Mapan iti linaonna

Mapan iti listaan dagiti linaonna

Nakonsiderar ken Naasitayo Koma kas ken Jehova

Nakonsiderar ken Naasitayo Koma kas ken Jehova

“Naragsak ti asinoman nga agtigtignay a buyogen ti konsiderasion iti daydiay nanumo.”​—SAL. 41:1.

KANTA: 130, 107

1. Kasano a nalawag a makita ti ayat iti ili ti Dios?

TI ILI ti Dios ket maysa a naespirituan a pamilia a malasin babaen ti ayat. (1 Juan 4:16, 21) Dayta nga ayat ket masansan a makita, saan nga iti manmano a nagpaiduma nga aramid, no di ket iti nagadu a babassit a pamay-an, kas iti nakonsiderar a sasao ken ar-aramid. No siaasi a tratuentayo ti sabsabali ken nakonsiderartayo, ‘tultuladentayo ti Dios, kas annak a dungdungnguen.’​—Efe. 5:1.

2. Kasano nga impakita ni Jesus ti ayat ti Dios?

2 Naan-anay a tinulad ni Jesus ti Amana. “Umaykayo kaniak, dakayo amin a mabambannogan ken madagdagsenan,” kinuna ni Jesus, “ket pagin-awaenkayto . . . , ta naalumamay ti kababalinko ken napakumbaba ti pusok.” (Mat. 11:28, 29) No tuladentayo ti ulidan ni Kristo babaen ti “[panangipakita iti] konsiderasion iti daydiay nanumo,” anamongannatayo ti nailangitan nga Amatayo ket agbalintayo a nakaragragsak. (Sal. 41:1) Kitaentayo no kasano a maipakitatayo ti konsiderasion iti pamilia, iti kongregasion, ken iti ministerio.

 KONSIDERASION ITI UNEG TI PAMILIA

3. Para iti asawa a lalaki, kasano nga agkadkadua ti pannakatarus ken panangipakita iti konsiderasion? (Kitaen ti ladawan iti rugi ti artikulo.)

3 Masapul nga iyun-una dagiti assawa a lallaki ti panagbalin a nakonsiderar iti uneg ti pamilia. (Efe. 5:25; 6:4) Kas pagarigan, nabalakadanda a tratuenda dagiti assawada “maitunos iti pannakaammo”​—sasao a mabalin a kaipapananna ti panangipakita iti konsiderasion wenno panangtarus kadakuada. (1 Ped. 3:7) Agkadkadua ti panangtarus ken panangipakita iti konsiderasion. Kas pagarigan, ammo ti mannakaawat nga asawa a lalaki a ni baketna, kas kakomplementona, ket naiduma kenkuana iti adu a banag, ngem saan a nababbaba. (Gen. 2:18) Gapuna, ikabilanganna ti rikrikna ni baketna, ket tratuenna nga addaan iti dignidad ken dayaw. Kuna ti maysa a babai idiay Canada maipapan ken lakayna: “Kanayon nga ikabilanganna ti rikriknak ken dina pulos ibaga, ‘Saan koma a kasta ti mariknam.’ Dumngeg met a naimbag. No tulongannak a mangbaliw iti panangmatmatko, sidudungngo nga aramidenna dayta.”

4. Iti pannakilangen ti asawa a lalaki iti sabali a babbai, kasano a maipakitana ti konsiderasion ken ni baketna?

4 Ti nakonsiderar nga asawa a lalaki ikabilanganna met ti rikrikna ni baketna no makilangen iti sabali a babbai. Saan a pulos agalembong (ag-flirt) wenno mangipakita iti di umiso nga interes kadakuada; ken saan a mangipakita iti kasta nga interes no agusar iti social media ken Internet. (Job 31:1) Wen, ipakitana a matalek ken baketna, saan laeng a gapu iti ayatna kenkuana no di pay ket gapu iti ayatna iti Dios ken iti gurana iti dakes.​—Basaen ti Salmo 19:14; 97:10.

5. Kasano a maipakita ti asawa a babai ti konsiderasion ken lakayna?

5 No tuladen ti asawa a lalaki ti ulona, ni Jesu-Kristo, tultulonganna ni baketna a mangipakita iti “nauneg a panagraem” kenkuana. (Efe. 5:22-25, 33) Kas resultana, agbalin a nakonsiderar ken lakayna, kas no asikasuen ni lakayna dagiti responsabilidadna iti organisasion wenno no adda problema a pampanunotenna. Kuna ti maysa nga asawa a lalaki idiay Britain: “No dadduma, madlaw ni baketko nga adda pakaburburiborak. Isu nga iyaplikarna ti prinsipio ti Proverbio 20:5, uray no kasapulan nga aguray iti umiso a tiempo tapno ‘mayaonna’ ti pampanunotek no mabalinko nga ibaga dayta kenkuana.”

6. Kasano a maparegtatayo dagiti ubbing nga agbalin a nakonsiderar, ken ania ti pagsayaatanna dayta iti ubing?

6 No nakonsiderar dagiti nagannak iti maysa ken maysa, nasayaat nga ulidan ti ipakpakitada kadagiti annakda. Siempre, dagiti nagannak ti makinresponsabilidad a mangisuro kadagiti annakda no kasano nga ipakita ti konsiderasion iti sabsabali. Kas pagarigan, mabalin nga isuro ida dagiti nagannakda a dida agtaraytaray iti Kingdom Hall. No adda okasion, mabalin nga ibaga dagiti nagannak kadagiti annakda a paunaenda a mangala iti makan dagiti natataengan. Siempre, suportaran koma ti amin a miembro ti kongregasion dagitoy a nagannak. Kas pagarigan, komendarantayo ti maysa nga ubing no adda nasayaat a naaramidanna kadatayo, kas no inlukatannatayo iti ridaw. Nasayaat ti epekto dayta iti ubing, ta maimula iti pusona nga “ad-adu ti kinaragsak iti panangted ngem iti panangawat.”​—Ara. 20:35.

‘AGPIPINNANUNOT’ KOMA TI TUNGGAL MIEMBRO TI KONGREGASION

7. Kasano nga impakita ni Jesus ti konsiderasion iti lalaki a tuleng, ken ania dagiti maadaltayo iti ulidan ni Jesus?

7 Naminsan, bayat nga adda ni Jesus idiay Decapolis, “inyeg [dagiti tattao] kenkuana ti maysa a lalaki a tuleng ken adda lapped ti panagsaona.” (Mar. 7:31-35) Imbes a paimbagenna iti publiko, “inyadayona”  sa pinaimbagna. Apay? Mabalin a saan a komportable ti lalaki iti adu a tattao gapu iti depektona. Mabalin a nadlaw dayta ni Jesus isu a pribado a pinaimbagna. Siempre, saantayo a simimilagro a makapaimbag. Ngem kabaelantayo nga ikabilangan ti kasapulan ken rikrikna dagiti kapammatiantayo ken masapul nga aramidentayo dayta. Insurat ni apostol Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid.” (Heb. 10:24) Naawatan ni Jesus ti rikrikna ti lalaki a tuleng isu a nakonsiderar ti panangpaimbagna kenkuana. Nagsayaat a tuladentayo!

8, 9. Kadagiti ania a pamay-an a maipakitatayo ti konsiderasion kadagiti natataengan ken masakit? (Mangted iti pagarigan.)

8 Ipakita ti konsiderasion kadagiti nataengan ken masakit. Ayat ti pakabigbigan ti kongregasion Kristiano saan a ti nasayaat nga ar-aramid. (Juan 13:34, 35) Dayta nga ayat ti mangtignay kadatayo a tumulong kadagiti nataengan ken addaan iti depekto nga umatender kadagiti gimong ken mangikasaba iti naimbag a damag, uray no limitadon ti maaramidanda. (Mat. 13:23) Ni Michael, a naka-wheelchair, ap-apresiarenna unay ti panangtultulong kenkuana ti pamiliana ken dagiti kakabsat a kagrupona iti panangasaba. Kunana: “Gapu iti tulongda, kaaduanna a maatendarak dagiti gimong ken regularak iti ministerio. Magusgustuak ti publiko a panangasaba.”

9 Adda dagiti nataenganen ken masakit a miembro iti adu a pagtaengan ti Bethel. Ipakpakita dagiti naayat a manangaywan ti konsiderasion kadagitoy a matalek a kakabsat babaen ti panangyurnosda a makiramanda iti panangasaba iti surat ken telepono. “Apresiarenmi ti pribilehio a makiraman iti panagsurat,” kuna ni Bill, nga agtawen iti 86 ken sursuratanna dagiti tattao kadagiti nasulinek a lugar. Inkomento ni Nancy nga ag-90 ti tawenna: “Para kaniak, ti panangasaba babaen ti surat ket saan laeng a panangikarga iti surat iti sobre. Panangasaba daytoy. Kasapulan a maammuan dagiti tattao ti kinapudno!” Kuna ni Ethel, a nayanak idi 1921: “Kanayon a makariknaak iti ut-ot. Adda dagiti gundaway a marigatanak nga agbado.” Ngem maragragsakan a mangasaba iti telepono ken adda dagiti masarsarungkaranna. Inlawlawag ni Barbara, nga agtawen iti 85: “Nakapsutakon isu a marigatanak a regular a mangasaba. Ngem makapangasabaak iti telepono. Pagyamanan Apo Jehova!” Awan pay makatawen, maysa a grupo dagiti patpatgentayo a nataengan ti nakabusbos iti 1,228 nga oras iti ministerio, nakaaramidda ti 6,265 a surat, nasurok a 2,000 a tawag iti telepono, ken nakaipaimada iti 6,315 a publikasion! Naragsak la ketdi ti puso ni Jehova gapu iti dayta!​—Prov. 27:11.

10. Kasanotayo a matulongan dagiti kakabsat tapno naan-anay a magunggonaanda kadagiti gimong?

10 Ipakita ti konsiderasion kadagiti gimong. Kayattayo a naan-anay a magunggonaan dagiti kakabsat kadagiti gimong. Makatulong kadakuada ti konsiderasiontayo. Kasano? Ti maysa a pamay-an ket ti isasangpet iti eksakto nga oras tapno saantayo a makaistorbo. Siempre, maladawtayo no dadduma gapu kadagiti di ninamnama a pasamak. Ngem no ugalitayo ti maladaw, panunotentayo koma no kasano nga agbalintayo nga ad-adda a nakonsiderar. Laglagipentayo met a ti mangsangaili kadatayo ket ni Jehova ken ti Anakna. (Mat. 18:20) Maikarida iti nauneg a panagraemtayo!

11. Apay a masapul nga iyaplikar dagiti agpaset iti gimong ti bilin iti 1 Corinto 14:40?

11 Ipakpakitatayo met ti konsiderasion kadagiti kakabsat no agtultulnogtayo iti daytoy a bilin: “Amin a bambanag maaramid koma a sitatakneng ken sigun iti urnos.” (1 Cor. 14:40) Agtultulnog iti dayta dagiti agpaset iti gimong no saanda nga ag-overtime.  No kasta ti aramidenda, ipakpakitada ti konsiderasion saan la nga iti sumaruno nga agpaset no di pay ket iti kongregasion. Adayo pay ti pagawidan ti dadduma a kakabsat. Nakadepende ti dadduma iti pangpubliko a pagluganan. Ken baka saan a Saksi ti assawa ti dadduma ket dida makaan-anus nga aguray kadakuada.

12. Apay a maikari iti espesial a konsiderasion dagiti managsakripisio a panglakayen? (Kitaen ti kahon nga “ Ipakita ti Konsiderasion Kadagidiay Mangidadaulo.”)

12 Maikari met iti espesial a konsiderasion dagiti naespirituan a papastor nga agsaksakripisio iti kongregasion ken sireregta a mangidadaulo iti ministerio. (Basaen ti 1 Tesalonica 5:12, 13.) Apresiarem la ketdi ti ar-aramiden dagiti panglakayen para kenka. Ikagumaam ngarud nga ipakita dayta babaen ti naimpusuan a kooperasion ken suportam. Kinapudnona, “agtultuloy a bambantayanda dagiti kararuayo a kasla isudanto dagidiay manungsungbat.”​—Heb. 13:7, 17.

KONSIDERASION ITI MINISTERIO

13. Ania ti masursurotayo iti panangtrato ni Jesus kadagiti tattao?

13 Impadto ni Isaias maipapan ken Jesus: “Awanto ti tukkolenna a naparpar a runo; ket no maipapan iti nakudrep a pabilo a lino, saannanto nga iddepen.” (Isa. 42:3) Mannakipagrikna ni Jesus ta ay-ayatenna dagiti tattao. Natarusanna ti rikrikna dagidiay arigna naparpar a runo wenno agkurkuridemdem a pabilo ti lampara. Isu a nakonsiderar, naasi, ken naanus. Naasideg kenkuana uray dagiti ubbing. (Mar. 10:14) Siempre, saan a kas ken Jesus ti kalaingtayo a mangtarus ken mangisuro! Ngem kabaelantayo nga ipakita ti konsiderasion kadagiti tattao iti teritoriatayo ken masapul nga ipakitatayo dayta. Ramanen dayta no kasano ti pannakisaritatayo, no kaano, ken no kasano kabayag dayta.

14. Apay a masapul nga annadantayo ti pamay-antayo a makisarita kadagiti tattao?

 14 Kasano ti rumbeng a pannakisaritatayo kadagiti tattao? Minilion ita ti kasla ‘nalalatan ken naiwarawara’ gapu kadagiti korap ken awanan asi a negosiante, politiko, ken lider ti relihion. (Mat. 9:36) Kas resultana, adu a tattao ti awanan panagtalek ken namnama. Masapul ngarud a naayat ken naasi ti usarentayo a sasao ken ti tono ti panagsaotayo! Wen, adu ti naginteres iti mensahetayo saan la a gapu ta nalaing ken nasayaat ti panangilawlawagtayo iti Biblia no di ket gapu pay iti naimpusuan nga interes ken konsiderasiontayo kadakuada.

15. Ania dagiti pamay-an a maipakitatayo ti konsiderasion kadagiti kasabaantayo?

15 Adu ti pamay-an a maipakitatayo ti konsiderasion kadagiti kasabaantayo. Kas pagarigan, dagiti saludsod ket nakapatpateg a katulongan iti panangisuro. Naayat ken narespeto koma ti panagsaludsodtayo. Adu ti managbabain wenno saan a makisarita iti teritoria ti maysa a payunir isu a nasursurona ti agusar iti saludsod a di mangpabain. Karaman kadagita dagiti saludsod a mabalin a di masungbatan wenno di umiso ti maisungbat ti bumalay. Kas pagarigan, liklikanna nga isaludsod ti ‘Ammom kadi ti nagan ti Dios?’ wenno ‘Ammom kadi no ania ti Pagarian ti Dios?’ Imbes ketdi, ibagana, “Nasursurok iti Biblia nga adda nagan ti Dios. Mabalin kadi nga ipakitak kenka?” Siempre, nagduduma ti kultura ken tattao, isu a saantay a kasapulan dagiti pagalagadan. Ngem rumbeng a kanayon a nakonsiderar ken narespetotayo. Karaman iti dayta ti panangam-ammotayo a naimbag kadagiti lumugar.

16, 17. Kasanotayo a maipakita ti konsiderasion iti (a) oras nga ibibisitatayo iti bumalay? (b) kapaut ti pannakisaritatayo iti maysa a tao?

16 Kaano ti nasayaat nga ibibisitatayo kadagiti kaarrubatayo? No agbalaybalaytayo, saan a namnamaen dagiti bumalay ti kaaddatayo. Nakapatpateg ngarud a bumisitatayo iti oras a nawaya a makisaritada! (Mat. 7:12) Kas pagarigan, naladaw kadi nga agririing dagiti tattao iti teritoriayo iti ngudo ti lawas? No kasta, mabalin a rugianyo pay laeng ti mangasaba iti lansangan, iti publiko, wenno sarungkaranyo dagidiay ammoyo a nakariingen.

17 Kasano ti rumbeng a kabayagtayo? Okupado ti adu a tattao, isu a nasayaat no apagbiit ti ibibisitatayo, uray iti damo laeng. Nasaysayaat nga ababa ti pannakisaritatayo imbes a nakabaybayag. (1 Cor. 9:20-23) No makita dagiti tattao nga ikabkabilangantayo ti kasasaadda wenno ti kinaokupadoda, mabalin a makisaritadanto manen inton agsublitayo. Masapul ngarud nga ipakitatayo ti bunga ti espiritu ti Dios iti ministeriotayo. No aramidentayo dayta, pudpudno a ‘katrabahuannatayo ti Dios’—nga usaren ni Jehova a mangyasideg iti maysa a tao iti kinapudno.—1 Cor. 3:6, 7, 9.

18. Ania dagiti bendision a manamnamatayo no nakonsiderartayo iti sabsabali?

18 Ikagumaantayo ngarud ti agbalin a nakonsiderar iti sabsabali​—iti pamiliatayo, iti kongregasion, ken iti ministerio. No aramidentayo dayta, umawattayo iti adu a bendision ita ken iti masanguanan. Kuna ti Salmo 41:1, 2: “Naragsak ti asinoman nga agtigtignay a buyogen ti konsiderasion iti daydiay nanumo; iti aldaw ti didigra isu ilisinto ni Jehova. . . . Isu maikunanto a naragsak iti daga.”