Mapan iti linaonna

Mapan iti listaan dagiti linaonna

 MAADAL NGA ARTIKULO 40

Agtalinaed nga Okupado iti Maudi a Paset ti “Maudi nga Al-aldaw”

Agtalinaed nga Okupado iti Maudi a Paset ti “Maudi nga Al-aldaw”

“Agbalinkayo a natibker ken di magaraw, a kanayon nga adu ti aramidenyo iti trabaho ti Apo.”​—1 COR. 15:58.

KANTA 58 Biroken Dagiti Managayat iti Kappia

ITI DAYTOY A PANAGADAL *

1. Apay a kombinsidotayo nga agbibiagtayon iti “maudi nga al-aldaw”?

NAYANAKKA kadi kalpasan ti 1914? No kasta, sipud pay kinaubingmo, agbibiagkan iti “maudi nga al-aldaw” ti agdama a sistema ti bambanag. (2 Tim. 3:1) Madamdamagtayo a matungtungpalen dagiti impadto ni Jesus maipapan iti panawentayo. Karaman iti dayta ti gubat, bisin, ginggined, makapapatay a sakit, kumarkaro a kinadakes, ken pannakaidadanes ti ili ni Jehova. (Mat. 24:3, 7-9, 12; Luc. 21:10-12) Makitkitatayo met a ti kababalin dagiti tattao ket kas iti impakpakauna ni apostol Pablo. (Kitaen ti kahon a “ Dagiti Tattao Ita.”) Kas agdaydayaw ken Jehova, kombinsidotayo nga agbibiagtayon iti “maudi a paset dagiti aldaw.”​—Mik. 4:1.

2. Ania dagiti saludsod a masapul a masungbatan?

2 Gapu ta adun a tawen ti naglabas sipud 1914, sigurado ngarud nga agbibiagtayon iti maudi a paset ti “maudi nga al-aldaw.” Nakaas-asidegen ti panungpalan, isu a masapul a maammuantayo ti sungbat dagitoy a napateg a saludsod: Anianto dagiti mapasamak iti panagpatingga ti “maudi nga al-aldaw”? Ken ania ti namnamaen ni Jehova kadatayo bayat nga ur-urayentayo dagidiay a pasamak?

ANIANTO TI MAPASAMAK ITI PANAGPATINGGA TI “MAUDI NGA AL-ALDAW”?

3. Sigun iti padto iti 1 Tesalonica 5:1-3, anianto ti iproklama dagiti nasion?

3 Basaen ti 1 Tesalonica 5:1-3. Dinakamat ni Pablo ti “aldaw ni Jehova.” Iti daytoy a teksto, tumukoy dayta iti tiempo a mangrugi inton maraut ti “Babilonia a Dakkel,” ti sangalubongan nga imperio ti ulbod a relihion, ken agpatingga inton Armagedon.  (Apoc. 16:14, 16; 17:5) Sakbay unay a mangrugi dayta nga “aldaw,” iproklamanto dagiti nasion ti “Talna ken talged!” No dadduma, us-usaren dagiti lider ti lubong ti sasao nga umasping iti dayta no ibagada a sumaysayaat ti relasion dagiti nasion. * Ngem naidumanto ti pannakaiproklama ti “talna ken talged” a dineskribir ti Biblia. Apay? Ngamin, inton mapasamak dayta, mabalin a panunotento dagiti tattao a napagbalinen dagitoy a lider a nataltalged ti lubong. Ngem ti agpayso, mangruginton ti “dakkel a rigat” ket dumtengen ti “kellaat a pannakadadaelda.”​—Mat. 24:21.

Dikay paallilaw iti saan nga agpayso a “talna ken talged” nga ibagbaga dagiti nasion (Kitaen ti parapo 3-6) *

4. (a) Ania pay ti ditay ammo maipapan iti pannakaideklara ti “talna ken talged”? (b) Ania ti ammotayon maipapan iti dayta?

4 Ammotayo ti dadduma a banag maipapan iti pannakaideklara ti “talna ken talged.” Ngem adda met dagiti ditay ammo. Saantayo nga ammo no anianto ti mangtignay kadagiti agtuturay a mangideklara iti dayta wenno no kasanonto ti panangideklarada. Ditay met ammo no maminsan laeng a deklarasion dayta wenno no agsasarunonto a deklarasion. Aniaman ti mapasamak, daytoy ti ammotayo: Saan a kabaelan dagiti lider ti lubong nga ipaay ti sangalubongan a talna, isu a ditay maallilaw iti ibagada. Imbes ketdi, dayta a deklarasion ti ibagbaga ti Biblia a padaanantayo​—ti pagilasinan a mangrugin ti “aldaw ni Jehova”!

5. Kasano a makatulong ti 1 Tesalonica 5:4-6 tapno makapagsaganatayo para iti “aldaw ni Jehova”?

5 Basaen ti 1 Tesalonica 5:4-6. Ti balakad ni Pablo ibagana no kasanotayo a makapagsagana para iti “aldaw ni Jehova.” “Saantay koma a maturog a kas iti ar-aramiden ti dadduma.” Masapul nga “agtalinaedtayo a siririing” ken alerto. Kas pagarigan, masapul nga alertotayo tapno ditay maikompromiso ti neutralidadtayo babaen ti pannakiraman kadagiti isyu ti politika. No makiramantayo, agbalintayo a ‘paset ti lubong.’ (Juan 15:19) Ammotayo a ti Pagarian ti Dios ti kakaisuna a namnama para iti sangalubongan a talna.

6. Ania ti kayattayo a pangtulongan kadagiti tattao, ken apay?

6 Kayattayo a saan laeng a datayo ti agtalinaed a siririing. Kayattayo met a tulongan ti sabsabali tapno mariingda iti impadto ti Biblia a mapasamak iti lubong. Laglagipentayo a no mangrugin ti dakkel a rigat, naladawen ti amin no iti dayta laeng a tiempo nga irugi dagiti tattao ti agserbi ken Jehova. Dayta ti rason a masapul a mangasabatayo itan! *

AGTALINAED NGA OKUPADO ITI PANANGASABA

Iti panangasabatayo, ipakpakitatayo a ti laeng Pagarian ti Dios ti kakaisuna a makaipaay iti pudpudno a talna ken talged (Kitaen ti parapo 7-9)

7. Ania ti namnamaen ni Jehova nga aramidentayo itan?

7 Iti ababa a nabatbati a tiempo sakbay a mangrugi ti “aldaw ni Jehova,” namnamaenna nga agtalinaedtayo nga okupado iti trabaho a panangasaba. Masapul a siguraduentayo a “kanayon nga adu ti aramiden[tayo] iti trabaho ti Apo.” (1 Cor. 15:58) Impakpakauna  ni Jesus ti masapul nga aramidentayo. Idi imbagana ti amin a napateg a bambanag a mapasamak bayat ti maudi nga al-aldaw, innayonna: “Masapul met a maikaskasaba nga umuna ti naimbag a damag iti amin a nasion.” (Mar. 13:4, 8, 10; Mat. 24:14) Panunotem daytoy: Kada mapanka mangasaba, makipaspasetka iti pannakatungpal dayta a padto ti Biblia!

8. Kasano nga agtultuloy a rumangrang-ay ti trabaho a panangikasaba iti Pagarian?

8 Ania ti makunatayo iti panagrang-ay ti trabaho a panangikasaba iti Pagarian? Kada tawen, umad-adu ti makangkangngeg iti naimbag a damag maipapan iti Pagarian. Kas pagarigan, panunotem ti immaduan dagiti agibumbunannag iti intero a lubong bayat ti maudi nga al-aldaw. Idi 1914, adda 5,155 nga agibumbunannag iti 43 a pagilian. Ita, addan agarup 8.5 a milion nga agibumbunannag iti 240 a pagilian! Ngem saan pay a nalpas ti trabahotayo. Masapul nga itultuloytayo nga ibaga a ti Pagarian ti Dios ti kakaisuna a solusion ti amin a problema ti sangatauan.​—Sal. 145:11-13.

9. Apay a masapul nga itultuloytayo nga ikasaba ti mensahe maipapan iti Pagarian?

9 Agtultuloy ti trabahotayo a panangikasaba iti Pagarian agingga nga ibaga ni Jehova a nalpasen dayta. Kasano pay kaadu ti tiempo a nabatbati tapno maam-ammo dagiti tattao ni Jehova ken ni Jesu-Kristo? (Juan 17:3) Ditay ammo. Ngem ammotayo nga agingga a di pay nangrugi ti dakkel a rigat, asinoman nga “addaan iti umiso a kababalin nga umawat iti agnanayon a biag” ket mabalin pay a mangipangag ken agserbi ken Jehova. (Ara. 13:48) Kasanotayo a matulongan dagitoy a tattao sakbay a maladaw ti amin?

10. Ania a tulong ti ipapaay ni Jehova tapno maisurotayo ti kinapudno kadagiti tattao?

10 Ipapaay ni Jehova babaen ti organisasionna ti amin a kasapulantayo tapno maisurotayo ti kinapudno kadagiti tattao. Kas pagarigan, masansanaytayo kada lawas iti gimong iti tengnga ti lawas. Tultulongannatayo daytoy a gimong tapno ammotayo ti ibagatayo iti damo a pannakisarita ken panagsarungkar. Isursuronatayo pay no kasano ti mangyadal iti Biblia. Impaay met ti organisasion ni Jehova ti Toolbox iti Panangisuro. Makatulong daytoy tapno . . .

  • mairugi ti saritaan,

  • matukay ti interes dagiti tattao,

  •   matignay ida nga agsursuro iti ad-adu pay,

  • maisuro ti kinapudno kadagiti mayad-adalan iti Biblia, ken

  • mayam-ammo ti website-tayo kadagiti interesado wenno maimbitaran ida a bumisita iti Kingdom Hall-tayo.

Siempre, saan nga umanay nga adda kadatayo dagitoy a material. Masapul nga usarentayo dagita. * Kas pagarigan, no imbatiam iti tract wenno magasin ti maysa nga interesado kalpasan ti nasayaat a panagsaritayo, mabalinna a basaen dayta agingga a masarungkaram manen. Responsabilidad ti tunggal maysa kadatayo ti agtalinaed nga okupado iti panangikasaba iti Pagarian iti kada bulan.

11. Apay a naaramid ti Online Bible Study Lessons?

11 Ti sabali pay a pagarigan no kasano a tultulongan ni Jehova dagiti tattao a mangammo iti kinapudno ket babaen ti Online Bible Study Lessons iti jw.org®. Apay a naaramid daytoy? Kada bulan, nakaad-adu a tattao iti intero a lubong ti agse-search iti Internet maipapan iti Biblia. Makatulong kadakuada dagiti online lesson iti website-tayo tapno maammuanda ti kinapudno iti Sao ti Dios. Adda dagiti makasaritatayo a mabalin nga agduadua nga agpayadal iti Biblia. No kasta, mabalintayo nga ipakita daytoy a feature ti website-tayo wenno i-send kadakuada ti link dagiti online lesson. *

12. Ania ti masursuro ti maysa a tao iti Online Bible Study Lessons?

12 Ilawlawag ti Online Bible Study Lessons dagitoy a topiko: “The Bible and Its Author,” “The Bible’s Main Characters,” ken “The Bible’s Message of Hope.” Kadagita a topiko, dagitoy ti masursuro:

  • No kasano a makatulong ti Biblia iti maysa a tao

  • No asino ni Jehova, ni Jesus, ken dagiti anghel

  • No apay a pinarsua ti Dios dagiti tattao

  • No apay nga adda panagsagaba ken kinadakes

Ilawlawag met dagiti leksion no anianto ti aramiden ni Jehova tapno . . .

  • agpatingga ti panagsagaba ken ipapatay,

  • agungar dagiti natay, ken

  • maikkat dagiti saan a naballigi a gobierno ti tao sa masuktan iti Pagarian ti Dios.

13. Suktan kadi dagiti online lesson ti urnos a panangyadal iti Biblia? Ilawlawag.

13 Saan a suktan dagiti online lesson ti urnos a panangyadal iti Biblia. Inikkannatayo ni Jesus iti pribilehio a tumulong kadagiti tattao nga agbalin nga adalan. Mangnamnamatayo nga adalen dagiti interesado dagitoy nga online lesson, maapresiarda ti masursuroda, ken kayatda ti agsursuro iti ad-adu pay. No kasta, nalabit kayatdanton ti agpayadal iti Biblia. Iti ngudo ti tunggal online lesson, maawis ti agbasbasa nga agkiddaw iti mangisuro kenkuana a mangadal iti Biblia. Iti website-tayo, kada aldaw a makaaw-awattayo iti nasurok a 230 a kiddaw iti panagadal iti Biblia iti intero a lubong! Nagpateg ti kasta a personal a panangisuro!

IKAGUMAAN A TULONGAN DAGITI TATTAO NGA AGBALIN NGA ADALAN

14. Sigun iti bilin ni Jesus iti Mateo 28:19, 20, ania ti ikagumaantayo nga aramiden, ken apay?

14 Basaen ti Mateo 28:19, 20. Bayat nga iyad-adalantayo dagiti tattao iti Biblia, ikagumaantayo koma a ‘pagbalinen ida nga adalan, ken isuro ida a mangtungpal iti amin nga imbilin ni Jesus.’ Masapul a tulongantayo dagiti tattao a mangtarus a nagpateg a pilienda ti agserbi ken Jehova ken suportaranda ti Pagarianna. Kaipapanan daytoy nga ikagumaantayo a tignayen dagiti tattao a mangyaplikar  kadagiti masursuroda, mangidedikar iti biagda ken Jehova, ken agpabautisar. No aramidenda dagitoy, maisalakanda inton aldaw ni Jehova.​—1 Ped. 3:21.

15. Ania ti ditay pangsayangan iti tiempotayo, ken apay?

15 Kas nadakamaten, ababan ti tiempo a nabatbati sakbay nga agpatingga daytoy a sistema ti bambanag. Isu a ditay sayangen ti tiempotayo a mangyadal iti Biblia kadagiti tattao nga awan ti intensionda nga agbalin nga adalan ni Kristo. (1 Cor. 9:26) Naganat ti trabahotayo! Adu pay a tattao ti masapul a makangngeg iti mensahe ti Pagarian sakbay a maladaw ti amin.

ADAYWAN TI ANIAMAN A KONEKTADO ITI ULBOD A RELIHION

16. Sigun iti Apocalipsis 18:2, 4, 5, 8, ania ti masapul nga aramidentayo amin? (Kitaen met ti footnote.)

16 Basaen ti Apocalipsis 18:2, 4, 5, 8. Ipakita dagitoy a bersikulo ti sabali pay a namnamaen ni Jehova kadagiti agdaydayaw kenkuana. Masapul a siguraduen ti amin a pudno a Kristiano nga awan ti aniaman a koneksionda iti Babilonia a Dakkel. Sakbay a naammuan ti maysa a mayad-adalan iti Biblia ti kinapudno, mabalin a miembro isuna ti maysa nga ulbod a relihion. Mabalin a nakimismisa wenno nakigimgimong iti dayta a relihion ken nakiramraman kadagiti aktibidadna. Wenno mabalin a nagdondonar iti kuarta iti kasta nga organisasion. Sakbay a maaprobaran ti mayad-adalan iti Biblia kas di bautisado nga agibumbunannag, masapul a pugsatenna ti amin a koneksionna iti ulbod a relihion. Masapul nga agsurat iti dati a relihionna wenno iti aniaman nga organisasion a paset ti Babilonia a Dakkel a nakimiembruanna tapno ipakaammona nga agikkaten iti dayta. *

17. Ania a klase ti trabaho ti masapul a liklikan dagiti Kristiano, ken apay?

17 Siguraduen koma ti maysa a pudno a Kristiano a ti sekular a trabahona ket saan a konektado iti Babilonia a Dakkel. (2 Cor. 6:14-17) Kas pagarigan, saan a rumbeng nga agbalin nga empleado iti maysa a simbaan. Kasta met, no empleado iti maysa a kompania, saanna nga awaten ti dakkel a trabaho iti maysa a pasilidad a mangitantandudo iti ulbod a panagdaydayaw. Ket no adda bukodna a negosio, saan a mangala wenno makikontrata iti maysa a trabaho nga adda aniaman a koneksionna iti Babilonia a Dakkel. Apay a kasta ti determinasiontayo? Gapu ta ditay kayat ti makiraman kadagiti aramid wenno basol dagiti  relihion a narugit iti imatang ti Dios.​—Isa. 52:11. *

18. Kasano nga impakita ti maysa a kabsat a determinado a mangsurot kadagiti prinsipio ti Biblia?

18 Adun a tawen ti napalabas, maysa a panglakayen nga adda bassit a negosiona ti inawis ti maysa a kontraktor nga agtrabaho iti bassit a proyekto iti maysa a simbaan iti ili ti kabsat. Ammo ti kontraktor a saan a kayat ti kabsat ti agtrabaho kadagiti simbaan, ngem awan sabali a maalana nga agtrabaho iti dayta a gundaway. Nupay kasta, determinado ti kabsat a mangsurot kadagiti prinsipio ti Biblia ket dina inawat ti trabaho. Iti sumaruno a lawas, naipakita iti diario iti lugarda ti piktiur ti karpintero a mangikabkabit iti krus iti simbaan. No inawat koma ti kabsat ti trabaho, piktiurna koma ti adda iti diario. Sigurado a nadadael koma ti reputasionna kadagiti padana a Kristiano! Panunotenyo met no ania koma ti narikna ni Jehova iti dayta.

ANIA DAGITI NASURSUROTAYO?

19-20. (a) Ania dagiti nasursurotayon? (b) Ania pay dagiti ammuentayo?

19 Sigun iti padto ti Biblia, ti sumaruno a dakkel a pasamak iti lubong a dandanin mapasamak ket ti panangiproklama dagiti nasion iti “talna ken talged.” Gapu iti insuro ni Jehova kadatayo, ammotayo a saanto a magun-od dagiti nasion ti pudpudno ken manayon a talna. Ania ti masapul nga aramidentayo sakbay a mapasamak dayta ken ti sumaruno a kellaat a pannakadadael? Namnamaen ni Jehova nga agtalinaedtayo nga okupado iti panangikasaba iti mensahe ti Pagarian ken tulongantayo ti ad-adu pay nga agbalin nga adalan. Kabayatanna, masapul nga agtalinaedtayo a naisina iti amin nga ulbod a relihion. Karaman iti dayta ti panagikkattayo iti aniaman nga organisasion a nakimiembruantayo ken panangliklik iti trabaho a konektado iti Babilonia a Dakkel.

20 Adda pay dagiti sumaruno a pasamak bayat ti maudi a paset ti “maudi nga al-aldaw.” Adda met dagiti sabali pay a namnamaen ni Jehova nga aramidentayo. Ania dagitoy, ken kasanotayo a makapagsagana para iti amin a dandanin mapasamak? Kitaentayo dagita iti sumaruno nga artikulo.

KANTA 71 Armadanatayo ni Jehova!

^ par. 5 Ekspektarentayo nga asidegen nga ibaga dagiti nasion a nagun-oddan ti “talna ken talged”! Daytanto ti pagilasinan a mangrugin ti dakkel a rigat. Ania ti namnamaen ni Jehova nga aramidentayo agingga a di pay naiproklama dayta? Tulongannatayo daytoy nga artikulo a mangsungbat iti dayta.

^ par. 3 Kas pagarigan, ibagbaga ti website ti United Nations a ‘namantenerna ti sangalubongan a talna ken talged.’

^ par. 10 Para iti detalye no kasano nga usaren ti Toolbox iti Panangisuro, kitaen ti artikulo nga “Isuro ti Kinapudno” iti Oktubre 2018 a ruar Ti Pagwanawanan.

^ par. 11 Ti Online Bible Study Lessons ket available pay laeng iti English ken Portuguese. Sumarsarunonto ti ad-adu pay a lengguahe.

^ par. 16 Masapul met a liklikantayo dagiti organisasion a pang-agtutubo a konektado iti ulbod a relihion wenno dagiti pasilidad nga us-usarenda para kadagiti aktibidadda. Karaman iti dayta ti pannakimiembro iti YMCA (Young Men’s Christian Association) ken iti YWCA (Young Women’s Christian Association). Uray no ibagbaga dagiti miembro ti YMCA/YWCA iti lugaryo a saan a konektado iti relihion dagiti aktibidadda, kinaagpaysuanna, supsuportaran dagitoy nga organisasion dagiti narelihiosuan nga ideya ken panggep.

^ par. 17 Para iti detalyado a pannakailawlawag ti Nainkasuratan a panangmatmat iti trabaho a konektado iti ulbod a relihion, kitaen ti “Dagiti Saludsod Manipud Kadagiti Agbasbasa” iti Abril 15, 1999 a ruar Ti Pagwanawanan.

^ par. 83 DAGITI LADAWAN: Interesado dagiti kostumer iti maysa a coffee shop iti damag iti TV maipapan iti pannakaiproklama ti “talna ken talged.” Ngem saan a naallilaw iti dayta ti agassawa a Saksi nga agmermerienda a naggapu iti ministerio.