Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2017

Salsaludsod Dagiti Agbasbasa

Salsaludsod Dagiti Agbasbasa

Insurat ni apostol Pablo a ‘saan nga ipalubos’ ni Jehova a “masulisogkayo iti labes ti kabaelanyo nga itured.” (1 Cor. 10:13) Kayatna kadi a sawen nga ammuen a nasaksakbay ni Jehova dagiti kabaelantayo nga ibturan sa pilienna dagiti pakasubokantayo?

Adda kabsat a nagpakamatay ti anakna ket insaludsodna: ‘Inammo kadi a nasaksakbay ni Jehova a kabaelanmi ken baketko nga ibturan ti panagpakamatay ti anakmi? Napasamak kadi dayta gapu ta ammo ti Dios a maibturanmi?’ Adda kadi natibker a pangibatayan nga imanmaniobra ni Jehova dagiti pasamak iti biagtayo iti kasta a pamay-an?

No utobentayo a naan-anay ti sasao ni apostol Pablo iti 1 Corinto 10:13, mabigbigtayo nga awan ti ibaga ti Biblia a nasaksakbay nga ammuen ni Jehova dagiti kabaelantayo nga ibturan sa pilienna ti pakasubokantayo. Kitaentayo ti uppat a rason a mangsuporta iti dayta a konklusion.

Umuna, inikkannatayo ni Jehova iti wayawaya nga agpili. Kayatna nga agbiagtayo iti pamay-an a kayattayo. (Deut. 30:19, 20; Jos. 24:15) No pilientayo ti agbiag maitunos iti pagayatan ni Jehova, masiguradotayo nga iwanwannatayo. (Prov. 16:9) Ngem no pilientayo ti di umiso, sagabaentayo dagiti pagbanaganna. (Gal. 6:7) No pilien ni Jehova dagiti pakasuotantayo, saan kadi nga arigna kiskissayanna ti wayawayatayo nga agpili?

Maikadua, saannatayo a protektaran ni Jehova manipud iti “tiempo ken ti di mapakpakadaan a pasamak.” (Ecl. 9:11) Mabalin a mapasamak dagiti nakaro nga aksidente—a nalabit nasaem ti resultana—gapu ta addatayo iti di umiso a lugar iti di umiso a tiempo. Dinakamat ni Jesus ti pannakatay ti 18 a tattao a natupakan iti torre, ket imbagana a saan a pagayatan ti Dios dayta. (Luc. 13:1-5) Umiso kadi a panunoten nga ikeddeng ti Dios no siasino ti agbiag wenno matay kadagiti di mapakpakadaan a pasamak?

Maikatlo, karaman ti tunggal maysa kadatayo iti isyu ti kinatarnaw. Kinuestionaran ni Satanas ti motibo dagiti agdaydayaw ken Jehova, nga ibagbagana a saantayo nga agtalinaed a nasungdo ken Jehova no masuottayo. (Job 1:9-11; 2:4; Apoc. 12:10) No ilisinatayo ni Jehova kadagiti pakasuotan nga ipagarupna a ditay maibturan, saan ngata a patalgedan dayta ti karit ni Satanas nga  agserserbitayo laeng iti Dios gapu iti pagimbagantayo?

Maikapat, saan a masapul nga ammuen a nasaksakbay ni Jehova ti amin a mapasamak kadatayo. Ti kapanunotan a pilien a nasaksakbay ti Dios dagiti pakasuotantayo ipakitana a masapul nga ammuenna ti amin maipapan iti masakbayantayo. Ngem saan nga isursuro ti Biblia dayta. Kabaelan ti Dios nga ammuen dagiti mapasamak iti masanguanan. (Isa. 46:10) Ngem ipakita ti Biblia a pilienna laeng ti ammuenna. (Gen. 18:20, 21; 22:12) Gapuna, balanse ti panangusar ti Dios iti pannakabalinna a mangammo iti masanguanan kas panagraemna iti wayawayatayo nga agpili. Saan kadi a kasta ti namnamaentayo iti Dios a kanayon a balanse ti panangipakitana kadagiti kualidadna ken mangipatpateg iti wayawayatayo?—Deut. 32:4; 2 Cor. 3:17.

Ania ngarud ti kayat a sawen ti imbaga ni Pablo a: “Ti Dios . . . saannanto nga ipalubos a masulisogkayo iti labes ti kabaelanyo nga itured”? Ibagbaga ditoy ni Pablo ti aramiden ni Jehova kabayatan ti pakasuotan, saan ket a sakbay dayta. * Ipasigurado ti sasao ti apostol a no agtalektayo ken Jehova, tulongannatayo aniaman ti pakasuotantayo. (Sal. 55:22) Naibatay dagiti makaliwliwa a sasao ni Pablo iti dua a nagpateg a kinapudno.

Umuna, dagiti pakasuotantayo ket “kadawyan kadagiti tattao.” Gagangay ngarud kadagiti tattao dagiti pakasubokantayo. Kabaelantayo nga ibturan dagita no la ket agpannuraytayo ken Jehova. (1 Ped. 5:8, 9) Iti konteksto ti 1 Corinto 10:13, dagiti suot a nakaipasanguan dagiti Israelita iti let-ang ti tuktukoyen ni Pablo. (1 Cor. 10:6-11) Awan kadagidiay a pakasuotan ti saan a maibturan dagiti tattao wenno uray dagiti matalek nga Israelita. Namimpat nga imbaga ni Pablo a “sumagmamano kadakuada” ti nagsukir. Nakalkaldaang ta nasulisog ti dadduma nga Israelita ta saanda a nagpannuray iti Dios.

Maikadua, “ti Dios matalek.” Ipakita ti pannakilangen ti Dios iti ilina a nasungdo ti ayatna kadagidiay “agayat kenkuana” ken kadagidiay “mangsalimetmet iti bilbilinna.” (Deut. 7:9) Paneknekan met dayta a kanayon a tungpalen ti Dios dagiti karina. (Jos. 23:14) Gapu kadagiti ebidensia ti kinamatalekna, masigurado dagidiay mangay-ayat ken agtultulnog kenkuana a tungpalenna dagitoy dua a karina no masuotda: (1) Saanna nga ipalubos a masulisogda iti dida kabaelan nga ibturan, ken (2) ‘mangaramidto iti dalan a pagruaranda.’

‘Liwliwaennatayo [ni Jehova] iti amin a rigattayo’

Kasano a mangaramid ni Jehova iti dalan a pagruaran dagidiay agpampannuray kenkuana no masuotda? Siempre, no kayatna, nalaka laeng nga ikkatenna ti pakasuotan. Ngem panunotem ti imbaga ni Pablo: “[Ni Jehova] aramidennanto met ti dalan a pagruaran tapno mabalinanyo nga ibturan dayta.” Ngarud, masansan a mangaramid iti “dalan a pagruaran” babaen iti panangipaayna iti kasapulantayo tapno maibturantayo dagiti pakasuotan. Kitaentayo ti dadduma a pamay-an no kasano a mangaramid ni Jehova iti dalan a pagruarantayo:

  • ‘Liwliwaennatayo iti amin a rigattayo.’ (2 Cor. 1:3, 4) Bang-aran ni Jehova ti rikna, puso, ken panunottayo babaen iti Saona, ti nasantuan nga espirituna, ken ti naespirituan a taraon nga ipapaay ti matalek nga adipen.—Mat. 24:45; Juan 14:16; Roma 15:4.

  • Mabalin nga iwanwannatayo babaen iti nasantuan nga espiritu. (Juan 14:26) No masuottayo, makatulong ti nasantuan nga espiritu tapno malagiptayo dagiti salaysay ken prinsipio iti Biblia ket makaaramidtayo iti umiso a desision.

  • Mabalin nga usarenna dagiti anghelna a tumulong kadatayo.—Heb. 1:14.

  • Mabalin a tulongannatayo babaen kadagiti kakabsat ta “makapabileg a tulong” dagiti sao ken aramidda.—Col. 4:11.

Ania ngarud ti konklusiontayo iti imbaga ni Pablo iti 1 Corinto 10:13? Saan a pilien ni Jehova dagiti ipalubosna a pakasuotantayo. Ngem no masuottayo, daytoy ti masiguradotayo: Di pulos ipalubos ni Jehova a masuboktayo iti labes ti kabaelantayo nga ibturan no naan-anay nga agtalektayo kenkuana; kanayon a mangaramid iti dalan a pagruaran tapno makapagibturtayo. Talaga a makaliwliwa dayta!

^ par. 2 Ti Griego a sao a naipatarus a “sulisog” mabalin a kaipapananna ti “pannubok, pakasuotan.”