Mapan iti linaonna

Mapan iti listaan dagiti linaonna

Natataengan a Kristiano—Ipatpateg ni Jehova ti Kinamatalekyo

Natataengan a Kristiano—Ipatpateg ni Jehova ti Kinamatalekyo

ITI intero a lubong, ipatpateg dagiti panglakayen ti pribilehioda nga agserbi iti ili ti Dios. Talaga a bendisionda kadatayo! Ngem iti di pay nabayag, adda naaramid a panagbalbaliw. Nakiddaw kadagiti nataengan a panglakayen nga ipasada kadagiti mas ub-ubing a panglakayen ti dadduma a nadagsen a responsabilidadda. Kasano?

Ti baro nga urnos ket agsardengen kas manangaywan iti sirkito ken field instructor ti maysa a kabsat no agtawenen iti 70. Dagiti met panglakayen nga agtawenen iti 80 ipasadan kadagiti mas ub-ubing a panglakayen ti dadduma nga annongenda, kas iti panagbalin a koordineytor ti Komite ti Sangay wenno koordineytor ti bagi dagiti panglakayen iti lokal a kongregasion. Ania ti reaksion dagitoy a dungdungnguentayo a nataenganen a panglakayen iti daytoy a panagbalbaliw? Impakitada a matalekda ken Jehova ken iti organisasionna!

“Umanamongak unay iti dayta a desision,” inkomento ni Ken, a nagserbi kas koordineytor ti Komite ti Sangay iti dandani 49 a tawen. “Kinapudnona, iti mismo a bigat a naammuak dayta, inkararagko ken Jehova a mangipaay  iti ub-ubing nga agserbi kas koordineytor.” Ti reaksion ni Ken ket kas iti dadduma pay a matalek a nataengan iti intero a lubong. Siempre, medio nadismayada idi damo gapu ta ipatpategda ti pribilehioda nga agserbi kadagiti kakabsatda.

“Maladingitanak bassit,” kuna ni Esperandio, a koordineytor idi ti bagi dagiti panglakayen iti kongregasionna. Ngem inaminna, “Kasapulak ti ad-adu a tiempo a mangaywan iti kumapkapuyen a salun-atko.” Kas namnamaentayo, intultuloy ni Esperandio ti matalek a panagserbina ken Jehova ken ti panagbalinna a bendision iti kongregasionna.

Komusta met dagiti nabayagen nga agdaldaliasat a manangaywan a nagbaliw ti annongenda? Inadmitir ni Allan, a nagserbi kas agdaldaliasat a manangaywan iti 38 a tawen, “Nakigtotak idi naammuak dayta.” Ngem binigbigna dagiti pagsayaatan ti panangsanay kadagiti mas ub-ubing a lallaki para iti kasta nga annongen, ket nagtultuloy a nagserbi a matalek.

Ni Russell, a nagserbi kas agdaldaliasat a manangaywan ken field instructor, iti agdagup nga 40 a tawen, imbagana a nadismayada ken baketna idi damo. “Ipatpategmi unay ti pribilehiomi ken panagriknami idi, kabaelanmi pay ti agtultuloy iti dayta nga annongen.” Us-usaren da Russell ken ni baketna ti pannakasanay ken kapadasanda a tumulong iti lokal a kongregasion, ket maragragsakan dagiti agibumbunannag a kaduada nga agserserbi.

Uray dimo napadasan ti rikrikna dagiti nadakamat a kakabsat, makatulong kenka ti salaysay iti 2 Samuel tapno maawatam ida.

LALAKI A NAEMMA KEN REALISTIKO

Subliantayo ti napasamak idi nagrebelde ni Absalom nga anak ni Ari David. Pimmanaw ni David idiay Jerusalem ket nagkamang idiay Mahanaim, iti daya ti Karayan Jordan. Agkasapulan idi ni David ken dagiti kakaduana iti taraon ken dadduma pay a banag. Malagipmo no ania ti napasamak?

Tallo a lallaki iti dayta a lugar ti sipaparabur a nangted iti pagturogan, agduduma a makan, ken dadduma pay a banag. Ni Barzillai ti maysa kadakuada. (2 Sam. 17:27-29) Idi saan a nagballigi ti panagrebelde ni Absalom, mabalinen ni David ti agsubli idiay Jerusalem, ket intulod ni Barzillai iti Jordan. Inawis ni David a sumurot idiay Jerusalem. Imbaga ti ari nga abastuanna iti taraon, uray ni Barzillai ket “naindaklan unay,” wenno nakabakbaknang, ken dina kasapulan ti maituktukon a taraon. (2 Sam. 19:31-33) Mabalin a naapresiar ni David dagiti kualidad ni Barzillai ken ti aniaman a maisingasingna. Nagsayaat la ketdi a pribilehio ti agyan ken agtrabaho iti palasio ti ari!

Gapu ta realistiko ken naemma ni Barzillai, imbagana nga agtawenen iti 80. Sa innayonna: “Mailasinko aya ti naimbag ken dakes?” Ania ti kayatna a sawen? Mabalin a naaddaan  ni Barzillai iti sirib bayat ti napaut a panagbiagna. Ket mabalin nga adda pay laeng nasayaat a maibalakadna, kas kadagidi “lallakay” idi tiempo ni Ari Rehoboam. (1 Ar. 12:6, 7; Sal. 92:12-14; Prov. 16:31) Isu nga idi imbaga ni Barzillai ti maipapan iti panangilasin iti naimbag ken dakes, mabalin a tuktukoyenna ti nakapuyen a salun-atna wenno dagiti limitasionna kas maysan a lakay. Imbagana nga apektadon ti panagraman ken panagdengngegna. (Ecl. 12:4, 5) Isu nga insingasing ni Barzillai a ti itugot ni David idiay Jerusalem ket ti ub-ubing a ni Kimham, a mabalin nga anak ni Barzillai.​—2 Sam. 19:35-40.

PANAGPLANO PARA ITI MASANGUANAN

Ti panagbalbaliw gapu iti panaglakay a nadakamat itay ket umasping iti panangmatmat nga impakita ni Barzillai. Ita, nalawag a saan laeng a dagiti situasion ken abilidad ti maysa ti maikabilangan, kas iti kaso ni Barzillai. Masapul met a realistiko a maikabilangan ti pagsayaatan dagiti matalek a panglakayen iti intero a lubong.

Makita dagitoy a naemma a natataengan a Kristiano a lallaki nga ad-adda a rumang-ay ti organisasion ni Jehova no dagiti mas ub-ubing a kakabsat ti mangasikaso kadagiti responsabilidad a nabayagen nga ibakbaklayda. Kaaduanna a dagiti nataengan ti nangsanay kadagiti mas ub-ubing, kas iti posible a panangsanay ni Barzillai iti anakna ken ti panangsanay ni Pablo ken ni Timoteo. (1 Cor. 4:17; Fil. 2:20-22) Pinaneknekan dagitoy a mas ub-ubing a kakabsat a lallaki nga isuda ket “sagut a tattao” ta kabaelanda ti tumulong a ‘mangpabileg iti bagi ni Kristo.’​—Efe. 4:8-12; idilig ti Numeros 11:16, 17, 29.

NADUMADUMA NGA OPORTUNIDAD A TUMULONG

Iti organisasion ti Dios, impasa ti adu a kakabsat ti dadduma a responsabilidadda isu a naaddaanda iti baro wenno ad-adu nga oportunidad iti trabaho ni Jehova.

“Gapu ta nagbaliw ti kasasaadko, addan panawenko a tumulong kadagiti di manamati nga assawa dagiti sister iti kongregasionmi,” imbaga ni Marco, a nagserbi kas agdaldaliasat a manangaywan iti 19 a tawen.

“Maysa kadagiti baro a kalatmi ti tumulong kadagiti di aktibo ken maaddaan iti ad-adu nga iyad-adalan iti Biblia,” kuna ni Geraldo, a nagserbi kas agdaldaliasat a manangaywan iti 28 a tawen. Impadamagna a 15 ti iyad-adalanda iti Biblia ken baketna ken makigimgimongen ti adu a di aktibo.

Imbaga ni Allan, a nadakamat itay: “Ad-adun ti tiempomi a makipaset iti panangasaba. Maragragsakankami nga ag-public witnessing, mangasaba kadagiti lugar ti negosio, ken kadagiti kaarrubami, a dua kadakuada ti nakigimongen.”

No makabael ken matalekka a kabsat ket nakaawatka iti baro nga annongen iti organisasion ti Dios, adda pay espesial a pamay-an a makatulongka. Masuportaram ti trabaho ni Jehova no iranudmo dagiti nasayaat a kapadasam kadagiti mas ub-ubing a lallaki iti kongregasion. “Sansanayen ken us-usaren ni Jehova dagiti nasayaat ken naabilidad nga ub-ubing a kakabsat,” kinuna ni Russell, a nadakamat itay. “Mabembenepisiaran dagiti kakabsat iti nabiag a panangisuro ken panangipastorda!”​—Kitaem ti kahon a “ Tulongam Dagiti Ub-ubing a Lallaki a Mangragpat iti Naan-anay a Potensialda.”

IPATPATEG NI JEHOVA TI KINAMATALEKMO

No nabiit pay a nagbaliw ti pribilehiom, agtalinaedka a positibo. Saanen a mabilang dagiti natulongam gapu iti naimpusuan a panagserbim, ket maitultuloymo nga aramiden dayta. Inay-ayatdaka dagiti kakabsat ken agtultuloy nga ayatendaka.

Napatpateg pay, nakaaramidka iti di pulos malipatan ni Jehova. Saanna a ‘lipaten ti aramidmo ken ti ayat nga impakitam maipaay iti naganna, ta nagserbika kadagiti sasanto ken  agtultuloyka nga agserserbi.’ (Heb. 6:10) Ipasigurado dayta a bersikulo a saanna a lipaten uray dagiti naaramidantayo iti napalabas. Ipatpategnaka unay ni Jehova isu a saannaka a malipatan ken uray dagiti naaramidam iti napalabas ken ti agtultuloy a panangikagumaam a mangparagsak kenkuana!

No ngay saan a nagbaliw ti annongem kas iti napagsaritaan iti ngato? Mabalin nga adda latta epektona kenka daytoy. Kasano a kasta?

No adda makalanglangenmo a matalek a nataengan a kabsat a nagbaliw ti annongenna, magunggonaanka iti kinamataenganna ken iti kapadasanna iti adu a tawen. Agpabalakadka kenkuana. Damagem dagiti suhestionna. Ken paliiwem no kasano a simamatalek nga iyap-aplikarna iti agdama nga annongenna dagiti kapadasanna.

Maysaka man a nataengan a nagbaliw ti annongenna wenno maysa a kabsat a mabalin a magunggonaan kadakuada, laglagipem nga ipatpateg ni Jehova ti kinamatalek dagiti nabayagen nga agserserbi kenkuana ken agtultuloy a mangar-aramid iti dayta.