Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2012

Pammaregta “Manipud iti Ngiwat Dagiti Ubbing”

Pammaregta “Manipud iti Ngiwat Dagiti Ubbing”

Idi Disiembre 2009, pinaboran ti Korte Suprema ti Russia ti maysa a desision a nagresulta iti pannakapasardeng ti aktibidad ti narelihiosuan nga organisasion dagiti Saksi ni Jehova idiay Taganrog, Russia. Nakompiskar met ti Kingdom Hall-da ken naideklara a kontra iti gobierno ti 34 kadagiti publikasiontayo. Daytoy a makapakigtot a damag ket naikabil iti opisial a Web site dagiti Saksi ni Jehova agraman ti retrato dagiti Saksi a naapektaran iti dayta a desision, a pakaibilangan dagiti ubbing.

Dagiti ubbing idiay Australia

Sumagmamano a bulan kalpasanna, ti Administrative Center of Jehovah’s Witnesses iti Russia ket nakaawat iti maysa a kahon ken surat manipud iti maysa a Saksi a pamilia idiay Queensland, Australia. Nakita dayta a pamilia ti report maipapan iti desision ti Korte, ket kinunada: “Patgenmi a Kakabsat, Natukay ti rikna dagiti annakmi a da Cody ken Larissa gapu iti nabileg a pammati dagiti kakabsat nga agpaspasar iti pannubok dita Russia. Nagaramid dagiti annakmi kadagiti kard ken surat, ket nangisaganakami iti bassit a pakete ti regalo a kayatmi nga ipatulod kadagiti ubbing idiay Taganrog, tapno maammuanda nga adda padada nga ubbing iti adayo a lugar a simamatalek nga agserserbi ken Jehova ken maseknan kadakuada. Idanon da Cody ken Larissa ti pakomusta ken ayatda kadagiti ubbing dita.”

Idi naawat dagiti ubbing idiay Taganrog dagitoy a regalo, nagaramidda kadagiti adda arte ken diseniona a surat ti panagyaman para iti dayta a pamilia idiay Australia. Natukay ti rikna ti maysa a kabsat nga agserserbi iti sanga nga opisina ti Russia gapu iti makaparegta a sasao “manipud iti ngiwat dagiti ubbing.” Kastoy ti insuratna kada Cody ken Larissa: “Sigurado nga awan ti ubing wenno adulto a maragsakan no madusa iti banag a saanna nga inaramid. Awan basbasol dagiti kakabsattayo idiay Taganrog, isu a nalidayda idi nakompiskar ti Kingdom Hall-da. Maragsakanda la ketdi a makaammo nga ay-ayaten ida dagiti kakabsatda iti sabali a pagilian. Pagyamanan iti ayat ken kinaimbagyo!”—Sal. 8:2.

Dagiti ubbing idiay Russia nga immawat kadagiti regalo dagiti ubbing idiay Australia

Talaga a pasettayo ti maysa a sangalubongan a panagkakabsat, ket ti ayattayo iti maysa ken maysa ti tumulong kadatayo a mangibtur iti aniaman a pannubok ken pakarigatan. Bayat a pagdedebatean dagiti korte no agresulta iti guranggura dagiti publikasion dagiti Saksi ni Jehova, siuulimek dagiti annaktayo a mangyeb-ebkas iti pannakaseknanda kadagiti kakabsattayo aniaman ti pagilian ken kulturada. Pampaneknekanda met a pudno ti kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:35.