Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2017

Siasino ti Mangidadaulo iti Ili ti Dios Ita?

Siasino ti Mangidadaulo iti Ili ti Dios Ita?

“Laglagipenyo dagidiay mangidadaulo kadakayo.”—HEB. 13:7.

KANTA: 125, 43

1, 2. Idi nagpalangit ni Jesus, ania ti mabalin a pinampanunot dagiti apostol?

ITI Bantay Dagiti Olibo, nakatakder dagiti apostol ni Jesus a mangkitkita iti langit. Kakitkitada laeng ni Jesus, ti apo ken gayyemda, a nagpangato ken naabbongan iti ulep. (Ara. 1:9, 10) Agarup dua a tawen nga insuro, pinaregta, ken indauluan ida ni Jesus. Ngem ita, saandan a kadua. Ania ngaruden ti aramidenda?

2 Imbilin ni Jesus kadagiti pasurotna: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Ara. 1:8) Kasano a maitungpalda dayta? Impasigurado met ketdi ni Jesus nga umawatdanto iti nasantuan nga espiritu. (Ara. 1:5) Ngem gapu ta nalawa ti saklawen ti trabaho a panangasaba, masapul nga adda ti mangiwanwan ken mangorganisar. Idi un-unana, nangusar ni Jehova kadagiti makita a pannakabagina a mangiwanwan ken mangorganisar iti ilina. Isu a mabalin a pinampanunot dagiti apostol, ‘Mangdutok kadi ni Jehova iti baro a lider?’

3. (a) Idi addan idiay langit ni Jesus, ania a nagpateg a desision ti inaramid dagiti matalek nga apostol? (b) Ania ti adalentayo iti daytoy nga artikulo?

 3 Awan pay dua a lawas kalpasanna, inadal dagiti adalan ni Jesus ti Kasuratan, inkararagda ti panangiwanwan ti Dios, ket pinilida ni Matias a mangsukat ken Judas Iscariote kas ti maika-12 nga apostol. (Ara. 1:15-26) Apay a nagpateg kadakuada kasta met ken Jehova daytoy a panangpili? Gapu ta nagpateg ti nagbalin nga akem ni Matias iti organisasion. * Saan a pinili ni Jesus dagiti apostolna tapno laeng adda mangkadua kenkuana iti ministerio, no di ket tapno sanayenna ida a mangaramid iti nagpateg nga akem iti ili ti Dios. Ania dayta nga akem, ken kasano nga inusar ni Jehova ni Jesus a mangtulong kadakuada tapno maitungpalda dayta? Ania nga urnos ti kapada dayta ita? Ken kasanotayo a ‘laglagipen dagidiay mangidadaulo kadatayo,’ nangruna dagiti mangbukel iti “matalek ken masirib nga adipen”?—Heb. 13:7; Mat. 24:45.

MAKITA A MANGIDADAULO BABAEN ITI DI MAKITA A LIDER

4. Idi umuna a siglo, ania ti akem dagiti apostol ken ti dadduma a panglakayen idiay Jerusalem?

4 Idi Pentecostes 33 C.E., indauluanen dagiti apostol ti kongregasion Kristiano. Iti dayta a panagtataripnong, “timmakder ni Pedro agraman dagiti sangapulo ket maysa” ket insuroda dagiti makaited iti biag a kinapudno iti adu a Judio ken proselita. (Ara. 2:14, 15) Adu kadakuada ti nagbalin a Kristiano. Kalpasanna, dagitoy a kabbaro a Kristiano “intuloyda nga impamaysa ti bagbagida iti sursuro dagiti apostol.” (Ara. 2:42) Inasikaso dagiti apostol ti pinansial a kasapulan dagiti kakabsat. (Ara. 4:34, 35) Impaayda dagiti naespirituan a kasapulan ti ili ti Dios. Kinunada: “Ipamaysami ti bagbagimi iti panagkararag ken iti ministerio ti sao.” (Ara. 6:4) Ken nangibaonda kadagiti eksperiensiado a Kristiano a mangasaba kadagiti baro a teritoria. (Ara. 8:14, 15) Idi agangay, timmulong ti dadduma a napulotan a panglakayen kadagiti apostol a mangidaulo iti kongregasion. Kas bagi a manarawidwid, nangtedda kadagiti instruksion iti amin a kongregasion.—Ara. 15:2.

5, 6. (a) Kasano a timmulong ti nasantuan nga espiritu iti bagi a manarawidwid? (Kitaen ti ladawan iti rugi ti artikulo.) (b) Kasano a tinulongan dagiti anghel ti bagi a manarawidwid? (c) Kasano nga inwanwan ti Sao ti Dios ti bagi a manarawidwid?

5 Ammo dagiti Kristiano idi umuna a siglo nga iwanwanwan ni Jehova a Dios ti bagi a manarawidwid babaen iti Liderda a ni Jesus. Kasanoda a masigurado dayta? Umuna, agtigtignay ti nasantuan nga espiritu iti bagi a manarawidwid. (Juan 16:13) Immawat ti amin a napulotan a Kristiano iti nasantuan nga espiritu, ngem kangrunaanna a daytoy ti timmulong kadagiti apostol ken ti dadduma a panglakayen idiay Jerusalem a mangitungpal iti annongenda kas mangidadaulo. Kas pagarigan, idi 49 C.E., ti nasantuan nga espiritu ti nangiwanwan iti bagi a manarawidwid tapno makaaramidda iti desision mainaig iti panagkugit. Nagtulnog iti dayta dagiti kongregasion ket “nagtultuloy a mapatibker iti pammati ken umadu iti bilang iti inaldaw-aldaw.” (Ara. 16:4, 5) Ipakita met ti surat a naglaon iti dayta a desision nga addaan ti bagi a manarawidwid iti bunga ti espiritu ti Dios a pakairamanan ti ayat ken pammati.—Ara. 15:11, 25-29; Gal. 5:22, 23.

6 Maikadua, tinulongan dagiti anghel ti bagi a manarawidwid. Sakbay a nabautisaran ni Cornelio, ti umuna a di nakugit a Gentil a Kristiano, maysa nga anghel ti nangiwanwan kenkuana a mapan ken apostol Pedro. Kalpasan a kinasabaan ni Pedro ni Cornelio ken dagiti kakabagianna, immawatda iti nasantuan nga espiritu nupay saanda idi a nakugit.  Dayta ti nangtignay kadagiti apostol ken ti dadduma a kakabsat nga agtulnog iti pagayatan ti Dios ken mangawat kadagiti di nakugit a Gentil iti kongregasion Kristiano. (Ara. 11:13-18) Kanayonanna, napasnek a timmulong dagiti anghel ken pinapartakda ti trabaho a panangasaba nga idadauluan idi ti bagi a manarawidwid. (Ara. 5:19, 20) Maikatlo, inwanwan ti Sao ti Dios ti bagi a manarawidwid. Nagpaiwanwan iti Kasuratan dagiti napulotan iti espiritu a papanglakayen iti panangsolbarda kadagiti isyu maipapan iti patpatien dagiti Kristiano wenno iti panangaramidda iti instruksion para iti organisasion.—Ara. 1:20-22; 15:15-20.

7. Apay a maibagatayo a ni Jesus ti nangidaulo kadagiti Kristiano idi umuna a siglo?

7 Nupay adda autoridad ti bagi a manarawidwid iti nagkauna a kongregasion, bigbigenda a ni Jesus ti Liderda. “Intedna [ni Kristo] ti sumagmamano kas apostol,” insurat ni apostol Pablo. “Babaen ti ayat dumakkeltayo koma iti amin a bambanag kenkuana nga isu ti ulo, ni Kristo.” (Efe. 4:11, 15) “Dagiti adalan babaen ti nadibinuan a panangiwanwan naawaganda iti Kristiano” imbes a naawaganda iti nagan ti mabigbigbig nga apostol. (Ara. 11:26) Ammo ni Pablo a napateg a ‘petpetan a siiirut dagiti tradision,’ wenno dagiti Nainkasuratan a pannursuro, nga impaay dagiti apostol ken ti dadduma a lallaki a mangidadaulo idi. Nupay kasta, kinunana: “Ngem kayatko a maammuanyo a ti ulo ti tunggal lalaki [a pakairamanan ti amin a miembro ti bagi a manarawidwid] isu ti Kristo; . . . ket ti ulo ti Kristo isu ti Dios.” (1 Cor. 11:2, 3) Wen, babaen iti Ulona a ni Jehova a Dios, ti di makita ken naitronon a ni Kristo Jesus ti mangidadaulo iti kongregasion.

“SAAN A TRABAHO TI TAO DAYTOY”

8, 9. Manipud idi 1870, ania ti nagpateg nga akem ni Brother Russell?

8 Manipud idi 1870, inkagumaan ni Charles Taze Russell ken ti dadduma a kakaduana nga isubli ti pudno a panagdaydayaw dagiti Kristiano. Tapno maipakaammoda ti kinapudno iti Biblia iti nagduduma a lengguahe, nabukel ti Zion’s Watch Tower Tract Society idi 1884, ket ni Brother Russell ti nagbalin a presidente. * Napasnek nga inadalna ti Biblia, ken situtured nga imbutaktakna dagiti ulbod a sursuro a kas iti Trinidad ken immortal a kararua. Ammona a saan a makita ti panagsubli ni Kristo ken agpatingga iti tawen 1914 ti “naituding a pampanawen dagiti nasion.” (Luc. 21:24) Insakripisio ni Brother Russell ti tiempo ken pigsana ken inusarna ti kuartana a mangipakaammo iti dadduma dagitoy a kinapudno. Nalawag a ni Brother Russell ti inusar idi ni Jehova a mangidaulo iti kongregasion.

9 Saan a kayat ni Brother Russell nga isu ket idaydayaw ti tao. Idi 1896, insuratna: “Dimi kayat nga idaydayaw ti bagimi ken dagiti insuratmi; saanmi met a kayat ti maawagan iti Reverend wenno Rabbi. Ken dimi kayat a mayawag ti naganmi iti asinoman.” Kinunana pay idi agangay: “Saan a trabaho ti tao daytoy.”

10. (a) Kaano a dinutokan ni Jesus “ti matalek ken masirib nga adipen”? (b) Ilawlawagmo no kasano nga in-inut a limmawag ti nagdumaan ti Bagi a Manarawidwid ken Watch Tower Society.

10 Idi 1919, tallo a tawen kalpasan a natay ni Brother Russell, dinutokan ni Jesus “ti matalek ken masirib nga adipen.” Apay? Tapno mangipaay kadagiti katulong iti “taraonda iti umiso a tiempo.” (Mat. 24:45) Uray kadagidi a tawen, mangipapaayen iti naespirituan a taraon kadagiti pasurot ni Jesus ti bassit a grupo dagiti napulotan a kakabsat nga agserserbi iti hedkuarter idiay Brooklyn, New York. Idi 1940’s, nangrugi a mabasa kadagiti publikasiontayo ti termino a “bagi a manarawidwid.” Naipagarup idi a dayta a termino ket tumukoy iti Watch Tower Bible  and Tract Society. Ngem idi 1971, nailawlawag a naiduma ti Bagi a Manarawidwid iti Watch Tower Society ken dagiti direktor dayta. Ti Watch Tower Society, a saan a Nainkasuratan a nagan, ti maus-usar para kadagiti legal a bambanag. Manipud idin, maipalubosen nga agbalin a miembro ti Bagi a Manarawidwid dagiti napulotan a kakabsat a lallaki uray saanda a direktor ti Sosiedad. Kadagiti nabiit pay a tawen, dagiti responsable a kakabsat a kameng ti “sabsabali a karnero” ket nagserbi kas direktor ti Sosiedad ken ti dadduma pay a korporasion nga inusar ti ili ti Dios. Iti kasta, ad-adda a maipamaysa ti Bagi a Manarawidwid ti mangipaay iti naespirituan a panangisuro ken panangiwanwan. (Juan 10:16; Ara. 6:4) Iti ruar ti Pagwanawanan a Hulio 15, 2013, nailawlawag a “ti matalek ken masirib nga adipen” ket maysa a bassit a grupo dagiti napulotan a kakabsat a lallaki a mangbukel iti Bagi a Manarawidwid.

Ti bagi a manarawidwid, idi 1950’s

11. Ania ti akem ti Bagi a Manarawidwid?

11 Ti Bagi a Manarawidwid ti mangar-aramid kadagiti napapateg a desision kas grupo. Kasano? Linawas nga agmimitingda tapno agsasarita ken agtalinaed ti panagkaykaysada. (Prov. 20:18) Tinawen nga agsisinnublatda nga agtserman kadagita a miting, ta awan ti miembro ti Bagi a Manarawidwid a maibilang a napatpateg ngem ti dadduma. (1 Ped. 5:1) Agsisinnublatda met a mangidaulo iti innem a komite ti Bagi a Manarawidwid. Awan ti miembro dayta a grupo a mangibilang iti bagina a lider dagiti kakaduana, no di ket ibilangda ti bagida kas maysa kadagiti ‘katulong’ a matartaraonan iti naespirituan ken agtultulnog iti panangidaulo ti matalek nga adipen.

Idi nadutokan ti matalek nga adipen idi 1919, mangipapaayen iti naespirituan a taraon iti ili ti Dios (Kitaen ti parapo 10, 11)

“SIASINO A PUDPUDNO TI MATALEK KEN MASIRIB NGA ADIPEN”?

12. Gapu ta saan a direkta a kasarsarita ti Dios dagiti miembro ti Bagi a Manarawidwid ken imperpektoda, ania dagiti saludsod a tumaud?

12 Saan a direkta a kasarsarita ti Dios dagiti miembro ti Bagi a Manarawidwid ken imperpektoda. Isu a mabalin nga agkamali dayta a grupo iti panangilawlawagda kadagiti pannursuro ti Biblia wenno iti panangiwanwan iti organisasion. Kinapudnona, iti Watch Tower Publications Index iti paulo a “Beliefs Clarified,” makita dagiti nabalbaliwan a pannakaawattayo kadagiti naibatay iti Biblia a patpatientayo manipud idi 1870. * Kinapudnona, saan nga imbaga ni Jesus a perpekto ti naespirituan a taraon nga ipaay ti matalek nga adipen. Ania ngarud ti sungbat iti saludsod ni Jesus a: “Siasino a pudpudno ti matalek ken masirib nga adipen?” (Mat. 24:45) Ania dagiti ebidensia a ti Bagi a Manarawidwid ti matuktukoy a matalek nga adipen? Kitaentayo ti tallo a banag a nangiwanwan met iti bagi a manarawidwid idi umuna a siglo.

13. Kasano a timmulong ti nasantuan nga espiritu iti Bagi a Manarawidwid?

13 Nasantuan nga espiritu. Tumultulong ti nasantuan nga espiritu iti Bagi a Manarawidwid a mangtarus kadagiti kinapudno iti Biblia a saan idi a maawatan. Kas pagarigan, kitaem dagiti nabalbaliwan a pannakaawat kadagiti patpatientayo iti listaan a nadakamat iti napalabas a parapo. Sigurado a saan a kabaelan ti tao a tarusan ken ilawlawag dagita a “nauneg a bambanag ti Dios”! (Basaen ti 1 Corinto 2:10.) Umanamong ti Bagi a Manarawidwid iti imbaga ni apostol Pablo idi insuratna: “Dagitoy a banag sawenmi met, saan a babaen ti sasao nga insuro ti natauan a sirib, no di ket babaen kadagidiay insuro ti espiritu.” (1 Cor. 2:13) Kalpasan ti ginasut a tawen a nakaro ti apostasia ken naespirituan a kinasipnget, adda kadi pay sabali malaksid iti nasantuan nga espiritu a makagapu iti napartak a panaglawag dagiti naespirituan a kinapudno manipud idi 1919?

14. Sigun iti Apocalipsis 14:6, 7, kasano a tultulongan dagiti anghel ti ili ti Dios ita?

 14 Dagiti anghel. Nagdakkel ita ti trabaho ti Bagi a Manarawidwid a mangidaulo iti nasurok a walo a milion nga agibumbunannag a makiramraman iti panangasaba iti intero a lubong. Apay a nakabalballigi dayta a trabaho? Ti maysa a makagapu ket ti tulong dagiti anghel. (Basaen ti Apocalipsis 14:6, 7.) Adu ti kapadasan dagiti kakabsat nga adda nakasaritada a maysa a tao a kalkalpasna laeng nga inkararag ti tulong ti Dios! * Rumangrang-ay ti trabaho a panangasaba ken panagaramid iti adalan uray nakaro ti ibubusor iti dadduma a pagilian. Posible laeng dayta gapu iti tulong dagiti anghel.

15. Ania ti nakaidumaan ti Bagi a Manarawidwid kadagiti lider ti dadduma a relihion? Mangted iti pagarigan.

15 Sao ti Dios. (Basaen ti Juan 17:17.) Kitaentayo ti napasamak idi 1973. Iti ruar ti Disiembre 1 a Ti Pagwanawanan, mabasa daytoy a saludsod: “Kualipikado kadi . . . dagiti tattao a saan pay a nakaikkat iti pannakaadiktoda iti tabako a mabautisaran?” Ti sungbat: “Ipakpakita dagiti pammaneknek iti Kasuratan a saanda a kualipikado.” Kalpasan ti panangdakamat ti Pagwanawanan iti adu a mangpaneknek a teksto, inlawlawagna no apay a masapul a mailaksid ti maysa a saan a mangisardeng iti panagsigarilio. (1 Cor. 5:7; 2 Cor. 7:1) Mabasa iti dayta: “Saan nga ipakpakita daytoy ti panagtarigagay nga agtignay iti naturay, wenno diktatoryal a wagas.  Ti kinainget ket pudno a naggapu iti Dios, nga impakaammona babaen iti naisurat a Saona.” Adda pay kadi sabali a relihion a sisasagana nga agpaiwanwan iti Sao ti Dios, uray no talaga a narigat nga aramiden dayta ti dadduma a miembrona? Mabasa iti maysa a nabiit pay a libro maipapan iti relihion idiay United States: “Kanayon a baliwan dagiti lider dagiti Kristiano dagiti isursuroda tapno maitunos dayta kadagiti patpatien ken opinion dagiti miembroda ken ti kaaduan a tattao ket maalada ti suportada.” No agpapaiwanwan dagiti miembro ti Bagi a Manarawidwid iti Biblia iti panagdesisionda, imbes nga iti opinion dagiti tattao, siasino a talaga ti mangidadaulo iti ili ti Dios ita?

“LAGLAGIPENYO DAGIDIAY MANGIDADAULO”

16. Ania ti maysa a pamay-an a laglagipentayo ti Bagi a Manarawidwid?

16 Basaen ti Hebreo 13:7. Mabalin met a maipatarus ti sao a “laglagipen” a “dakamaten.” Ngarud, ti maysa a pamay-an a ‘laglagipem dagiti mangidadaulo’ ket babaen iti panangdakamatmo ken panangiramanmo iti Bagi a Manarawidwid kadagiti kararagmo. (Efe. 6:18) Panunotem dagiti responsabilidadda a mangipaay iti naespirituan a taraon, mangiwanwan iti panangasaba iti intero a lubong, ken mangimanehar kadagiti pondo a naidonar. Masapul ngarud nga itultuloytayo ida nga iraman kadagiti kararagtayo!

17, 18. (a) Kasanotayo a matulongan ti Bagi a Manarawidwid? (b) Kasano a no mangasabatayo ipakpakitatayo a supsuportarantayo ti Bagi a Manarawidwid ken ni Jesus?

17 Siempre, saan laeng nga iti sao a laglagipentayo ti Bagi a Manarawidwid no di ket uray iti panagtulnogtayo iti panangiwanwanna. Ipapaay ti Bagi a Manarawidwid dagiti instruksion babaen kadagiti publikasion, gimong, asamblea, ken kombensiontayo. Kasta met, isu ti mangdutok kadagiti manangaywan iti sirkito, a mangdutok met kadagiti panglakayen. Laglagipen dagiti manangaywan iti sirkito ken papanglakayen ti Bagi a Manarawidwid babaen iti panangsurotda a naimbag kadagiti urnos a naipaay kadakuada. Maipakitatayo a resrespetuentayo ti Lidertayo a ni Jesus no agtulnog ken agpasakuptayo kadagiti lallaki nga us-usarenna a mangiwanwan kadatayo.—Heb. 13:17.

18 Ti panagreggettayo a mangasaba ti maysa pay a pamay-an a laglagipentayo ti Bagi a Manarawidwid. Imparegta pay ketdi ni Pablo a tuladentayo ti pammati dagidiay mangidadaulo kadatayo. Ipakpakita ti matalek nga adipen ti nakabilbileg a pammati babaen iti naregta a panangsuporta ken panangipakaammoda iti naimbag a damag maipapan iti Pagarian. Maysaka kadi kadagiti sabsabali a karnero a tumultulong kadagiti napulotan iti daytoy nagpateg a trabaho? Sigurado a maragsakanka no ibaga kenka ti Lidertayo a ni Jesus: ‘No kasano nga inaramidmo dayta iti maysa kadagiti kanunumuan kadagitoy kakabsatko, inaramidmo dayta kaniak.’—Mat. 25:34-40.

19. Apay a determinadoka nga agtulnog iti Lidertayo a ni Jesus?

19 Idi nagsubli ni Jesus idiay langit, dina binaybay-an dagiti pasurotna. (Mat. 28:20) Idi nangidaulo ditoy daga, napadasanna a mismo ti tulong ti nasantuan nga espiritu, dagiti anghel, ken ti Sao ti Dios. Gapuna, kasta met ti ipapaayna a tulong ita iti matalek nga adipen. Dagiti napulotan a Kristiano a miembro dayta nga adipen “agtultuloy a sumursurot[da] iti Kordero iti uray sadino a papananna.” (Apoc. 14:4) Isu a no agtulnogtayo iti instruksionda, agtultulnogtayo met iti Lidertayo a ni Jesus. Asidegen nga iturongnatayo iti biag nga agnanayon. (Apoc. 7:14-17) Awan ti tao a lider a makaikari iti kasta!

^ par. 3 Kayat ni Jehova a ti 12 nga apostol ti mangbukel iti agbalin a “sangapulo ket dua a pamuon a bato” ti Baro a Jerusalem. (Apoc. 21:14) Isu a saanen a kasapulan a masuktan pay ti asinoman kadagiti matalek nga apostol a natay idi agangay.

^ par. 8 Manipud idi 1955, naawaganen dayta a korporasion iti Watch Tower Bible and Tract Society of Pennsylvania.

^ par. 12 Kitaen met ti paulo a “Pannakalawlawag Dagiti Patpatientayo” iti libro a Giya iti Panagsukimat Para Kadagiti Saksi ni Jehova.

^ par. 14 Kitaen ti Naan-anay nga Ikasabam ti Pagarian ti Dios, p. 58-59.