Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2016

Inawagan ni Jehova a “Gayyemko”

Inawagan ni Jehova a “Gayyemko”

“Sika, O Israel, ti adipenko, sika, O Jacob, a pinilik, ti bin-i ni Abraham a gayyemko.”—ISA. 41:8.

KANTA: 91, 22

1, 2. (a) Kasano nga ammotayo a mabalin a makigayyem ti tao iti Dios? (b) Ania ti usigentayo iti daytoy nga artikulo?

MANIPUD kinamaladaga agingga iti tanem, ayat ti kasapulantayo unay. Kasapulan ken tarigagayan ti tao ti ayat—saan laeng a ti romantiko nga ayat. Kayattayo ti makigayyem ken makilangen iti sabsabali. Ngem adda ayat a kangrunaan a kasapulantayo—ti ayat ni Jehova. Kuna ti dadduma nga imposible nga agbalin a nasinged a gayyem ti tao ti Mannakabalin-amin a Dios a maysa nga Espiritu. Kasta kadi met ti pampanunotentayo? Saan a pulos!

2 Ipakita ti Biblia nga adda dagiti imperpekto a tattao a nagbalin a gayyem ti Dios. No usigentayo dagiti ulidanda, maaddaantayo iti nabileg a pannakigayyem iti Dios. Dayta ti kapatgan a kalattayo iti biag. Ni Abraham ti nagsayaat nga ulidan a naaddaan iti nasinged a pannakigayyem iti Dios. (Basaen ti Santiago 2:23.) Kasano a nagbalin a nasinged ni Abraham ken Jehova? Pammati ti kangrunaan a kasapulan iti kasta a panaggayyem. Kinapudnona, awagan ti Biblia ni Abraham nga “ama dagidiay amin nga addaan  iti pammati.” (Roma 4:11) Usigentayo ngarud no kasano a ti pammati ni Abraham ti nakatulong kenkuana a suminged iti Dios. Isaludsodtayo, ‘Kasano a matuladko ti pammati ni Abraham ken kasano a mapabilegko ti pannakigayyemko ken Jehova?’

KASANO A NAGBALIN A GAYYEM NI JEHOVA NI ABRAHAM?

3, 4. (a) Ania ti kadakkelan a pannubok iti pammati ni Abraham? (b) Apay a situtulok ni Abraham a mangisakripisio ken Isaac?

3 Iladawanmo ti maysa a lakay a sumangsang-at iti bantay. Dayta ti karirigatan a panagdaliasat iti biagna. Saan a ti edadna ti makagapu no apay a marigatan iti panagdaliasatna. Mabalin nga agtawen idin ni Abraham iti agarup 125, ngem napigsa pay. [1] Adda agkabannuag a lalaki a sumarsaruno kenkuana a nalabit agtawen iti 25. Isu ni Isaac nga anakna nga agaw-awit iti pagsungrod. Adda awit ni Abraham nga imuko ken pagarun. Kiniddaw ni Jehova kenkuana nga isakripisiona ti anakna!—Gen. 22:1-8.

4 Naipasango ken Abraham ti karirigatan a pannubok iti pammatina. Adda dagiti agkuna a naulpit unay ti Dios idi kiniddawna dayta ken Abraham, ken ibaga met ti dadduma a basta nagtulnog lattan ni Abraham ken saanna nga ipatpateg ti anakna. Ibagada dayta ta awananda iti pammati ken saanda nga ammo no kasano ti panagtignay ti pammati. (1 Cor. 2:14-16) Saan laeng a basta nagtulnog ni Abraham iti Dios. Imbes ketdi, nagtulnog gapu iti makitana. Babaen iti mata ti pudpudno a pammati, nakitana a ti nailangitan nga Amana a ni Jehova, saanna a pulos kiddawen kadagiti matalek nga adipenna a mangaramidda iti banag nga agresulta iti manayon a pagdaksanda. Ammo ni Abraham a no agtulnog ken Jehova, isu ken ti dungdungnguenna nga anak ket bendisionan ti Diosna. Ania ti nakaibatayan dayta a pammati? Pannakaammo ken kapadasan.

5. Kasano a mabalin a naammuan ni Abraham ti maipapan ken Jehova, ken ania ti naitulong kenkuana dayta a pannakaammo?

5 Pannakaammo. Nupay dimmakkel idiay Ur, maysa a siudad dagiti Caldeo a nasaknap ti idolatria, naam-ammo ni Abraham ni Jehova. Kasano a napasamak dayta, aglalo ta maysa nga agdaydayaw iti idolo ti amana a ni Tare? (Jos. 24:2) Awan ti direkta a sungbat ti Biblia, ngem ipakitana a ni Abraham ti maikasiam a henerasion iti linia ni Sem, maysa kadagiti annak ni Noe nga addaan iti nabileg a pammati. Nagbiag ni Sem agingga nga agtawen ni Abraham iti 150. Saantayo a masigurado no naammuan ni Abraham ken Sem ti maipapan ken Jehova. Nupay kasta, mabalin a maikunatayo nga inyallatiw ni Sem iti pamiliana ti naammuanna maipapan ken Jehova. Aniaman ti makagapu, dimmanon dayta a pannakaammo ken Abraham ken natignay ti pusona. Inayatna ti Dios a naam-ammona, ket dayta a pannakaammo ti nangpabileg iti pammatina.

6, 7. Kasano a napabileg ti pammati ni Abraham gapu kadagiti kapadasanna?

6 Kapadasan. Kasano a naaddaan ni Abraham iti kapadasan a nangpabileg iti pammatina ken Jehova? Kas ti kuna ti dadduma, pampanunot ti mangtignay iti rikrikna ken dagiti rikrikna ti mangiturong iti panagtignay. Dagiti nasursuro ni Abraham maipapan iti Dios ti nangtignay kenkuana a maaddaan iti nauneg a panagraem ken “Jehova a Kangatuan a Dios, Namataud iti langit ken daga.” (Gen. 14:22) Awagan ti Biblia dayta a rikrikna kas ‘nadiosan a panagbuteng,’ ket napateg dayta iti nasinged a pannakigayyem iti Dios. (Heb. 5:7; Sal. 25:14) Dayta a nadiosan a panagbuteng ti nangtignay ken Abraham.

7 Imbilin ti Dios kada Abraham ken Sara a panawanda ti Ur ken umakarda iti ganggannaet a lugar. Agnaedda kadagiti tolda iti amin a panagbiagda. Gapu iti panagtulnogna,  binendisionan ken sinalakniban ni Jehova ni Abraham. Kas pagarigan, mabuteng ni Abraham nga isu ket papatayenda, kalpasanna, alaenda ti napintas nga asawana a ni Sara. Pudno dagiti panagamakna, ngem dina impalubos a dagita ti manglapped kenkuana nga agtulnog ken Jehova. Saan laeng a naminsan a bimmallaet ni Jehova ket simimilagro a sinalaknibanna da Abraham ken Sara. (Gen. 12:10-20; 20:2-7, 10-12, 17, 18) Dagita a kapadasan ti nangpabileg iti pammati ni Abraham.

8. Kasano a maaddaantayo iti pannakaammo ken kapadasan a mangpabileg iti pannakigayyemtayo ken Jehova?

8 Mabalin kadi a makigayyemtayo met ken Jehova? Mabalin! Ti kasapulan a pannakaammo ken kapadasan ket magun-odantayo. Bassit laeng idi ti ammo ni Abraham iti nakaad-adu a sirib a linaon ita ti Biblia. (Dan. 12:4; Roma 11:33) Napno ti Biblia iti gameng a mabalin a mangpauneg iti pannakaammotayo maipapan iti “Namataud iti langit ken daga” ken makatulong kadatayo a mangraem ken mangayat kenkuana. Tignayennatayo dayta a rikrikna nga agtulnog iti Dios. Gapuna, maaddaantayo iti kapadasan gapu ta makitatayo dagiti pagsayaatan ti panagtulnog kenkuana. Makitatayo a mangsalaknib dagiti balakadna ken bendisionan ken pabilgennatayo. Maammuantayo a ti naimpusuan a panagserbi iti Dios ket mangyeg iti pannakapnek, talna, ken ragsak. (Sal. 34:8; Prov. 10:22) Bayat nga umad-adu ti pannakaammo ken kapadasantayo, bumileg met ti pammatitayo ken Jehova ken ti pannakigayyemtayo kenkuana.

KASANO A TINAGINAYON NI ABRAHAM TI PANNAKIGAYYEMNA ITI DIOS?

9, 10. (a) Ania ti kasapulan tapno bumileg ti panaggayyem? (b) Ania ti mangipakita nga impateg ken pinabileg ni Abraham ti pannakigayyemna ken Jehova?

9 Ti pannakigayyem ket mayarig iti nagpateg a gameng. (Basaen ti Proverbio 17:17.) Nupay kasta, ti pannakigayyem ket saan a kas iti maysa a banag a mabalinmo a gatangen sa idulin ket matapokan laeng. Ti pannakigayyem ket mayarig iti maysa a nabiag a banag a masapul nga aywanan ken masibugan tapno agbiag ken dumakkel. Impateg ken tinaginayon ni Abraham ti pannakigayyemna ken Jehova. Kasano?

10 Saan a pinanunot ni Abraham nga umdasen ti sigud a panagbuteng ken panagtulnogna iti Dios. Idi agdaldaliasat a kaduana ti sangakabbalayanna nga agturong idiay Canaan, intultuloyna ti nagpaiwanwan ken Jehova iti panangaramidna kadagiti desision, babassit man wenno dadakkel. Makatawen sakbay a mayanak ni Isaac, idi agtawenen ni Abraham iti 99, imbilin ni Jehova a makugit amin a lallaki iti sangakabbalayan ni Abraham. Kinuestionaran kadi ni Abraham dayta wenno nagpambar tapno saan nga agtungpal? Saan, nagtalek iti Dios ken nagtulnog iti ‘daydi met laeng nga aldaw.’—Gen. 17:10-14, 23.

11. Apay a maseknan ni Abraham iti Sodoma ken Gomorra, ket kasano a tinulongan ni Jehova?

 11 Gapu ta inyugalina ti agtulnog ken Jehova uray kadagiti babassit a banag, nataginayon ni Abraham a nasayaat ken bumilbileg ti pannakigayyemna iti Dios. Sibubulos nga inyebkasna ken Jehova dagiti pakaseknanna, ket nagpatulong idi adda dagiti narigat a saludsodna. Kas pagarigan, idi naammuanna a dadaelen ti Dios dagiti siudad ti Sodoma ken Gomorra, maseknan ni Abraham kadagiti nalinteg a tattao a mabalin a mairaman iti pannakadadael dagiti managdakdakes. Mabalin a madanagan ni Abraham iti kaanakanna a ni Lot ken ti pamiliana nga agnanaed idi idiay Sodoma. Addaan iti panagtalek ken sipapakumbaba a nagsaludsod ni Abraham iti Dios, ti “Ukom ti intero a daga.” Siaanus nga insuro ni Jehova ken Abraham ti kinamanangngaasina, a mabasana ti puso ken makitana dagiti nalinteg tapno isalakanna, uray iti tiempo a mangukom.—Gen. 18:22-33.

12, 13. (a) Kasano a ti pannakaammo ken kapadasan ni Abraham nakatulong kenkuana idi agangay? (b) Ania ti mangipakita nga adda panagtalek ni Abraham ken Jehova?

12 Awan duadua nga amin a pannakaammo ken kapadasan ni Abraham ket nakatulong kenkuana a mangtaginayon iti nasinged a pannakigayyemna ken Jehova. Idi agangay, idi naipasango iti narigat a pannubok—idi kiniddaw ni Jehova nga idatonna ti anakna a ni Isaac—napanunot ni Abraham no ania a kita a Persona ti nailangitan a Gayyemna. Subliantayo ti matalek a lalaki a sumangsang-at iti bantay idiay Moria. Pinanunotna kadi nga agbaliw lattan ken agbalin a naulpit ken awanan asi ni Jehova? Imposible a mapanunot dayta ni Abraham! Kasano nga ammotayo?

13 Sakbay a simmina kadagiti adipen a kimmuyog kadakuada, kinuna ni Abraham: “Agyankayo ditoy agraman ti asno, ngem siak ken ti ubing kayatmi ti mapan sadiay ket agdayawkami ket agsublikami kadakayo.” (Gen. 22:5) Ania ti kayat a sawen ni Abraham? Agul-ulbod kadi kadagiti adipenna, nga ibagbagana nga agsubli ni Isaac uray ammona a maidaton? Saan. Mangted ti Biblia iti pamalatpatan no ania ti pampanunoten ni Abraham. (Basaen ti Hebreo 11:19.) Pinanunot ni Abraham a “kabaelan ti Dios nga ibangon [ni Isaac] uray pay manipud kadagiti natay.” Wen, mamati ni Abraham iti panagungar. Ammona nga insubli ni Jehova ti kabaelanda ken Sara a maaddaan iti anak uray nataengandan. (Heb. 11:11, 12, 18) Ammo ni Abraham nga awan ti imposible ken Jehova. Agtalek nga aniaman ti mapasamak iti daydi a narigat nga aldaw, agungar met laeng ti anakna tapno matungpal ti amin a kari ni Jehova. Gapuna, naawagan ni Abraham nga “ama dagidiay amin nga addaan iti pammati”!

14. Ania dagiti pannubok a pakaipaspasanguam iti panagserbim ken Jehova, ket kasano a makatulong kenka ti ulidan ni Abraham?

14 Datayo ngay? Agpayso a saanen a kiddawen ti Dios kadatayo ti kiniddawna ken Abraham. Ngem kidkiddawenna kadatayo nga  agtulnogtayo kenkuana uray no marigatantayo a mangtungpal kadagiti bilinna wenno saantayo matarusan ti rason no apay nga aramidentayo dagita. Adda kadi mapanunotmo a kiddaw ti Dios kenka a marigatanka a mangtungpal? Adu ti marigatan a mangasaba. Mabalin a managbabainda isu a marigatanda a mangasaba kadagiti saanda nga am-ammo. Narigat met para iti dadduma ti agbalin a naiduma idiay eskuelaan wenno pagtrabahuan. (Ex. 23:2; 1 Tes. 2:2) Mariknam kadi a kaslaka ken Abraham, a kasla sumangsang-atka met iti bantay idiay Moria nga adda narigat a banag a kasla dimo kabaelan a sanguen? No kasta ti mariknam, tuladem ti pammati ken tured ni Abraham! No utobentayo ti ulidan dagiti matalek a lallaki ken babbai, matignaytayo a mangtulad kadakuada ken matignaytayo a suminged ken Jehova kas Gayyemtayo.—Heb. 12:1, 2.

PANNAKIGAYYEM A MANGYEG ITI BENDISION

15. Apay a masiguradotayo a saan a pulos nagbabawyan ni Abraham ti matalek a panagtulnogna ken Jehova?

15 Panagkunam, nagbabawyan ngata ni Abraham ti matalek a panagtulnogna ken Jehova? Kuna ti Biblia maipapan iti ngudo ti biagna: “Nauyos ti biag ni Abraham ket natay iti naimbag a kinalakay, lakay ken napneken.” (Gen. 25:8) Kimmapuy ni Abraham idi agtawenen iti 175, ngem napnek a nanglagip iti nagsayaat a biagna—biag a naipamaysa iti pannakigayyemna ken Jehova a Dios. Nupay kasta, no mabasatayo a “lakay ken napneken” ni Abraham, saanna a kayat a sawen nga umdasen kenkuana ti biagna ket awanen ti tarigagayna nga agbiag iti masanguanan.

16. Anianto dagiti pakaragsakan ni Abraham idiay Paraiso?

16 Ibaga ti Biblia maipapan ken Abraham: “Inur-urayna ti siudad nga addaan kadagiti pudpudno a pamuon, a ti nangibangon ken nangaramid iti dayta a siudad isu ti Dios.” (Heb. 11:10) Namati ni Abraham nga addanto aldaw a makitana dayta a siudad, ti Pagarian ti Dios nga agturturayen ditoy daga—ket talaga a makitananto dayta! Mailadawanmo kadi ti ragsak ni Abraham nga agbiag iti Paraiso a daga ken itultuloyna a pabpabilgen ti pannakigayyemna iti Dios? Maragsakanto a makaammo a nakatulong ti ulidan ti pammatina kadagiti adipen ni Jehova rinibu a tawen kalpasan ti ipapatayna! Idiay Paraiso, maammuannanto pay a ti pannakaisubli ni Isaac kenkuana ket adda ‘inladawanna’ a dakdakkel a banag. (Heb. 11:19) Maammuannanto pay a ti saem a nariknana idi isagsaganana nga idaton ni Isaac ket nakatulong iti minilion a matalek a tattao tapno mailadawanda ti saem a narikna ni Jehova idi intedna kas subbot ti Anakna a ni Jesu-Kristo. (Juan 3:16) Ti ulidan ni Abraham ti tumulong kadatayo tapno ad-adda pay nga apresiarentayo ti subbot, ti kadakkelan nga ebkas ti ayat iti intero a pakasaritaan ti tao.

17. Ania ti determinasionmo, ken ania ti usigentayo iti sumaruno nga artikulo?

17 Determinadotayo koma a mangtulad iti pammati ni Abraham. Bayat nga ad-adda a maam-ammotayo ni Jehova, mangar-aramidtayo iti nasayaat a pakalaglagipan ti kinamatalektayo kenkuana ken maaddaantayo iti ad-adu a kapadasan a mainaig kadagiti gunggona ti matalek a panagserbitayo kenkuana. (Basaen ti Hebreo 6:10-12.) Agnanayon koma a Gayyemtayo ni Jehova! Iti sumaruno nga artikulo, usigentayo ti tallo pay nga ulidan dagiti matalek a tattao a nagbalin a nasinged a gagayyem ti Dios.

^ [1] (parapo 3) Naawagan idi iti Abram ken Sarai dagitoy nga agassawa, ngem iti daytoy nga artikulo, mausar ti impanagan kadakuada ni Jehova idi agangay—Abraham ken Sara.