Mapan iti linaonna

Mapan iti listaan dagiti linaonna

 MAADAL NGA ARTIKULO 49

“Adda Tiempo” ti Panagtrabaho ken Panaginana

“Adda Tiempo” ti Panagtrabaho ken Panaginana

“Intayo iti awan matataona a lugar ta aginanatayo biit.”—MAR. 6:31.

KANTA 143 Agbantay, Agtrabaho, ken Aguray

ITI DAYTOY A PANAGADAL *

1. Ania ti panangmatmat dagiti tattao maipapan iti trabaho?

ITI lugaryo, ania ti panangmatmat ti kaaduan maipapan iti trabaho? Iti adu a pagilian, ad-adda itan nga igagaed dagiti tattao ti agtrabaho. Kaaduanna a dagidiay sobra ti panagtrabahoda ket awan ti panawenda nga aginana, makikadua iti pamiliada, wenno mangasikaso iti naespirituan a kasapulanda. (Ecl. 2:23) Iti sabali a bangir, adda met dagidiay saanda a pulos kayat ti agtrabaho ket agbirokda iti pagpambar a saan nga agtrabaho.​—Prov. 26:13, 14.

2-3. Ania nga ulidan ti impakita ni Jehova ken ni Jesus maipapan iti trabaho?

2 Saan a balanse ti panangmatmat ti lubong maipapan iti trabaho, ngem naiduma ti panangmatmat ni Jehova ken ni Jesus. Ammotayo a magusgustuan ni Jehova ti agtrabaho. Pinaneknekan ni Jesus dayta idi imbagana: “Agtrabtrabaho ni Amak agingga ita, isu nga agtrabtrabahoak met.” (Juan 5:17) Panunotem ti amin nga inaramid ti Dios idi pinarsuana ti di mabilang nga espiritu a parsua ken ti naglawa nga uniberso. Makitatayo met ti adu a nagpipintas a parsuana ditoy daga. Umiso ti kinuna ti salmista: “O Jehova, anian a nakaad-adu dagiti inaramidmo! Pinarsuam amin ida babaen ti siribmo. Napno ti daga kadagiti pinataudmo.”​—Sal. 104:24.

3 Tinulad ni Jesus ni Amana. Timmulong daytoy nga Anak idi “insagana [ti Dios] ti langit.” Kadua idi isuna ni Jehova “kas eksperto a trabahador.” (Prov. 8:27-31) Idi adda ni Jesus ditoy daga, nagpaiduma a trabaho ti inaramidna.  Imbilangna dayta a trabaho kas taraon, ket paneknekan ti amin nga inaramidna nga isu ket imbaon ti Dios.​—Juan 4:34; 5:36; 14:10.

4. Ania ti masursurotayo ken Jehova ken ni Jesus maipapan iti panaginana?

4 Ipakita kadi ti kinagaget ni Jehova ken ni Jesus a saantayon a kasapulan ti aginana? Saan a pulos. Saan a mabambannog ni Jehova, isu a dina kasapulan ti pisikal a panaginana. Pudno nga ibaga ti Biblia a kalpasan a pinarsua ni Jehova ti langit ken ti daga, “naginana . . . ket naragsakan.” (Ex. 31:17) Ngem nalawag a ti kaipapanan dayta ket nagsardeng ni Jehova nga agparsua ken tinagiragsakna dagiti inaramidna. Ken uray no nagaget a nagtrabaho ni Jesus idi adda ditoy daga, inwayaanna ti aginana ken makipangan kadagiti gagayyemna.​—Mat. 14:13; Luc. 7:34.

5. Ania ti pagrigatan ti adu?

5 Iparparegta ti Biblia kadagiti adipen ti Dios a tagiragsakenda ti agtrabaho. Masapul nga agbalinda a nagaget imbes a nasadut. (Prov. 15:19) Mabalin nga agtrabtrabahoka tapno masuportaram ti pamiliam. Ken responsabilidad ti amin nga adalan ni Kristo ti makiraman iti trabaho a panangikasaba iti naimbag a damag. Ngem kasapulam met ti umdas nga inana. Marigatanka kadi no dadduma a mangbalanse iti panawenmo iti trabaho, ministerio, ken iti panaginana? Kasanotayo a maammuan ti balanse a panagtrabaho ken panaginana?

NO KASANO TI AGBALIN A BALANSE

6. Kasano nga ipakita ti Marcos 6:30-34 a balanse ti panangmatmat ni Jesus iti trabaho ken panaginana?

6 Napateg ti kinabalanse iti panagtrabaho. Inwanwan ti Dios ni Ari Solomon a mangisurat: “Adda tiempo ti . . . tunggal aramid.” Dinakamatna ti panagmula, panagibangon, panagsangit, panagkatawa, panagsala, ken dadduma pay. (Ecl. 3:1-8) Nalawag nga importante a paset ti biag ti panagtrabaho ken panaginana. Balanse ti panangmatmat ni Jesus iti trabaho ken panaginana. Naminsan, idi nagsubli dagiti apostol ken Jesus kalpasan ti panangasabada, nagbalinda nga okupado nga uray la “dida payen masango ti mangan.” Gapuna, kinuna ni Jesus: “Intayo iti awan matataona a lugar ta aginanatayo biit.” (Basaen ti Marcos 6:30-34.) Uray adda dagiti gundaway a saan a nakainana ni Jesus ken dagiti adalanna, ammona a kasapulanda amin ti aginana.

7. Kasano a makatulong no usigentayo ti linteg ti Sabbath?

7 No dadduma, kasapulan nga aginanatayo wenno baliwantayo ti rutinatayo. Makitatayo dayta iti maysa nga urnos nga inaramid ti Dios para kadagiti adipenna idi un-unana—ti linawas a Sabbath. Saantayon nga obligado a mangsurot iti Mosaiko a Linteg, ngem makatulong no usigentayo ti ibagbaga dayta maipapan iti Sabbath. Makatulong dayta tapno maammuantayo no balanse ti panangmatmattayo iti trabaho ken panaginana.

TI SABBATH​—TIEMPO PARA ITI PANAGINANA KEN PANAGDAYDAYAW

8. Sigun iti Exodo 31:12-15, para iti ania ti aldaw ti Sabbath?

8 Sigun iti Biblia, kalpasan ti innem nga “aldaw” ti panamarsua, nagsardeng ti Dios nga agparsua ditoy daga. (Gen. 2:2) Ngem magusgustuan ni Jehova ti agtrabaho, ket iti dadduma a pamay-an, agtultuloy nga “agtrabtrabaho.” (Juan 5:17) Ti urnos ti linawas a Sabbath ket naibatay iti aldaw ti panaginana ni Jehova a nadeskribir iti Genesis. Nagserbi ti Sabbath kas pagilasinan ti espesial a relasion ti Dios iti Israel. Aldaw dayta ti naan-anay a  “panaginana” ken “nasantuan dayta ken Jehova.” (Basaen ti Exodo 31:12-15.) Maiparit nga agtrabaho ti amin, a pakairamanan dagiti ubbing, adipen, ken uray dagiti taraken nga animal. (Ex. 20:10) Gapu iti dayta, ad-adda a makapagpokusda iti naespirituan a bambanag.

9. Ania ti di umiso a panangmatmat dagiti tattao idi tiempo ni Jesus maipapan iti Sabbath?

9 Nagsayaatan ti ili ti Dios ti aldaw ti Sabbath. Ngem adu a lider ti relihion idi tiempo ni Jesus ti istrikto unay ken nalabes ti panangmatmatda iti dayta. Kunada a saan a mabalin iti Sabbath uray ti panangruros laeng iti dawa wenno panangpaimbag iti masakit. (Mar. 2:23-27; 3:2-5) Ngem saan a kasta ti kayat ti Dios, ket pinagminar dayta ni Jesus kadagidiay mayat a dumngeg.

Inusar ti pamilia ni Jesus ti Sabbath tapno makapagpokusda iti naespirituan a bambanag (Kitaen ti parapo 10) *

10. Ania ti masursurotayo iti Mateo 12:9-12 maipapan iti panangmatmat ni Jesus iti Sabbath?

10 Sursuroten idi ni Jesus ken dagiti Judio a pasurotna ti Sabbath gapu ta masapul nga agpasakupda iti Mosaiko a Linteg. * Ngem impakita ni Jesus iti sao ken aramidna a masapul a rasonable ti panangsurot iti Sabbath ken saan a dakes ti agaramid iti naimbag ken tumulong iti dayta nga aldaw. Silalawag nga imbagana: “Maipalubos ti agaramid iti nasayaat iti Sabbath.” (Basaen ti Mateo 12:9-12.) Saanna nga imbilang a maikontra iti Sabbath ti panangaramid iti naimbag ken panangtulong iti sabsabali. Impakita dagiti aramid ni Jesus ti nagpateg a rason nga imbilin ti Dios ti Sabbath.  Gapu ta agin-inana ti ili ti Dios kalpasan ti innem nga aldaw a panagtrabahoda, makapagpokusda iti naespirituan a bambanag. Dimmakkel la ketdi ni Jesus iti pamilia a mangus-usar iti Sabbath tapno rumang-ay ti espiritualidadda. Ammotayo dayta gapu ta mabasatayo maipapan ken Jesus idi adda iti ilina a Nazaret: “Kas iti nakairuaman [ni Jesus] iti aldaw ti Sabbath, simrek iti sinagoga, ket timmakder tapno agbasa.”​—Luc. 4:15-19.

ANIA TI PANANGMATMATMO ITI PANAGTRABAHO?

11. Ania ti nagsayaat nga ulidan ni Jesus maipapan iti panagtrabaho?

11 Sigurado nga insuro ni Jose ken Jesus, a siumanna, ti panangmatmat ti Dios iti panagtrabaho bayat a sansanayenna nga agkarpintero. (Mat. 13:55, 56) Ken nakita la ketdi ni Jesus ti kinagaget ni Jose nga agtrabaho iti inaldaw tapno masustentuan ti dakkel a pamiliana. Makapainteres ta idi agangay, imbaga ni Jesus kadagiti adalanna: “Ti trabahador ket maikari a matangdanan.” (Luc. 10:7) Wen, ammo ni Jesus a napateg ti kinagaget iti panagtrabaho.

12. Ania dagiti teksto a mangipakita iti panangmatmat ti Biblia iti kinagaget?

12 Nagaget met la ni apostol Pablo nga agtrabaho. Ti kangrunaan a trabaho ti apostol ket ti panangikasaba maipapan ken Jesus ken kadagiti insurona. Ngem nagtrabaho latta ni Pablo tapno masuportaranna ti bagina. Ammo dagiti taga-Tesalonica a “nagtrabaho ken nagbannog [ni Pablo] iti aldaw ken rabii tapno saan nga aggasto iti dakkel ti asinoman.” (2 Tes. 3:8; Ara. 20:34, 35) Mabalin a ti tuktukoyen ni Pablo ket ti trabahona a panagaramid iti tolda. Bayat nga adda idiay Corinto, nagdagus kada Aquila ken Priscila ken “nakipagtrabaho kadakuada, ta agar-aramidda iti tolda.” Idi imbaga ni Pablo a nagtrabaho iti “aldaw ken rabii,” saanna a kayat a sawen a dayta lattan ti inob-obrana. Adda met tiempo a saan nga agtrabaho, kas iti aldaw ti Sabbath. Dita a gundawayanna a kasabaan dagiti Judio, a saan met la nga agtrabtrabaho iti Sabbath.​—Ara. 13:14-16, 42-44; 16:13; 18:1-4.

13. Ania ti masursurotayo iti ulidan ni Pablo?

13 Nagsayaat ti ulidan ni apostol Pablo. Kasapulanna ti agtrabaho, ngem siniguradona a regular latta a makiraman iti “nasantuan a trabaho a panangikasaba iti naimbag a damag ti Dios.” (Roma 15:16; 2 Cor. 11:23) Kasta ti imparegtana nga aramiden ti dadduma, isu a da Aquila ken Priscila ket ‘kakaduana nga agserserbi ken Kristo Jesus.’ (Roma 12:11; 16:3) Imparegta ni Pablo kadagiti taga-Corinto a kanayon koma nga ‘adu ti aramidenda iti trabaho ti Apo.’ (1 Cor. 15:58; 2 Cor. 9:8) Inwanwan pay ketdi ni Jehova ni apostol Pablo a mangisurat: “Saan a rumbeng a mangan ti asinoman a dina kayat ti agtrabaho.”—2 Tes. 3:10.

14. Ania ti kayat a sawen ti sasao ni Jesus iti Juan 14:12?

14 Ti kapatgan a trabaho kadagitoy a maudi nga al-aldaw ket ti panangasaba ken panagaramid iti adalan. Impakpakauna pay ketdi ni Jesus nga ad-adunto ti maaramidan dagiti adalanna ngem iti maaramidanna! (Basaen ti Juan 14:12.) Saanna a kayat a sawen a makaaramidtayo met kadagiti milagro a kas kenkuana. Imbes ketdi, mangasaba ken mangisuronto dagiti pasurotna iti ad-adu a lugar, ad-adu a tattao, ken iti at-atiddog a panawen ngem iti naaramidanna.

15. Ania dagiti masapul nga isaludsodtayo iti bagitayo, ken apay?

15 No adda sekular a trabahom, isaludsodmo iti bagim: ‘Am-ammodak kadi iti pagtrabahuak kas nagaget? Ilepleppasko kadi ti trabahok iti umiso a tiempo ken iti kasayaatan a maaramidak?’ No wen ti sungbatmo, maalam  la ketdi ti panagtalek ti boss-mo. Ken posible met nga aginteres dagiti katrabahuam iti mensahe ti Pagarian. Iti met trabaho a panangasaba ken panangisuro, isaludsodmo iti bagim: ‘Am-ammodak kadi a nagaget iti ministerio? Isagsaganak kadi ti ibagak iti damo a pannakisaritak? Sarsarungkarak kadi a dagus dagiti interesado? Ken regular kadi a makiramramanak iti nadumaduma a pamay-an ti panangasaba?’ No wen ti sungbatmo, naragsakka iti ministeriom.

ANIA TI PANANGMATMATMO ITI PANAGINANA?

16. Kasano a naiduma ti panangmatmat ni Jesus ken dagiti apostol iti panangmatmat ti adu ita iti panaginana?

16 Ammo ni Jesus nga adda dagiti gundaway a kasapulanna ken dagiti apostol ti aginana. Ngem adu a tattao idi panawenna ken uray ita ti kas iti nabaknang a tao iti ilustrasion ni Jesus. Imbaga dayta a tao iti bagina: “Agnam-ayka, manganka, uminumka, agragragsakka.” (Luc. 12:19; 2 Tim. 3:4) Impagarupna a ti panaginana ken ragragsak ti kapatgan iti biag. Ngem saan a dagita ti nagpokusan ni Jesus ken dagiti apostolna.

No balansetayo iti trabaho ken iti panaginana, makapagpokustayo iti nasayaat nga ar-aramid a mangpagin-awa kadatayo (Kitaen ti parapo 17) *

17. Kasanotayo nga us-usaren ti aldaw nga awan trabahotayo?

17 Ikagkagumaantayo ita a tuladen ni Jesus. Us-usarentayo ti aldaw nga awan trabahotayo wenno ti day off-tayo saan laeng a tapno aginana no di ket tapno agaramid iti naimbag babaen ti panangasaba ken pannakigimong. Kinapudnona, nakapatpateg kadatayo ti panagaramid iti adalan ken pannakigimong isu nga ikagkagumaantayo ti agbalin a regular kadagita a sagrado nga aktibidad. (Heb. 10:24, 25) Uray nakabakasiontayo, saantayo a liwliwayan ti makigimong sadinoman ti ayantayo, ken mangkitatayo kadagiti oportunidad a mangasaba kadagiti maam-ammotayo.​—2 Tim. 4:2.

18. Ania ti kayat ti Aritayo a ni Kristo Jesus nga aramidentayo?

18 Anian a yamantayo ta saan a nalabes ti namnamaen kadatayo ti Aritayo a ni Kristo Jesus ken tultulongannatayo nga agbalin a balanse iti trabaho ken iti panaginana! (Heb. 4:15) Kayatna nga aginanatayo ta kasapulantayo dayta. Kayatna met a nagagettayo nga agtrabaho tapno masuportarantayo ti bagitayo, ken kayatna a makiramantayo iti makapabang-ar a trabaho a panagaramid iti adalan. Iti sumaruno nga artikulo, pagsasaritaantayo ti inaramid ni Jesus tapno mawayawayaantayo iti naulpit a kita ti pannakaadipen.

KANTA 38 Papigsaennaka

^ par. 5 Isuro ti Kasuratan no kasano a maaddaantayo iti balanse a panangmatmat iti trabaho ken panaginana. Iti daytoy nga artikulo, usarentayo a pagarigan ti linawas a Sabbath a sursuroten idi dagiti Israelita tapno maammuantayo no balanse ti panangmatmattayo iti trabaho ken panaginana.

^ par. 10 Dakkel ti panagraem dagiti adalan iti linteg ti Sabbath nga uray la insardengda ti agsagana para iti pannakaitabon ni Jesus agingga a nalpas ti Sabbath.​—Luc. 23:55, 56.

^ par. 55 LADAWAN: Ikuykuyog ni Jose ti pamiliana iti sinagoga iti aldaw ti Sabbath.

^ par. 57 LADAWAN: Ama nga agtrabtrabaho tapno masuportaranna ti pamiliana, ken us-usarenna ti day off-na para kadagiti naespirituan nga aktibidad, uray no nakabakasionda a pamilia.