Mapan iti linaonna

Mapan iti listaan dagiti linaonna

 PAKASARITAAN TI BIAG

Posible ti Amin a Banag ken Jehova

Posible ti Amin a Banag ken Jehova

“AWANTON ti ipapatay, ken agungarto pay dagiti natay.” Nangngeg dagita ni baketko a Mairambubu bayat a nakalugan iti bus. Naginteres iti nangngegna ken kayatna a maammuan ti ad-adu pay. Idi nagsardeng ti bus ken nakadissaagen dagiti pasahero, kinamakamna ti babai a nangibaga kadagita a sasao. Apun Mambetsadykova ti nagan ti babai, ken maysa a Saksi ni Jehova. Delikado idi ti makisarita kadagiti Saksi, ngem dagiti nasursuromi ken Apun idi agangay ti nangbalbaliw iti biagmi.

PANAGTRABAHO ITI PARBANGON AGINGGA ITI SUMIPNGET

Nayanakak idi 1937 iti taltalon a kukua ti gobierno a maawagan iti kolkhoz, nga adda iti asideg ti Tokmok, Kyrgyzstan. Agpada a Kyrgyz ti puli ken pagsasaomi. Mannalon dagiti nagannakko, ken agtrabtrabahoda iti kolkhoz manipud parbangon agingga iti sumipnget. Regular idi a maikkan dagiti trabahador iti abasto a taraon, ngem maminsan laeng iti makatawen a masuelduanda. Inkarkarigatan ni nanangmi nga aywanannakami ken adingko. Kalpasan laeng ti lima a tawen a panageskuelak, nagtrabahoak metten iti kolkhoz.

Kabambantayan ti Teskey Ala-Too

Nakaro idi ti kinapanglaw iti rehionmi, ken makabannog ti trabaho a pangalaanmi iti pagbiagmi. Gapu ta ubingak pay, diak unay pampanunoten ti panggep ti biag ken ti masanguanan. Diak pulos idi napanunot nga agbalbaliw ti biagko gapu kadagiti nakaskasdaaw a kinapudno maipapan ken Jehova a Dios ken iti panggepna. Makapagagar ti estoria maipapan iti pannakaidanon ken pannakaisaknap dayta a mensahe ditoy Kyrgyzstan. Nangrugi dayta iti rehionmi iti makin-amianan a paset ti Kyrgyzstan.

DIMMANON TI KINAPUDNO ITI KYRGYZSTAN BABAEN KADAGITI DATI A DESTIERO

Nangrugi a maimula ti kinapudno maipapan ken Jehova iti Kyrgyzstan idi 1950’s. Tapno maaramid dayta, masapul a sarangten ti kinapudno ti nabileg nga ideolohia, wenno prinsipio, ti Komunista a gobierno. Apay? Ti Kyrgyzstan ket karaman idi iti Union of Soviet Socialist Republics (USSR). Iti intero a USSR, nagtalinaed dagiti Saksi ni Jehova a neutral iti politika. (Juan 18:36) Dayta ti makagapu a naidadanesda kas kabusor ti Komunista a gobierno. Ngem awan ti ideolohia a makalapped iti  Sao ti Dios a mangdanon iti puso dagiti napudno a tattao. Kinapudnona, ti maysa kadagiti kapatgan a nasursurok iti intero a panagbiagko ket posible ti ‘amin a banag’ ken Jehova.—Mar. 10:27.

Ni Emil Yantzen

Gapu iti pannakaidadanes dagiti Saksi ni Jehova, nakadanonda iti Kyrgyzstan. Kasano? Karaman ti Siberia iti USSR, ket puersado a naipan sadiay dagiti ibilang ti Gobierno a kabusor. Idi nawayawayaanda, adu kadakuada ti immay iti Kyrgyzstan, ket intugot ti dadduma kadakuada ti kinapudno. Maysa kadakuada ni Emil Yantzen, a nayanak iti Kyrgyzstan idi 1919. Naipan ni Emil iti kampo a pagtrabahuan ket naam-ammona sadiay dagiti Saksi. Inawatna ti kinapudno ket nagawid idi 1956. Nagnaed ni Emil iti asideg ti Sokuluk a rehionmi. Nabuangay ti kaunaan a kongregasion iti Kyrgyzstan iti rehion ti Sokuluk idi 1958.

Ni Victor Vinter

Kalpasan ti agarup makatawen, immakar iti Sokuluk ni Victor Vinter. Adu a rigat ti napasaran daytoy a matalek a kabsat. Namindua a nasentensiaan iti tallo a tawen a pannakaibalud gapu iti kinaneutralna, sa naibalud manen iti sangapulo a tawen ken lima a tawen a naidestiero. Ngem saan a nalapdan ti ibubusor ti panagsaknap ti pudno a panagdaydayaw.

IMMASIDEG ITI LUGARMI TI KINAPUDNO

Ni Eduard Varter

Idi 1963, adda agarup 160 a Saksi iti Kyrgyzstan, ket adu kadakuada ti dati a taga-Germany, Ukraine, ken Russia. Karaman kadakuada ti destiero a ni Eduard Varter, a nabautisaran idiay Germany idi 1924. Idi 1940’s, ni Eduard ket imbalud dagiti Nazi iti kampo konsentrasion. Sumagmamano a tawen kalpasanna, dagiti Komunista iti USSR indestieroda daytoy a kabsat. Idi 1961, immakar daytoy a matalek a kabsat iti ili ti Kant, a nakaas-asideg iti ilimi.

Ni Elizabeth Fot; ni Aksamai Sultanalieva

Agnanaed met iti Kant ti matalek a kabsat a ni Elizabeth Fot. Panagdait ti trabahona. Gapu ta nalaing nga agdait, isu ti pagpadpadaitan dagiti propesional, kas kadagiti doktor ken mannursuro. Maysa kadagiti kostumerna ti babai nga agnagan iti Aksamai Sultanalieva nga asawa ti maysa nga opisial iti public prosecutor’s office. Napan nagpadait ni Aksamai ken Elizabeth, ngem adu dagiti saludsodna maipapan iti panggep ti biag ken ti kasasaad dagiti natay. Inusar ni Elizabeth ti Biblia a nangsungbat kadagita. Nagbalin a naregta a manangaskasaba iti naimbag a damag ni Aksamai.

Ni Nikolai Chimpoesh

Kadagidi met la a tiempo, nadutokan a manangaywan iti sirkito ti taga-Moldova a ni Nikolai Chimpoesh, ket nagserbi iti dandani 30 a tawen. Saanna la a binisita dagiti kongregasion no di ket inorganisarna pay ti pannakakopia ken pannakaiwaras dagiti publikasiontayo. Nadlaw dagita dagiti agtuturay. Gapuna, nangted ni Eduard Varter iti makaparegta a balakad ken Nikolai: “No kuestionarandaka dagiti agtuturay, ibagam nga aggapgapu dagiti literaturatayo iti hedkuarter idiay Brooklyn. Perrengem ti KGB agent. Awan ti masapul a pagbutngam.”—Mat. 10:19.

Di nagbayag kalpasan ti panagsaritada, napaayaban ni Nikolai iti hedkuarter ti KGB idiay Kant. Inyestoriana ti napasamak: “Dinamag ti agent no pagal-alaanmi kadagiti literatura. Insungbatko nga aggap-gapu idiay Brooklyn. Awanen ti naibagana. Pinalubosannakon ken dinakon pinapaayaban.” Intultuloy dagitoy a natured a Saksi a siaannad nga ikasaba ti naimbag a damag iti rehionmi, iti makin-amianan a paset ti Kyrgyzstan. Idi 1981, nakadanon met laengen iti pamiliami ti nagpateg a kinapudno maipapan ken Jehova, ket ni baketko a Mairambubu ti umuna a nakangngeg iti dayta.

 NABIGBIG A DAGUS NI BAKETKO TI KINAPUDNO

Naggapu ni baketko iti Naryn a rehion ti Kyrgyzstan. Iti maysa nga aldaw idi Agosto 1974, bimmisita isuna iti balay ni adingko ket sadiay ti nagam-ammuanmi. Nakursonadaak a dagus ni Mairambubu ket nagkasarkami iti dayta met la nga aldaw.

Ni Apun Mambetsadykova

Idi Enero 1981, bayat a nakalugan ni baketko a mapan makitienda, nangngegna ti saritaan a nadakamat itay. Kayatna a maammuan ti ad-adu pay isu a dinamagna ti nagan ken adres ti babai. Imbaga ti babai nga Apun ti naganna, ngem naannad ta maiparit ti trabaho dagiti Saksi uray idi 1980’s. Imbes nga ibaga ni Apun ti adresna, dinamagna ti adresmi. Nakaragragsak a nagawid ni baketko.

“Nagmayat dagiti nangngegko,” kuna ni Mairambubu. “Adda babai a nangibaga kaniak a saanton a matay dagiti tattao. Agbalinto payen a naamo dagiti naatap nga animal.” Para kaniak, kasla saan a nakappapati dayta. “Urayenta a bumisita tapno ilawlawagna dayta,” kinunak.

Binisitanakami ni Apun kalpasan ti tallo a bulan. Kadagiti simmaruno a panagsarungkar, naam-ammomi ti dadduma a kaunaan a Saksi a Kyrgyz. Dagitoy a sister ti nangisuro kadakami kadagiti nakaskasdaaw a kinapudno maipapan ken Jehova ken iti panggepna iti sangatauan. Imbasada kadakami ti libro a Manipud Paraiso a Napucaw Agingga iti Paraiso a Naisubli. * Ken gapu ta maymaysa laeng a kopia dayta a libro iti Tokmok, manomano a sinakarmi dayta.

Ti maysa kadagiti kaunaan a nasursuromi ket ti padto iti Genesis 3:15. Matungpalto dayta babaen ken Jesus kas ti Mesianiko nga Ari a dinutokan ti Dios. Nagpateg daytoy a mensahe a masapul a mangngeg ti amin! Maysa dayta a rason tapno makiramankami a mangasaba. (Mat. 24:14) Dandani idin balbaliwan ti kinapudno iti Biblia ti biagmi.

PANAGGIGIMONG KEN PANAGBAUTISAR ITI LAKSID TI PANNAKAIPARIT

Inawisnakami ti maysa a brother a taga-Tokmok iti maysa a kasar. Di nagbayag, nadlawmi a naiduma ti panagtigtignay dagiti Saksi. Awan ti inumen a de alkohol iti kasaran, ken nakaur-urnos ti selebrasionda. Nagdakkel ti nakaidumaan dayta kadagiti kasar a naatenderanmin, a masansan a mabartek dagiti bisita, naalas ti tigtignayda, ken agsasaoda iti dakes.

 Nakigimongkami met iti kongregasion idiay Tokmok. Naangay dagita iti kakaykaywan, ipalubos la ketdi ti panawen. Nangdutok dagiti kakabsat iti parabantay ta ammoda a palpaliiwendakami latta dagiti polis. No kalam-ekna, aggigimongkami iti maysa a balay. No dadduma, umay dagiti polis iti paggigimonganmi a balay ket damagenda no ania ti ar-aramidenmi. Idi nagbautisarkami ken Mairambubu idi Hulio 1982 iti Chüy River, masapul nga agannadkami. (Mat. 10:16) Saggabassit laeng ti panagsangpet dagiti kakabsat ken nagtataripnongkami iti kabakiran. Nagkantakami iti kanta ti Pagarian ken dimngegkami iti palawag para iti bautismo.

GINUNDAWAYANMI A PALAWAEN TI MINISTERIOMI

Idi 1987, kiniddaw ti maysa a kabsat a bisitaek ti maysa nga interesado nga agnanaed idiay Balykchy. Tapno makadanonkami sadiay, agbiahekami iti uppat nga oras babaen iti tren. Kalpasan ti sumagmamano a gundaway a panangasabami idiay Balykchy, napaliiwmi nga adu ti interesado. Nalawag a gundaway dayta tapno palawaenmi ti ministeriomi.

Masansan a mapankami ken Mairambubu idiay Balykchy. Iti kaaduan a ngudo ti lawas, agyankami sadiay, mangasabakami, ken mangikondukta iti gimong. Nagpardas nga immadu dagiti mayat nga agbasa kadagiti publikasiontayo. Awitenmi idi dagiti publikasion manipud Tokmok babaen iti sako a pagibiahe iti patatas a maaw-awagan iti mishok. Dandani agkurang para iti makabulan a suplay ti dua a sako a napno iti literatura. Makapangasabakami met kadagiti pasahero ti tren bayat a mapankami idiay Balykchy ken no agawidkami.

Kalpasan ti walo a tawen manipud idi damo nga ibibisitami iti Balykchy, nabuangay ti maysa a kongregasion sadiay idi 1995. Adu ti magastosmi a mapan iti Balykchy ken agawid iti Tokmok. Ngem kasano a naaramidanmi dayta idinto ta awan unay makukuartami? Adda kabsat a kanayon a mangmangted iti kuarta tapno adda gastuenmi. Nakita ni Jehova ti tarigagaymi a mangpalawa iti ministeriomi, ket linuktanna ti “aribengbeng ti langlangit” kadakami. (Mal. 3:10) Talaga a posible ti amin a banag ken Apo Jehova!

OKUPADO ITI PAMILIA KEN ITI MINISTERIO

Idi 1992, nadutokanak kas maysa a panglakayen, ket siak ti kaunaan a Kyrgyz a panglakayen iti intero a pagilian. Iti kongregasionmi iti Tokmok, naluktan ti adu a pribilehio iti panagserbi. Adu nga estudiante a Kyrgyz nga agtutubo ti iyad-adalanmi iti Biblia. Maysa kadakuada ti agserserbi itan kas miembro ti Komite ti Sangay, ken special pioneer met ti dua kadakuada. Inkagumaanmi met a tulongan ti dadduma no aggigimongkami. Iti nasapa a paset ti 1990’s, Russian ti lengguahe dagiti publikasionmi ken dagiti gimongmi. Ngem umad-adu dagiti makigimgimong a Kyrgyz ti pagsasaoda. Gapuna, impatarusko dagiti gimong, a nakatulong tapno ad-adda a matarusanda ti kinapudno.

Dakami nga agassawa ken ti walo kadagiti annakmi idi 1989

Okupadokami met idi a mangpadpadakkel kadagiti annakmi. Intugtugotmi ida iti panangasaba ken iti gimong. Uray agtawen laeng idi iti 12 ti anakmi a ni Gulsayra, pagragragsakanna nga ipakaammo ti kinapudno iti Biblia kadagiti aglabas iti kalsada.  Magusgustuan met dagiti annakmi ti agikabesa kadagiti teksto. Gapu kadagita, naregtada a makiramraman kadagiti aktibidad iti kongregasion, uray met dagiti appokomi idi agangay. Addaankami iti 9 nga annak ken 11 nga appoko, ket 16 kadakuada ti agserserbi ken Jehova wenno makigimgimong a kadua dagiti nagannakda.

NAISANGSANGAYAN A PANAGBALBALIW

Masdaaw la ketdi dagiti kakabsat a nangirugi iti trabaho ni Jehova iti lugarmi idi 1950’s a makakita kadagiti panagbalbaliw a napasaranmi. Kas pagarigan, idi 1990’s, naikkankami iti ad-adu a wayawaya a mangikasaba iti naimbag a damag ken mangangay kadagiti dadakkel a taripnong.

Dakami ken baketko iti pangasabaan

Idi 1991, damomi ti immatender nga agassawa iti kombension idiay Alma-Ata, a pagaammo kas Almaty iti Kazakhstan. Ket idi 1993, naangay met ti kaunaan a kombension iti Kyrgyzstan idiay Spartak Stadium iti Bishkek. Makalawas a dinalusan dagiti kakabsat ti istadium sakbay ti kombension. Naapresiar unay dayta ti direktor ti istadium nga uray la impausarna dayta a libre.

Idi 1994, adda manen nakallalagip a pasamak. Adda met laengen publikasion a nayimprenta iti lengguahe a Kyrgyz. Regular itan a maipatpatarus dagiti literatura iti Kyrgyz iti sanga nga opisina idiay Bishkek. Idi 1998, naikkanen iti legal a pammalubos ti trabaho dagiti Saksi iti Kyrgyzstan. Gapu iti panagrang-ay ti organisasion, nasurokkami itan a 5,000 nga agibumbunannag ditoy. Adda itan 83 a kongregasion ditoy ken 25 a grupo a Chinese, English, Kyrgyz, Russian, Russian Sign Language, Turkish, Uighur, ken Uzbek. Sangsangkamaysa nga agserserbi ken Jehova dagitoy a kakabsat nupay nagduduma ti pulida. Pinagbalin amin ni Jehova a posible dagita a naisangsangayan a panagbalbaliw.

Binalbaliwan met ni Jehova ti biagko. Dimmakkelak iti napanglaw a pamilia dagiti trabahador ken lima a tawen laeng a nageskuelaak. Nupay kasta, inusarnak ni Jehova nga agserbi kas panglakayen ken mangisuro kadagiti nagpateg a kinapudno iti Biblia kadagiti tattao a nangatngato ti adalna ngem siak. Pudno a pagbalinen ni Jehova a posible dagiti kasla imposible a bambanag. Ti mismo a kapadasak ti mangtigtignay kaniak nga agtultuloy a simamatalek a mangsaksi maipapan ken Jehova, a kenkuana posible ti ‘amin a banag.’—Mat. 19:26.

^ par. 21 Impablaak dagiti Saksi ni Jehova ngem saanen a mayim-imprenta.