Mapan iti linaonna

Mapan iti listaan dagiti linaonna

 MAADAL NGA ARTIKULO 48

‘Ileppasmo ti Inrugim’

‘Ileppasmo ti Inrugim’

“Ileppasyo ti [inrugiyo].”​—2 COR. 8:11.

KANTA 35 ‘Siguraduen Dagiti Napatpateg a Bambanag’

ITI DAYTOY A PANAGADAL *

1. Ania ti ipalpalubos ni Jehova nga aramidentayo?

IPALPALUBOS ni Jehova nga aramidentayo ti bukodtayo a desision. Isursuronatayo no kasano ti agdesision iti nasayaat, ken tultulongannatayo nga agballigi no maragsakan kadagiti desisiontayo. (Sal. 119:173) No iyap-aplikartayo ti sirib manipud iti Sao ti Dios, ad-adda a makaaramidtayo kadagiti nasayaat a desision.​—Heb. 5:14.

2. Ania ti mabalin a pagrigatantayo kalpasan a nagdesisiontayo?

2 Ngem uray no nainsiriban ti desisiontayo, mabalin a marigatantayo a mangileppas iti inrugitayo. Kitaentayo ti dadduma a pagarigan: Nagdesision ti maysa nga agtutubo a kabsat a lalaki a basaenna ti intero a Biblia. Inaramidna dayta iti sumagmamano a lawas ngem naisardengna. Nagdesision ti maysa a kabsat a babai nga ag-regular pioneer ngem kanayonna nga itantan no kaano a mangrugi. Sangsangkamaysa a nagdesision ti maysa a bagi dagiti panglakayen a nayonanda ti panangipastorda iti kongregasion ngem saanda pay a naaramidan dayta kalpasan ti sumagmamano a bulan. Nagduduma dagitoy a situasion, ngem adda pagpapadaanda. Saan a naan-anay a naitungpal dagita a desision. Kasta met laeng idi ti problema dagiti Kristiano idiay Corinto idi umuna a siglo. Pagsasaritaantayo ti maadaltayo kadakuada.

3. Ania ti desision dagiti taga-Corinto, ngem ania ti napasamak?

3 Idi agarup 55 C.E., nangaramid dagiti taga-Corinto iti napateg a desision. Naammuanda a marigrigatan dagiti kakabsatda idiay Jerusalem ken Judea ken agkolkolekta iti kuarta ti dadduma a kongregasion tapno matulonganda ida. Naimbag ken naparabur dagiti taga-Corinto isu nga inkeddengda ti agdonar ken indamagda ken apostol Pablo no kasano a makatulongda.  Nangted ni Pablo iti instruksion iti kongregasion ken dinutokanna ni Tito a tumulong iti panagkolekta. (1 Cor. 16:1; 2 Cor. 8:6) Ngem sumagmamano a bulan kalpasanna, naammuan ni Pablo a saan a naitultuloy dayta dagiti taga-Corinto. Isu a baka saanto pay a nakasagana ti donasionda inton maipan idiay Jerusalem ti kontribusion ti dadduma pay a kongregasion.​—2 Cor. 9:4, 5.

4. Sigun iti 2 Corinto 8:7, 10, 11, ania ti imparegta ni Pablo nga aramiden dagiti taga-Corinto?

4 Nasayaat ti desision dagiti taga-Corinto, ket kinomendaran ida ni Pablo iti nabileg a pammati ken gagarda a tumulong. Ngem kasapulan met a paregtaenna ida nga ileppasda ti inrugida. (Basaen ti 2 Corinto 8:7, 10, 11.) Masursurotayo iti kapadasanda nga uray dagiti matalek a Kristiano mabalin a marigatanda a mangitungpal iti nasayaat a desision.

5. Ania dagiti saludsod a sungbatantayo?

5 Kas kadagiti taga-Corinto, mabalin a marigatantayo a mangitungpal iti desisiontayo. Apay? Gapu ta imperpektotayo, mabalin a maitantantayo nga itungpal dayta. Wenno gapu iti di mapakpakadaan a pasamak, mabalin a saantayon a maaramidan ti inkeddengtayo nga aramiden. (Ecl. 9:11; Roma 7:18) Kasano a maammuantayo no masapul a baliwantayo ti maysa a desision? Ken kasano a masiguradotayo a maileppastayo ti inrugitayo?

SAKBAY NGA AGDESISION

6. Kaano a kasapulan a baliwantayo ti maysa a desision?

6 Adda dagiti desision a saantayo a kayat a baliwan. Kas pagarigan, saantayo a baliwan ti desisiontayo nga agserbi ken Jehova, ken determinadotayo nga agmatalek iti asawatayo. (Mat. 16:24; 19:6) Ngem adda dagiti desision a kasapulan a mabaliwan. Apay? Gapu ta agbalbaliw dagiti kasasaad. Ania dagiti makatulong tapno makaaramidtayo iti nasayaat a desision?

7. Ania koma ti ikararagtayo, ken apay?

7 Ikararagmo ti sirib. Inwanwan ni Jehova ni Santiago a mangisurat: “No agkurang iti sirib ti asinoman kadakayo, agtultuloy koma nga agdawat iti Dios, ta sipaparabur nga ikkanna ti amin.” (Sant. 1:5) No dadduma, amintayo ket “agkurang iti sirib.” Isu nga agpannurayka ken Jehova no agaramidka iti desision ken no repasuem no kasapulan a baliwam dayta. Iti kasta, tulongannaka ni Jehova a mangaramid iti nainsiriban a desision.

8. Ania dagiti masapul a sukimatentayo sakbay nga agdesisiontayo?

8 Agsukimatka a naimbag. Agkonsultaka iti Sao ti Dios, basaem dagiti publikasion ti organisasion ni Jehova, ken makisaritaka kadagiti pagtaltalkam. (Prov. 20:18) Nakapatpateg ti kasta a panagsukimat sakbay nga agdesisionka a mangbaliw iti trabahom, umakar iti pagnaedam, wenno agpili iti kurso a pangsuportam iti ministeriom.

9. Apay a pagsayaatantayo no napudnotayo iti bagitayo?

9 Panunotem ti motibom. Napateg ken Jehova dagiti motibotayo. (Prov. 16:2) Kayatna nga agbalintayo a napudno iti amin a banag. Isu a no agdesisiontayo, kayattayo met ti agbalin a napudno iti bagitayo ken iti sabsabali no ania ti motibotayo. No saan a napudno ti motibotayo, baka marigatantayto a mangitungpal iti desisiontayo. Kas pagarigan, baka nagdesision nga ag-regular pioneer ti maysa nga agtutubo a lalaki. Ngem kalpasan ti sumagmamano a tiempo, marigatanen a mangala iti orasna ken saan unayen a naragsak iti ministeriona. Mabalin nga impagarupna a ti talaga a motibona nga agpayunir ket ti panangparagsak ken Jehova. Ngem posible ngata a ti kangrunaan a motibona  ket tapno maparagsakna dagiti nagannakna wenno ti maysa a kabsat?

10. Ania ti kasapulan tapno makapagbalbaliw ti maysa a tao?

10 Alaentayo a pagarigan ti maysa nga agad-adal iti Biblia a nagdesision nga isardengnan ti agsigarilio. Idi damo, nabaelanna ti di agsigarilio iti maysa wenno dua a lawas, ngem saan a nakapagteppel idi agangay. Nupay kasta, nagballigi met laeng kamaudiananna! Ti ayatna ken Jehova ken ti tarigagayna a mangparagsak Kenkuana ti nakatulong tapno maisardengna ti bisiona.​—Col. 1:10; 3:23.

11. Apay a masapul nga adda espesipiko a kalatmo?

11 Maaddaan iti espesipiko a kalat. No mas espesipiko dagiti kalatmo, dakdakkelto met ti posibilidad a maileppasmo ti inrugim. Kas pagarigan, nagdesisionka a kanayon a basaem ti Biblia. Ngem no awan ti eskediulmo, mabalin a saanmo a maaramidan ti kalatmo. * Wenno mabalin a nagdesision dagiti panglakayen iti maysa a kongregasion a nayonanda ti panangipastorda iti arban, ngem kalpasan ti sumagmamano a tiempo, saanda a naitungpal dayta. Tapno agballigida, mabalin nga isaludsodda dagitoy: “Ammomi kadin no asino dagiti kakabsat a magunggonaan iti panangipastormi? Naiplanomi kadin ti espesipiko a tiempo a panangbisita kadakuada?”

12. Ania ti kasapulan nga aramidentayo no dadduma, ken apay?

12 Agbalin a realistiko. Limitado ti tiempo, sanikua, wenno pigsatayo a mangaramid iti amin a kayattayo. Isu a realistiko ken rasonabletayo koma. No kasapulan, mabalin a baliwam ti desisionmo a saanmo gayam a kabaelan nga itungpal. (Ecl. 3:6) Ngem ipapantayo a rinepasom ti desisionmo, nangaramidka iti kasapulan a panagbalbaliw, ket nakitam a kabaelam nga aramiden dayta. Adda lima a makatulong tapno maileppasmo ti inrugim.

DAGITI ARAMIDEM TAPNO MAITUNGPALMO TI DESISIONMO

13. Kasano a maaddaanka iti bileg a kasapulam tapno maitungpalmo ti maysa a desision?

13 Ikararagmo ti bileg nga agtignay. Maipaay kenka ti Dios ti “pannakabalin” nga agtignay tapno maitungpalmo ti desisionmo. (Fil. 2:13) Kiddawem ngarud ken Jehova ti nasantuan nga espirituna a mangipaay kenka iti bileg a kasapulam. Itultuloymo ti agkararag uray no kasla saan a masungsungbatan ti kiddawmo. Kinuna ni Jesus: “Itultuloyyo ti agdawat, ket maikkankayto [iti nasantuan nga espiritu].”​—Luc. 11:9, 13.

14. Kasano a makatulong ti prinsipio iti Proverbio 21:5 tapno maitungpalmo ti desisionmo?

14 Agplanoka. (Basaen ti Proverbio 21:5.) Tapno maileppasmo ti aniaman a proyekto nga inrugim, kasapulam ti agplano. Kalpasanna, masapul a surotem dayta. Kasta met, no mangaramidka iti desision, ilistam dagiti espesipiko a banag a kayatmo a suroten tapno maitungpalmo dayta a desision. Bingaybingayem dagiti dadakkel a trabaho tapno nalaklakam a makita dagiti mailepleppasmo. Pinaregta ni Pablo dagiti taga-Corinto a mangilasinda iti idonarda “iti umuna nga aldaw ti tunggal lawas” imbes nga urayenda a sumangpet isuna sadanto agkolekta iti donasion. (1 Cor. 16:2) Saankanto a magabsuonan iti aramiden no bingaybingayem dagiti dadakkel a trabaho.

15. Ania ti aramidem no nakaaramidkan iti plano?

15 Makatulong kenka ti naisurat a plano tapno maitungpalmo dagiti desisionmo. (1 Cor. 14:40) Kas pagarigan, naibilin iti bagi dagiti panglakayen a mangpilida iti panglakayen a mangirekord iti tunggal desision, no  asino ti mangitungpal iti dayta, ken no kaano a maileppas. No suroten dagiti panglakayen daytoy a bilin, nalaklakada a maitungpal dagiti desisionda. (1 Cor. 9:26) Mabalinmo a tuladen dayta iti inaldaw a panagbiagmo. Kas pagarigan, mabalin nga ilistam ti inaldaw nga aramidem sigun iti kayatmo a panagsasarunoda. Makatulong daytoy tapno al-alisto a maileppasmo ti inrugim ket ad-adu ti maaramidam.

16. Ania ti kasapulan tapno maitungpalmo ti desisionmo, ken kasano a suportaran dayta ti Roma 12:11?

16 Agreggetka. Ikagumaam a suroten ti planom ken ileppasmo ti inrugim. (Basaen ti Roma 12:11.) Imbaga ni Pablo ken Timoteo nga ‘itultuloyna nga ipamaysa’ ti annongenna ken ‘ikagumaanna’ ti agbalin a nasaysayaat a mannursuro. Agaplikar met dayta a balakad iti dadduma pay a naespirituan a kalat.​—1 Tim. 4:13, 16.

17. Kasano a mayaplikartayo ti Efeso 5:15, 16 iti panangitungpal iti desisiontayo?

17 Usarem a nainsiriban ti tiempom. (Basaen ti Efeso 5:15, 16.) Mangpilika iti tiempo no kaanom nga itungpal ti desisionmo ken surotem dayta. Saanmon nga ur-urayen ti kasayaatan a tiempo sakbay nga agtignayka, ta baka awan ti mauraymo. (Ecl. 11:4) Dimo ipalubos a maibus ti tiempom iti saan unay a napateg a bambanag nga awanen ti pigsam para iti napatpateg a bambanag. (Fil. 1:10) No posible, agpilika iti tiempo a basbassit ti pakaistorboam. Ibagam iti sabsabali a kasapulam ti tiempo nga agpokus. Mabalin nga iddepem ti selponmo ken dimo pay laeng kitkitaen ti e-mail-mo wenno ti social media account-mo. *

18-19. Ania ti makatulong tapno maitungpalmo ti nasayaat a desisionmo uray no adda problema?

18 Agpokuska iti resulta. Ti resulta wenno pagbanagan ti desisionmo ket mayarig iti destinasion ti panagbiahe. No talaga a kayatmo ti makadanon iti destinasionmo, itultuloymo ti agbiahe uray no naserraan ti kalsada ken masapul a baliwam ti dalanmo. Kasta met, no panunotentayo ti resulta dagiti desisiontayo, saantayto a nalaka a sumuko no adda problema wenno kasapulan a balbaliwan.​—Gal. 6:9.

19 Narigat ti agaramid kadagiti nasayaat a desision, ken mabalin a narigat nga itungpal dagita. Ngem iti tulong ni Jehova, maaddaanka iti sirib ken pigsa a mangileppas iti inrugim.

KANTA 65 Rumang-ay!

^ par. 5 Pagbabbabawyam kadi ti dadduma a desisionmo? Wenno marigatanka kadi no dadduma nga agaramid iti nasayaat a desision ken mangyaplikar iti dayta? Matulongannaka daytoy nga artikulo tapno mapagballigiam dagitoy a karit ket maileppasmo ti inrugim.

^ par. 11 Tapno maiplanom ti panangbasam iti Biblia, mabalinmo nga usaren ti “Eskediul iti Panagbasa iti Biblia” nga adda iti jw.org®.

^ par. 17 Para iti ad-adu pay a suhestion no kasano ti panangusarmo iti tiempom, kitaem ti artikulo a “20 a Pamay-an Tapno Ad-adu ti Tiempom” iti Abril 2010 nga Agriingkayo!