Mapan iti linaonna

Mapan iti listaan dagiti linaonna

Dagiti Sirmata ni Zacarias—Ti Epektoda Kenka

Dagiti Sirmata ni Zacarias—Ti Epektoda Kenka

“Agsublikayo kaniak, . . . ket agsubliakto kadakayo.”—ZAC. 1:3.

KANTA: 120, 117

1-3. (a) Ania ti kasasaad ti ili ti Dios idi nangrugi nga agipadto ni Zacarias? (b) Apay nga imbaga ni Jehova iti ilina nga agsublida kenkuana?

AGTAYTAYAB a lukot, babai nga adda iti uneg ti maysa a pagkargaan, ken dua a babbai nga agtaytayab nga addaan iti payak a kas kadagiti tikbaboy. Masarakan dagita a nakaskasdaaw a panangiladawan iti libro ni Zacarias. (Zac. 5:1, 7-9) Apay nga impakita ni Jehova iti propetana dagitoy a naisangsangayan a sirmata? Ania ti kasasaad dagiti Israelita iti daydi a tiempo? Ania ti epektona kadatayo ita dagiti sirmata ni Zacarias?

2 Maysa a nakaragragsak a tiempo para iti dedikado nga ili ni Jehova ti tawen 537 B.C.E. Nawayawayaanda kalpasan ti 70 a tawen a pannakaadipenda iti Babilonia. Kasta unay idi ti ragsakda isu nga inkagumaanda nga isubli ti pudno a panagdaydayaw idiay Jerusalem. Idi 536 B.C.E., naipasdek ti pundasion ti templo. Iti dayta a panawen, “agpukpukkaw idi dagiti umili buyogen ti natbag a dir-i, ket ti met laeng uni nangngeg uray pay agingga iti adayo unay.” (Esd. 3:10-13) Ngem di nagbayag, adda dagiti bimmusor iti  trabaho a panagibangon. Gapuna, naupay dagiti umili kadagiti karit ken pakarigatan isu nga insardengda nga ibangon ti templo. Inasikasoda ketdi dagiti balay ken kaubasanda. Kalpasan ti 16 a tawen, saan latta a naituloy a maibangon ti templo. Masapul a mapalagipan ti ili ti Dios a rumbeng nga agsublida ken Jehova ken isardengda nga ipangpangruna dagiti personal a pagimbaganda. Kayat ni Jehova nga agsublida kenkuana, nga ituloyda ti natured ken naimpusuan a panagserbida.

3 Tapno maipalagip kadakuada no apay a nawayawayaanda iti Babilonia, imbaon ti Dios ni propeta Zacarias idi 520 B.C.E. Mabalin a naipalagip kadakuada ti nagpateg a kinapudno ta ti nagan a Zacarias kaipapananna ti “Linagip ni Jehova.” Nupay nalipatanda ti panangisalakan ni Jehova, linagip latta ti Dios ti ilina. (Basaen ti Zacarias 1:3, 4.) Siaayat nga impanamnamana kadakuada a tulonganna ida a mangisubli iti pudno a panagdaydayaw, ngem pinakdaaranna met ida a saanna nga awaten ti di naimpusuan a panagdayaw. Kitaentayo no kasano a tinignay ida ni Jehova babaen ti maikanem ken maikapito a sirmata ni Zacarias. Ania met ti masursurotayo ita iti daytoy?

DUSAEN TI DIOS DAGITI AGTAKAW

4. Ania ti maikanem a nasirmata ni Zacarias, ket ania ti ipamatmat ti agsumbangir a pannakasurat ti lukot? (Kitaen ti ladawan 1 iti rugi ti artikulo.)

4 Mangrugi ti kapitulo 5 ti Zacarias iti naidumduma a sirmata. (Basaen ti Zacarias 5:1, 2.) Nasirmata ni Zacarias ti agtaytayab a lukot nga agarup 9 a metro ti kaatiddogna ken 4.5 a metro ti kaakabana! Nakaukrad ken nakasagana a mabasa dayta. Nailanad iti agsumbangir dayta ti mensahe ti panangukom. (Zac. 5:3) Gagangay a saan nga agsinnumbangir a masuratan ti lukot. Gapuna, nalawag a nadagsen ken serioso ti mensahe a linaon daytoy a lukot.

Awan ti lugarna kadagiti Kristiano ti aniaman a kita ti panagtakaw (Kitaen ti parapo 5-7)

5, 6. Ania ti panangmatmat ni Jehova iti amin a kita ti panagtakaw?

5 Basaen ti Zacarias 5:3, 4. Nupay manungsungbat ken Jehova ti amin a tao, ad-adda pay ti ilina. Ammo dagiti mangay-ayat iti Dios a ti panagtakaw ket pakaibabainan ti nagan ti Diosda. (Prov. 30:8, 9) Aniaman ti motibo ti nagtakaw wenno uray kasla mabalin a mapakawan gapu iti kasasaadna, ad-adda nga impangpangrunana ti kinaagum ngem iti Dios ta nalabes ti panangipategna iti material. Tagtagibassitenna ti linteg ti Dios, ken saanna nga ikankano wenno awan panagraemna ken Jehova ken iti naganna.

6 Nadlawyo kadi nga iti Zacarias 5:3, 4, “ti lunod . . . sumrek iti balay ti mannanakaw ken . . . agdagus iti tengnga ti balayna ket talipuposenna dayta”? Saan a malapdan ti rehas ken kandado ti panangukom ni Jehova. Sumarut iti aniaman a paglemmengan tapno maibutaktak ti basol iti tengnga ti ili ni Jehova. Uray no mailemmeng ti maysa ti panagtakawna manipud kadagiti autoridad, amo, panglakayen, wenno nagannak, saanna a mailemmeng dayta iti Dios, daydiay nangpatalged a maibutaktak ti amin a panagtakaw. (Heb. 4:13) Anian a makapabang-ar ti makikadua kadagiti tattao a “mapagtalkan iti amin a bambanag”!—Heb. 13:18.

7. Kasano a malisiantayo ti lunod ti agtaytayab a lukot?

7 Kagura ni Jehova ti amin a kita ti panagtakaw. Ibilangtayo kas dayaw ti agbiag maitunos iti nangato a moral a pagalagadan ni Jehova babaen ti panangtaginayontayo iti kababalin a saan a mangibabain iti nagan ti Dios. No kasta, mabalin a malisiantayo ti panangukom ni Jehova kadagiti mangigaggagara nga agsukir iti lintegna.

 “INALDAW-ALDAW” A TUNGPALENTAYO TI INKARITAYO

8-10. (a) Ania ti sapata? (b) Ania a sapata ti saan a tinungpal ni Ari Zedekias?

8 Ti mensahe a naisurat iti agtaytayab a lukot pakdaaranna dagidiay ‘siuulbod nga agsapata iti nagan ti Dios.’ (Zac. 5:4) Ti sapata ket maysa a kari a mangpasingked a pudno ti maysa a banag wenno serioso a kari ti maysa a tao a tungpalenna wenno saan ti maysa a banag.

9 Nagdagsen a banag ti agsapata iti nagan ni Jehova. Kasta ti inaramid ti maudi nga ari nga agtugaw iti trono idiay Jerusalem. Nagsapata ni Zedekias iti nagan ni Jehova nga agpasakup ken agbalin a nasungdo iti ari ti Babilonia. Ngem saan a tinungpal ni Zedekias ti insapatana. Kas resultana, inkeddeng ni Jehova ti panangukomna babaen kadagitoy a sasao: “Kas sibibiagak, . . . iti disso ti ari a nangikabil kas ari iti daydiay nangumsi iti sapatana ken nangrakrak iti tulagna, matayto [ni Zedekias] a maikanunong kenkuana iti tengnga ti Babilonia.”—Ezeq. 17:16.

10 Masapul a tinungpal koma ni Ari Zedekias ti sapatana ta nagsapata iti nagan ti Dios. (2 Cron. 36:13) Nupay kasta, nagpatulong iti Egipto tapno mawayawayaan manipud Babilonia, ngem awan nagmamaayan dayta.—Ezeq. 17:11-15, 17, 18.

11, 12. (a) Ania ti kapatgan a sapata a maaramidtayo? (b) Ania koma ti epekto ti dedikasiontayo kadagiti inaldaw nga aktibidadtayo?

11 Denggen met ni Jehova dagiti ikaritayo. Agpaypayso kenkuana dagiti sapatatayo, ket masapul a tungpalentayo dagita tapno magun-odtayo ti paborna. (Sal. 76:11) Ti panagdedikartayo ken Jehova ti kapatgan a karitayo. Ti panagdedikar ket serioso a sapata nga agserbitayo ken Jehova nga awan namnamaentayo a kasukatna.

12 Kasano a mapaneknekantayo a pudno ti sapatatayo a mangidedikar iti biagtayo? Ti reaksiontayo kadagiti pannubok, babassit  man wenno dadakkel, ti mangipakita a napudnotayo iti karitayo nga “inaldaw-aldaw” nga idaydayawtayo ni Jehova. (Sal. 61:8) Kas pagarigan, no adda mangipakita iti saan a serioso a romantiko a rikna kadatayo iti man pagtrabahuan wenno eskuelaan, ibilangtayo kadi dayta a gundaway a mangparagsak ken Jehova babaen ti panangilaksid kadagita? (Prov. 23:26) No saan a Saksi ti dadduma a kapamiliatayo, agpatpatulongtayo kadi ken Jehova tapno maipakitatayo dagiti Nakristianuan a kababalin uray no awan ti kabbalaytayo a mangipakpakita kadagita? Inaldaw kadi nga agkararagtayo iti nailangitan nga Amatayo, nga agyamantayo iti panagayatna ken iti panangyaponna kadatayo iti sidong ti turayna? Iwaywayaantayo kadi ti inaldaw nga agbasa iti Biblia? Saan kadi nga arigna inkaritayo nga aramiden dagita? Masapul nga agtulnogtayo. Ti naan-anay a pannakiramantayo iti panagdaydayaw ti mangipakita nga ay-ayatentayo ni Jehova ken talaga a nagdedikartayo kenkuana. Paset ti biagtayo ti panagdaydayawtayo, banag a saan la a basta annurotentayo. Pagimbagantayo no tungpalentayo ti karitayo. No agmatalektayo, natalgedto ti masakbayantayo.—Deut. 10:12, 13.

13. Ania ti maadaltayo iti maikanem a sirmata ni Zacarias?

13 Makatulong ti maikanem a sirmata ni Zacarias tapno maammuantayo a masapul a saan a makiraman iti aniaman a kita ti panagtakaw wenno agsapata a siuulbod dagiti mangay-ayat ken Jehova. Ammotayo met a nupay adu ti nagbasolan dagiti Israelita, saan ida a binaybay-an ni Jehova. Naawatanna dagiti rigatda idi napalawlawanda kadagiti kabusor. Nagsayaat nga ulidan ni Jehova iti panangtungpal kadagiti karina, ket tulongannatayo a mangtungpal kadagiti karitayo. Matulongannatayo ta impanamnamana a dandanin ikkatenna ti amin a kinadakes iti intero a lubong. Patalgedan ti sumaruno a sirmata ni Zacarias dayta a nagsayaat a namnama.

MAIPAN TI KINADANGKES ITI “UMISO A LUGARNA”

14, 15. (a) Ania ti maikapito a nasirmata ni Zacarias? (Kitaen ti ladawan 2 iti rugi ti artikulo.) (b) Ania ti iladladawan ti babai nga adda iti uneg ti efa, ket apay a naipupok ken naisubli iti pagkargaan?

14 Idi nakita ni Zacarias ti agtaytayab a lukot, kinuna ti anghel kenkuana: ‘Tumangadka.’ Ania ti ipalgak ti maikapito a sirmatana? Makitkitana ti maysa a pagkargaan a maawagan “efa.” (Basaen ti Zacarias 5:5-8.) Kalkalainganna ti kadakkel daytoy a pagkargaan ken addaan iti “nagsirkulo a kalub a buli.” Idi naikkat ti kalubna, nakita ni Zacarias nga adda “babai a situtugaw.” Inlawlawag ti anghel a ti babai iti uneg ti pagkargaan ket “Kinadangkes.” Panunotenyo ti buteng ni Zacarias idi makitana a ginandat ti babai ti rummuar iti nakaipupokanna! Dagus a nagtignay ti anghel, ket insublina ti babai iti pagkargaan ken kinalubanna iti nadagsen a kalub. Ania ti kaipapanan dayta?

15 Isuro daytoy a paset ti sirmata a saan a palubosan ni Jehova ti aniaman a kinadakes iti ilina. Siguraduenna a paksiatenna dayta ken sidadaras nga ikkatenna. (1 Cor. 5:13) Masiguradotayo daytoy babaen ti panangkalub ti anghel iti pagkargaan.

Kanayon nga agaramid ni Jehova iti pamay-an tapno agtalinaed a nadalus ti nasin-aw a panagdaydayaw (Kitaen ti parapo 16-18)

16. (a) Ania ti simmaruno a nakita ni Zacarias a napasamak iti pagkargaan nga efa? (Kitaen ti ladawan 3 iti rugi ti artikulo.) (b) Pangipanan dagiti nagpayak a babbai iti pagkargaan nga efa?

16 Kalpasanna, adda dua a babbai nga addaan iti napigsa a payak a kas iti payak ti tikbaboy. (Basaen ti Zacarias 5:9-11.) Naiduma unay dagita a babbai iti babai nga adda iti pagkargaan! Usaren dagitoy a babbai dagiti payakda a mangitayab iti pagkargaan nga ayan ti “Kinadangkes.” Pangipananda? Ipanda dayta iti “daga ti Sinar,” wenno Babilonia. Ngem apay nga ipanda iti Babilonia?

17, 18. (a) Apay a ti Sinar ti ‘umiso a lugar’ a pakaipanan ti “Kinadangkes”? (b) Ania koma ti determinasiontayo mainaig iti kinadangkes?

 17 Para kadagiti Israelita idi kaaldawan ni Zacarias, maitutop ti Sinar a lugar a pakaipanan ti Kinadangkes. Patalgedan ni Zacarias ken dagiti padana a Judio nga idi kaaldawanda, ti Babilonia ti lugar ti kinadakes. Gapu ta dimmakkelda iti siudad a narugit ken agdaydayaw kadagiti idolo, masapul idi nga inaldaw a labananda ti espiritu daydi a pagano a lubong. Talaga a makapabang-ar kadakuada daytoy a sirmata—pammatalged a taginayonen ni Jehova a nadalus ti nasin-aw a panagdaydayaw!

18 Nupay kasta, impalagip met ti sirmata kadagiti Judio a responsabilidadda a taginayonen a nadalus ti panagdaydayawda. Saan a kabaelan ken saan a mapalubosan a sumrek ken agnaed iti ili ti Dios ti kinadakes. Idi simrektayo iti natalged, naayat, ken nadalus nga organisasion ti Dios, addaantayon iti responsabilidad a mangmantener iti dayta. Kayattayo kadi a kanayon a nadalus ti “balaytayo”? Awan ti lugar ti kinadakes iti naespirituan a paraisotayo.

TI NADALUS NGA ILI IDAYDAYAWNA NI JEHOVA

19. Ania ti epektona kadatayo ita dagiti naisangsangayan a sirmata ni Zacarias?

19 Serioso a pakdaar kadagiti agar-aramid iti dakes ti maikanem ken maikapito a sirmata ni Zacarias. Ipalagip dayta a saan nga ipalubos ni Jehova nga agtultuloy ti kinadakes. Iti biang dagiti pudno nga agdaydayaw, masapul a talaga a guraenda ti kinadakes. Naayat met a pammatalged manipud iti nailangitan nga Amatayo dagitoy a salaysay. No ikagumaantayo a gun-oden ti pabor ken pannalaknib ti Dios, saantayo a mapasaran ti makapapatay a lunod. Imbes ketdi, maragsakan ni Jehova a mangbendision kadatayo. Pagimbagantayo ti amin a panangikagumaantayo nga agtalinaed a nadalus iti lubong a napno iti kinadakes. Masiguradotayo nga agballigitayo babaen ti tulong ni Jehova! Ngem kasano a masiguradotayo nga agtalinaed ti pudno a panagdaydayaw iti lubong a napno iti kinadakes? Ania ti pammatalged a salakniban ni Jehova ti organisasionna bayat nga umad-adanin ti dakkel a rigat? Masungbatan dagita a saludsod iti sumaruno nga artikulo.