawat ken masapul nga iyun-una dagiti interes ti Pagarian ngem iti personal a tarigagay. Gapuna, pimmilida iti assawa nga addan iti amin-tiempo a panagserbi. Nagresulta dayta iti uppat a nalagda ken naragsak a panagasawa.

Tapno nalagda ti panaggayyem wenno panagasawa, masapul a karaman ni Jehova. (Ecl. 4:12) Nupay nabalo da Bill ken Ramon idi agangay, agpada a napadasanda ti rag-o ken suporta ti matalek nga asawa. Nagtultuloy a tinagiragsak da Lowell ken Richard daytoy a suporta. Nagasawa manen ni Bill ngem nainsiriban a pimmili iti kaparehana tapno makapagtultuloy iti amin-tiempo a panagserbi.

Idi agangay, naibaonda iti nadumaduma a lugar gapu kadagiti naited nga annongenda—kaaduanna nga iti Germany, Austria, Luxembourg, Canada, ken Estados Unidos. Gapuna, saanen a makapagkakadua iti adu a tiempo dagitoy nga aggagayyem. Ngem nupay agiinnaddayoda, kanayon nga agkikinnomustada ket makipagragsakda iti bendision ti tunggal maysa ken agiinnandingayda kadagiti naladingit a pasamak iti biagda. (Roma 12:15) Maipatpateg ti kakasta a gagayyem ken rumbeng a pagyamanan. Napapategda a sagut manipud ken Jehova. (Prov. 17:17) Pudno a manmano ita ditoy lubong ti makasarak iti pudno a gagayyem. Ngem posible a maaddaan ti tunggal pudno a Kristiano iti adu a pudno a gagayyem. Kas Saksi ni Jehova,  tagtagiragsakentayo ti pannakigayyem kadagiti kapammatiantayo iti intero a lubong ken, kangrunaanna, ken Jehova a Dios ken ni Jesu-Kristo.

Kas kadatayo, adda met parparikut dagitoy nga aggagayyem—mabalin a maigapu iti saem ti ipupusay ti asawa, nakaro a sakit, panangaywan kadagiti nataenganen a nagannak, panangpadakkel iti anak bayat ti amin-tiempo a panagserbi, panagdanag gapu iti baro a nateokratikuan nga annongen, ken iti agdama, isu ti panaglakay. Ngem napaneknekanda met a dagiti gagayyem—adda man iti asideg wenno adayo—tulonganda dagiti matalek ken Jehova nga agballigi iti aniaman a parikutda.

AGNANAYON A PANAGGAGAYYEM

Indedikar da Lowell, Ramon, Bill, ken Richard ti biagda ken Jehova iti nasapa nga edad a 18, 12, 11, ken 10. Inrugida met ti ag-regular pioneer iti nagbaetan ti edad a 17 ken 21. Inaramidda ti imparegta ti Eclesiastes 12:1: “Lagipem, itan, ti Naindaklan a Namarsuam kadagiti aldaw ti kinaagtutubom.”

No maysaka nga agtutubo a Kristiano a lalaki, awatem koma aginggat’ mabalin ti awis ni Jehova a sumrek iti amin-tiempo a panagserbi. Kas kadagitoy nga uppat nga aggagayyem, mabalin met a matagiragsakmo ti nadumaduma a pribilehio gapu iti di kaikarian a kinamanangngaasi ni Jehova. Karaman kadagita ti panagserbi iti sirkito, distrito, wenno sona; panagserbi iti Bethel, a pakairamanan ti panagbalin a miembro ti Komite ti Sanga; panangisuro iti Kingdom Ministry School ken Pioneer Service School; ken panagpalawag iti babassit ken dadakkel a kombension. Anian a rag-o dagitoy nga uppat ta ammoda a pinullo a ribu ti nagunggonaan iti trabahoda! Nagbalin a posible amin dagitoy gapu ta agtutuboda pay idi impangagda ti awis ni Jehova nga amin-kararua nga agserbi kenkuana.—Col. 3:23.

Agpakannawan: Da Richard, Bill, Lowell, ken Ramon nagkikitada idiay Selters iti dedikasion dagiti baro a pasdek iti sanga nga opisina idi 1984

Agserserbi manen ita da Lowell, Richard, ken Ramon iti sanga nga opisina nga adda itan idiay Selters, Germany. Makapaladingit ta natay ni Bill idi 2010 bayat nga agserserbi kas special pioneer idiay Estados Unidos. Ginuped ni patay ti dandani 60 a tawen a naisangsangayan a pannakigayyem ni Bill kadagitoy a tallo! Ngem ti Diostayo a ni Jehova saannanto a pulos lipaten dagiti gagayyemna. Masiguradotayo nga iti sidong ti Pagarianna, maisublinto ti amin a Nakristianuan a panaggagayyem a temporario a ginuped ni patay.

“Iti unos ti 60 a tawen a panaggagayyemmi, awan ti malagipko a dimi panagkikinnaawatan”

Insurat ni Bill sakbay a natay: “Iti unos ti 60 a tawen a panaggagayyemmi, awan ti malagipko a dimi panagkikinnaawatan. Il-ilalaek unay ti nasinged a relasionmi kas aggagayyem.” Innayon met ti tallo a gagayyemna, a mangnamnama nga agtultuloyto ti panaggagayyemda idiay baro a lubong, “Kasla mangrugrugikami pay laeng.”

^ par. 17 Naipablaak ti makapabileg a pakasaritaan ti biag ni Kabsat Frost iti The Watchtower nga Abril 15, 1961, panid 244-249.