Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) SEPTIEMBRE 2016

Itultuloy ti Makiranget a Manggun-od iti Bendision ni Jehova

Itultuloy ti Makiranget a Manggun-od iti Bendision ni Jehova

“Nakirangetka iti Dios ken kadagiti lallaki iti kasta nangabakka.”—GEN. 32:28.

KANTA: 60, 38

1, 2. Ania dagiti pakarigatan a masapul a sanguen dagiti adipen ni Jehova?

MANIPUD iti umuna a matalek a tao a ni Abel agingga iti kaaldawantayo, nagtultuloy a nakiranget dagiti matalek nga agdaydayaw. Insurat ni apostol Pablo kadagiti Hebreo a Kristiano nga ‘inibturanda ti dakkel a salisal iti sidong dagiti panagsagaba,’ tapno magun-odda ti anamong ken bendision ni Jehova. (Heb. 10:32-34) Inyarig ni apostol Pablo ti pannakiranget dagiti Kristiano kadagiti atleta a karaman kadagiti pasalip ti Griego, kas iti tinnarayan, wrestling, ken boksing. (Heb. 12:1, 4) Ita, makisalsalisaltayo a manggun-od iti biag, ket kayat dagiti kalabantayo a masinga, matumba, kumapuy, ken mapukaw ti ragsak ken gunggonatayo iti masanguanan.

2 Umuna, ti karigatan a karanget wenno kalabantayo ket ni Satanas ken ti dakes a lubongna. (Efe. 6:12) Nagpateg a saantayo nga agpaapektar kadagiti “natibker ti pannakasarikedkedna a bambanag” iti lubong. Karaman iti daytoy dagiti doktrina, pilosopia, ken dagiti makadangran nga aramid, kas iti immoralidad, panagsigarilio,  nalabes a panaginum iti arak, ken panagdroga. Masapul nga agtultuloy a labanantayo met ti pannakaupay ken dagiti pagkapuyantayo.—2 Cor. 10:3-6; Col. 3:5-9.

3. Kasano a sansanayennatayo ti Dios a manglaban kadagiti kabusortayo?

3 Talaga kadi a kabaelantayo nga abaken dagita a nakabilbileg a kalaban? Wen, ngem masapul ti panagregget. Kas kadagiti boksingero idi un-unana, kinuna ni Pablo maipapan iti bagina: “Ti wagas a panangiturongko kadagiti danogko saan a kasla panangkabkabil iti angin.” (1 Cor. 9:26) No kasano a labanan ti boksingero ti kalabanna, masapul a labanantayo met dagiti kabusortayo. Sansanayen ken tultulongannatayo ni Jehova iti pannakilabantayo. Nangipaay kadagiti makaispal iti biag a bilin iti Saona. Tultulongannatayo met babaen kadagiti naibatay iti Biblia a publikasiontayo, dagiti Nakristianuan a gimong, asamblea, ken kombension. Iyap-aplikarmo kadi dagiti masursurom? No saan, mayarig dayta iti “panangkabkabil iti angin,” wenno saan a pananglaban iti kabusor.

4. Kasano a maliklikantayo a maparmeknatayo ti dakes?

4 Mabalin a darupendatayo dagiti kabusortayo no saantayo a nakasagana wenno no nakapuytayo, isu a masapul a kanayon nga alertotayo. Pakdaarannatayo ti Biblia: “Dika ipalubos a parmekennaka ti dakes, no di ket itultuloymo a parmeken ti dakes babaen ti naimbag.” (Roma 12:21) Ti pammaregta a saantayo nga ipalubos a ‘parmekennatayo ti dakes’ ipakitana a kabaelantayo nga abaken ti dakes. Maaramidtayo dayta no itultuloytayo ti lumaban. Ngem no sumardengtayo nga agbantay ken makilaban, abakennatayo ni Satanas, ti dakes a lubongna, ken ti imperpekto a lasagtayo. Pulos a saanmo nga ipalubos a butbutngennaka ni Satanas tapno agsalupaypay ti imam ket maabakka!—1 Ped. 5:9.

5. (a) Ania ti makatulong kadatayo nga agtultuloy nga agregget a manggun-od iti bendision ti Dios? (b) Siasino dagiti karakter ti Biblia nga usigentayo?

5 Tapno agballigi dagiti makisalisal, masapul a laglagipenda no apay a makilablabanda. Kasta met, tapno magun-odda ti anamong ken bendision ti Dios, masapul a laglagipenda ti pammatalged a mabasatayo iti Hebreo 11:6. Kunana: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” Ti Griego a sao a naipatarus a “sipapasnek a mangsapsapul” ipakitana ti napinget ken napasnek a panagregget. (Ara. 15:17) Mangipaay ti Kasuratan iti nagsasayaat nga ulidan dagiti lallaki ken babbai a nagregget a manggun-od iti bendision ni Jehova. Naipasango idi da Jacob, Raquel, Jose, ken Pablo kadagiti kasasaad a makapakapuy iti pisikal ken emosional. Ngem saanda a simmuko isu nga adu a bendision ti nasagrapda. Kasano a matuladtayo dagitoy nga uppat a nagsayaat nga ulidan?

MANGYEG ITI BENDISION TI SAAN NGA ISUSUKO

6. Ania ti nakatulong ken Jacob a saan a sumuko, ken kasano a nagunggonaan? (Kitaen ti ladawan iti rugi ti artikulo.)

6 Nagregget ken nakapagtultuloy ni Jacob gapu ta ay-ayatenna ni Jehova, apresiarenna dagiti naespirituan a bambanag, ken naan-anay a patienna ti kari ni Jehova a bendisionanna dagiti kaputotanna. (Gen. 28:3, 4) Daytoy ti mangilawlawag no apay nga idi agarup 100 ti tawen ni Jacob, inaramidna ti amin a kabaelanna a manggun-od iti bendision ti Dios; nakigubal pay ketdi iti maysa nga anghel a naglasag a tao. (Basaen ti Genesis 32:24-28.) Kabaelan kadi ni Jacob nga abaken ti nakabilbileg nga anghel? Siempre saan! Ngem determinado a nakiranget, ken impakitana a saan a sumuko! Gapuna, nabendisionan ti saanna nga isusuko. Maitutop a  napanaganan iti Israel, (kaipapananna “Daydiay Nakiranget [Nagregget] iti Dios” wenno “Makiranget ti Dios”). Nagun-odan ni Jacob ti gunggona a kayattayo met a gun-oden—ti anamong ken bendision ni Jehova.

7. (a) Ania ti narigat a kasasaad ni Raquel? (b) Kasano nga intultuloyna ti nakilaban ket nabendisionan idi agangay?

7 Magagaran met ti dungdungnguen ni Jacob nga asawa a ni Raquel a makakita no kasano a tungpalen ni Jehova ti karina iti asawana. Ngem adda dakkel a problema. Awan ti anakna. Idi kaaldawanna, mamatmatan dayta a dakkel a pakarigatan. Kasano a pinapigsa ni Raquel ti pakinakemna ken naaddaan iti bileg nga agtultuloy a manglaban kadagiti makapaupay a kasasaad nga awan maaramidanna? Saan a naawanan iti namnama. Intultuloyna ti limmaban babaen ti napasnek a panagkararag. Dinengngeg ni Jehova dagiti napasnek a panagpakaasi ni Raquel, ket idi agangay, nabendisionan kadagiti annak. Di ngarud pakasdaawan a naminsan, naibaga ni Raquel gapu iti ragsakna: ‘Buyogen dagiti napinget a pannakigubal nakigubalak ket nangabakak met!’—Gen. 30:8, 20-24.

8. Ania ti napaut ken nakaro a rigat a napasaran ni Jose, ken apay a nasayaat nga ulidan kadatayo ti inaramidna?

8 Dakkel ti epekto ti matalek nga ulidan da Jacob ken Raquel iti anakda a ni Jose. Nakatulong dayta kenkuana a nangsango kadagiti pannubok iti pammatina. Idi agtawen ni Jose iti 17, naan-anay a nagbalbaliw ti biagna. Gapu iti imon, inlako dagiti kakabsatna kas maysa nga adipen. Idi agangay, masapul nga ibturanna ti adu a tawen a di umiso a pannakaibalud idiay Egipto. (Gen. 37:23-28; 39:7-9, 20-21) Saan a simmuko ni Jose gapu iti pannakaupay. Saan met a nagipempen iti sakit ti nakem ket kayatnan ti agibales. Impamaysana ketdi ti panunot ken pusona iti nasayaat a relasionna ken Jehova. (Lev. 19:18; Roma 12:17-21) Makatulong koma kadatayo ti ulidan ni Jose. Kas pagarigan, uray no saan a nasayaat ti pannakapadakkeltayo wenno kasla awanen ti namnama ti kasasaadtayo, ikagumaantayo ti agtultuloy a lumaban ken saan a sumuko. Agtalektayo a no kasta ti aramidentayo, bendisionannatayo ni Jehova.—Basaen ti Genesis 39:21-23.

9. Kas panangtulad kada Jacob, Raquel, ken Jose, kasano nga agreggettayo a manggun-od iti anamong ni Jehova?

9 Panunotem ti maysa a kasasaad a maipaspasango kenka a mabalin a pakasuotam. Mabalin a dayta ket ti kinaawan iti hustisia, panangidumduma, wenno pananguy-uyaw. Wenno nalabit gapu iti imon, siuulbod nga ak-akusarandaka. Imbes a sumukoka, laglagipem no ania ti nakatulong kada Jacob, Raquel, ken Jose a nagtultuloy a siraragsak nga agserbi ken Jehova. Pinabileg ken binendisionan ida ti Dios gapu ta intultuloyda nga impateg dagiti naespirituan a bambanag. Intultuloyda ti nagregget ken nagtignayda a maitunos kadagiti napasnek a kararagda. Agbibiagtayo iti tiempo a dandanin agpatingga ti dakes a sistema ti bambanag isu a petpetantayo ti namnama nga adda iti sanguanantayo! Ikagkagumaam kadi a gun-oden ti anamong ni Jehova, nga arigna makilabanka a manggun-od iti dayta?

SITUTULOK A MAKIRANGET A MANGGUN-OD ITI BENDISION

10, 11. (a) Apay a mabalin a masapul a makirangettayo a manggun-od iti bendision ti Dios? (b) Ania ti makatulong kadatayo a mangaramid kadagiti umiso a desision ken mangparmek iti pakaupayan ken pakasingaan?

10 Ania dagiti kasasaad a masapul a makirangettayo a manggun-od iti bendision ti Dios? Adu ti naipasango iti pananglaban iti pagkapuyan ti lasag. Dadduma ti nangikagumaan a mangtaginayon iti positibo a panangmatmat iti ministerio. Wenno, para kenka, mabalin a masapul nga itultuloymo  ti agibtur, uray no nakapuy ti salun-atmo wenno malmaldayka. Ditay met liplipatan ti panangikagumaan ti dadduma a mangpakawan iti nangsair wenno nakabasol kadakuada. Kasanoman kabayag nga agserserbitayon ken Jehova, amintayo ket masapul a labanantayo dagiti lapped iti panagserbitayo iti Dios, a manggunggona kadagiti matalek.

Makirangrangetka kadi a manggun-od iti bendision ti Dios? (Kitaen ti parapo 10, 11)

11 Kinapudnona, saan a nalaka ti agaramid iti umiso ken mangsurot iti Nakristianuan a panagbiag. Pudno dayta nangruna no iturongnatayo ti manangallilaw a pusotayo iti sabali a direksion. (Jer. 17:9) No mabigbigmo a negatibo no dadduma ti panangmatmatmo, kiddawem ti nasantuan nga espiritu. Ti panagkararag ken ti nasantuan nga espiritu ti makatulong kenka nga agtultuloy iti dalan nga ammom nga umiso ken bendisionan ni Jehova. Agtignayka a maitunos iti kararagmo. Ikagumaam a basaen ti Biblia iti inaldaw, ken mangipaayka iti tiempo nga agadal a personal ken regular a mangaramid iti Panagdaydayaw ti Pamilia.—Basaen ti Salmo 119:32.

12, 13. Kasano a natulongan ti dua a Kristiano a mangkontrol iti dakes a tarigagayda?

12 Adu dagiti pagarigan no kasano a ti Sao ti Dios, ti espirituna, ken dagiti publikasiontayo ket nakatulong kadagiti Kristiano a mangparmek kadagiti dakes a tarigagay. Binasa ti maysa a tin-edyer ti artikulo a “Kasano a Maiwaksim Dagiti Dakes a Tarigagay?” iti ruar ti Agriingkayo! a Disiembre 8, 2003. Ania ti makunana? “Ikagkagumaak a kontrolen dagiti dakes a panagpampanunot. Idi nabasak iti artikulo a ‘para iti adu, marigatanda unay a mangparmek kadagiti dakes a tarigagayda,’ nariknak a  pasetnak ti panagkakabsat. Nariknak a saanak nga agmaymaysa.” Nagunggonaan met daytoy nga agtutubo iti artikulo a “Dagiti Naiduma nga Estilo ti Panagbiag—Anamongan Kadi ti Dios?” a mabasa iti ruar ti Oktubre 8, 2003. Kinunana a nadakamat iti dayta a para iti dadduma, ti pannakilaban iti di umiso a tarigagay ket “siit iti lasag.” (2 Cor. 12:7) Nupay agtultuloy a makirangrangetda a mangtaginayon iti nalinteg a kababalin, positiboda a kumita iti masanguanan. “Gapu iti dayta,” kinunana, “panagkunak tunggal aglabas ti aldaw, kabaelak ti agtalinaed a matalek. Agyamanak ken Jehova ta us-usarenna ti organisasionna a tumulong kadatayo nga inaldaw nga agballigi iti daytoy dakes a sistema.”

13 Usigentayo met ti kapadasan ti maysa a kabsat a babai idiay United States. Insuratna: “Kayatko ti agyaman kadakayo iti kanayon a panangpakanyo kadakami iti kasapulanmi iti umiso a tiempo. Masansan a mariknak a dagitoy nga artikulo ket naisurat para kaniak. Adu a tawenen a lablabanak ti nakaro a panagtarigagay iti banag a kagura ni Jehova. No dadduma, kayatkon ti sumuko. Ammok a naasi ken manangpakawan ni Jehova, ngem gapu ta dakes ti tarigagayko ken diak kagura dayta, ipagarupko a saannak a tulongan. Naapektaran ti intero a panagbiagko gapu iti daytoy a lablabanak. . . . Idi nabasak ti artikulo nga ‘Addaanka Kadi iti “Puso nga Agtarigagay a Mangammo” ken Jehova?’ iti ruar ti Pagwanawanan a Marso 15, 2013, talaga a nariknak a kayatnak a tulongan ni Jehova.”

14. (a) Ania ti makuna ni Pablo iti pannakilabanna? (b) Kasano nga agballigitayo a manglaban kadagiti pagkapuyantayo?

14 Basaen ti Roma 7:21-25. Ammo ni Pablo a nagrigat nga iwaksi dagiti dakes a tarigagay ken pagkapuyan. Nupay kasta, naan-anay nga agtalek a maparmekna dagiti pagkapuyanna babaen ti panagpatulongna ken Jehova ken ti panangipakitana iti pammati iti subbot a sakripisio ni Jesus. Datayo ngay? Agballigitayo no agreggettayo a manglaban kadagiti pagkapuyantayo. Kasano? Babaen ti panangtuladtayo ken Pablo, babaen ti naan-anay a panagpannuray ken Jehova a saan nga iti bukodtayo a pigsa, ken babaen ti panamati iti subbot.

15. Apay a makatulong ti kararag tapno agtalinaedtayo a matalek ken maibturantayo dagiti pakasuotan?

15 No maminsan, ipalubos ti Dios a nakaro ti panangpampanunottayo iti maysa a banag. Kas pagarigan, kasano ngay no agsakittayo iti nakaro (wenno ti maysa a kapamiliatayo) wenno di umiso ti pannakatratotayo? Maipakitatayo ti naan-anay a panagtalek ken Jehova babaen ti panangikararagtayo a pabilgennatayo tapno agtalinaedtayo a matalek ken saan a mapukaw ti rag-otayo ken nabileg latta ti pammatitayo. (Fil. 4:13) Paneknekan ti adu, agpadpada idi kaaldawan ni Pablo ken iti kaaldawantayo, a makatulong ti kararag tapno mapabarotayo ti bilegtayo ken makapagtultuloytayo nga agibtur.

ITULTULOY TI MAKIRANGET A MANGGUN-OD ITI BENDISION NI JEHOVA

16, 17. Ania ti determinasionmo kas maysa a mannakilaban?

16 Kayat ti Diablo a makitanaka a sumuko. Determinadoka koma a ‘kumpet a siiirut iti nasayaat.’ (1 Tes. 5:21) Masiguradom a maparmekmo ni Satanas, ti dakes a lubongna, ken ti aniaman a dakes a pagannayasam. Maaramidmo dayta babaen ti naan-anay a panagtalekmo a kabaelannaka a pabilgen ti Dios.—2 Cor. 4:7-9; Gal. 6:9.

17 Aniaman ti mapasamak, itultuloymo ti makilaban. Itultuloymo ti agregget. Itultuloymo ti makiranget. Dika sumuko. Naan-anay nga agtalekka a ni Jehova ‘ibukboknanto kenka ti bendision agingga nga awanen panagkasapulan.’—Mal. 3:10.