Mapan iti linaonna

Mapan iti listaan dagiti linaonna

 PAKASARITAAN TI BIAG

Mabendisionan Dagiti Mangaramid iti Kidkiddawen ni Jehova

Mabendisionan Dagiti Mangaramid iti Kidkiddawen ni Jehova

“Dakamin!” Kasta ti insungbatmi ken lakayko, ken ti kabsatko ken ti baketna, iti awis para iti maysa nga annongen. Apay nga inawatmi dayta, ken kasano a binendisionannakami ni Jehova? Sakbayna, estoriaek pay nga umuna ti biagko.

NAYANAKAK idi 1923 idiay Hemsworth, Yorkshire, England. Adda maysa a kabsatko, ni Manong Bob. Kagurgura idi ni tatangko dagiti aginsisingpet a relihion. Idi agtawenak iti siam, naaddaan ni tatangko kadagiti libro a mangibutbutaktak iti ulbod a relihion. Nagustuanna dagiti nabasana. Kalpasan ti mano a tawen, immay ni Bob Atkinson iti balaymi ket impangngegna iti ponograpo ti maysa a palawag ni Brother Rutherford. Naammuanmi a dayta met laeng a grupo ti nangipablaak kadagiti libro nga adda ken Tatang! Imbaga dagiti nagannakko nga inaldaw a mangrabii iti balaymi ni Brother Atkinson ket sungbatanna ti adu a saludsodmi maipapan iti Biblia. Naawiskami a makigimong iti balay ti maysa a kabsat a sumagmamano a kilometro ti kaadayona. Pinatganmi a dagus dayta, ket nabukel ti bassit a kongregasion iti Hemsworth. Idi agangay, agdagusen dagiti zone servant (manangaywan iti sirkito itan) iti balaymi ket agawiskami kadagiti payunir nga umay makipangan. Dakkel ti naitulong kaniak ti pannakikadkaduak kadakuada.

Adda idi negosiomi, ngem kinuna ni Tatang ken manongko, “No kayatmo ti agpayunir, iserratayo daytoy.” Immanamong ni manongko, ket nagpayunir iti sabali a lugar idi agtawen iti 21. Dua a tawen kalpasanna, nagpayunirak idi agtawenak iti 16. Masansan idi nga agmaymaysaak a mangasaba malaksid no ngudo ti lawas. Agus-usarak idi iti testimony card ken ponograpo. Ngem binendisionannak ni Jehova iti iyad-adalan iti Biblia a nagsayaat ti panagrang-ayna. Adu a kapamiliana ti nagbalin a Saksi. Iti simmaruno a tawen, nadutokankami ken Mary Henshall kas special pioneer. Naibaonkami iti di maas-asak a teritoria idiay Cheshire.

Idi madama ti Gubat Sangalubongan II, naibilin kadagiti babbai a tumulongda iti gubat. Kas special pioneer, namnamaenmi a saankami a makiraman a kas iti dadduma a ministro ti relihion. Ngem saan nga immanamong ti korte isu a  nasentensiaanak a maibalud iti 31 nga aldaw. Iti simmaruno a tawen, idi agtawenak iti 19, nagpalistaak a saan nga agsoldado. Naidarumak iti dua a korte ngem naabsueltoak. Kadagitoy a kapadasak, ammok a tultulongannak ti nasantuan nga espiritu ken ig-iggaman ni Jehova ti imak tapno tumibker ken pumigsaak.—Isa. 41:10, 13.

KABBARO A KADUA

Nagam-ammokami ken Arthur Matthews idi 1946. Kalpasan ti tallo a bulan a pannakaibaludna gapu ta saanna a kayat ti agsoldado, kinaduana ti special pioneer a kabsatna a ni Dennis idiay Hemsworth. Insuro kadakuada ni tatangda ti maipapan ken Jehova manipud pay kinaubingda ket nabautisaranda idi tin-edyerda. Di nagbayag, naibaon ni Dennis idiay Ireland isu nga agmaymaysan ni Arthur. Nagustuan dagiti nagannakko ti kinagaget ken ugali daytoy a baro isu nga inawisda a makipagyan kadakuada. No agaw-awidak, dakami idi ken Arthur ti manginnaw kadagiti nangananmi. Idi kuan, nagsinsinnuratkamin. Idi 1948, nasentensiaan manen a maibalud ni Arthur iti tallo a bulan. Nagkasarkami idi Enero 1949 ken kayatmi ti agtultuloy nga agserbi iti amin-tiempo. Babaen ti tulong ni Jehova ken babaen ti panagplano, inusarmi dagiti bakasionmi nga agburas iti prutas tapno adda kuartami, ket makapagtultuloykami a payunir.

Idiay Hemsworth di unay nagbayag kalpasan ti kasarmi idi 1949

Kalpasan laeng ti makatawen, naibaonkami idiay Northern Ireland. Idi damo, idiay Armagh, sa idiay Newry. Katoliko ti kaaduan nga umili kadagita a lugar. Delikado ti lugar, ken masapul a naannadkami ken mannakaawatkami no makisaritakami kadagiti tattao. Aggigimongkami idi iti balay ti agassawa a kabsat, a 16 a kilometro ti kaadayona. Walokami idi nga aggigimong. No umyankami sadiay, maturogkami iti datar ken kabigatanna, nakaim-imas ti pammigatmi. Makaparagsak ta adun ti Saksi sadiay.

“DAKAMIN!”

Special pioneer idin ni manongko ken ti asawana a ni Lottie idiay Northern Ireland. Idi 1952, nagkombensionkami nga uppat idiay Belfast ket sinangailinakami a naimbag ti maysa a kabsat. Kaduami idi ni Pryce Hughes, a branch servant idi idiay Britain. Maysa a rabii, nagsasaritaanmi ti pannakairuar ti bokleta a God’s Way Is Love, a naaramid a nangnangruna para kadagiti taga-Ireland. Nayestoria ni Brother Hughes ti rigat ti panangasaba kadagiti Katoliko a taga-Ireland. Mapagtaltalaw idi dagiti kakabsat iti pagdagusanda ken kabkabilen ida dagiti tattao gapu iti panangsugsog dagiti papadi. Kinuna ni Pryce: “Kasapulanmi ti agassawa nga adda luganna a makiraman iti espesial a kampania a panangibunong iti bokleta iti intero a pagilian.” * Insungbatmi a dagus, “Dakamin!” Isu dayta ti adda iti rugi ti estoria.

Kaduami dagiti payunir a nakalugan iti tricycle

 Nawaya idi dagiti payunir nga agyan iti balay ti nabayagen a matalek a sister idiay Dublin a ni Ma Rutland. Idi nakipagyankami sadiay ken idi inlakomin ti dadduma a sanikuami, naglugankami nga uppat iti tricycle ni Manong Bob ket nagsapulkami iti lugan a gatangenmi. Nakabirokkami iti segunda mano a lugan ket imbagami iti makinkukua nga ipanna dayta iti dagusmi ta saanmi nga ammo ti agmaneho. Karabiyanna, nagtugaw ni Arthur iti katre, ket agikamkambio kampay idi. Kabigatanna, iruarna koman ti lugan iti garahe idi simmangpet ti misionera a ni Mildred Willett (ti nagbalin nga asawa ni John Barr). Ammona ti agmaneho ket sinuruanna ni Arthur. Bassit laengen a praktis, nakasaganakamin a mapan!

Ti luganmi ken ti bagonmi

Ita, kasapulanmin ti pagdagusan. Napakdaarankami a saankami nga agyan iti bagon ta amangan no puoran dagiti bumusbusor, isu a nagsapulkami iti balay, ngem awan nabirokanmi. Naturogkami iti lugan iti dayta a rabii. Kabigatanna, adda bassit a bagon a nasarakanmi nga adda dua a babassit a katrena. Dayta ti nagbalin a balaymi. Imbag laengen ta impalubos dagiti nasisingpet a mannalon nga iparadami iti loteda ti bagonmi. Mangasabakami iti 16 agingga iti 24 a kilometro. Inton makaadayokamin, sublianmi dagiti tattao iti lugar a nangibatianmi iti bagon.

Nagsayaat ti panangasabami iti amin a balay iti makin-abagatan a daya ti pagilian, ket nakaipaimakami iti nasurok a 20,000 a bokleta sa intedmi iti sanga nga opisina idiay Britain ti nagan dagiti interesado. Makaparagsak ta ginasgasut itan ti Saksi sadiay!

PANAGSUBLI ITI ENGLAND, SA ITI SCOTLAND

Idi agangay, naibaonkami iti makin-abagatan a paset ti London. Kalpasan ti sumagmamano a lawas, ti sanga nga opisina iti Britain inawaganna ni Arthur tapno agserbi kas manangaywan iti sirkito kabigatanna! Kalpasan ti makalawas a panagsanay, napankamin iti sirkitomi idiay Scotland. Awanen ti tiempo ni Arthur a mangisagana kadagiti palawagna, ngem naparegtaak ta kanayon a nakasagana a mangsango kadagiti karit iti panagserbi ken Jehova. Nakaragragsakkami a nagserbi iti sirkito. Nagserbikami iti sumagmamano a tawen iti di unay maas-asak a teritoria, ket makaparagsak ta nakaad-adu itan ti kakabsat kadagita a lugar.

Idi 1962, naawis ni Arthur nga agadal iti sangapulo a bulan iti Gilead School isu a dakkel dayta a desisionanmi. Nagdesisionkami nga awaten ni Arthur daytoy a pribilehio uray no agbatiak. Gapu ta awan ti kaduak, nagawidak idiay Hemsworth kas special pioneer. Idi nagsublin ni Arthur kalpasan ti makatawen, naibaonkami nga agserbi iti distrito a mangsakup iti Scotland, makin-amianan nga England, ken Northern Ireland.

BARO NGA ANNONGEN ITI IRELAND

Idi 1964, nakaawat ni Arthur iti baro a pribilehio kas branch servant iti Irish Republic.  Magusgustuanmi idi ti pribilehiomi isu a maamakak idi damo iti daytoy a panagbalbaliw. No subliak ti napalabas, maragsakanak ta naaddaanak iti gundaway nga agserbi iti Bethel. Mamatiak a no awatem ti maysa nga annongen uray no kasla saanmo a kayat nga aramiden, kanayon a bendisionannaka ni Jehova. Nagtrabahoak idi iti opisina, nagikarton kadagiti literatura, naglutluto, ken nagdalus. Napadasanmi met ti nagserbi iti distrito ket adu a kakabsat ti naam-ammomi iti intero a pagilian. Dagita ken ti pannakakitami iti panagrang-ay dagiti iyad-adalanmi ti nangpatibker iti relasionmi iti naespirituan a pamiliami iti Ireland. Nagsayaat a bendision dayta!

NAGBALBALIW TI PAKASARITAAN TI ORGANISASION ITI IRELAND

Idi 1965, naangay ti umuna a kombension idiay Dublin, Ireland. * Nakaro idi ti ibubusor ngem nagballigi latta ti kombension. Adda 3,948 a nakikombension, ken 65 ti nabautisaran. Nakaawat iti surat ti panagyaman ti amin a nagdagusan ti 3,500 a nakikombension a naggapu iti sabali a pagilian. Pinadayawan ida dagiti nangpadagus kadakuada gapu iti kinasingpetda. Dayta ti nangrugian ti dakkel a panagbalbaliw iti Ireland.

Kabkablaawan ni Arthur ni Nathan Knorr idi simmangpet para iti 1965 a kombension

Idi inruar ni Arthur ti My Book of Bible Stories iti lengguahe a Gaelic idi 1983

Idi 1966, ti sanga nga opisina ti Dublin ti mangimatmatonen iti amianan ken abagatan nga Ireland—naiduma unay dayta iti kasasaad ti politika ken relihion iti isla. Naragsakankami a nakakita kadagiti Katoliko a simrek iti kinapudno ken nagserbi a kadua dagiti dati a Protestante.

DAKKEL A PANAGBALBALIW ITI ANNONGEN

Namimpinsan a nagbaliw ti biagmi idi 2011 idi nagtipon ti sanga nga opisina ti Britain ken Ireland sa naipankami idiay London Bethel. Napasamak dayta idi adda probleman ti salun-at ni Arthur. Naammuan nga adda Parkinson’s disease-na. Idi Mayo 20, 2015, natay ti asawak a nakaduak iti 66 a tawen.

Nakaro ti ladingitko kadagiti naglabas a tawen. Kanayon idi nga adda ni Arthur a tumulong kaniak. Kailiwko la unayen! Ngem no mapadasam ti kastoy, ad-adda a sumingedka ken Jehova! Makaparagsak met a maammuan nga ipatpateg dagiti kakabsat ni Arthur. Nakaawatak kadagiti surat manipud kadagiti gagayyem iti Ireland, Britain, ken uray idiay United States. Nagdakkel ti naitulong kaniak dagitoy a surat ken ti pammaregta ti kabsat ni Arthur a ni Dennis, ti asawana a ni Mavis, ken dagiti kaanakak a da Ruth ken Judy.

Naliwliwaak la unay iti Isaias 30:18. Kunana: “Ni Jehova mangin-inanamanto a maipaayannakayo iti parabur, ket ngarud isu tumakderto tapno ipakitaannakayo iti asi. Ta ni Jehova maysa a Dios ti panangukom. Naragsak amin dagidiay mangin-inanama kenkuana.” Talaga a naliwliwaak a makaammo nga agan-anus ni Jehova nga agur-uray tapno solusionanna dagiti bambanag ken tapno ikkannatayo kadagiti kabbaro a pribilehio iti baro a lubongna.

No subliak ti napalabas, makitak nga inturong ken binendisionan ni Jehova ti trabaho iti Ireland! Naragsakak nga adda bassit a naitulongko iti dayta a naespirituan a panagrang-ay. Talaga a kanayon a mabendisionan dagiti mangaramid iti kidkiddawen ni Jehova.

^ par. 12 Kitaen ti 1988 Yearbook of Jehovah’s Witnesses, p. 101-102.

^ par. 22 Kitaen ti 1988 a Yearbook, p. 109-112.