Mapan iti linaonna

Mapan iti listaan dagiti linaonna

 MAADAL NGA ARTIKULO 11

Dumngegkayo iti Timek ni Jehova

Dumngegkayo iti Timek ni Jehova

“Daytoy ti Anakko . . . Dumngegkayo kenkuana.”​—MAT. 17:5.

KANTA 89 Dumngeg, Agtulnog, ket Mabendisionan

ITI DAYTOY A PANAGADAL *

1-2. (a) Kasano a nakisarita ni Jehova kadagiti tattao? (b) Ania ti adalentayo iti daytoy nga artikulo?

MAAY-AYATAN ni Jehova a makisarita kadatayo. Idi un-unana, inusarna dagiti propeta, anghel, ken ti Anakna, ni Jesu-Kristo, a mangipakaammo iti pampanunotna. (Amos 3:7; Gal. 3:19; Apoc. 1:1) Ita, makisarsarita kadatayo babaen ti Saona, ti Biblia. Intedna dayta tapno maammuantayo ti pampanunotna ken dagiti pamay-anna a mangaramid iti bambanag.

2 Idi adda ni Jesus ditoy daga, namitlo a nagsao ni Jehova manipud langit. Kitaentayo no ania ti imbaga ni Jehova, no ania ti masursurotayo, ken no kasanotayo a magunggonaan kadagita.

“SIKA TI ANAKKO A DUNGDUNGNGUEK”

3. Kas mabasa iti Marcos 1:9-11, ania ti imbaga ni Jehova ken Jesus idi nagbautisar, ken ania dagiti importante a kinapudno a pinatalgedan dagita a sasao?

3 Nairekord iti Marcos 1:9-11 ti umuna a gundaway a nagsao ni Jehova manipud langit. (Basaen.) Kunana: “Sika ti Anakko a dungdungnguek; maragsakanak kenka.” Sigurado a naparegta ni Jesus a nakangngeg iti panangyebkas ni Amana iti ayat ken pammasigurona! Adda tallo nga importante a kinapudno maipapan ken Jesus a pinatalgedan dagiti imbaga ni Jehova. Umuna, ni Jesus ket Anakna. Maikadua, ay-ayatenna ti Anakna. Ken maikatlo, maragragsakan iti Anakna. Kitaentayo a naimbag ti tunggal maysa kadagita.

4. Idi nagbautisar ni Jesus, ania ti nagbalin a baro a relasionna iti Dios?

4 “Sika ti Anakko.” Iti daytoy nga imbaga ni Jehova, impakitana  a ti ay-ayatenna nga Anak a ni Jesus ket naaddaan iti baro a relasion Kenkuana. Idi adda idiay langit ni Jesus, isu ket espiritu nga anak ti Dios. Ngem idi nabautisaran, isu ket dinutokan ti nasantuan nga espiritu. Iti dayta a gundaway, impamatmat ti Dios a ni Jesus, kas dinutokanna nga Anak, ket addan namnamana nga agsubli idiay langit tapno agbalin nga Ari ken Nangato a Padi nga inapointaran ti Dios. (Luc. 1:31-33; Heb. 1:8, 9; 2:17) Isu a nalawag no apay nga idi nagbautisar ni Jesus, imbaga ni Amana: “Sika ti Anakko.”​—Luc. 3:22.

Mapabilegtayo no makomendaran ken maparegtatayo (Kitaen ti parapo 5) *

5. Kasanotayo a matulad ti ulidan ni Jehova iti panangyebkas iti ayat ken anamongna?

5 “Sika ti . . . dungdungnguek.” Inyebkas ni Jehova ti ayat ken anamongna isu nga agbiroktayo met iti gundaway a mangpabileg iti dadduma. (Juan 5:20) Mapabilegtayo no ipakitaandatayo iti ayat dagiti ipatpategtayo ken komendaranda dagiti nasayaat a maar-aramidantayo. Kasta met, kasapulan dagiti kakabsattayo iti kongregasion ken dagiti miembro ti pamiliatayo ti ayat ken pammaregtatayo. No komendarantayo ti sabsabali, mapabilegtayo ti pammatida ken matulongantayo ida nga agserbi a simamatalek ken Jehova. Ad-adda a masapul a paregtaen dagiti nagannak dagiti annakda. No naimpusuan a komendaran ken ipakitada nga ipatpategda dagiti annakda, matulonganda ida a rumang-ay.

6. Apay a makapagtalektayo ken Jesu-Kristo?

6 “Maragsakanak kenka.” Ipakita dagitoy a sasao nga agtalek ni Jehova a simamatalek nga aramiden ni Jesus ti pagayatan ni Amana. Gapu ta kasta ti panagtalek ni Jehova iti Anakna, masiguradotayo met a simamatalek a tungpalen ni Jesus ti amin a kari ni Jehova. (2 Cor. 1:20) No panunotentayo ti ulidan ni Jesus, mas  determinadotayo nga agsursuro ken mangtulad kenkuana. Kasta met laeng ti panagtalek ni Jehova kadagiti adipenna kas grupo nga itultuloyda ti agsursuro iti Anakna.​—1 Ped. 2:21.

“DUMNGEGKAYO KENKUANA”

7. Sigun iti Mateo 17:1-5, kaano a nagsao ni Jehova manipud langit, ken ania ti imbagana?

7 Basaen ti Mateo 17:1-5. Ti maikadua a gundaway a nagsao ni Jehova manipud langit ket idi ‘nagbalbaliw ti langa’ ni Jesus. Inawis ni Jesus da Pedro, Santiago, ken Juan a kumuyog kenkuana iti nangato a bantay. Idi addada sadiay, nakakitada iti nakaskasdaaw a sirmata. Rimmaniag ti rupa ni Jesus ken simmilap ti badona. Dua a lallaki a kasla da Moises ken Elias ti nangrugi a makisarita ken Jesus maipapan iti asidegen nga ipapatay ken panagungarna. Uray no “nakaturog” ti tallo nga apostol, nakitada daytoy nakaskasdaaw a sirmata idi nakariingda. (Luc. 9:29-32) Idi kuan, naabbungotanda iti naraniag nga ulep, ket adda timek a nangngegda iti ulep​—ti timek ti Dios! Kas idi nagbautisar ni Jesus, inyebkas ni Jehova ti anamong ken ayatna iti Anakna: “Daytoy ti Anakko a dungdungnguek, a pakaragsakak.” Ngem iti daytoy a gundaway, innayon ni Jehova: “Dumngegkayo kenkuana.”

8. Ania ti epekto ti sirmata ken ni Jesus ken kadagiti adalanna?

8 Impakita ti sirmata no kasanonto ti kinadayag ken pannakabalin ni Jesus kas Ari ti Pagarian ti Dios. Sigurado a naparegta ken napabileg iti dayta ni Kristo a mangibtur kadagiti sagabaenna ken iti nasaem nga ipapatayna. Napabileg met ti pammati dagiti adalan ken nakapagsaganada kadagiti pakasuotan a mapasarandanto ken iti narigat a trabaho nga aramidenda. Kalpasan ti agarup 30 a tawen, dinakamat ni apostol Pedro dayta a sirmata, a mangipakita a nalawag pay laeng dayta iti panunotna.​—2 Ped. 1:16-18.

9. Ania a makatulong a balakad ti imbaga ni Jesus kadagiti adalanna?

9 “Dumngegkayo kenkuana.” Nalawag a kayat ni Jehova a dumngeg ken agtulnogtayo iti sasao ti Anakna. Ania dagiti imbaga ni Jesus idi adda ditoy daga? Adu dagiti imbagana a nakapatpateg a denggentayo! Kas pagarigan, siaayat nga insurona dagiti pasurotna no kasano nga ikasaba ti naimbag a damag, ken maulit-ulit a pinalagipanna ida nga agtultuloyda nga agbantay. (Mat. 24:42; 28:19, 20) Pinaregtana pay ida nga aramidenda ti amin a kabaelanda ken saanda a sumuko. (Luc. 13:24) Impaganetget ni Jesus kadagiti pasurotna a masapul nga agiinnayatda, agtalinaedda nga agkaykaysa, ken tungpalenda dagiti bilinna. (Juan 15:10, 12, 13) Talaga a nakatulong kadagiti pasurot ni Jesus dayta a balakadna! Napateg pay laeng dayta agingga ita.

10-11. Kasanotayo a maipakita a dumdumngegtayo ken Jesus?

10 Kinuna ni Jesus: “Dumngeg iti timekko ti asinoman a mangtungtungpal iti kinapudno.” (Juan 18:37) Ipakpakitatayo a dumdumngegtayo iti timekna no “itultuloy[tayo] ti agiinnanus ken situtulok nga agpipinnakawan.” (Col. 3:13; Luc. 17:3, 4) Ipakpakitatayo pay a dumdumngegtayo iti timekna no sireregta nga ikasabatayo ti naimbag a damag “iti nasayaat ken narigat a tiempo.”​—2 Tim. 4:2.

11 Imbaga ni Jesus: “Denggen dagiti karnerok ti timekko.” (Juan 10:27) Ipakpakita dagiti pasurot ni Kristo a dengdenggenda ti timekna no ipangag ken tungpalenda ti saona. Saanda a nagpaapekto kadagiti “pakaringgoran iti biag.” (Luc. 21:34)  Imbes ketdi, inyun-unada ti panagtulnog kadagiti bilin ni Jesus uray kadagiti narigat a kasasaad. Adu a kakabsattayo ti agib-ibtur kadagiti narigat a pakasuotan, kas iti napalalo a pannakabusor, nakaro a kinapanglaw, ken kalamidad. Ngem matalekda latta ken Jehova aniaman ti mapasaranda. Impasigurado ni Jesus: “Ti umawat ken agtungpal kadagiti bilinko, ay-ayatennak. Ti mangay-ayat kaniak ayatento ti Amak.”​—Juan 14:21.

Makatulong ti ministeriotayo iti panagtalinaedtayo a nakapokus (Kitaen ti parapo 12) *

12. Ania ti sabali pay a pamay-an a maipakitatayo a dumdumngegtayo ken Jesus?

12 Daytoy ti sabali pay a pamay-an a mangipakita a dumdumngegtayo ken Jesus: no makikooperartayo kadagiti inapointaranna a mangidaulo kadatayo. (Heb. 13:7, 17) Adu a panagbalbaliw ti inaramid ti organisasion ti Dios iti naglabas a tawtawen, a pakairamanan ti panagusar kadagiti baro nga alikamen ken pamay-an iti ministeriotayo, ti pormat ti gimong iti tengnga ti lawas, ken ti pamay-an iti panagibangon, panagtarimaan, ken panagmantener kadagiti Kingdom Hall-tayo. Agyamyamantayo unay iti dayta a naayat ken nainsiriban a panangidalan! Masiguradotayo a bendisionan ni Jehova ti panangikagumaantayo a mangsurot kadagiti naintiempuan nga instruksion ti organisasion.

13. Ania dagiti pagsayaatanna no dumngegtayo ken Jesus?

13 Pagsayaatantayo no dumngegtayo iti amin nga insuro ni Jesus. Impasigurado ni Jesus kadagiti adalanna a magin-awaanda kadagiti pannursurona. “Magin-awaankayto,” kinunana. “Ta naasi ti sangolko, ken nalag-an ti awitko.” (Mat. 11:28-30) Ti Sao ti Dios, a pakairamanan ti uppat nga Ebanghelio maipapan iti biag ken ministerio ni Jesus, ket makapagin-awa, makapabileg iti espiritualidadtayo, ken pagbalinennatayo a masirib. (Sal. 19:7; 23:3) Imbaga ni Jesus: ‘Naragsak dagidiay dumdumngeg iti sao ti Dios ken mangtungtungpal iti dayta!’​—Luc. 11:28.

‘PADAYAGEKTO TI NAGANKO’

14-15. (a) Ania ti maikatlo a gundaway a nagsao ni Jehova manipud langit a nadakamat iti Juan 12:27, 28? (b) Apay a naliwliwa ken napabileg ni Jesus iti sasao ni Jehova?

14 Basaen ti Juan 12:27, 28. Nairekord iti Ebanghelio ni Juan ti maikatlo a gundaway a nagsao ni Jehova manipud langit. Sumagmamano nga aldaw sakbay ti ipapatay ni Jesus, sinelebraranna ti maudi  a Paskuana idiay Jerusalem. “Mariribukanak,” kinunana. Sa inkararagna: “Ama, padayagem ti naganmo.” Kas sungbat, imbaga ni Amana manipud langit: “Pinadayagko dayta ket padayagekto manen.”

15 Nariribukan ni Jesus gapu iti dakkel a responsabilidadna nga agtalinaed a matalek ken Jehova. Ammo ni Jesus a makapasarto iti nakaro a pannakasapsaplit ken naulpit nga ipapatay. (Mat. 26:38) Ngem ti kapatgan iti amin, kayat ni Jesus a maipadayag ti nagan ni Amana. Naakusaran a nagsao maibusor iti Dios, ken maseknan iti pannakaibabain ti Dios gapu iti ipapatayna. Sigurado a napabileg ni Jesus kadagiti imbaga ni Jehova! Masiguradona a maipadayagto ti nagan ni Jehova. Dakkel a liwliwa ken Jesus ti imbaga ni Amana ken napabileg a mangsango iti mapasamak kenkuana. Nupay mabalin a ni laeng Jesus ti nakatarus iti imbaga ni Amana iti dayta a gundaway, sinigurado ni Jehova a maisurat ti sasaona para kadatayo.​—Juan 12:29, 30.

Padayagen ni Jehova ti naganna ken isalakanna ti ilina (Kitaen ti parapo 16) *

16. Apay a mabalin a maseknantayo no dadduma a maibabain ti nagan ti Dios?

16 Kas ken Jesus, baka maseknantayo met a maibabain ti nagan ni Jehova. Nalabit kas ken Jesus, biktimatayo iti saan a patas a pannakatrato. Wenno mabalin nga apektadotayo kadagiti ulbod nga estoria nga iwarwaras dagiti bumusbusor kadatayo. Mabalin a pampanunotentayo ti pannakaibabain ti nagan ni Jehova ken ti organisasionna  gapu kadagitoy. Kadagiti kasta a gundaway, makaliwliwa unay kadatayo ti sasao ni Jehova. Ditay koma unay madanagan. Masiguradotayo a “ti talna ti Dios a mangartap iti amin a pannakaawat salaknibannanto ti puso ken isip[tayo] babaen ken Kristo Jesus.” (Fil. 4:6, 7) Kanayon a padayagen ni Jehova ti naganna. Babaen ti Pagarianna, pukawennanto ti amin nga impalak-am ni Satanas ken ti lubongna kadagiti matalek nga adipen ti Dios.​—Sal. 94:22, 23; Isa. 65:17.

MAGUNGGONAANTAYO ITA ITI TIMEK NI JEHOVA

17. Maitunos iti Isaias 30:21, kasano a makisarsarita ita ni Jehova kadatayo?

17 Makisarsarita pay laeng ita ni Jehova kadatayo. (Basaen ti Isaias 30:21.) Agpayso a saantayon a mangngeg ti Dios nga agsao manipud langit. Ngem intedna ti naisurat a Saona, ti Biblia, a mangipapaay kadatayo iti instruksion. Kanayonanna, tigtignayen ti espiritu ni Jehova ti “matalek a mayordomo” a kanayon a mangipapaay iti naespirituan a taraon kadagiti adipenna. (Luc. 12:42) Talaga nga aglaplapusanan ti maaw-awattayo a naespirituan a taraon, kas kadagiti nayimprenta ken online a material, video, ken audio a publikasion!

18. Kasano a ti sasao ni Jehova mapabilegna ti pammatim ken mapaturednaka?

18 Laglagipentayo ti sasao ni Jehova idi adda ditoy daga ti Anakna! Sapay koma ta ti sasao ti Dios a nairekord iti Biblia pabilgenna ti panagtalektayo a kontrolado ni Jehova ti amin a bambanag ken pukawennanto ti aniaman nga impalak-am ni Satanas ken ti dakes a lubongna. Ken determinadotayo koma a dumngeg a naimbag iti timek ni Jehova. Iti kasta, maibturantayo ti aniaman a problematayo iti agdama ken aniaman a karit a pakaipasanguantayo. Ipalagip ti Biblia: “Masapul nga agibturkayo, tapno kalpasan a naaramidyon ti pagayatan ti Dios, mabalinyon nga awaten ti kaitungpalan ti kari.”​—Heb. 10:36.

KANTA 4 “Ni Jehova ti Pastorko”

^ par. 5 Idi adda ni Jesus ditoy daga, namitlo a nagsao ni Jehova manipud langit. Iti maysa kadagita, pinaregta ni Jehova dagiti adalan ni Kristo a dumngegda iti Anakna. Ita, makisarsarita kadatayo ni Jehova babaen ti naisurat a Saona, a pakairamanan dagiti sursuro ni Jesus, ken babaen ti organisasionna. Maadal iti daytoy nga artikulo no kasanotayo a magunggonaan no dumngegtayo ken Jehova ken ni Jesus.

^ par. 52 DAGITI LADAWAN: Mapalpaliiw ti maysa a panglakayen ti ministerial nga adipen a tumultulong iti panangmantener iti Kingdom Hall ken as-asikasuenna dagiti literatura. Naimpusuan a komkomendaran ti panglakayen.

^ par. 54 TI LADAWAN: Agassawa idiay Sierra Leone a mangmangted iti imbitasion iti gimong iti maysa a mangngalap.

^ par. 56 TI LADAWAN: Aggigimong dagiti Saksi iti pribado a balay ta maiparit ti trabahotayo iti pagilianda. Saan unay a pormal ti badoda tapno saanda a mapagsuspetsaan.