Mapan iti linaonna

Mapan iti listaan dagiti linaonna

Isuro ti Kinapudno

Isuro ti Kinapudno

“O Jehova, . . . ti kababagas ti saom ket kinapudno.”​—SAL. 119:159, 160.

KANTA: 29, 53

1, 2. (a) Ania a trabaho ti impamaysa ni Jesus iti biagna, ken apay? (b) Ania ti aramidentayo tapno agballigitayo kas ‘katrabahuan ti Dios’?

KARPINTERO ken ministro ni Jesu-Kristo. (Mar. 6:3; Roma 15:8) Agpada a nakalalaing kadagita. Kas karpintero, nasursurona no kasano nga usaren dagiti remienta nga agaramid kadagiti muebles ken dadduma pay a banag. Kas mannursuro iti naimbag a damag, inusarna a naimbag ti nauneg a pannakaammona iti Kasuratan a tumulong kadagiti ordinario a tattao a mangtarus iti kinapudno iti Sao ti Dios. (Mat. 7:28; Luc. 24:32, 45) Idi 30 ti tawen ni Jesus, binaybay-anna dagiti remientana kas karpintero ta ammona a mas importante ti panagbalinna a ministro. Imbagana a ti panangipakaammo iti naimbag a damag ti Pagarian ti Dios ti maysa a rason no apay nga imbaon ti Dios ditoy daga. (Mat. 20:28; Luc. 3:23; 4:43) Impamaysa ni Jesus ti biagna iti ministerio, ken kayatna a kumadua dagiti sabsabali iti dayta a trabaho.​—Mat. 9:35-38.

2 Mabalin a saantayo a karpintero, ngem ministrotayo ti naimbag a damag. Nagpateg dayta a trabaho ta karaman ti Dios. Naawagantayo a ‘katrabahuan ti Dios.’ (1 Cor. 3:9; 2 Cor. 6:4) Bigbigentayo a “ti kababagas ti sao [ni Jehova] ket kinapudno.” (Sal. 119:159, 160) Isu a kayattayo a siguraduen nga ‘ar-aramatentayo a siuumiso ti sao ti kinapudno’ iti ministeriotayo. (Basaen ti 2 Timoteo 2:15.) Dayta ti rason no apay nga itultuloytayo nga asaen ti abilidadtayo a mangusar iti Biblia, ti kangrunaan a remienta  wenno alikamentayo a mangisuro iti kinapudno maipapan ken ni Jehova, ni Jesus, ken ti Pagarian. Tapno agballigitayo iti ministerio, nangipaay ti organisasion ni Jehova iti dadduma pay nga alikamen a masapul a kabesaduentayo. Dagitoy ti adda iti Toolbox iti Panangisuro.

3. Ania koma ti pagpokusantayo iti nabatbati a tiempo ti panangasabatayo, ken kasano a makatulong ti Aramid 13:48?

3 Baka pampanunotem no apay a naawagan dayta iti Toolbox iti Panangisuro, saan a Toolbox iti Panangasaba. Ti kayat a sawen ti “panangasaba” ket panangipakaammo iti mensahe; ngem ti “panangisuro” ket panangimula iti mensahe iti panunot ken puso ti maysa a tao, tapno agtignay maitunos iti naadalna. Bayat ti nabatbati a tiempo ti panangasabatayo, masapul nga agpokustayo iti panangirugi iti panangyadal iti Biblia ken iti panangisuro iti kinapudno iti tattao. Kaipapananna a sipapasnek a birokentayo amin a “siuumiso nga agannayas iti agnanayon a biag” ken tulongantayo ida nga agbalin a manamati.​—Basaen ti Aramid 13:44-48.

4. Kasano a maammuantayo no asino dagidiay “siuumiso nga agannayas iti agnanayon a biag,” ken kasanotayo a mabirokan ida?

4 Kasano a maammuantayo no asino dagidiay “siuumiso nga agannayas iti agnanayon a biag”? Kas idi umuna a siglo, panangasaba laeng ti pamay-an tapno mabirokan dagita a tattao. Isu a masapul nga aramidentayo ti imbilin ni Jesus: “Iti aniaman a siudad wenno purok a serkanyo, birokenyo no siasino iti dayta ti maikari.” (Mat. 10:11) Ditay namnamaen a dumngeg iti naimbag a damag dagiti managinsisingpet, natangsit, wenno dagidiay di interesado iti naespirituan. Birbirokentayo dagiti napudno, napakumbaba, ken mabisin iti kinapudno. Mabalin nga ipadatayo dayta a panagbirok iti inaramid ni Jesus kas karpintero nga agbirok iti maitutop a kayo a para iti muebles, ridaw, sangol, wenno dadduma pay a banag. No nabirokannan ti maitutop a kayo, alaenna ti kahon dagiti remienta (toolbox), usarenna ti abilidadna, sa aramidenna ti banag a pampanunotenna. Kasta met ti aramidentayo iti panangikagumaantayo a mangtulong kadagiti nasingpet a tattao nga agbalin nga adalan.​—Mat. 28:19, 20.

5. Ania ti masapul a maammuantayo kadagiti alikamen iti Toolbox iti Panangisuro? Iyilustrarmo. (Kitaen ti ladawan iti rugi ti artikulo.)

5 Nagduduma ti usar ti tunggal remienta iti toolbox. Alaentayo a pagarigan dagiti remienta nga inusar ni Jesus kas karpintero. * Kasapulanna dagiti remienta a pagrukod, pagmarka, pagputed, pagabut, ken pagporma iti kayo. Kasapulanna met ti nibel, tinnag, ken pagsangal kadagiti pedaso ti kayo. Kasta met, tunggal alikamen iti Toolbox iti Panangisuro ket adda espesipiko nga usarna. Isu a kitaentayo ti toolbox-tayo ken ammuentayo no kasano nga usaren dagitoy a nagpapateg nga alikamen a naited kadatayo.

DAGITI ALIKAMEN A MANGYAM-AMMO KADATAYO

6, 7. (a) Kasanom nga inusar dagiti contact card? (b) Ania ti dua a panggep dagiti imbitasiontayo iti gimong?

6 Contact Card. Babassit dagitoy ngem epektibo nga alikamen a pangyam-ammotayo iti bagitayo ken pangiturongtayo kadagiti tattao iti website-tayo, a pakaammuanda iti ad-adu pay maipapan kadatayo ken mabalinda ti agkiddaw a mayadalan iti Biblia. Nasurok nga 400,000 a panagkiddaw iti panagadal iti Biblia ti naawaten iti jw.org, ket ginasut pay a kiddaw ti maaw-awat iti inaldaw! Mabalinmo ti mangitugot kadagiti contact card tapno makapangasabaka bayat dagiti inaldaw nga aktibidadmo.

7 Imbitasion. Adda dua a panggep dagiti  imbitasiontayo iti gimong. Kunana: “Maawiska a makipagadal iti Biblia kadagiti Saksi ni Jehova.” Sa mangipaay iti pagpilian no kayatna a maaramid dayta “kadagiti miting publiko” “wenno adda mangyadal” kenkuana. Isu a saannatayo laeng nga iyam-ammo daytoy nga alikamen no di ket awisenna pay dagiti sabsabali a “sipapanunot iti naespirituan a kasapulanda” a makipagadal iti Biblia kadatayo. (Mat. 5:3) Siempre, maawis latta a makigimong dagiti tattao, makipagadalda man iti Biblia wenno saan. No makigimongda, makita ken mangngegda no ania ti iyaw-awistayo a pudpudno a panagadal iti Biblia.

8. Apay a napateg nga umatender dagiti tattao kadagiti gimongtayo uray maminsan laeng? Mangted iti pagarigan.

8 Nakapatpateg nga itultuloytayo nga awisen dagiti tattao a tumabuno iti gimongtayo uray maminsan laeng. Apay? Makitada ti nagdakkel a nagdumaan ti naespirituan a paraiso iti gimongtayo ken ti nakakaasi a naespirituan a kasasaad iti Babilonia a Dakkel. (Isa. 65:13) Napaliiw daytoy ti agassawa a da Ray ken Linda idiay Estados Unidos sumagmamano a tawenen ti napalabas. Nagdesisionda a masapul a mapanda makimisa. Mamatida iti Dios ken kayatda a penken ti naespirituan a kasapulanda, isu a sinaggaysada a napanan ti adu a simbaan ken relihion iti lugarda. Idi damo, pinagsaritaanda a makimiembroda laeng iti maysa a relihion iti dua a kondision. Umuna, masapul nga adda masursuroda no mapanda makimisa, ken maikadua, masapul a makitada iti kababalin dagiti miembro dayta a relihion nga ireprepresentarda ti Dios. Sumagmamano a tawen kalpasanna, nakapandan iti amin a simbaan iti lugarda, ngem nadismayada. Awan a pulos ti nasursuroda, ken saan a naemma ti panaglanglanga dagiti makimismisa. Kalpasan a pimmanawda iti maudi a simbaan iti listaanda, napanen ni Linda iti trabahona ken agawiden ni Ray. Ngem adda Kingdom Hall a nakita ni Ray ket napanunotna, ‘Ania ngata no sumrekak ket kitaek ti ar-aramidenda?’ Siempre, dayta pay laeng ti kasayaatan a kapadasanna! Amin nga adda iti Kingdom Hall ket mannakigayyem ken naemma ti panagbadbadoda. Nagtugaw iti sanguanan a maay-ayatan iti maad-adalna! Kapada daytoy ti kuna ni apostol Pablo maipapan iti maysa a damona ti makigimong a mangibaga: “Ti Dios pudno nga adda iti tengngayo.” (1 Cor. 14:23-25) Sipud idin, tumabtabunon ni Ray kada Domingo. Kalpasanna, umat-atenderen kadagiti gimong iti tengnga ti lawas. Nakigimong met ni Linda, ken uray nasuroken a 70 ti tawenda, nakipagadalda iti Biblia sa nagpabautisarda.

DAGITI ALIKAMEN A PANGIRUGI ITI SARITAAN

9, 10. (a) Apay a nalaka nga usaren dagiti tract? (b) Ilawlawagmo no kasano nga usaren ti tract nga Ania ti Pagarian ti Dios?

9 Tract. Addaantayo iti walo a nalaka nga usaren a tract nga epektibo a pangirugi iti saritaan. Sipud idi nairuar dagitoy a tract idi 2013, aglima a bilionen ti nayimprenta! Ti pagsayaatan dagitoy a tract ket no nasursuromon nga usaren ti maysa, kayamon nga usaren ti amin ta agpapada ti pormatda. Kasanom nga usaren ti tract a makisarita?

10 Mabalin a kayatmo nga usaren ti tract nga Ania ti Pagarian ti Dios? Ipakitam ti saludsod iti sango sa damagem: “Napanunotmo kadin no ania ti Pagarian ti Dios? Para kenka, dayta kadi ket . . . ?” Sa pagpiliem kadagiti tallo a sungbat. Saanmo nga ibagbaga no husto wenno saan ti sungbatna. Ukradem ti tract iti “Ti Kuna ti Biblia” ken basaem dagiti nadakamat a teksto, ti Daniel 2:44 ken Isaias 9:6. No posible, ituloymo ti saritaan. Kamaudiananna, ipakitam ti saludsod iti likudan ti tract iti subtitulo a “Panunotem”: “Anianto ti kasasaad ti biag iti panagturay ti Pagarian ti Dios?” Daytanto ti sumaruno a pagsaritaanyo. No  makasaritam manen, mabalinmo nga usaren ti leksion 7 ti broshur a Naimbag a Damag Manipud iti Dios, maysa nga alikamen a pangirugi iti panagadal iti Biblia.

DAGITI ALIKAMEN A MANGTUKAY ITI INTERES

11. Ania ti nakairantaan dagiti magasintayo, ngem ania ti masapul nga ammuentayo?

11 Magasin. Ti Pagwanawanan ken Agriingkayo! ti kasaknapan ti pannakayimprenta ken pannakaipatarusna a magasin iti intero a lubong! Gapu ta pang-internasional dagita, nadisenio ti akkubna tapno aginteres dagiti tattao sadinoman ti ayanda. Usarentayo koma dagita nga alikamen a mangtukay iti interes ti tao no ania a talaga ti kapatgan iti biag ita. Tapno maipaimatayo dagita a magasin kadagiti interesado, masapul nga ammuentayo no asino ti nakairantaan ti tunggal magasin.

12. (a) Asino ti nakairantaan ti Agriingkayo!, ken ania ti panggepna? (b) Ania ti nabiit pay a nasayaat a kapadasam iti daytoy nga alikamen?

12 Nadisenio ti Agriingkayo! para kadagiti bassit wenno awan ti ammoda iti Biblia. Mabalin nga awan ti ammoda maipapan iti Nakristianuan a sursuro, mabalin met a dida agtalek iti relihion, wenno dida ammo nga adda maitulong kadakuada ti Biblia. Ti kangrunaan a panggep ti Agriingkayo! ket tapno makombinsir dagiti agbasbasa nga adda Dios. (Roma 1:20; Heb. 11:6) Tulonganna met ti agbasbasa a mamati a ti Biblia ket talaga a “sao ti Dios.” (1 Tes. 2:13) Ti tallo a topiko iti akkub para iti 2018 ket: “Ti Dalan ti Kinaragsak,” “12 a Sekreto ti Naballigi a Pamilia,” ken “Tulong Kadagiti Agladladingit.”

13. (a) Asino ti nakairantaan ti publiko nga edision Ti Pagwanawanan? (b) Ania ti nabiit pay a nasayaat a kapadasam iti daytoy nga alikamen?

13 Ti Pagwanawanan a publiko nga edision ket nakapokus iti naespirituan a kasapulan dagidiay addaan iti panagraem iti Dios ken iti Saona. Uray no adda bassit ammoda iti Biblia, saan nga umiso ti pannakaawatda kadagiti sursuro a linaonna. (Roma 10:2; 1 Tim. 2:3, 4) Sungbatan ti tallo a topiko iti akkub para iti 2018 dagiti saludsod a: “Makatulong Pay Kadi ti Biblia Ita?,” “Ania ti Mapasamak iti Masanguanan?,” ken “Maseknan Kadi ti Dios Kenka?

DAGITI ALIKAMEN A MANGTIGNAY ITI RIKNA

14. (a) Ania ti panggep ti uppat a video iti Toolbox iti Panangisuro? (b) Ania ti nasayaat a kapadasam iti panangipabuyam kadagitoy a video?

14 Video. Idi panawen ni Jesus, agus-usar dagiti karpintero iti manomano a remienta. Ngem ita, agus-usaren dagiti karpintero iti dekoriente a remienta—ragadi, kulukol, liha, paglansa, ken dadduma pay. Kas kanayonan dagiti nayimprenta a publikasion, addaantayon iti agkakapintas a video a maipabuya—uppat kadagitoy ti adda iti toolbox-tayo: Apay nga Adalem ti Biblia?, Kasano ti Panagadal iti Biblia?, Ania ti Maar-aramid iti Kingdom Hall?, ken Siasino Dagiti Saksi ni Jehova? Dagiti video a nakurang a dua a minuto ket nasayaat nga usaren iti damo a pannakisarita. Dagiti at-atiddog a video ti mausar iti panagsarungkar ken kadagidiay nawaywaya a makisarita. Dagitoy a nagsayaat nga alikamen matignayda dagiti tattao nga agpayadal iti Biblia ken umatender kadagiti gimongtayo.

15. Mangted iti pagarigan no ania ti epektona kadagiti tattao ti panangipabuya kadagiti video iti bukodda a lengguahe.

15 Kas pagarigan, idi nakasarita ti sister ti maysa a babai a naggapu iti Micronesia ken Yapese ti kangrunaan a lengguahena, impabuyana ti Apay nga Adalem ti Biblia? iti Yapese. Idi mangrugin ti video, kuna ti babai: “Lengguahek daytoy. Kasla diak mamati! Mailasinko iti ayugna nga agpada ti isla nga ayanmi. Agpadakami iti lengguahe!” Kalpasanna, imbagana a basaen ken buyaenna amin a naipatarus iti lengguahena iti jw.org. (Idilig ti Aramid 2:8, 11.) Kitaentayo pay ti sabali a pagarigan. Ti maysa a sister iti Estados  Unidos in-send-na iti kaanakanna ti link ti isu met laeng a video iti lengguahena. Binuyana ket imbagana ken antina: “Nagustuak ti paset maipapan iti dakes a pannakabalin a mangkonkontrol iti lubong. Nagkiddawak iti online a mayadalanak iti Biblia.” Aggigian iti pagilian nga adda restriksion ti trabahotayo!

DAGITI ALIKAMEN A PANGISURO ITI KINAPUDNO

16. Ilawlawagmo ti panggep ti tunggal broshur: (a) Umimdengka iti Dios ket Agbiagka nga Agnanayon. (b) Naimbag a Damag Manipud iti Dios. (c) Siasino Ita Dagiti Mangar-aramid iti Pagayatan ni Jehova?

16 Broshur. Kasano nga isurom ti kinapudno kadagiti saan unay a nalaing nga agbasa wenno awan ti aniaman a literatura iti lengguaheda? Adda alikamen para iti dayta—ti broshur nga Umimdengka iti Dios ket Agbiagka nga Agnanayon. * Ti nasayaat nga alikamen a pangirugi iti panagadal ket ti broshur a Naimbag a Damag Manipud iti Dios. Mabalinmo nga ipakita ti 14 a topiko nga adda iti makinlikud nga akkub ken damagem ti nangnangruna a paginteresanna. Sa irugim ti panagadal iti dayta a leksion. Napadasam kadin nga usaren dayta iti panagsarungkarmo? Ti maikatlo a broshur nga adda iti toolbox ket ti Siasino Ita Dagiti Mangar-aramid iti Pagayatan ni Jehova? Nadisenio daytoy a mangiturong iti estudiante iti organisasion. Tapno masursurom nga usaren daytoy iti tunggal panangyadalmo iti Biblia, kitaem ti Marso 2017 a ruar ti Panagbiag ken Ministeriotayo kas Kristiano—Workbook iti Gimong.

17. (a) Ania ti panggep ti tunggal libro a maus-usar iti panangyadal? (b) Ania ti kasapulan nga aramiden ti amin a kabbaro a nabautisaran, ken apay?

17 Libro. No nakairugika iti panagadal iti broshur, mabalinmo nga iyakar iti libro nga Ania a Talaga ti Isursuro ti Biblia? iti aniaman a kanito. Palawaen daytoy nga alikamen ti pannakaammo ti estudiante maipapan kadagiti pagdamdamuan a sursuro ti Biblia. No malpasna daytoy a libro ken rumangrang-ay iti naespirituan, itultuloymo nga iyadalan iti libro nga Agtalinaedka iti Ayat ti Dios. * Isuro daytoy nga alikamen no kasano a mayaplikar ti estudiante dagiti prinsipio ti Biblia iti inaldaw a panagbiagna. Laglagipem nga uray nabautisaranen, masapul a maitultuloy a mayadalan agingga a malpasna dagita a dua a libro. Tumulong daytoy tapno tumibker ti pundasionna iti kinapudno.​—Basaen ti Colosas 2:6, 7.

18. (a) Ania ti iparegta kadatayo ti 1 Timoteo 4:16 kas mannursuro iti kinapudno, ken ania ti resulta dayta? (b) Ania koma ti kalattayo iti panangusartayo iti Toolbox iti Panangisuro?

18 Kas Saksi ni Jehova, naitalek kadatayo ti “pannakaibaga ti kinapudno dayta a naimbag a damag” a mangiturong kadagiti tattao iti biag nga agnanayon. (Col. 1:5; basaen ti 1 Timoteo 4:16.) Gapu iti dayta, naipaayantayo iti Toolbox iti Panangisuro a naglaon iti talaga a kasapulantayo. (Kitaen ti “ Toolbox iti Panangisuro.”) Sapay koma ta ikagumaantayo nga usaren a naimbag dagitoy nga alikamen. Mabalin a pilien ti tunggal agibumbunannag no ania a literatura iti toolbox ti usarenna a makisarita iti interesado a tao ken no kaano nga itedna dayta. Ngem ti panggeptayo ket saan a basta panangipaima wenno panangibati iti literatura kadagiti saan nga interesado iti mensahetayo. Kalattayo nga aramiden nga adalan dagiti napudno, napakumbaba, ken mabisin iti naespirituan​—dagidiay “siuumiso nga agannayas iti agnanayon a biag.”​—Ara. 13:48; Mat. 28:19, 20.

^ par. 5 Kitaen ti artikulo a “Ti Allawagi” ken ti “Kahon Dagiti Alikamen ti Karpintero” iti Agosto 1, 2010, Ti Pagwanawanan.

^ par. 16 No saan a makabasa ti kasarsaritam, mabalin nga ibagam a pasurotanna ti broshur a Listen to God, a ladawan ti kaaduan a linaonna.

^ par. 17 No magun-odanen dagiti libro nga Ania ti Isuro ti Biblia Kadatayo? ken No Kasano ti Agtalinaed iti Ayat ti Dios, mabalinyon nga usaren dagita.