Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan—Pagadalan nga Edision  |  Septiembre 2012

Dagiti Teokratiko nga Eskuelaan—Pammaneknek ti Ayat ni Jehova

Dagiti Teokratiko nga Eskuelaan—Pammaneknek ti Ayat ni Jehova

NI Jehova ti ‘Naindaklan a Manangisuro’ kadatayo. (Isa. 30:20) Ayat ti mangtigtignay kenkuana a mangedukar ken mangsanay iti sabsabali. Kas pagarigan, gapu iti nauneg nga ayat ni Jehova, impakitana ken Jesus ti “amin a bambanag nga aramidenna.” (Juan 5:20) Gapu iti nauneg nga ayatna kadatayo a Saksina, inikkannatayo ni Jehova iti “dila dagidiay nasursuruan,” bayat nga ikagkagumaantayo nga idayaw isuna ken tulongan ti sabsabali.—Isa. 50:4.

Ti Teaching Committee ti Bagi a Manarawidwid tultuladenna ti ayat ni Jehova a Dios babaen ti panangusarna iti sangapulo a teokratiko nga eskuelaan tapno masanay dagidiay agtarigagay ken adda iti kasasaad a makipaset iti dayta. Ibilbilangmo kadi dagitoy nga eskuelaan kas pammaneknek ti ayat ni Jehova?

Kitaem ti sumario maipapan kadagiti agdama a teokratiko nga eskuelaan ken ti komento ti dadduma a nakapagadal kadagita. Kalpasanna isaludsodmo iti bagim, ‘Kasano a magunggonaanak iti daytoy a nadiosan nga edukasion?’

 GUNGGONA NGA ITDEN TI NATEOKRATIKUAN A PANNAKASANAY

Yantangay ni Jehova ket “Dios ti ayat,” sansanayennatayo tapno ad-adda a makapnek ti biagtayo, mapagballigiantayo dagiti karit, ken maaddaantayo iti dakkel a rag-o iti ministerio. (2 Cor. 13:11) Kas kadagiti adalan idi umuna a siglo, maipapaay ti pannakasanay a kasapulantayo a tumulong iti dadduma, iti kasta, ‘maisurotayo ida a mangtungpal iti amin a bambanag’ a naibilin kadatayo.—Mat. 28:20.

Nupay saan a posible a makapagadaltayo amin kadagitoy nga eskuelaan, mabalin a magunggonaantayo iti maysa wenno ad-adu pay kadagita. Mabalintayo nga iyaplikar dagiti maaw-awattayo a naibatay-Biblia nga instruksion. Mas epektibo met ti ministeriotayo no makikaduatayo kadagiti nasanay nga adipen ni Jehova.

Isaludsodmo iti bagim, ‘Kualipikadoak kadi iti aniaman kadagitoy nga eskuelaan?’

Ibilang dagiti agdaydayaw ken Jehova a pribilehioda ti makipaset ken agsursuro kadagitoy a napapateg nga eskuelaan. Ti koma pannakasanaymo ti mangpasinged kenka iti Dios ken tumulong kenka iti panangibaklaymo kadagiti nateokratikuan a responsabilidadmo, nangruna iti naganat nga annongen a panangikasaba iti naimbag a damag.