Mapan iti linaonna

Mapan iti listaan dagiti linaonna

Kinamanangngaasi—Kualidad a Maipakita iti Sao ken Aramid

Kinamanangngaasi—Kualidad a Maipakita iti Sao ken Aramid

ANIAN a makaparegta ken makaliwliwa ti maipakitaan iti kinamanangngaasi! Agyamantayo la ketdi no ammotayo nga adda maseknan kadatayo. Gapu ta kayattayo amin ti maipakitaan iti kinamanangngaasi, kasano a mapatanortayo daytoy a nagsayaat a kualidad?

Ti kinamanangngaasi ramanenna ti naimpusuan nga interes iti pagimbagan ti dadduma​—interes a maipakita iti makatulong a sasao ken aramid. Aktibo daytoy a kualidad ken saan a pammarang a kinaimbag ken respeto. Ti pudpudno a kinamanangngaasi ket gapu iti nauneg a panagayat ken empatia. Kangrunaan iti amin, ti kasta a kinamanangngaasi ket paset ti bunga ti nasantuan nga espiritu ti Dios a naibaga a patanoren dagiti Kristiano. (Gal. 5:22, 23) Masapul a patanorentayo ti kinamanangngaasi, isu a pagsasaritaantayo no kasano nga impakita ni Jehova ken ti Anakna daytoy a kualidad ken no kasano a matuladtayo ti ulidanda.

MANANGNGAASI NI JEHOVA ITI AMIN

Ni Jehova ket manangngaasi ken nakonsiderar iti amin, a pakairamanan dagiti “awanan panagyaman ken nadangkes.” (Luc. 6:35) Kas pagarigan, “pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mat. 5:45) Gapuna, uray dagidiay saan a mangbigbig ken Jehova kas Namarsua magunggonaanda latta kadagiti naasi a probisionna para iti biag ken makariknada latta iti ragsak.

Nagsayaat nga ulidan iti kinamanangngaasi ti impakita ni Jehova kada Adan ken Eva. Kalpasan unay a nagbasolda, ‘dinaitda a pinagsasaip ti bulbulong ti higos ket inyaramidanda ti bagbagida kadagiti abbong ti lomoda.’ Ngem ammo ni Jehova a kasapulanda ti mayanatup a bado tapno makapagbiagda iti ruar ti Eden, a nailunoden a pagtubuan ti “sisiitan ken kalkalunay.” Siaasi ngarud nga impaayna ti kasapulanda babaen ti panangaramidna iti “nagayad a kawes a lalat” nga usarenda.​—Gen. 3:7, 17, 18, 21.

Nupay manangngaasi ni Jehova “kadagiti nalinteg a tattao ken kadagiti nakillo,” nangnangruna nga ipakitana dayta kadagiti matalek nga adipenna. Kas pagarigan, idi tiempo ni propeta Zacarias, nariribukan ti maysa nga anghel idi nakitana a naisardeng ti pannakatarimaan ti templo idiay Jerusalem. Impangag ni Jehova ti pakaseknan ti anghel ket simmungbat iti “naimbag a sasao, makaliwliwa a sasao.” (Zac. 1:12, 13) Kasta met laeng ti inaramid ni Jehova ken propeta Elias. Adda idi tiempo a naladingitan unay ti propeta nga uray la kiniddawna a patayen koman ni Jehova. Ammo ni Jehova ti rikrikna ni Elias ket nangibaon iti anghel a mangpabileg kenkuana. Impasigurado met ti Dios a saan nga agmaymaysa ti propeta. Idi nangngeg dayta ni Elias ken naawatna ti tulong a kasapulanna, naitultuloyna manen ti annongenna. (1 Ar. 19:1-18) Kadagiti adipen ti Dios, asino ti kangrunaan a nangipakita iti nagsayaat a kualidad ni Jehova a kinamanangngaasi?

 NI JESUS—DAKKEL TI KINAMANANGNGAASINA

Bayat ti ministerio ni Jesus ditoy daga, pagaammo kas manangngaasi ken nakonsiderar. Di pulos nagbalin a nauyong wenno naturay no di ket mannakipagrikna. Imbagana: “Umaykayo kaniak, dakayo amin a mabambannogan ken madagdagsenan, ket pagin-awaenkayto. . . . Ta ti sangolko nalanay.” (Mat. 11:28-30) Gapu iti kinamanangngaasina, simmurot dagiti tattao sadinoman ti papananna. “Simnek ti asina kadakuada,” ket pinakanna ida, pinaimbagna dagiti masakit ken baldado kadakuada, ken insurona ida iti “adu a banag” maipapan ken Amana.​—Mar. 6:34; Mat. 14:14; 15:32-38.

Kas pammaneknek iti dakkel a kinamanangngaasi ni Jesus, mannakaawat ken nakonsiderar iti pannakilangenna iti sabsabali. Kinapudnona, uray saan a kombiniente ken Jesus ti kiddaw dagiti tattao, inawatna a “siaasi” amin a napan kenkuana. (Luc. 9:10, 11) Kas pagarigan, dina inungtan ti mabutbuteng a babai, nga uray narugit sigun iti linteg, sinagidna ti makinruar a bado ni Jesus a namnamaenna nga umimbag ti panagbulos ti darana. (Lev. 15:25-28) Naasian ni Jesus iti daytoy a babai a 12 a tawenen nga agsagsagaba ket imbagana: “Anak, ti pammatim pinaimbagnaka. Mapanka a sitatalna, ket sumalun-atka koma iti nadagsen a sakitmo.” (Mar. 5:25-34) Anian a naisangsangayan a kinamanangngaasi!

MAIPAKITA TI KINAMANANGNGAASI ITI ARAMID

Kadagiti nadakamat a pagarigan, naammuantayo a ti pudno a kinamanangngaasi ket maipakita iti aramid. Impakita ni Jesus a kasapulan ti panagtignay iti ilustrasionna maipapan iti naasi a Samaritano. Nupay aggiginnura idi dagiti Samaritano ken Judio, naasian ti Samaritano iti lalaki a natakawan, nakabkabil, ken nabaybay-an iti dalan a dandanin matay. Kinamanangngaasi ti nangtignay iti Samaritano. Inagasanna dagiti sugat ti lalaki sa impanna iti maysa a pagdagusan. Binayadanna pay ti agay-aywan iti pagdagusan tapno aywananna ti nadangran a lalaki ken imbagana a bayadanna ti aniaman a kanayonan a magastos.​—Luc. 10:29-37.

Nupay masansan a maipakita ti kinamanangngaasi iti aramid, maipakita met dayta iti nakonsiderar ken makaparegta a sasao. Isu nga uray ti “panagdanag nga adda iti puso ti maysa a tao isunto ti mamagrukob iti dayta,” innayon ti Biblia a “ti naimbag a sao isu ti mamagrag-o iti dayta.” (Prov. 12:25) No manangngaasi ken naimbagtayo matignaytayo nga agsao iti makapabileg a bambanag kadagidiay maladladingitan. * Maipakitatayo a maseknantayo kadakuada no naasi ti panagsaotayo. Gapu ta naparegtada, nalaklakada a sanguen dagiti pakasuotan iti biag.​—Prov. 16:24.

PATANOREN TI KINAMANANGNGAASI

Gapu ta naparsuatayo iti “ladawan ti Dios,” kabaelan ti amin a tao a patanoren ti kinamanangngaasi. (Gen. 1:27) Kas pagarigan, ni Julio, nga opisial ti buyot ti Roma a nakaitalkan ti pannakaibiahe ni apostol Pablo idiay Roma, “trinatona [ti apostol] buyogen ti natauan a kinamanangngaasi ket pinalubosanna a mapan kadagiti gagayyemna ken mangtagiragsak iti panangasikasoda” iti siudad ti Sidon. (Ara. 27:3) Idi agangay, adda “naisangsangayan a natauan a kinamanangngaasi” nga impakita dagiti taga-Malta kada Pablo ken iti dadduma pay idi narba ti barkoda. Nangpasgedda pay iti apuy a pagpapudotan dagiti biktima. (Ara. 28:1, 2) Maapresiar ti inaramidda, ngem ti kinamanangngaasi ket saan laeng a sagpaminsan a naasi a panagtignay.

Tapno naan-anay a maparagsaktayo ti Dios, masapul a pagbalinentayo ti kinamanangngaasi kas permanente a paset ti personalidad ken kabibiagtayo. Gapu iti dayta, ibaga kadatayo ni Jehova a ‘kawesantayo’ ti bagitayo iti  kinamanangngaasi. (Col. 3:12) Ngem aminentayo a saan a nalaka a pagbalinen daytoy a nadiosan a kualidad kas paset ti kababalintayo. Apay? Mabalin nga agkedkedtayo a mangngaasi gapu iti kinamanagbabain, kurang a kompiansa iti bagi, ibubusor, wenno kinamanagimbubukodan. Ngem mapagballigiantayo dagita a lapped no agtalektayo iti nasantuan nga espiritu ken no tuladentayo ti pamay-an ni Jehova a mangipakita iti kinamanangngaasi.​—1 Cor. 2:12.

Maibagatayo kadi dagiti masapul a parang-ayentayo iti panangipakita iti kinamanangngaasi? Isaludsodtayo iti bagitayo: ‘Dumdumngegak kadi nga addaan iti empatia? Alertoak kadi iti kasapulan ti sabsabali? Kaano ti naudi a nangipakitaak iti kinamanangngaasi iti maysa a saanko a kapamilia wenno nadekket a gayyem?’ Sa mangaramidtayo iti kalat, kas iti panangam-ammo a naimbag iti dadduma, nangnangruna kadagiti kakabsat iti kongregasion. Iti kastoy a pamay-an, maammuantayo ti situasion ken kasapulanda. Sumaruno, ikagumaantayo ti mangngaasi iti sabsabali iti pamay-an a maapresiartayo no datayo ti adda iti situasionda. (Mat. 7:12) Kamaudiananna, bendisionan ni Jehova ti panagreggettayo no agpatulongtayo kenkuana.​—Luc. 11:13.

MAKAATRAKAR TI KINAMANANGNGAASI

Idi dinakamat ni apostol Pablo ti pakailasinanna kas ministro ti Dios, inramanna ti “kinamanangngaasi.” (2 Cor. 6:3-6) Naatrakar dagiti tattao ken Pablo gapu iti personal nga interesna kadakuada, nga impakitana iti naasi nga ar-aramid ken sasao. (Ara. 28:30, 31) Maatrakartayo met dagiti tattao iti kinapudno no naimbag ti kababalintayo. No manangngaasitayo iti amin, a pakairamanan dagidiay bumusbusor kadatayo, mabalin a mabang-aranda ken malunag ti gurada kadatayo. (Roma 12:20) Inton agangay, baka aginteresda pay ketdi iti mensahe ti Biblia.

Inton Paraison ti daga, sigurado a maragsakanto ti di mabilang a mapagungar a makarikna iti pudpudno a kinamanangngaasi, nalabit iti umuna a gundaway. Kas panagyamanda, matignaydanto met a mangngaasi iti sabsabali. Asinoman ngarud a saanto a mangngaasi ken tumulong ket awanto ti lugarna iti Pagarian ti Dios. Iti sabali a bangir, dagidiay anamongan ti Dios nga agbiag nga agnanayon tratuendanto ti maysa ken maysa iti naayat ken naasi a pamay-an. (Sal. 37:9-11) Talaga a natalged ken natalnanton ti lubong! Ngem sakbay dayta a nakasaysayaat a tiempo, kasano a magunggonaantayo itan iti panangipakita iti kinamanangngaasi?

DAGITI PAGIMBAGAN TI PANANGNGAASI

“Ti tao nga addaan naayat a kinamanangngaasi mangipapaay iti gunggona iti bukodna a kararua,” kuna ti Biblia. (Prov. 11:17) Maatrakar dagiti tattao iti naasi a tao, ket matignayda met nga agbalin a naasi. Kinuna ni Jesus: “Ti rukod a pangrukrukodyo, pangrukoddanto met kadakayo.” (Luc. 6:38) Isu a nalaka a maaddaan ti naasi a tao iti nasayaat a gagayyem.

Imparegta ni apostol Pablo kadagiti miembro ti kongregasion idiay Efeso nga “agbalin[da] a manangngaasi iti maysa ken maysa, nadungngo a mannakipagrikna, a sibubulos a pakawanen[da] ti maysa ken maysa.” (Efe. 4:32) Talaga a magunggonaan ti kongregasion no dagiti miembrona ket mannakipagrikna, manangngaasi, ken tultulonganda ti maysa ken maysa. Dida igagara ti mangkritikar ken agsao iti makapasakit ken makapainsulto. Imbes nga iwarasda ti makadadael a tsismis, ikagumaanda nga usaren ti dilada a tumulong iti sabsabali. (Prov. 12:18) Kas resultana, nabileg ken naragsak ti kongregasion.

Wen, ti kinamanangngaasi ket kualidad a maipakita iti sao ken aramid. No manangngaasitayo, ipakpakitatayo ti naayat ken naparabur a personalidad ti Diostayo, ni Jehova. (Efe. 5:1) Kas resultana, mapabilegtayo ti kongregasiontayo ken maawistayo ti sabsabali iti nadalus a panagdayaw. Sapay koma ta maam-ammodatayo kas tattao a manangngaasi!

^ par. 13 Ti kinaimbag ket sumaruno a mailawlawag kadagitoy a siam nga artikulo maipapan iti bunga ti nasantuan nga espiritu ti Dios.