Mapan iti linaonna

Mapan iti listaan dagiti linaonna

 MAADAL NGA ARTIKULO 44

Pabilgem ti Relasionmo Kadagiti Kakabsat Sakbay ti Panungpalan

Pabilgem ti Relasionmo Kadagiti Kakabsat Sakbay ti Panungpalan

“Ti pudno a gayyem agayat iti amin a tiempo.”​—PROV. 17:17.

KANTA 101 Agkaykaysa nga Agtrabaho

ITI DAYTOY A PANAGADAL *

Kasapulantayo dagiti nasayaat a gagayyem inton “dakkel a rigat” (Kitaen ti parapo 2) *

1-2. Sigun iti 1 Pedro 4:7, 8, ania ti makatulong kadatayo a mangibtur kadagiti pakarigatan?

BAYAT nga umas-asideg ti panungpalan ti “maudi nga al-aldaw,” mabalin a maipasangotayo kadagiti nakaro a pakarigatan. (2 Tim. 3:1) Kas pagarigan, kalpasan ti eleksion iti maysa a pagilian idiay abagatan nga Africa, timmaud ti nakaro a gulo. Iti nasurok nga innem a bulan, saan a nawaya a makagaraw dagiti kakabsattayo gapu iti panaglalaban. Ania ti nakatulong tapno maibturanda ti kasta a narigat a situasion? Nagkamang ti dadduma kadakuada iti pagtaengan dagiti kakabsat iti nataltalged a lugar. Imbaga ti maysa a kabsat: “Iti kasta a situasion, naapresiarko ti kaadda dagiti gagayyemko iti sibayko ta naparegtami ti maysa ken maysa.”

2 Inton mangrugi ti “dakkel a rigat,” maapresiartayto ti kaadda dagiti nasayaat a gagayyem a mangay-ayat kadatayo. (Apoc. 7:14) Masapul ngarud a pabilgentayo itan ti relasiontayo kadagiti kakabsat. (Basaen ti 1 Pedro 4:7, 8.) Adu ti masursurotayo iti kapadasan ni Jeremias. Tinulongan dagiti gagayyemna tapno malasatanna ti narigat a tiempo sakbay ti pannakadadael ti Jerusalem. * Kasano a matuladtayo ni Jeremias?

TI MASURSUROTAYO KEN JEREMIAS

3. (a) Apay a mabalin nga insina koma ni Jeremias ti bagina iti sabsabali? (b) Ania ti inyebkas ni Jeremias iti sekretariona a ni Baruk, ken ania ti resultana?

3 Iti agarup 40 a tawen, nagbiag ni Jeremias iti tengnga dagiti di matalek a tattao, a pakairamanan dagiti kaarrubana ken  mabalin a ti dadduma a kabagianna iti ilina nga Anatot. (Jer. 11:21; 12:6) Nupay kasta, saanna nga insinsina ti bagina. Kinapudnona, inyebkasna ti rikriknana iti matalek a sekretariona a ni Baruk ken ammotayo met dayta ta mabasbasatayo ti insuratna. (Jer. 8:21; 9:1; 20:14-18; 45:1) Mapanunottayo a bayat nga isursurat ni Baruk ti mapaspasamak ken Jeremias, immuneg ti panagayat ken panagraemda iti maysa ken maysa.​—Jer. 20:1, 2; 26:7-11.

4. Ania ti imbaga ni Jehova nga aramiden ni Jeremias, ken kasano a bimmileg ti panaggayyem da Jeremias ken Baruk gapu iti dayta?

4 Iti adu a tawen, situtured nga impakdaar ni Jeremias kadagiti Israelita ti mapasamakto iti Jerusalem. (Jer. 25:3) Idi kinombinsir manen ida ni Jehova nga agbabawi, imbagana ken Jeremias nga isuratna dagiti pakdaarna iti maysa a lukot. (Jer. 36:1-4) Bayat ti nasinged a panagkadua da Jeremias ken Baruk iti daytoy a trabaho nga inted ti Dios, a posible a nagpaut iti sumagmamano a bulan, sigurado a makapabileg dagiti panagtungtongda.

5. Kasano nga impakita ni Baruk nga isu ket nasayaat a gayyem ken Jeremias?

5 Idi tiempon a maipakaammo ti linaon ti lukot, masapul nga agtalek ni Jeremias iti gayyemna a ni Baruk a mangidanon iti mensahe. (Jer. 36:5, 6) Situtured nga intungpal ni Baruk daytoy a delikado nga annongen. Mapanunotmo kadi ti ragsak ni Jeremias idi napan ni Baruk iti paraangan ti templo ket inaramidna ti imbilin ni Jeremias? (Jer. 36:8-10) Nadamag dagiti prinsipe ti Juda ti inaramid ni Baruk, ket imbilinda a sipipigsa a basaenna ti lukot! (Jer. 36:14, 15) Inkeddeng dagiti prinsipe nga ibaga ken Ari Jehoiakim ti imbaga ni Jeremias. Kinaasianda ni Baruk ket imbagada: “Mapankay aglemmeng, sika ken ni Jeremias, ket diyo ibagbaga ti ayanyo.” (Jer. 36:16-19) Nagsayaat dayta nga imbagada!

6. Ania ti reaksion da Jeremias ken Baruk iti ibubusor?

 6 Nakapungtot unay ni Ari Jehoiakim idi nangngegna ti sasao nga insurat ni Jeremias nga uray la pinuoranna ti lukot ken imbilinna a matiliw da Jeremias ken Baruk. Ngem saan a nagbuteng ni Jeremias. Nangala iti sabali pay a lukot ket intedna ken Baruk. Bayat nga idikdiktar ni Jeremias ti mensahe ni Jehova, insurat ni Baruk ti “amin nga insuratna idi iti lukot a pinuoran ni Ari Jehoiakim ti Juda.”​—Jer. 36:26-28, 32.

7. Ania ti nalabit napasamak bayat a nagkadua nga agtrabtrabaho da Jeremias ken Baruk?

7 Masansan nga agbalin a nasinged nga aggayyem dagiti tattao nga agkadua a mangibtur iti pakasuotan. Isu a mapanunottayo a bayat nga agkadua da Jeremias ken Baruk a mangisursurat iti lukot a sukat ti pinerdi ti dakes nga ari a ni Jehoiakim, mas naapresiarda ti kualidad ti maysa ken maysa. Kasano a makatulong kadatayo ti ulidan dagitoy dua a matalek a lallaki?

NAIMPUSUAN A KOMUNIKASION

8. Ania ti mabalin a manglapped kadatayo a maaddaan iti nasinged a gagayyem, ken apay a saantayo koma a sumuksuko?

8 Mabalin a marigatantayo a mangibaga iti rikriknatayo iti dadduma gapu ta adda idin nangpasakit kadatayo. (Prov. 18:19, 24) Wenno mabalin a mariknatayo nga awan tiempo ken pigsatayo a makigayyem. Ngem saantay koma a sumuksuko. No kayattayo a tulongandatayo dagiti kakabsat no adda pakasuotan, masapul a sursuruentayo itan ti agtalek kadakuada, nga ibagatayo ti pampanunot ken rikriknatayo. Napateg dayta iti panagbalin a pudno a gayyem.—1 Ped. 1:22.

9. (a) Kasano nga impakita ni Jesus nga agtaltalek kadagiti gagayyemna? (b) Kasano a bumileg ti relasiontayo iti sabsabali no nawaya ti pannakisaritatayo kadakuada? Mangted iti pagarigan.

9 Impakita ni Jesus nga agtaltalek kadagiti gagayyemna babaen ti nawaya a pannakisaritana kadakuada. (Juan 15:15) Matuladtayo isuna no iyebkastayo iti sabsabali dagiti pagragsakan, pakaseknan, ken pakaupayantayo. Dumngegka a naimbag no adda kasarsaritam, ket mabalin a makitamto nga adu gayam ti pagpadaan ti pampanunoten, rikrikna, ken kalatyo. Alaentayo a pagarigan ni Cindy, maysa a kabsat nga agtawen iti 29. Ginayyemna ti maysa a payunir nga agtawen iti 67 nga agnagan Marie-Louise. Agkadua iti ministerio da Cindy ken Marie-Louise iti kada bigat ti Huebes, ket nawayada nga aginnestoria maipapan iti nadumaduma a banag. Kuna ni Cindy, “Maragragsakanak a makiinnestoria kadagiti gagayyemko maipapan iti serioso a bambanag tapno ad-adda a maam-ammo ken matarusak  ida.” Bumileg ti panaggayyem no adda nasayaat a komunikasion. Kas ken Cindy, no sika ti mangyun-una iti naimpusuan ken nawaya a pannakisarita iti sabsabali, bumilegto ti pannakigayyemmo kadakuada.—Prov. 27:9.

MAKIPAGTRABAHO KADAGITI KAPAMMATIANTAYO

Agkadua iti ministerio dagiti nasayaat nga aggayyem (Kitaen ti parapo 10)

10. Sigun iti Proverbio 27:17, ania ti resultana no makipagtrabahotayo kadagiti kapammatiantayo?

10 Kas kada Jeremias ken Baruk, no makipagtrabahotayo kadagiti kapammatiantayo ken mapaliiwtayo a mismo ti nagsasayaat a kualidadda, makasursurotayo ket agbalintayo a nasinged kadakuada. (Basaen ti Proverbio 27:17.) Kas pagarigan, ania ti mariknam no mangngegmo ti gayyemmo a situtured a mangidepensa iti pammatina iti ministerio wenno kombinsido iti ibagbagana maipapan ken Jehova ken kadagiti panggepna? Mabalin nga ad-adda pay a sumingedka kenkuana.

11-12. Mangted iti pagarigan no kasano a matulongannatayo ti ministerio a mangpabileg iti pannakigayyemtayo.

11 Usigentayo ti dua a kapadasan a mangipakita nga ad-adda a suminged ti dua a tao no agkaduada iti ministerio. Inawis ni Adeline nga agtawen iti 23 ti gayyemna a ni Candice a mapanda mangasaba iti teritoria a manmano a makasabaan. “Kayatmi ti agbalin a naregregta iti ministerio ken matagiragsakmi dayta,” kunana. “Agpada a kasapulanmi ti pammaregta.” Kasano a nagunggonaanda iti panagkaduada iti ministerio? “Kalpasan ti tunggal aldaw,” kuna ni Adeline, “pagsaritaanmi no ania ti nariknami, no ania ti nakaparegtaanmi iti pannakisaritami, ken no kasano a nariknami ti panangiwanwan ni Jehova iti ministeriomi. Naragsakankami kadagita a panagtungtong ket mas naam-ammomi ti maysa ken maysa.”

12 Ti babbalasang a taga-France a da Laïla ken Marianne nangasabada iti lima a lawas idiay Bangui, ti adu ti populasionna a kabesera ti Central African Republic. Malagip ni Laïla: “Saan nga agpada ti personalidadmi ken Marianne ken uray dagiti kayatmi, ngem gapu iti nasayaat a komunikasionmi ken pudno nga ayat, bimmileg ti panaggayyemmi.  Bayat a makitkitak ti laing ni Marianne a makibagay, ti ayatna kadagiti lumugar, ken ti regtana iti ministerio, mas naapresiarko isuna.” Saan a kasapulan nga umakarka iti sabali a pagilian tapno matagiragsakmo dagita. Tunggal makipagtrabahoka iti maysa a kabsat iti teritoriayo, adda gundawaymo nga ad-adda pay a mangam-ammo kenkuana ken mangpabileg iti panaggayyemyo.

AGPOKUS ITI POSITIBO KEN AGBALIN A MANANGPAKAWAN

13. Ania ti mapasamak no dadduma no makipagtrabahotayo kadagiti gagayyemtayo?

13 No dadduma, no makatrabahotayo dagiti gagayyemtayo, saan laeng a dagiti positibo a kualidadda ti makitatayo no di pay ket dagiti kamalida. Ania ti makatulong tapno agtalinaed a nasinged ti panaggagayyemtayo? Usigentayo manen ti ulidan ni Jeremias. Ania ti nakatulong kenkuana a mangkita iti naimbag a kualidad ti sabsabali ken mangpalabas kadagiti kamalida?

14. Ania ti nasursuro ni Jeremias maipapan ken Jehova, ken kasano a nakatulong daytoy kenkuana?

14 Insurat ni Jeremias ti libro a naipanagan iti naganna, ken mabalin nga insuratna met dagiti libro ti Biblia nga 1 ken 2 Ar-ari. Nakatulong la ketdi kenkuana dayta nga annongen tapno maapresiarna ti asi ni Jehova kadagiti imperpekto a tattao. Kas pagarigan, ammona a gapu ta nagbabawyan ni Ari Ahab dagiti dakes nga inaramidna, saan a dinadael ni Jehova ti intero a pamiliana bayat a sibibiag. (1 Ar. 21:27-29) Ammo met ni Jeremias a nakarkaro pay ngem iti dayta ti inaramid ni Manases, a namagpungtot ken Jehova. Nupay kasta, pinakawan ni Jehova ni Manases gapu ta nagbabawi. (2 Ar. 21:16, 17; 2 Cron. 33:10-13) Nakatulong la ketdi ken Jeremias dagita a salaysay a mangtulad iti kinaanus ken asi ti Dios iti mismo a pannakilangenna kadagiti nasinged a gagayyemna.​—Sal. 103:8, 9.

15. Kasano a tinulad ni Jeremias ti kinaanus ni Jehova idi napukaw ni Baruk ti pokusna?

15 Usigentayo no kasano a tinulongan ni Jeremias ni Baruk idi temporario a napukaw ti pokusna iti annongenna. Imbes a baybay-anna ti gayyemna, tinulonganna ni Baruk babaen ti panangibagana iti naasi ngem prangka a mensahe ti Dios. (Jer. 45:1-5) Ania dagiti maadaltayo iti daytoy a salaysay?

Sibubulos nga agpinnakawan dagiti nasayaat nga aggayyem (Kitaen ti parapo 16)

16. Kas naipakita iti Proverbio 17:9, ania ti masapul nga aramidentayo tapno agtalinaed ti nasinged a pannakigayyemtayo?

16 Siempre, saan a perpekto dagiti kakabsattayo. Isu a no nasingeden a gayyemtayo ida, ikagumaantayo koma a pagtalinaeden dayta. No agkamali dagiti gagayyemtayo, baka kasapulan a mangipaaytayo iti naasi ngem prangka a balakad manipud iti Sao ti Dios. (Sal. 141:5) Ket no masaktandatayo, masapul a pakawanentayo ida. No napakawantayon ida, liklikantayo koma a dakamaten manen dayta kadakuada wenno iti sabsabali. (Basaen ti Proverbio 17:9.) Nakapatpateg ngarud a kadagitoy delikado a tiempo, agpokustayo iti positibo a kualidad dagiti kakabsattayo imbes nga iti pagkamkamalianda! Ita kasta, bumileg ti pannakigayyemtayo kadakuada. Napateg dayta ta kasapulantayo dagiti nasinged a gagayyem inton dakkel a rigat.

IPAKITA TI NAPUDNO NGA AYAT

17. Kasano nga impakita ni Jeremias a pudno a gayyem iti tiempo ti rigat?

17 Impakita ni propeta Jeremias nga isu ket pudno a gayyem iti tiempo ti rigat. Kas pagarigan, kalpasan nga inispal isuna ti opisial iti palasio a ni Ebed-melec iti napitak a pagurnongan iti danum, nagbuteng ni Ebed-melec amangan no dangran dagiti prinsipe. Idi naammuan dayta ni Jeremias, saan a nagulimek  a nangnamnama lattan a makapagibtur ti gayyemna. Nupay nakabalud ni Jeremias, inaramidna no ania ti maaramidanna babaen ti panangibagana iti makaliwliwa a kari ni Jehova iti gayyemna a ni Ebed-melec.—Jer. 38:7-13; 39:15-18.

Tumulong dagiti nasayaat nga aggayyem kadagiti kakabsat nga agkasapulan (Kitaen ti parapo 18)

18. Sigun iti Proverbio 17:17, ania ti masapul nga aramidentayo no adda kabsat nga agsagsagaba?

18 Nagduduma ita ti problema dagiti kakabsattayo. Kas pagarigan, adu ti agsagsagaba gapu iti natural a kalamidad wenno didigra a gapuanan ti tao. No mapasamak dayta, mabalin a padagusen ti dadduma kadatayo dagitoy a kakabsat. Mabalin met a makatulong ti dadduma iti pinansial a kasapulanda. Ngem mabalintayo amin nga ikararag a tulongan ida ni Jehova. No naammuantayo a maup-upay ti maysa a kabsat, baka ditay ammo no ania ti ibaga wenno aramidentayo. Ngem adda maitulongtayo amin. Kas pagarigan, mabalintayo a kaduaen dayta a kabsat, ket siaasi a dumngegtayo bayat nga agsasao. Ken mabalin nga ibagatayo ti paboritotayo a makaliwliwa a teksto. (Isa. 50:4) Ti kapatgan ket addaka iti sibay dagiti kakabsat no kasapulandaka.​—Basaen ti Proverbio 17:17.

19. Kasano a makatulong iti masanguanan ti nabileg a pannakigayyemtayo itan kadagiti kakabsat?

19 Determinadotayo koma a maaddaan iti nasinged a relasion kadagiti kakabsattayo ken mangpabileg iti dayta itan. Apay? Gapu ta ikagumaan dagiti kabusortayo a pagsisinaendatayo babaen kadagiti kinaulbod ken di umiso nga impormasion. Ikagumaanda a perdien ti panagtalektayo iti maysa ken maysa. Ngem saanda nga agballigi. Saanda a madadael ti ayattayo iti maysa ken maysa. Uray ania ti aramidenda, saanda a madadael ti panaggagayyemtayo. Kinapudnona, saan nga agpatingga dagita a panaggagayyem inton panungpalan daytoy a sistema no di ket agtultuloy dagita iti agnanayon!

KANTA 24 Sumang-attayo iti Bantay ni Jehova

^ par. 5 Bayat nga umas-asideg ti panungpalan, kasapulantayo amin a pabilgen ti relasiontayo kadagiti kapammatiantayo. Iti daytoy nga artikulo, kitaentayo no ania ti masursurotayo iti kapadasan ni Jeremias. Pagsasaritaantayo met no kasano a ti panangpatanortayo ita iti nasinged a relasion kadagiti kakabsat ket makatulongto iti tiempo ti pannubok.

^ par. 2 Dagiti pasamak iti libro a Jeremias ket saan a naisurat sigun iti panagsasarunoda.

^ par. 57 DAGITI LADAWAN: Ipakita daytoy nga eksena ti mabalin a mapasamak inton “dakkel a rigat.” Nagtitipon ti sumagmamano a kakabsat iti maysa nga attic ti balay. Kas aggagayyem, maliwliwada ti maysa ken maysa bayat ti tiempo ti pannakasuot. Ipakita ti sumaruno a tallo nga eksena nga addan nabileg a panaggagayyem dagita met laeng a kakabsat sakbay pay ti dakkel a rigat.