Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) 2006-11-15

Kanayon nga Awatem ti Disiplina ni Jehova

Kanayon nga Awatem ti Disiplina ni Jehova

“Ti disiplina ni Jehova . . . saanmo a laksiden.”—PROVERBIO 3:11.

NI Solomon nga ari iti nagkauna nga Israel ibagana kadatayo ti naimbag a rason no apay nga awatentayo ti disiplina ti Dios. “Ti disiplina ni Jehova, O anakko, saanmo a laksiden,” kuna ni Solomon, “ket saanmo a karurod ti pannubngarna, agsipud ta daydiay ayaten ni Jehova tubngarenna, kas met laeng iti panangtubngar ti maysa nga ama iti anak a pakasarakanna iti ragsak.” (Proverbio 3:11, 12) Wen, disiplinaennaka ti nailangitan nga Ama gapu ta ay-ayatennaka.

2 Ti “disiplina” tukoyenna ti pannusa, panangatur, pammilin, ken panangisuro. “Awan disiplina a kasla makaparag-o iti agdama, no di ket makapaladingit,” insurat ni apostol Pablo, “ngem kalpasanna kadagidiay a nasanayen iti dayta mangpataud iti natalna a bunga, awan sabali, ti kinalinteg.” (Hebreo 12:11) Ti panangawat ken panangyaplikarmo iti disiplina ti Dios tulongannaka a mangsalimetmet iti nalinteg a dana ken ad-adda nga iyadaninaka ken ni Jehova, ti nasantuan a Dios. (Salmo 99:5) Magun-odtayo ti pannakaatur nalabit babaen kadagiti kapammatiantayo, kadagiti maad-adaltayo kadagiti Nakristianuan a gimong, ken iti panagadaltayo iti Sao ti Dios ken kadagiti publikasion “ti matalek a mayordomo.” (Lucas 12:42-44) Anian a yamanmo no adda mangipatuldo kenka kadagiti banag a masapul a balbaliwam! Ngem ania a disiplina ti kasapulan no adda nadagsen a basol a naaramidan ti maysa?

No Apay nga Adda Dagiti Mailaksid

3 Dagiti adipen ti Dios ad-adalenda ti Biblia ken dagiti Nakristianuan a publikasion. Mausig dagiti pagalagadan ni Jehova kadagiti gimong, asamblea, ken kombension. Gapuna, ammo dagiti Kristiano no ania ti kalkalikaguman ni Jehova  kadakuada. Sa la mailaksid ti maysa a kameng ti kongregasion no isu ket awanan panagbabawi nga agar-aramid iti nadagsen a basol.

4 Usigentayo ti maysa a pagarigan ti panangilaksid a nadakamat iti Kasuratan. Ti kongregasion sadi Corinto pinanuynoyanna “ti kasta a pannakiabig [nga] awan uray iti tengnga dagiti nasion, a ti asawa a tinagikua ti maysa a lalaki ket kukua ni amana.” Indagadag ni Pablo kadagiti taga-Corinto nga ‘iyawatda ken Satanas ti kasta a tao maipaay iti pannakadadael ti lasag, tapno ti espiritu maisalakan koma.’ (1 Corinto 5:1-5) Kalpasan a nailaksid ken nayawat ken ni Satanas, ti nakabasol ket paset manen ti lubong ti Diablo. (1 Juan 5:19) Gapu iti dayta a pannakailaksid ti nakabasol, maysa a dakes nga impluensia ti naikkat manipud iti kongregasion. Iti kasta, nataginayon ti nadiosan nga “espiritu,” wenno nadalus a kasasaad, ti kongregasion.2 Timoteo 4:22; 1 Corinto 5:11-13.

5 Kalpasan ti saan unay a naunday a panawen, indagadag ni Pablo kadagiti Kristiano idiay Corinto nga isublida daydi a nakabasol. Apay? Tapno saan koma ida a “magundawayan ni Satanas,” sigun iti apostol. Nalawag a nagbabawi ti nakabasol ken dinalusannan ti biagna. (2 Corinto 2:8-11) No agkedked dagiti taga-Corinto a mangisubli iti agbabbabawi a tao, magundawayan ida ni Satanas iti anag nga agbalinda a di manangngaasi ken di manangpakawan, banag a makaay-ayo iti Diablo. Mabalin a di nagbayag, ‘pinakawan ken liniwliwada’ ti nagbabawi a tao.2 Corinto 2:5-7.

6 Ania a pagimbagan ti iyeg ti panangilaksid? Maliklikan ti pannakaumsi ti nasantuan a nagan ni Jehova ken mataginayon ti nasayaat a reputasion ti ilina. (1 Pedro 1:14-16) No mailaksid ti saan nga agbabawi a nakabasol, maitandudo dagiti pagalagadan ti Dios ken mataginayon ti naespirituan a kinadalus ti kongregasion. Mabalin a dayta met ti mamagpanunot iti nailaksid tapno maamirisna ti kinadagsen ti naaramidna a basol.

Apay a ni apostol Pablo impaayanna dagiti taga-Corinto kadagiti pagalagadan mainaig iti panangilaksid?

Dakkel ti Maaramidan ti Panagbabawi

7 Sipapasnek nga agbabawi ti kaaduan kadagidiay makaaramid iti nadagsen a basol isu a saanda a mailaksid iti kongregasion. Siempre, saan a kanayon a nalaka nga iparangarang ti pudno a panagbabawi. Panunotenyo ni Ari David iti Israel, a nangputar iti Salmo 32. Ipakita dayta a kanta a saan a dagus nga impudno ni David ti nadagsen a basolna mainaig ken ni Bat-seba. Nalpay ni David gapu iti pannakatutuok ti riknana, kas iti mula a nalaylay gapu iti kinadagaang ti kalgaw. Nagsagaba ti bagi ken isip ni David, ngem idi ‘impudnona dagiti salungasingna, isu ket pinakawan ni Jehova.’ (Salmo 32:3-5) Kalpasanna, inkanta ni David: “Naragsak ti tao nga iti kuentaanna saan a mangikabil ni Jehova iti biddut.” (Salmo 32:1, 2) Anian a makapagin-awa ti asi nga ipapaay ti Dios!

8 Nalawag ngarud a masapul nga agbabawi ti nakabasol sakbay a mapakitaan iti asi. Ngem saan a maibilang a panagbabawi no aramidenna dayta gapu laeng ta mabain wenno maamak a matakuatan ti basolna. Ti “panagbabawi” kaipapananna ti “panangbalbaliw ti maysa iti panangmatmatna” maipapan iti dakes nga aramid, a maldaangan gapu ta nakaaramid iti basol. Ti maysa nga agbabbabawi ket addaan iti “puso a nadunor ken naidagel” ken kayatna nga ‘ilinteg ti biddutna’ agingga a mabalin.—Salmo 51:17; 2 Corinto 7:11.

9 Napateg ti panagbabawi tapno maisubli ti maysa iti kongregasion Kristiano. Saan a dagus nga awaten ti kongregasion ti maysa a nailaksid kalpasan ti sumagmamano a tiempo. Sakbay a maisubli, masapul nga adda dakkel a panagbalbaliw ti kasasaad ti pusona. Masapul a mabigbigna ti kinadagsen ti basolna ken ti pannakaumsi nga inyegna ken ni Jehova ken iti kongregasion. Masapul nga agbabawi, sipapasnek nga ikararagna ti pammakawan, ken itunosna ti biagna kadagiti nalinteg a pagalagadan ti Dios. No agkiddaw a maisubli, nasken nga ipakitana nga isu ket  agbabbabawi ken mangiparparangarang “kadagiti aramid a maitutop iti panagbabawi.”—Aramid 26:20.

Apay nga Ipudno ti Naaramid a Basol?

10 Mabalin a panunoten ti dadduma a nakabasol: ‘No ibagak ti basolko, nalabit a maipasangoak kadagiti nakababain a saludsod ken mabalin a mailaksidak. Ngem no ilimedko lattan, maliklikak ti maibabain ken saan a pulos a maammuan dayta dagiti kakabsat.’ Ngem dagidiay kasta ti kapanunotanda nalipatanda nga ikabilangan ti sumagmamano a napateg a banag. Ania dagita?

11 Ni Jehova ket “maysa a Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno, mangsalsalimetmet iti naayat a kinamanangngaasi maipaay iti rinibu, mamakpakawan iti biddut ken salungasing ken basol.” Kaskasdi, ilintegna dagiti adipenna “iti maiparbeng a rukod.” (Exodo 34:6, 7; Jeremias 30:11) No kas pagarigan ta nakabasolka iti nadagsen, kasano koma a magun-odmo ti asi ti Dios no ilimedmo ti basolmo? Ammo dayta ni Jehova, ket saanna a basta palabsen ti maysa a panagbasol.Proverbio 15:3; Habakuk 1:13.

12 No nakaaramidka iti nadagsen a basol, makatulong ti panangipudnom tapno maaddaanka manen iti nadalus a konsiensia. (1 Timoteo 1:18-20) Ngem no saanmo nga ipudno, mabalin nga agresulta dayta iti namulitan a konsiensia nga agturong iti ad-adu pay a panagbasol. Laglagipem a ti basolmo ket saan laeng a maibusor iti sabali a tao wenno iti kongregasion. Maibusor met dayta iti Dios. Inkanta ti salmista: “Ni Jehova—ti tronona adda iti langlangit. Dagiti bukodna a mata kumitada, dagiti bukodna nga agsilnasilnag a mata sukimatenda ti annak ti tattao. Ni met laeng Jehova sukimatenna daydiay nalinteg kasta met daydiay nadangkes.”—Salmo 11:4, 5.

13 Saan a bendisionan ni Jehova ti asinoman a mangilimed iti nadagsen a basolna ken mangikagumaan nga agtalinaed iti nadalus a kongregasion Kristiano. (Santiago 4:6) No ngarud nakaaramidka iti nadagsen a basol ket kayatmo nga ilinteg dayta, dika agpangadua a mangipudno iti dayta. Ta no saan, masidsidirto latta ti konsiensiam, nangruna no adda mabasa wenno mangngegmo a balakad maipapan kadagiti nadagsen a basol a kas iti naaramidmo. Ania ti mapasamak kenka no ipaidam ni Jehova ti espirituna, kas iti inaramidna iti kaso ni Ari Saul? (1 Samuel 16:14) No awan kenka ti espiritu ti Dios, mabalin a matnagka iti nadagdagsen a basol.

Mapagpiaram Dagiti Matalek a Kakabsat

14 Gapuna, ania ti rumbeng nga aramiden ti agbabbabawi a nakabasol? “Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Ket ti kararag ti pammati paimbagennanto ti addaan sagubanit, ket isu ibangonto ni Jehova.” (Santiago 5:14, 15) Ti iyaasideg kadagiti papanglakayen ket maysa a pamay-an tapno ti tao ‘mapataudna ti bunga a maitutop iti panagbabawi.’ (Mateo 3:8) Dagitoy a matalek ken naayat a lallaki ti ‘mangikararag ken mangsapsapo kenkuana iti lana iti nagan ni Jehova.’ Kas iti makapagin-awa a lana, makaliwliwa dagiti naibatay iti Biblia a balakadda iti asinoman a pudno nga agbabbabawi.Jeremias 8:22.

15 Anian nga ulidan ti ayat ti impakita ti Pastortayo, ni Jehova, idi winayawayaanna dagiti Judio manipud iti pannakaadipenda idiay Babilonia idi 537 K.K.P. ken idi winayawayaanna ti naespirituan nga Israel manipud iti “Babilonia a Dakkel” idi 1919 K.P.! (Apocalipsis 17:3-5; Galacia 6:16) Iti kasta, tinungpalna ti karina: “Siak pakanekto dagiti karnerok, ket siak pagiddaekto ida . . . Daydiay napukaw birokekto, ket daydiay naiwara isublikto, ket daydiay nadunor patapatakto ket daydiay masaksakit papigsaekto.”—Ezequiel 34:15, 16.

16 Ni Jehova pinakanna ti piguratibo a karnerona, sitatalged a pinagiddana ida, ken binirokna dagidiay mapukpukaw. Umasping iti dayta, dagiti Kristiano a pastor nasken a siguraduenda a natalged  ken umiso ti naespirituan a pannakataraon ti arban ti Dios. Biroken dagiti papanglakayen ti karnero a naiwawa manipud iti kongregasion. No kasano a ti Dios ‘patapatanna daydiay nadunor,’ dagiti manangaywan ‘patapatanda’ ti karnero a nasaktan gapu iti naisawang ti sabali a tao wenno gapu iti bukodna nga aramid. Ken no kasano a ti Dios ‘pinapigsana daydiay masakit,’ dagiti papanglakayen tulonganda daydiay masakit iti naespirituan, nalabit gapu iti bukodna nga aramid.

No Kasano a Makatulong Dagiti Pastor

17 Siraragsak nga annuroten dagiti papanglakayen daytoy a balakad: “Itultuloyyo ti mangipakita iti asi . . . , nga aramidenyo ti kasta buyogen ti buteng.” (Judas 23) Dadduma a Kristiano ti nakaaramid iti nadagsen a basol babaen ti pannakiramanda iti seksual nga imoralidad. Ngem no pudno nga agbabbabawida, manamnamada ti naasi ken naayat a panangtaming dagiti papanglakayen a sigagagar a tumulong kadakuada iti naespirituan. Kinuna ni Pablo maipapan kadagita a lallaki, a pakairamananna: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo.” (2 Corinto 1:24) Gapuna, dika koma pulos bumdeng a dumawat iti naespirituan a tulong.

18 No nakaaramidka iti nadagsen a basol, apay a mapagpiaram dagiti panglakayen? Gapu ta kangrunaanna, papastorda iti arban ti Dios. (1 Pedro 5:1-4) Awan ti naayat a pastor a mangkabil iti maysa a naamo, agim-immik a kordero a nangdangran iti bagina. No ngarud tamingen dagiti panglakayen ti maysa a kabsat a nakabasol, panunotenda koma no kasanoda a tamingen ti basol ken no kasano a mapabileg manen ti espiritualidad ti nakabasol, saan ket a no ania a pannusa ti mabalinda nga ipataw. (Santiago 5:13-20) Masapul a mangukom dagiti panglakayen buyogen ti kinalinteg ken ‘tratuenda a sidudungngo ti arban.’ (Aramid 20:29, 30; Isaias 32:1, 2) Kas iti amin a Kristiano, nasken a ‘watwaten dagiti panglakayen ti kinahustisia, ayatenda ti kinamanangngaasi, ken sieemma a makipagnada iti Dios.’ (Mikias 6:8) Napateg dagita a galad no mangaramidda kadagiti desision mainaig iti biag ken sagrado a panagserbi “dagiti karnero iti pagpaaraban [ni Jehova].”Salmo 100:3.

Kas kadagiti nagkauna a pastor, dagiti Kristiano a panglakayen ‘patapatanda’ dagiti nadunor a karnero ti Dios

19 Dinutokan ti nasantuan nga espiritu dagiti Kristiano a papastor isu nga ikagumaanda ti agpaidalan iti dayta. No ti “maysa a tao makaaramid iti aniaman a di umiso nga addang  sakbay a maammuanna dayta,” a nalabit dina napupuotan—dagiti lallaki a kualipikado iti naespirituan padasenda koma nga “aturen ti kasta a tao iti espiritu ti kinaalumamay.” (Galacia 6:1; Aramid 20:28) Kas iti nakonsiderar a doktor a siaannad a mangagas iti bullo tapno saan unay a naut-ot, ikagumaan dagiti panglakayen nga aturen ti panagpampanunot ti nakabasol buyogen ti kinaalumamay, ngem kaskasdi a sititibker a salimetmetanda dagiti pagalagadan ti Dios. (Colosas 3:12) Ti pangngeddeng dagiti panglakayen iyanninawna koma ti panangmatmat ti Dios yantangay naibatay iti Kasuratan ken nabuyogan iti kararag ti aniaman a maipaay nga asi.Mateo 18:18.

20 No agdindinamag ti basol wenno awan duadua a maipalgakto dayta, maiparbeng a maaramid ti maysa a pakaammo iti kongregasion tapno masalakniban ti reputasion ti kongregasion. Maaramid met ti maysa a pakaammo no masapul a mapakdaaran ti kongregasion. Bayat nga agpapaungar iti naespirituan ti maysa a naipaayan iti hudisial a pannubngar, mabalin nga isu ket mayarig iti maysa nga agpapaimbag iti pisikal, a temporario a manglimitar iti magapuananna. Iti sumagmamano a tiempo, nalabit a pagimbagan ti agbabbabawi a kabsat no isu ket umimdeng pay laeng imbes nga agkomento kadagiti gimong. Mabalin nga iyurnos dagiti panglakayen nga adda mangyadal kenkuana tapno mapabileg iti benneg a nagkapuyanna ket iti kasta, agbalin manen a “nasalun-at iti pammati.” (Tito 2:2) Maaramid amin dagitoy gapu iti ayat, saan ket a kas pannusa iti daydiay nakabasol.

21 Dagiti papanglakayen makaipaayda iti naespirituan a tulong iti nadumaduma a pamay-an. Alaentayo a pagarigan ti maysa a kabsat a nagparikut idi mainaig iti panaginum iti arak. Iti naminsan wenno namindua a gundaway, nasobraanna ti imminum bayat nga agmaymaysa iti pagtaenganna. Wenno adda maysa a nabayagen a nangisardeng iti panagsigariliona. Nalabit a bayat ti panagmaymaysana, nagsigarilio manen iti naminsan wenno namindua a gundaway gapu iti temporario a panagkapuy. Nupay nagkararag ken patienna nga isu ket pinakawanen ti Dios, masapul nga agpatulong latta iti panglakayen tapno saanna a mayugali ti basol a naaramidna. Maysa wenno dua a panglakayen ti mabalin a mangtaming iti dayta ngem masapul a pakaammuanda ti mamangulo a manangaywan, yantangay nalabit nga adda dadduma a banag a nairaman.

Itultuloyyo nga Awaten ti Disiplina ti Dios

22 Tapno magun-od ti anamong ti Dios, masapul nga ipangag ti tunggal Kristiano ti disiplina ni Jehova. (1 Timoteo 5:20) Gapuna, nasken nga iyaplikarmo ti aniaman a panangilinteg a mabasam iti Kasuratan ken kadagiti Nakristianuan a publikasion wenno mangngegmo a balakad a maidatag kadagiti gimong, asamblea, ken kombension ti ili ni Jehova. Agtalinaedka a nasiput no kasanom a maaramid ti pagayatan ni Jehova. Iti kasta, tulongannaka ti disiplina ti Dios tapno maaddaanka iti naespirituan a baluartemaysa a nabileg a pangdepensam maibusor iti basol.

23 No awatem ti disiplina ti Dios, makapagtalinaedka iti ayatna. Pudno, dadduma ti nailaksid iti kongregasion Kristiano, ngem mabalin a di mapasamak dayta kenka no “saluadam ta pusom” ken ‘magnaka a kas masirib a tao.’ (Proverbio 4:23; Efeso 5:15) Ngem no maysaka itan a nailaksid, apay a dimo pagreggetan ti maisubli? Kayat ti Dios nga amin a nagdedikar kenkuana agdayawda a simamatalek ken buyogen ti “rag-o ti puso.” (Deuteronomio 28:47) Maaramidmo dayta iti agnanayon no kanayonmo nga awaten ti disiplina ni Jehova.Salmo 100:2.