Mapan iti linaonna

Mapan iti listaan dagiti linaonna

“Agyamankayo Gapu iti Amin a Banag”

“Agyamankayo Gapu iti Amin a Banag”

PANAGKUNAM, managyamanka kadi? Masapul a panunotentayo amin daytoy a saludsod. Impadto ti Biblia a “saan a managyaman” ti adu a tattao iti panawentayo. (2 Tim. 3:2) Mabalin nga adda dagiti am-ammom nga ipapanda a maikarida iti amin nga adda kadakuada. Mabalin a mariknada a saanda a kasapulan ti agyaman kadagiti banag a maaw-awatda. Saan kadi a makapasuron ti makikadua kadagiti kasta a tattao?

Iti sabali a bangir, naibaga kadagiti adipen ni Jehova: “Ipakitayo a managyamankayo.” Masapul nga ‘agyamantayo gapu iti amin a banag.’ (Col. 3:15; 1 Tes. 5:18) Kinapudnona, pagsayaatantayo no managyamantayo. Adda sumagmamano a rason no apay.

AGBALIN A BALANSE TI PANANGMATMATMO ITI BAGIM

No managyamantayo, agbalin a positibo ti panangmatmattayo iti bagitayo. Maysa dayta a rason a masapul nga agbalintayo a managyaman. No agyaman ti maysa, sumayaat ti panagkitana iti bagina, ket mabalin a kasta met ti marikna ti nangibagaanna iti dayta. Apay nga agpada a kasta ti epekto ti panagyaman? Panunotenyo daytoy: No kayat ti dadduma ti agaramid iti maysa a banag para kenka, saan kadi nga ipakita dayta a napategka kadakuada? Maseknanda kenka. No mariknam dayta, sumayaat la ketdi ti panagkitam iti bagim. Kasta ti napasamak ken Ruth. Nagbalin a naparabur kenkuana ni Boaz. Awan duadua a nakaragragsak ni Ruth ta nabigbigna nga adda maseknan kenkuana.—Ruth 2:10-13.

Ad-adda a rumbeng nga agyamantayo iti Dios. Sigurado a mapampanunotmo ti adu a naespirituan ken material a sagut nga impaayna ken agtultuloy nga ipapaayna. (Deut. 8:17, 18; Ara. 14:17) Ngem imbes nga apagbiit laeng a panunotem ti kinaimbag ti Dios, utobem ti adu a bendision nga intedna kenka ken kadagiti ipatpategmo. No utobem ti kinaparabur ti Namarsua, mas maapresiarmo isuna ken ad-adda a mariknam ti napalalo nga ayat ken panangipategna kenka.—1 Juan 4:9.

Ngem saantayo laeng nga utoben dagiti ipapaay ni Jehova kadatayo no di ket agyamantayo pay iti kinaimbagna. (Sal. 100:4, 5) Kuna ti maysa a reperensia a “dakkel ti maitulong ti panagyaman tapno agbalin a naragsak ti tao.”

SUMINGEDKA ITI SABSABALI

Adda pay sabali a rason no apay a pagsayaatam no agyamanka: Bumileg ti pannakigayyemmo iti sabali a tao. Kasapulantayo amin a marikna a maap-apresiartayo. No naimpusuan nga agyamanka iti maysa a tao gapu iti nasayaat nga inaramidna, ad-adda a sumingedkayo. (Roma 16:3, 4) Kasta met, ad-adda nga agbalin a manangtulong dagiti managyaman a tattao. Makitada dagiti kinaimbag a naipakita kadakuada, isu a matignayda a mangipakita met iti kinaimbag. Wen, agresulta iti kinaragsak ti panangtulong iti sabsabali. Kasta ti imbaga ni Jesus: “Naragragsak ti mangted ngem ti umawat.”—Ara. 20:35.

Imbaga ni Robert Emmons a maysa kadagiti direktor iti panagadal maipapan iti kinamanagyaman iti University of California: “Tapno agbalintayo a managyaman, masapul a bigbigentayo a kasapulantayo ti maysa ken maysa. No dadduma, datayo ti mangted; no dadduma met, datayo ti umawat.” Kinapudnona, kasapulantayo ti suporta ti dadduma iti adu a pamay-an tapno agtultuloytayo nga agbiag ken naragsak. Kas pagarigan, mabalin nga ipaayda ti taraontayo wenno ti medikal a tulong a kasapulantayo. (1 Cor. 12:21) Apresiaren ti managyaman a tao ti ar-aramiden ti dadduma para kenkuana. No kasta, nayugalim  kadin nga iyebkas ti panagyamanmo iti ar-aramiden ti dadduma para kenka?

AGBALIN A POSITIBO TI PANANGMATMATMO ITI BIAG

Daytoy ti sabali pay a rason no apay a masapul nga agbalinka a managyaman: Makatulong dayta tapno agbalinka a positibo imbes a negatibo. Ti panunot ket kasla maysa a sagatan. Mabalinna a lapdan dagiti negatibo a banag tapno agtalinaed iti panunotmo dagiti positibo a banag. Iti kasta, saanka unay nga agpokus kadagiti problema. No ad-adda a managyamanka, ad-adu ti makitam a nasayaat, ket ad-adda pay nga agbalinka a managyaman. No agpokuska iti bambanag a mabalinmo a pagyamanan, maaramidmo ti imparegta ni apostol Pablo: “Kanayon nga agragsakkayo gapu iti Apo.”​—Fil. 4:4.

Ti kinamanagyaman ket pangontra iti kinanegatibo. Saan kadi a no managyamanka, narigat ti makarikna iti apal, liday, wenno pungtot? Kasta met, basbassit ti posibilidadna nga agbalin a materialistiko dagiti managyaman. Kontentoda iti adda kadakuada ken saanda nga agtarigagay iti ad-adu pay.​—Fil. 4:12.

BILANGEM DAGITI BENDISION A MAAW-AWATMO!

Kas Kristiano, ammom a kayat ni Satanas a naliday ken maupayka gapu kadagiti rigat a pakaipaspasanguam bayat ti maudi nga al-aldaw. Maayatan no agbalinka a negatibo ken managreklamo. No kastaka, saanka unay nga epektibo a mangidanon iti naimbag a damag. Kinapudnona, ti panagbalin a managyaman ket maitunos iti bunga ti nasantuan nga espiritu ti Dios​—a pakairamanan ti rag-o gapu iti nagsasayaat a banag nga inted kenka ti Dios, kasta met ti pammati iti amin a karina.​—Gal. 5:22, 23.

Kas adipen ni Jehova, nalabit umanamongka kadagiti nabasam iti daytoy nga artikulo maipapan iti kinamanagyaman. Ngem ammom a saan a nalaka ti agbalin a managyaman ken positibo. Dimo ipalubos a dayta ti mangupay kenka. Kabaelam ti agbalin a managyaman ken agtalinaed a kasta. Kasano? Inaldaw a panunotem dagiti banag a mabalinmo a pagyamanan. No kanayonmo nga aramiden dayta, mas naturalton nga agyamanka. Iti kasta, adayo a naragragsakka ngem kadagidiay nakapokus iti problema. Panunotem ti nasayaat a bambanag nga ar-aramiden ti Dios ken ti dadduma tapno maparegtaka ken agbalinka a naragsak. Mabalinmo nga isurat dagita. Mabalinmo nga ilista ti dua wenno tallo a banag a pagyamyamanam iti tunggal aldaw.

Nadiskobre dagiti eksperto a no kanayon nga agyamantayo, mabaliwan ti panagandar ti utektayo ket nalaklakatayo a marikna ti pannakapnek iti biag. Naragragsak ti managyaman a tao. Bilangem ngarud dagiti bendision a maaw-awatmo, lagipem dagiti nagsasayaat a kapadasam, ken iyugalim ti agyaman! Imbes a laglag-anentayo dagiti bendision a maaw-awattayo, “agyaman[tayo] ken Jehova, ta isu ket naimbag.” Wen, “agyaman[tayo] gapu iti amin a banag.”​—1 Cron. 16:34; 1 Tes. 5:18.