Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) SEPTIEMBRE 2012

Talna iti Sangaribu a Tawen—Ken Kalpasanna!

Talna iti Sangaribu a Tawen—Ken Kalpasanna!

“Tapno ti Dios agbalinto nga amin a bambanag iti tunggal maysa.”—1 COR. 15:28.

1. Ania a namnama ti segseggaan ti “dakkel a bunggoy”?

IPAPANMON nga adda nabileg a gobierno a nainkalintegan ken naasi ti agturayna. Mailadawam kadi ti amin a pagimbagan a maipaayna kadagiti iturayanna iti uneg ti sangaribu a tawen? Adda nagsasayaat a paspasamak nga agur-uray iti di mabilang a “dakkel a bunggoy” a makalasat iti “dakkel a rigat,” a naan-anay a mamagpatingga iti agdama a dakes a sistema ti bambanag.—Apoc. 7:9, 14.

2. Ania ti napasaran ti sangatauan bayat ti napalabas nga 6,000 a tawen?

2 Bayat ti 6,000 a tawen a pakasaritaan ti tao, nakaad-adun nga ut-ot ken panagsagaba ti imbunga ti panagbukbukod ken panangituray ti tao. Nabayagen nga imbaga ti Biblia: “Ti tao dinominaranna ti tao iti pakadangrananna.” (Ecl. 8:9) Ania ti makitkitatayo ita? Malaksid kadagiti gubat ken iyaalsa, adda dita dagiti mangparigat a problema a kas iti kinapanglaw, sakit, pannakadadael ti aglawlaw, panagbalbaliw ti klima, ken adu pay. Ipakpakdaar dagiti opisial ti gobierno a no ditay balbaliwan ti kababalintayo ken ditay maseknan iti aglawlawtayo, apitentayto dagiti dakes a resulta.

3. Anianto ti ibanag ti Sangaribu a Tawen a Turay?

3 Iti sidong ti panangituray ti Mesianiko nga ari a ni Jesu-Kristo ken dagiti 144,000 a kakaduana, in-inutto nga ikkaten ti Pagarian ti Dios ti amin a pannakadangran ti tao ken ti pagtaenganna, ti planeta a Daga. Ibanagto ti Sangaribu a Tawen a Turay ti makaparagsak a kari ni Jehova a Dios: “Adtoy mangparsuaak iti baro a langlangit ken baro a daga; ket dagiti immun-una a banag saandanto a maipalagip, saandanto met a tumpuar iti puso.” (Isa. 65:17) Ania dagiti nakaskasdaaw a bambanag a mapasamak iti masanguanan? Dagiti padto iti Sao ti Dios tulongannatayo a mangtarus kadagiti nadayag  a bambanag a “di makita,” wenno di pay napasamak.—2 Cor. 4:18.

‘MANGBANGONDANTO ITI BALBALAY KEN AGMULADANTO KADAGITI KAUBASAN’

4. Ania ti parikut ti adu ita mainaig iti pagtaengan?

4 Asino koma ti madi a maaddaan iti bukod a balay a natalged a pagtaenganna ken ti pamiliana? Iti agdama, dakkel a parikut ti kinaawan ti pagtaengan. Aglilinnetlet dagiti tattao kadagiti napusek a siudad. Adu ti agnanaed kadagiti iskuater ket arapaap laeng kadakuada ti maaddaan iti bukod a balay.

5, 6. (a) Kasanonto a matungpal ti Isaias 65:21 ken Mikias 4:4? (b) Ania ti aramidentayo tapno masagraptayo dagita a bendision?

5 Iti sidong ti turay ti Pagarian, matungpalton ti tarigagay ti amin a maaddaan iti bukod a pagtaengan, ta impadto ni Isaias: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.” (Isa. 65:21) Ngem saan laeng a ti kaadda ti bukod a pagtaengan ti namnamaenda. Agpayso nga adu ita dagiti agnanaed iti bukodda a balay, ken addada pay ketdi agnanaed iti mansion. Ngem madanaganda amangan no mapukawda ti pagtaenganda gapu iti pinansial a parikut wenno serken ida dagiti mannanakaw, wenno nakarkaro pay ketdi ti mapasamak. Ngem anian a naan-anay a nagpaiduma ti kasasaad bayat ti panagturay ti Pagarian! Insurat ni propeta Mikias: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.”—Mik. 4:4.

6 Ania ti aramidentayo tapno masagraptayo dayta a nakaskasdaaw a namnama? Siempre, kasapulantayo amin ti nasayaat a pagtaengan. Ngem imbes nga agreggettayo a maaddaan ita iti ar-arapaapentayo a balay—nalabit nga uray la mailumlomtayon iti utang—saan kadi a nasaysayaat a mangnamnamatayo iti kari ni Jehova? Laglagipentayo ti kinuna ni Jesus maipapan iti bagina: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.” (Luc. 9:58) Kabaelan idi ni Jesus ti mangbangon wenno gumatang iti kasayaatan a balay. Ngem apay a dina inaramid dayta? Nalawag a saanna a kayat a masinga ti panangyun-unana iti Pagarian. Mabalin kadi a tuladentayo ti ulidanna tapno agtalinaed a simple ti matatayo—a di pasinga kadagiti material a bambanag?—Mat. 6:33, 34.

“TI LOBO KEN TI KORDERO AGLANGLANGDANTO”

7. Ania ti imbilin ni Jehova iti tao mainaig kadagiti animal?

7 Idi nagparsua ni Jehova, ti tao ti naudi nga inaramidna, ti kangrunaan a pinarsuana ditoy daga. Imbaga ni Jehova ti espesipiko a panggepna iti Nasigo a Managobrana, ti inauna nga Anakna: “Aramidenta ti tao iti ladawanta, sigun iti langata, ket pagpasakupenda koma dagiti ikan iti baybay ken dagiti agtaytayab a parsua iti langlangit ken dagiti naamo nga animal ken ti intero a daga ken tunggal aggargaraw nga animal nga aggargaraw iti rabaw ti daga.” (Gen. 1:26) Gapuna, naibilin kada Adan ken Eva nga aywanan ken pagpasakupenda dagiti animal. Ket kastanto met ti aramiden ti amin a tattao inton agangay.

8. Ania ti gagangay a kababalin ita dagiti animal?

8 Posible kadi a maiturayanto ti tattao ti amin nga animal ken maadda ti talna iti nagbaetanda? Adu a tattao ti nadungngo kadagiti tarakenda, a kas kadagiti aso ken pusa. Ngem adda ngata met kasta a rikna dagiti atap nga animal? Kuna ti maysa a report: “Natakuatan dagiti sientista a  mangpalpaliiw ken mangad-adal kadagiti atap nga animal nga adda emosion ti amin a mamalia.” Siempre, adda dagiti animal a mabuteng wenno lumaban no agpeggad ti biagda, ngem makaipakitada kadi met iti kinadungngo? Ituloy ti report: “Makita ti kasayaatan a galad dagiti mamalia iti panangpadakkelda kadagiti annakda—isu ti nakaskasdaaw nga abilidadda a mangipakita iti kinadungngo.”

9. Anianto ti mapasamak a panagbalbaliw kadagiti animal?

9 Ditay ngarud pakasdaawan no mabasatayo iti Biblia nga agarinto ti talna iti nagbaetan ti tao ken animal. (Basaen ti Isaias 11:6-9; 65:25.) Apay? Laglagipentayo nga idi rimmuar ni Noe ken ti pamiliana iti daong kalpasan ti Layus, imbaga kadakuada ni Jehova: “Ti panagbuteng kadakayo ken ti panagaligaget kadakayo agtultuloyto iti tunggal sibibiag a parsua iti daga.” Agpaay dayta a proteksion iti biag dagiti animal. (Gen. 9:2, 3) Posible kadi a kissayanto ni Jehova dayta a panagbuteng ken panagamak dagiti animal tapno matungpal ti orihinal a bilinna? (Os. 2:18) Anian a nagragsak a panawen ti agur-uray para iti amin a makalasatto nga agbiag ditoy daga!

“PUNASENNANTO TI AMIN A LUA”

10. Ania ti gagangay a makagapu iti panaglua ti tao?

10 Idi nakita ni Solomon ti “amin [a] panangirurumen a maar-aramid iti baba ti init,” insennaayna: “Adtoy! ti lulua dagidiay mairurrurumen, ngem awananda ti manangliwliwa.” (Ecl. 4:1) Kasta met laeng ti kasasaad ita wenno nakarkaro pay ketdi. Adda kadi asinoman kadatayo a saanna pay a napadasan ti naglua gapu iti maysa a naliday a pasamak? Nupay adda dagiti aglua gapu iti rag-o, kaaduanna nga agluatayo gapu iti panagleddaang.

11. Ania a salaysay ti Biblia ti nakatukayan ti riknam?

11 Lagipentayo ti adu a makatukay ken nasaem nga eksena a nabasatayo iti Biblia. Idi natay ni Sara iti edad a 127, “immay ni Abraham tapno dung-awanna ni Sara ken tapno sangitanna.” (Gen. 23:1, 2) Idi nagpakada ni Noemi iti dua a manugangna, ‘impigsada dagiti timekda ket nagsangitda,’ sa idi agangay ‘impigpigsada pay ti nagsangit.’ (Ruth 1:9, 14) Idi naaddaan ni Ari Ezekias iti nakaro a sakit ken dandanin matay, nagkararag iti Dios ken “nangrugi nga agsangit iti napalalo,” ket natukay ti rikna ni Jehova. (2 Ar. 20:1-5) Ken asino ti di matukay ti riknana iti napasamak idi inlibak ni apostol Pedro ni Jesus? Idi nangngeg ni Pedro ti taraok ti kawitan, “rimmuar ket nagsangit a sipapait unay.”—Mat. 26:75.

12. Kasanonto nga iyeg ti turay ti Pagarian ti pudpudno a bang-ar iti sangatauan?

12 Gapu iti adu a nasaem a pasamak, kasapulan unay ti sangatauan ti liwliwa ken bang-ar. Daytanto ti ipaay ti Sangaribu a Tawen a Turay para kadagiti iturayanna: “[Punasento ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apoc. 21:4) Makaliwliwa a maammuan a maawanton ti panagleddaang, panagsangit, ken ut-ot. Ngem saan la a dayta, inkari pay ti Dios a maparmekto ti kangrunaan a kabusor ti sangatauan—ti ipapatay. Kasanonto a mapasamak dayta?

“AMIN DAGIDIAY ADDA KADAGITI PAKALAGLAGIPAN A TANEM . . . RUMMUARDA”

13. Sipud nagbasol ni Adan, ania ti epekto ti ipapatay kadagiti tattao?

13 Sipud nagbasol ni Adan, nangrugin nga agturay ti ipapatay kas ari iti sangatauan. Nakaam-amak dayta a kabusor—ti di maliklikan a pagbanagan dagiti managbasol a tattao ken makagapu iti nakaro a ladingit  ken leddaang. (Roma 5:12, 14) Kinapudnona, “gapu iti buteng iti ipapatay,” minilion a tattao ti nagbalin nga ‘ad-adipen iti intero a panagbiagda.’—Heb. 2:15.

14. Anianto ti resulta ti pannakapukaw ni patay?

14 Ibaga ti Biblia a dumtengto ti tiempo a ‘mapukaw ni patay, ti maudi a kabusor.’ (1 Cor. 15:26) Adda dua a grupo a magunggonaan iti dayta. Para iti “dakkel a bunggoy” nga agbibiag itan, makalasatdanto ket posible nga agbiagda nga agnanayon iti baro a lubong. Para iti binilion a natayen, posiblento a mapagungarda. Mailadawam kadi ti rag-o ken gagar ti “dakkel a bunggoy” inton abrasaenda dagiti mapagungar? Mailadawantayo dayta no usigentayo ti sumagmamano a salaysay ti Biblia maipapan iti panagungar.—Basaen ti Marcos 5:38-42; Lucas 7:11-17.

15. Ania ti mabalin a reaksionmo no makitam nga agungar ti maysa nga ay-ayatem?

15 Panunotem ti sasao a “saanda a natngelan ti riknada buyogen ti dakkel a panagsiddaaw” ken “rinugianda nga idayaw ti Dios.” Nalabit kasta met koma ti nariknam no naimatangam dagita a pasamak. Sigurado a kasta unay ti rag-o ken panagamangatayo inton makitatayo a sibibiag manen dagiti ay-ayatentayo a pimmusay. Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda.” (Juan 5:28, 29) Awan pay ti naimatangantayo a kasta a pasamak; isu a sigurado a maysanto dayta kadagiti makapasiddaaw a ‘banag a di pay nakita.’

“TI DIOS AGBALINTO NGA AMIN A BAMBANAG ITI TUNGGAL MAYSA”

16. (a) Apay a sigagagar koma nga isarsaritatayo dagiti bendision iti masanguanan? (b) Ania ti kinuna ni Pablo idi pinaregtana dagiti Kristiano idiay Corinto?

16 Wen, addanto nakaskasdaaw a masakbayan dagidiay agmatalek ken Jehova kadagitoy napeggad  a tiempo! No pampanunotentayo dagiti agkakaimbag a bendision iti masanguanan, matulongantayo a mangipamaysa iti atensiontayo iti napatpateg a bambanag ken ditay maisiasi kadagiti pangallukoy ti agdama a sistema ti bambanag. (Luc. 21:34; 1 Tim. 6:17-19) Sigagagar koma a pagsasaritaantayo ti nakaskasdaaw a namnamatayo bayat ti panagdaydayaw ti pamiliatayo ken no kaduatayo dagiti iyad-adalantayo iti Biblia ken dagiti interesado. Daytoy ti mamagtalinaed a napaypayso ti namnamatayo. Kasta ti inaramid ni apostol Pablo idi pinaregtana dagiti padana a Kristiano. Arigna impanna ida iti arinunos ti Sangaribu a Tawen a Turay ni Kristo. Padasem a panunoten ti naan-anay a kaipapanan ti sasao ni Pablo a masarakan iti 1 Corinto 15:24, 25, 28.Basaen.

17, 18. (a) Iti ania a pamay-an a ni Jehova ti “amin a bambanag iti tunggal maysa” idi nangrugi ti pakasaritaan ti tao? (b) Anianto ti aramiden ni Jesus tapno maisubli ti tunos ken panagkaykaysa?

17 Awanen ti nasaysayaat pay a pangdeskribir iti nadayag a masakbayan no di ti sasao a “ti Dios agbalinto nga amin a bambanag iti tunggal maysa.” Ania ti kaipapanan dayta? Panunotem ti tiempo idi perpekto pay laeng da Adan ken Eva idiay Eden ken pasetda pay laeng ti natalna ken nagkaykaysa a pamilia ni Jehova iti intero nga uniberso. Ni Jehova, a Soberano iti Uniberso, iturturayanna idi ti amin a parsuana, anghel ken tao. Mabalinda ti direkta a makisarita ken agdayaw kenkuana ken masagrapda ti bendisionna. Isu idi ti “amin a bambanag iti tunggal maysa.”

Inton naan-anayen a maibanag ni Jesus ti annongenna kas Ari, sipapakumbabanto nga isublina ti Pagarian ken Amana

18 Nasinga dayta a panagkaykaysa idi nagsukir ti tao ken Jehova gapu iti impluensia ni Satanas. Ngem sipud idi 1914, rugrugianen ti Mesianiko a Pagarian nga isubli daydi a tunos ken panagkaykaysa. (Efe. 1:9, 10) Bayat ti Sangaribu a Tawen a Turay, pumudnonto ti nakaskasdaaw a bambanag a “di makita” iti agdama. Anianto ti mapasamak inton agpatingga ti Milenio a Turay ni Kristo? Nupay naited ken Jesus ti “isuamin nga autoridad . . . idiay langit ken ditoy daga,” saan nga ambisioso. Awan ti gandatna a mangagaw iti saad ni Jehova. Isu a sipapakumbabanto nga “iyawatna ti pagarian iti Dios ken Amana.” Usarenna ti nagpaiduma a saad ken autoridadna agpaay iti “dayag ti Dios.”—Mat. 28:18; Fil. 2:9-11.

19, 20. (a) Kasano a maipakita ti amin nga iturayan ti Pagarian a bigbigbigenda ti panangituray ni Jehova? (b) Ania a naindaklan a namnama ti matungpalto?

19 Iti dayta a gundaway, napagbalinton a perpekto dagiti iturayan ti Pagarian ditoy daga. Surotendanto ti ulidan ni Jesus ket sipapakumbaba ken situtulok a bigbigenda ti kalintegan ni Jehova a mangituray iti uniberso. Maikkandanto iti gundaway a mangpaneknek no tarigagayanda nga aramiden dayta babaen ti panagballigida iti maudi a pannubok. (Apoc. 20:7-10) Kalpasanna, mapukawton iti agnanayon ti amin a rebelde—tao man ken espiritu. Sigurado a nakaragragsakto dayta a tiempo! Siraragsakto ti intero a pamilia ni Jehova a mangidaydayaw kenkuana, ket isunton ti “amin a bambanag iti tunggal maysa.”—Basaen ti Salmo 99:1-3.

20 Matignayka kadi a mangipamaysa iti pagayatan ti Dios gapu iti nagsasayaat a bambanag nga aramidento ti Pagarian? Ikagkagumaam kadi a liklikan ti silo ti palso a namnama ken bang-ar nga ididiaya ti lubong ni Satanas? Patpatibkerem kadi ti determinasionmo a mangsuporta ken mangitandudo iti panangituray ni Jehova? Sapay koma ta paneknekan dagiti tignaymo a kayatmo nga aramiden dayta iti agnanayon. No kasta, pribilehiom a sagrapen ti talna ken kinatalged iti sangaribu a tawen—ken iti agnanayon!