Mapan iti linaonna

Mapan iti listaan dagiti linaonna

 MAADAL NGA ARTIKULO 10

Ania ti Makalapped Kaniak nga Agpabautisar?

Ania ti Makalapped Kaniak nga Agpabautisar?

“Timmapog ni Felipe ken ti eunuko iti danum, ket binautisaranna.”​—ARA. 8:38.

KANTA 52 Panagdedikar kas Kristiano

ITI DAYTOY A PANAGADAL *

1. Ania ti napukaw da Adan ken Eva, ken ania ti resultana?

PANAGKUNAM, asino ti rumbeng a mangaramid iti pagalagadan no ania ti naimbag ken dakes? Idi kinnan da Adan ken Eva ti bunga ti kayo a pakaammuan iti naimbag ken dakes, impakitada a saanda a nagtalek ken Jehova ken kadagiti pagalagadanna. Nangaramidda iti bukodda a pagalagadan no ania ti naimbag ken dakes. (Gen. 3:22) Ngem panunotem ti napukawda—ti pannakigayyemda ken Jehova ken ti gundawayda nga agbiag nga agnanayon. Impatawidda pay ti basol ken patay kadagiti annakda. (Roma 5:12) Nakaladladingit ti resulta ti desision da Adan ken Eva.

Kalpasan nga inawat ti Etiope a eunuko ni Jesus, kayatnan ti agpabautisar a dagus (Kitaen ti parapo 2-3)

2-3. (a) Ania ti reaksion ti Etiope a eunuko idi kinasabaan ni Felipe? (b) Ania dagiti bendisiontayo no agpabautisartayo, ken ania dagiti saludsod nga usigentayo?

2 Ikomparam ti inaramid da Adan ken Eva iti kababalin ti Etiope a eunuko. Idi kinasabaan ni Felipe, inapresiarna unay ti inaramid ni Jehova ken ni Jesus para kenkuana isu a dagus a nagpabautisar. (Ara. 8:34-38) Idi nagdedikartayo iti Dios sa nagpabautisartayo a kas iti eunuko, impakitatayo nga ap-apresiarentayo ti inaramid ni Jehova ken ni Jesus para kadatayo. Impakitatayo met nga agtaltalektayo ken Jehova ken bigbigbigentayo nga isuna ti makinkalintegan a mangaramid iti pagalagadan iti naimbag ken dakes.

3 Panunotem met dagiti bendision nga awatentayo no agserbitayo ken Jehova! Mabalin a maisublinto kadatayo ti amin a napukaw da Adan ken Eva, agraman ti gundaway nga agbiag nga agnanayon. Gapu iti pammatitayo ken  Jesu-Kristo, pakawanennatayo ni Jehova ken maaddaantayo iti nadalus a konsiensia. (Mat. 20:28; Ara. 10:43) Agbalintayo met a paset ti pamilia ni Jehova a buklen dagiti inanamonganna, nga addaan iti nagsayaat a masakbayan. (Juan 10:14-16; Roma 8:20, 21) Iti laksid dagitoy a bendision, adda dagiti makaam-ammo ken Jehova a maamak a mangtulad iti ehemplo ti Etiope a eunuko. Ania ti mabalin a makalapped iti panagpabautisarda? Ken kasano a mapagballigianda dagita?

DAGITI KARIT A MANGLAPPED ITI DADDUMA NGA AGPABAUTISAR

Dagiti karit a pakaipasanguan ti dadduma sakbay nga agpabautisarda

Kinaawan Kompiansa (Kitaen ti parapo 4-5) *

4-5. Ania dagiti karit a nakaipasanguan dagiti agtutubo a da Avery ken Hannah?

4 Kinaawan kompiansa. Saksi ni Jehova dagiti nagannak ti agtutubo a lalaki a ni Avery. Nasayaat ti reputasion ni tatangna kas naayat nga ama ken nasayaat a panglakayen. Ngem dina pay kayat ti agpabautisar. Apay? “Kasla diak matulad ti kinasayaat ni Tatang,” kinunana. Ken ipapanna a dinanto kaya dagiti responsabilidad a maited kenkuana. “Baka ibagada a siak ti mangidaulo iti kararag, agpalawag, wenno mangidaulo iti panangasaba.”

5 Ni Hannah, agtawen iti 18, ket sobra ti kinaawan kompiansana. Agserserbi ken Jehova dagiti nagannakna. Nupay kasta, nagduadua no kabaelanna a suroten dagiti pagalagadan ni Jehova. Apay? Nababa ti panagkita ni Hannah iti bagina. No dadduma, nakaro ti lidayna nga uray la saktanna ti bagina, a mangpakaro laeng iti kasasaadna. “Awan nangibagbagaak iti ar-aramidek, uray kadagiti nagannakko,” kinunana, “ket pinanunotko a saannak a pulos kayat ni Jehova gapu iti ar-aramidek iti bagik.”

Impluensia ti Gagayyem (Kitaen ti parapo 6) *

6. Ania ti nakalapped ken Vanessa nga agpabautisar?

6 Impluensia ti gagayyem. Imbaga ni Vanessa, nga agtawen iti 22, “Adda nasinged a gayyemko iti dandanin maysa a dekada.” Ngem, saanna a sinuportaran ti plano ni Vanessa nga agpabautisar. Nasaktan ni Vanessa, ket kinunana, “Marigatanak a makigayyem, isu a madanaganak a no putdek ti panaggayyemmi, baka diakon makabirok iti sabali.”

Buteng a Makabasol (Kitaen ti parapo 7) *

7. Ania ti pagbutbutngan ti agtutubo a ni Makayla, ken apay?

7 Buteng a makabasol. Lima ti tawen ni Makayla idi nailaksid ni manongna. Bayat a dumakdakkel, nakitana ti epekto dayta kadagiti nagannakna. “Mabutengak nga agpabautisar,” kuna ni Makayla, “baka makabasolakto met laeng, mailaksidak, ket lalo a malidayan dagiti nagannakko.”

Buteng a Mabusbusor (Kitaen ti parapo 8) *

8. Ania ti pagbutbutngan ti agtutubo a lalaki a ni Miles?

 8 Buteng a mabusbusor. Saksi ni Jehova ti tatang ni Miles ken ti agsiuman kenkuana, ngem saan a Saksi ti agpayso a nanangna. “Nagyanak ken nanangko iti 18 a tawen,” kuna ni Miles, “ket mabutengak a mangibaga a kayatko ti agpabautisar. Nakitakon ti reaksionna idi nagbalin a Saksi ni tatangko. Mabutengak iti mabalin nga aramidenna kaniak.”

KASANO A MAPAGBALLIGIAM DAGITI KARIT?

9. Anianto ti mabalin a mapasamak no maammuam ti kinamanagayat ken kinaanus ni Jehova?

9 Saan a pinili da Adan ken Eva ti agserbi ken Jehova ta saanda a napatanor ti nauneg a panagayat kenkuana. Uray kasta, impalubos ni Jehova nga agtultuloyda nga agbiag, maaddaan iti annak, ken agaramid iti bukodda a pagalagadan iti panangpadakkel iti annakda. Idi agangay, dagiti resulta ti desision da Adan ken Eva a sumina ken Jehova ti nalawag a mangipakita iti kinamaagda. Pinatay ti inauna nga anakda ti kabsatna, ket idi agangay, nagsaknap ti kinaranggas ken kinamanagimbubukodan iti sangatauan. (Gen. 4:8; 6:11-13) Ngem nangaramid ni Jehova iti pamay-an tapno maisalakanna dagiti annak da Adan ken Eva a mayat nga agserbi kenkuana. (Juan 6:38-40, 57, 58) Bayat a maam-ammuam ti kinaanus ken kinamanagayat ni Jehova, mabalin nga umun-uneg met ti ayatmo kenkuana. Saanmonto a kayat a suroten ti desision da Adan ken Eva no di ket idedikarmo ti bagim ken Jehova.

No kasanom a mapagballigian dagitoy

(Kitaen ti parapo 9-10) *

10. Apay a makatulong iti panagserbim ken Jehova ti panangutobmo iti Salmo 19:7?

10 Itultuloymo ti agsursuro maipapan ken Jehova. Bayat nga ad-adu ti masursurom maipapan ken Jehova, dakdakkel met ti kompiansam a kabaelam ti agserbi kenkuana. Kuna ni Avery, a nadakamat itay: “Naaddaanak iti kompiansa idi mabasa ken mautobko ti kari ti Salmo 19:7.” (Basaen.) Idi nakita ni Avery no kasano a tinungpal ni Jehova dayta a karina, immuneg ti panagayatna iti Dios. Ti ayat ket saan laeng a mangted iti kompiansa; tulongannatayo  met nga agpokus ken Jehova ken mangaramid iti kayatna. Kuna ni Hannah, a nadakamat itay: “Babaen ti personal a panagadalko ken panagbasak iti Biblia, natarusak a no saksaktak ti bagik, saksaktak met ni Jehova.” (1 Ped. 5:7) Nagbalin ni Hannah a ‘managtungpal iti sao ti Dios.’ (Sant. 1:22) Ania ti resultana? Kunana: “Idi nakitak ti gunggona iti panagtulnogko ken Jehova, immuneg ti ayatko kenkuana. Siguradoak itan a kanayon nga iwanwannak ni Jehova no kasapulak ti tulongna.” Saanen a saksaktan ni Hannah ti bagina. Nagdedikar ken Jehova sa nagpabautisar.

(Kitaen ti parapo 11) *

11. Ania ti inaramid ni Vanessa tapno maaddaan iti nasayaat a gagayyem, ken ania ti masursurotayo iti daytoy?

11 Piliem a naimbag dagiti gagayyemmo. Naamiris met laeng ni Vanessa, a nadakamat itay, a ti gayyemna ti makalapped nga agserbi ken Jehova. Isu a pinutedna ti panaggayyemda. Ngem adda pay inaramidna. Inkagumaanna ti mangbirok iti baro a gagayyem iti uneg ti kongregasion. Kunana a nakatulong kenkuana ti ulidan ni Noe ken ti pamiliana. “Napalawlawanda kadagiti tattao a di mangay-ayat ken Jehova,” imbagana, “ngem nasayaat ti impluensiada iti maysa ken maysa.” Idi nabautisaranen, nagpayunir ni Vanessa. Kinunana, “Nakatulong daytoy tapno maaddaanak iti nasayaat a gagayyem saan la nga iti kongregasionko no di ket iti dadduma pay a kongregasion.” Maaddaanka met iti nasayaat a gagayyem no okupadoka iti trabaho nga inted ni Jehova kadatayo.​—Mat. 24:14.

(Kitaen ti parapo 12-15) *

12. Ania a kita ti buteng ti awan kada Adan ken Eva, ken ania ti resultana?

12 Maaddaan iti balanse a panangmatmat iti buteng. Adda dagiti kita ti buteng a pagsayaatantayo. Kas pagarigan, masapul a mariknatayo ti buteng a mapagura ni Jehova. (Sal. 111:10) No koma adda kastoy a panagbuteng da Adan ken Eva, saanda koma a nagrebelde ken Jehova. Idi nagrebeldeda, naluktan dagiti matada ket naamirisda a managbasolda. Ti laeng naipatawidda kadagiti annakda ket  basol ken ipapatay. Gapu ta makita wenno maawatanda ti kasasaadda, nagbainda iti kinalamolamoda ket inabbonganda ti bagbagida.​—Gen. 3:7, 21.

13-14. (a) Sigun iti 1 Pedro 3:21, apay a saan koma a nalabes ti panagbutengtayo iti ipapatay? (b) Ania dagiti rasontayo a mangayat ken Jehova?

13 Masapul a kabutengtayo ni Jehova ngem saan koma a nalabes ti panagbutengtayo iti ipapatay. Nangaramid ni Jehova iti pamay-an tapno maaddaantayo iti biag nga agnanayon. No makabasoltayo ngem naimpusuan nga agbabawitayo, palabsen ni Jehova dagiti kamalitayo. Pakawanennatayo gapu iti pammatitayo iti daton a subbot ti Anakna. Ti maysa kadagiti kapatgan a pamay-an a maipakitatayo ti pammati ket ti panagdedikartayo iti Dios ken panagpabautisar.​—Basaen ti 1 Pedro 3:21.

14 Adu ti rasontayo a mangayat ken Jehova. Saanna laeng nga ipapaay ti bambanag a tagtagiragsakentayo iti inaldaw no di ket isursurona pay kadatayo ti kinapudno maipapan kenkuana ken kadagiti panggepna. (Juan 8:31, 32) Intedna ti kongregasion Kristiano a mangidalan ken mangsuporta kadatayo. Tultulongannatayo a mangibtur kadagiti problematayo, ken iyaw-awisna ti namnama nga agbiagto iti agnanayon iti perpekto a kasasaad. (Sal. 68:19; Apoc. 21:3, 4) No utobentayo ti kinaadu ti naaramidanen ni Jehova tapno maipakitana ti ayatna kadatayo, matignaytayo a mangayat kenkuana. Ken no ayatentayo ni Jehova, maaddaantayo iti umiso a kita ti buteng​—ti buteng a masaktantayo Daydiay ay-ayatentayo unay.

15. Kasano a nalabanan ni Makayla ti buteng a makabasol?

15 Napagballigian ni Makayla, a nadakamat itay, ti butengna a makabasol idi naawatanna a manangpakawan ni Jehova. “Nabigbigko nga imperpekto ken agkamalitayo amin. Ngem naawatak met nga ay-ayatennatayo ni Jehova ken pakawanennatayo maibatay iti subbot.” Ti ayatna ken Jehova ti nangtignay kenkuana nga agdedikar ken agpabautisar.

(Kitaen ti parapo 16) *

16. Kasano a natulongan ni Miles a manglaban iti butengna a mabusor?

16 Ni Miles, a mabuteng a busoren ni nanangna ti desisionna nga agpabautisar, ket nagpabalakad iti manangaywan iti sirkito. Imbaga ni Miles: “Saan met a Saksi ni nanangna. Tinulongannak a mangpanunot no ania ti ibagak tapno maawatan ni nanangko a desisionko ti agpabautisar ken saannak a pinilit ni tatangko.” Saan a naragsakan ti nanang ni Miles iti desisionna. Di nagbayag, kasapulan a pumanaw iti balay ni nanangna, ngem tinakderanna ti desisionna. “Natukay ti pusok idi naadalko ti naimbag a bambanag nga inaramid kaniak ni Jehova,” imbagana. “Idi pinampanunotko ti daton a subbot ni Jesus, naawatak nga ay-ayatennak unay ni Jehova.  Dayta ti nakatignayak nga agdedikar ken Jehova ken agpabautisar.”

TAKDERAM TI DESISIONMO

Maipakitatayo nga ap-apresiarentayo ti inaramid ti Dios para kadatayo (Kitaen ti parapo 17)

17. Ania a gundaway ti adda kadatayo?

17 Idi nangan ni Eva iti bunga daydiay a kayo idiay Eden, linaksidna ni Amana. Idi nangan met ni Adan iti dayta, impakitana ti kinaawan panagyamanna iti amin a kinaimbag nga inaramid ni Jehova kenkuana. Addaantayo amin iti gundaway a mangipakita a ditay umanamong iti desision da Adan ken Eva. No agpabautisartayo, ipakpakitatayo a patientayo a ni Jehova ti adda autoridadna a mangaramid iti pagalagadan no ania ti umiso ken dakes para kadatayo. Pampaneknekantayo nga ay-ayaten ken pagtaltalkantayo ti Amatayo.

18. Kasano nga agballigika iti panagserbim ken Jehova?

18 Kalpasan ti bautismo, masapul nga inaldaw a surotentayo dagiti pagalagadan ni Jehova, saan a ti kayattayo. Kasta ti ar-aramiden ita ti minilion nga adipen ti Dios. Matuladmo ida no itultuloymo a paunegen ti pannakaawatmo iti Sao ti Dios, ti Biblia; regular a makikaduaka kadagiti kakabsat; ken sireregta nga iranudmo dagiti naadalmo maipapan iti naayat nga Amam. (Heb. 10:24, 25) No mangaramidka kadagiti desision, surotem ti balakad ni Jehova a naggapu iti Saona ken iti organisasionna. (Isa. 30:21) Iti kasta, agballiginto ti amin nga aramidem.​—Prov. 16:3, 20.

19. Ania ti rumbeng nga itultuloymo a bigbigen, ken apay?

19 No itultuloymo a bigbigen nga adu ti nagunggonam iti panangidalan ni Jehova, umuneg ti ayatmo kenkuana ken kadagiti pagalagadanna. Ket awanto ti aniaman nga itukon ni Satanas a mangpasardeng iti panagserbim ken Jehova. Panunotem no ania ti pagbalinam sangaribu a tawen manipud ita. Malagipmonto a ti kasayaatan pay laeng a desisionmo ket ti panagpabautisarmo!

KANTA 28 Pannakigayyem ken Jehova

^ par. 5 Ti kapatgan pay laeng a desision nga aramidem ket ti panagpabautisar. Apay a nakapatpateg dayta? Sungbatan daytoy nga artikulo dayta a saludsod. Tulonganna met dagiti agplamplano nga agpabautisar tapno mapagballigianda dagiti posible a lapped.

^ par. 56 TI LADAWAN: Kompiansa: Agnerbios nga agkomento ti agtutubo.

^ par. 58 TI LADAWAN: Gagayyem: Mabain ti agtutubo a Saksi idi nakitana dagiti padana a Saksi ta di nasayaat ti gayyemna.

^ par. 60 TI LADAWAN: Panagbasol: Nailaksid ti manong ti agtutubo a babai sa pimmanaw iti balayda, ket madanagan a baka makabasolto met.

^ par. 62 TI LADAWAN: Pannakabusor: Agnerbios nga agkararag ti agtutubo a lalaki bayat a kitkitaen ti di manamati a nanangna.

^ par. 65 TI LADAWAN: Kompiansa: Pinasayaat ti agtutubo a lalaki ti personal a panagadalna.

^ par. 67 TI LADAWAN: Gagayyem: Nasursuro ti agtutubo a Saksi a saanna nga ibain ti kina-Saksina.

^ par. 69 TI LADAWAN: Panagbasol: Impapuso ti agtutubo a babai ti kinapudno ken nagpabautisar.

^ par. 71 TI LADAWAN: Pannakabusor: Situtured nga inlawlawag ti agtutubo a lalaki ken nanangna ti pammatina.