Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Pebrero 2016

 MANIPUD ITI ARCHIVES

Nalatak iti Minilion ti Sound Car

Nalatak iti Minilion ti Sound Car

“Maymaysa laeng idi ti sound car a maus-usar iti panagserbi iti Apo idiay Brazil, ket pagaammo dayta ti minilion kas ‘ti sound car ti Watch Tower.’”—Nathaniel A. Yuille, idi 1938.

NABUNTOG ti panagrang-ay ti panangikasaba iti Pagarian idiay Brazil idi rugrugi ti dekada 1930. Ngem idi 1935, nagsurat ti agassawa a payunir a da Nathaniel ken Maud Yuille ken Joseph F. Rutherford, a mangidadaulo idi iti panangasaba. Nagboluntarioda nga agserbi ket imbagada iti suratda a “maragsakanda a mapan iti sadinoman a lugar” a pakaibaonanda.

Ni Nathaniel, a maysa a retirado nga inheniero, ket agtawen idin iti 62. Isu idi ti service director ti maysa a kongregasion dagiti Saksi ni Jehova idiay San Francisco, California, U.S.A. Sadiay nga inorganisarna ti trabaho a panangasaba ket nagusar iti sound equipment a mangisaknap iti naimbag a damag. Ti kapadasanna ken ti situtulok a kababalinna ket nakatulong iti baro nga annongenna kas adipen ti sanga iti naglawa ken aduan iti nagduduma a lengguahe a teritoria—ti Brazil.

Simmangpet da Nathaniel ken Maud idiay Brazil idi 1936, kaduada ti padada a payunir ken interpreter a ni Antonio P. Andrade. Adda nagpateg nga awitda—35 a ponograpo ken maysa a sound car. Ti Brazil ti maikalima a kadakkelan a pagilian, ngem addaan laeng idi iti agarup 60 nga agibumbunannag iti Pagarian! Ngem makatulong dagitoy a kabbaro a pangpapigsa iti timek nga alikamen tapno mapakaammuanda dagiti minilion a tattao iti sumagmamano laeng a tawen.

Makabulan kalpasan a simmangpet dagiti agassawa a Yuille, inyurnos ti sanga nga opisina ti umuna a kombension idiay Brazil, a naangay iti siudad ti São Paulo. Gapu ta ni Maud ti drayber, nausar ti sound car a mangyanunsio iti palawag publiko, ket adda timmabuno a 110! Naparegta dagiti agibumbunannag iti programa ti kombension. Natignayda nga ad-adda a makiraman iti  panangasaba. Nasursuroda ti mangasaba babaen kadagiti literatura ken ti panangusar iti testimony card, agraman dagiti plaka a mangngegan babaen iti ponograpo iti lengguahe nga Ingles, Aleman, Espaniol, Hungarian, Polish, ken idi agangay, Portuguese.

Nausar daytoy a sound car tapno maidanon ti naimbag a damag iti minilion a tattao idiay Brazil

Ti tallo a kombension a naangay idiay São Paulo, Rio de Janeiro, ken Curitiba idi 1937, nakaipaayda iti ad-adda a pammaregta iti panangasaba. Inusar dagiti nakikombension ti sound car iti trabaho a panangasaba. Ni José Maglovsky, nga agtutubo idi, insuratna idi agangay: “Ikabilmi dagiti naibatay iti Biblia a publikasion iti maysa a puesto, ket bayat nga agyanunsio ti sound car iti naiplaka a mensahe, kasaritami dagiti tattao a rummuar kadagiti balayda a mangkita iti mapaspasamak.”

Naaramid ti bautismo kadagiti karayan, bayat nga agkakainaran dagiti agdigdigus a tattao. Nagsayaat ti mangasaba babaen iti tulong ti sound car! Gapu iti napigsa a timek ni Brother Rutherford iti palawagna iti bautismo manipud iti amplifier, adu nga agusioso ti nangaribungbong iti lugan, bayat a dumngegda iti palawag a naipatarus iti Portuguese. Kalpasanna, maitaneb dagiti kandidato bayat a maipatpatokar dagiti kanta ti Pagarian iti lengguahe a Polish. Agkakadua dagiti kakabsat nga agkanta iti nagduduma a lengguahe. “Naipalagip iti maysa no kasano a naawatan ti tunggal maysa nga adalan ti bukodna a lengguahe idi Pentecostes,” kuna ti 1938 Yearbook.

Kalpasan dagiti kombension, kada Domingo, agtudo man wenno aginit, mausar ti sound car tapno maipangngeg kadagiti tattao dagiti naiplaka a palawag a naibatay iti Biblia iti parke, kabalbalayan, ken paktoria iti sentro ti São Paulo ken kadagiti kabangibang nga ili. Adda binulan a programa a maipangngeg babaen iti sound car kadagiti 3,000 nga adda iti pagtaengan dagiti agkukutel a 97 a kilometro (60 a milia) ti kaadayona iti amianan a laud ti São Paulo. Idi agangay, addan narang-ay a kongregasion sadiay. Nupay nakaro ti sakitda, dagidiay nga agibumbunannag iti Pagarian dimmawatda iti pammalubos a bumisita iti sabali a pagtaengan dagiti agkukutel tapno idanonda ti makaliwliwa a mensahe ti Biblia.

Iti maudi a bulbulan ti 1938, simmangpet dagiti nairekord iti Portuguese a mensahe ti Pagarian. Iti kaaldawan ti Piesta Dagiti Natay, naipangngeg kadagiti sementerio manipud iti sound car dagiti naiplaka a mensahe a “Where Are the Dead?,” “Jehovah,” ken “Riches,” ket nangngegan dayta ti nasurok nga 40,000 nga agladladingit!

Marurod dagiti lider ti relihion iti natured a pannakaiwaragawag ti kinapudno iti Biblia iti publiko ket masansan a pinilitda dagiti autoridad a mangpasardeng iti sound car. Nalagip ni Sister Yuille ti napasamak idi sinugsogan ti padi ti maysa a bunggoy a manglikmut iti sound car. Ngem simmangpet ti mayor ken dagiti opisial ti polis ket dimngegda iti intero a programa. Nagawid ti mayor nga adda awitna a literatura a naibatay iti Biblia. Awan ti napasamak a riribuk iti dayta nga aldaw. Nupay adda ibubusor, ti report maipapan iti Brazil iti 1940 Yearbook ibagana a ti tawen 1939 “ti kasayaatan kadagiti amin a panagserbi iti Naindaklan nga Agturay ken panangiwaragawag iti naganna.”

Ti isasangpet “ti sound car ti Watch Tower” talaga a nangipaay iti dakkel a panagbalbaliw iti trabaho a panangasaba idiay Brazil. Dakkel ti pasetna iti panangidanon iti mensahe ti Pagarian kadagiti minilion a tattao. Nupay nailako dayta a nalatak a lugan idi 1941, adu a Saksi ni Jehova ti nagtultuloy a nangipakaammo iti naimbag a damag kadagiti nasingpet a tattao iti nagdakkel a teritoria ti Brazil.—Manipud iti archives-tayo iti Brazil.